Monon Behavior Ciu

di Diego Manna

E cussì anche el grande giorno xe rivado! El giorno che in via San Michele 24b se prova a verzer la prima osmiza in centro zità. Sai, sai cocolo, iera tanta roba bona de magar, salame, formaio, pan e sopratuto tanto bon vin che i sprizetes coreva zo per la riva più che'l Rio Ospo. Po iera tanta zente, el local iera strapien de no poderse gnanche voltar per passarghe la feta de salame a quel dadrio de ti, e cussì mi che iero davanti me ga tocà magnar e bever per no farghe far un torto a quei che organizava la serata e più che me incoconavo più trovavo gusto a mangar e bever  visto che iera anche a gratis. E se volemo contarla tuta la persona che pagava iera lanfur! AH SI, iera anche el mulo Diego! Anche lui, che xe stado definido el fenomeno leterario dell'ano (inteso come anno no come daur!), quel Diego Manna che xe stado anche sopranominado el Woody Allen del Molo Balota, che za che iera pien de zente el ga profitado per presentar la sua seconda opera siementifica: el Monon Behavior Ciu.

A parte i scherzi, siori e siore se trovemo davanti a un volumeto divertentissimo, scrito in quel inglese patoco che solo i triestini pol capir. Come za gavevo dito per el primo MB, anche el secondo xe leteralmente de spanzars of smile e anzi zonteria che el xe anche really de cagars adoss of smile! El metodo xe sempre quel: darghe una tratazion sientifica, anzi siementifica, ale robe più ovie come testar che veramente se te bevi tanto te se imbriaghi o che se te ga mal de panza a Servola no se acorzi nissun co te la moli.

Dopo el grande sucesso del primo libro (quasi domila copie vendude fin novembre 2009), Diego Manna se lancia in questa seconda aventura con tantissime novità. Per cominciar el libro el ga el dopio dele pagine del primo e ghe xe anche pagine a colori che ghe da più valor ai pupoli che ga disegnà su morosa e altri amici. Po' ghe xe una nova cocolissima sezion botanica (el botanic canton) 'ndove se parlà del matawitz, un ortagio mataran, del ciclaminchia o ciclamona, un tipo de fior un poco sporcacion e po ancora i strazakawey, el stropacool fin a rivar ae l' oreegamo, una spece de origano cinese. E per finir la rubrica con le mail (vere) dei letori

Una ultima nota su la serata che xe stada veramente figa: divertente, spigliata e briosa per usar parole de fin, una vanzada per usar un termine più s'ceto. Diego e l'amico intervistador i ga savudo meter in scena quel che xe el spirto del libro, divertindo tuti i partecipanti che pol vantarse de gaver passà una bela serata (sopratuto per el vin!). E mi me devo scusar per gaver messo pena desso onlain 'sta pagina ma xe che gavevo de far prima el quel... e de portar quel'altro la de la quela... e anche de andar la de quel.... insoma, afari miei!

3 dicembre 2009

Massimo Barbo - TuttoTrieste.net

Eco i video dela presentazion del libro: