dopo el Monon Behavior e

dopo el Monon Behavior Ciu

Diego Manna

presenta

Tre Volte Monon Behavior

Finalmente el libro che tuti spetavimo el xe pronto. El terzo e, ahinoi, ultimo MONON xe in vendita in tuta la zità e, pareria, anche oltre el Timavo. Ultimo libro de la saga perchè, come ga spiegado l'autor a la presentazion del volume, el se senti in pericolo. Come Saviano anche Diego Manna cori el ris'cio de esser ciapà de mira ma no de la mafia, ma de persone ancora più pericolose: i lanfur! Conclusa stà trilogia, Diego sarà probabilmente costreto a girar con la scorta (de birete) de ofrirghe a tuti i amici, parenti, conossienti ala lontana, che ga speso diese euri per cior el libro.

Tanta ma proprio tanta, anzi de più, la gente che xe venuda a scoltar la presentazion sabato 20 novembre, tuti sicuramente inzinganadi dal fato che dopo se magnava e se beveva. Tra el publico se ga missiado qualche lanfur che ormai tien de ocio el nostro autor. Diego Manna coadiuvado da igor, storico presentator dei mononi, ga spiegado aprofonditamente i temi e i argomenti tratai nel Tre Volte Monon Behavior, spiegando come ormai tuto quel che'l fa, dai prigeti pe'l parco del mar, ai studi scementifici su la bora, dale ricerche sul sfrutamento del turismo a Trieste, fin a la publicazion del libro, xe fato solo ed esclusivamente per farse pila bruta (ugly pila)! Tanti aplausi e un fraco de ridade ga compagnà tuta la presentazion, seguida a rioda da la presentazion de alcuni tochi de I Sardoni Barcolani Vivi e pò finalmente quel che tuti spetava e per el motivo che i xe venudi: el rebechin!

Veramente de spanzarse de rider, corè a ciorlo, in tute le librerie e anche in qualche edicola, el Tre Volte Monon Behavior no ve deluderà!

Massimo Barbo - TuttoTrieste.net