Pino Peschechera

Amore e nostalgia

Triestin emigrado in Australia, una vita piena de aventure, un amor smisurato per la sua zità. Questo in poche parole xe Pino, un mulòn che no diventerà mai vecio. E da stò omo cussì forte e fiero, vien fora belissime poesie che in ogni strofa nascondi quela nostalgia per Rena Vecia, per l'albero de nadal de nona, per quel odor de minestra de una volta, per quei guati pescadi de la riva. In tel giardin de la casa de Melbourne, Pino coltiva el radicio perchè co'l vien a Trieste el ciol sempre via le semenze che ghe da Claudio. Un cafè in acquedoto legendo el giornal, un toc a Barcola, una magnada de pesse e un bicer de vin, tute robe che in Australia, per quanto grande che la sia, no'l pol far e cussì pena che'l pol Pino vien qua!

Xe con orgoglio che el sotoscrito anuncia la publicazion de 'sto libro, perchè xe grazie a 'ste poesie che go conossudo Pino, un dei primi colaboratori de TuttoTrieste.net, alcune sue poesie, difati, le trovè QUA.

Massimo Barbo - TuttoTrieste.net