| ELENCO SERVIZI |


 



Le nove Galerie de Trieste

(testo de Massimo - foto de Giuliano)

- clichè su le foto per ingrandirle -

 

Dopo tanti ani de polemiche, progeti, fa e disfa e nosepol. finalemente xe partida la costruzion de 'sto benedeto colegamento autostradale tra Catinara e Padriciano, quel tocheto de strada mancante che costrenzi i autisti a strozarse zo per la vecia camionale passando pe'l famigerato bivio H fin soto la galeria de Catinara per po tornar in autostrada dopo aver traversà un pericoloso incrocio.

Più de venti ani xe passadi da quando la cosideta Grande Viabilità ga circondà Trieste de una autostrada a discapito de grote, castelieri e de monumenti come la Tore del Lloyd! El tuto reso quasi inutile da la mancanza de un tocheto de autostrada che no se podeva mai far.

Ma bando a le polemiche, finalmente sta strada se fa e qua ve proponemo le foto de l'inizio dei scavi per quele galerie che da soto la Strada di Fiume (trato Strada per Basovizza - Strada per Mocò) le se sburterà per zinque chilometri soto el monte per sbucar a Padriciano là de l'Area de Ricerca.

Le due galerie no gaverà limitazioni de trafico, sarà un normale trato de autostrada a due corsie per ogni senso de marcia più la corsia de emergenza e el transito par che sarà gratis, in barba ai austriaci che per farte passar le do Galerie dei Tauri (a due sole corsie una per ogni senso de marcia) i te fa pagar el pedagio oltre a quanto za se paga per l'autostrada, senò gira i tachi e rampighite su pei monti!

 

 

Qua semo difronte le costruende galerie, dopo Catinara, in fin de Longera. La ringhiera rossa sora le galerie delimita la Strada di Fiume che vien zo da l'incrocio con Strada per Basovizza. Poco più a destra de la foto xe la curva, che prosegui verso Catinara dove xe la vecia colona de la Chiusa de San Giuseppe. Difati se no se fa la curva se va driti zo per San Giuseppe, Moccò, Bagnoli fin San Dorligo.

 

Eco l'imbocadura dei tunel, afascinante no?

 

Curiosa la statueta inserida su la somità de l'arcada de una de le due galerie: xe una riproduzion de Santa Barbara, protetrice de chi lavora coi esplosivi e de chi lavora soto tera:

 

 

Trieste, luglio 2004

a cura de Massimo e Giuliano

per TuttoTrieste.net

 

 

 

 


| ELENCO SERVIZI |