El Mercadindio de TuttoTrieste.net


rubrica de consigli e proposte, una risposta per ogni tua question, la soluzion de tuti i tui problemi, l’analisi completa dei fati e dei misfati, ogni gropo sul suo petine

 

I colori de le machine nove

Come sempre son qua per darve consigli utili, suggerimenti e voi savé benissimo che se gavé un dubio basta che me scrivé (mercadindio@tuttotrieste.net) e no resterè delusi.

Ciao MercaDindio go de cambiar auto ma no so che color cior. Xe meio ciaro o xe meio scuro, normale o metalizà?” Cossa volè che ve digo polastri miei oltre a dir che el nero xe bestiale co fa caldo e che el metalizà xe difficile de ritocar co se fa un gratòn? Qua el problema no xe questo ma xe quel de scelier tra la miriade de colori marziani che i concessionari ve proponi. Fin vinti ani fa co un voleva cambiar l’auto doveva scelier tra un per de tinte che altro no iera che normalissimi colori: bianco, nero, rosso, grigio, verde e blu. Po’ col tempo i ga fato le machine de colori più sofisticadi ma senza mai andar tropo lontan da quela realtà che tuti semo abituai: ocra, celeste che no xe azuro e viceversa, verdi, blu e rossi in tute le tonalità. Ma ogi, si proprio ogi, prové andar voi in zerca de un auto novo, no ve meti in crisi che cilindrata, che forma, quante porte o che antifurto farse meter, ma che color cior perchè el color no esisti in natura. Cussì ve vien proposti nomi de colori che ve lassa sempre a boca verta e con do oci spalancadi e dopo qualche minuto de mancanza de colegamento tra zervel e boca se senti el cliente dir: “bianca, la voio bianca!”.

In pratica cossa ve sentì dir? “Questa la gavemo disponibile color Canna di fucile”, ma cossa son vignù comprar un caroarmato? Grigio Colorado, meno mal che’l xe colorado e no in bianco e nero!. Polvere di Luna, pena ciolta za tuta impolverada la xe? Celeste Tonic, ma xe un auto o un drink? Rosso Tango, no grazie mi co balo ghe mastruzo sempre le scarpe a la baba! Silver Lightning, ma un color talian lo gavè? Ma anche mi che son el MercaDindio e che no me lasso mai intimorir, me son areso difronte a un venditor de auti che me ga proposto de ciorla color Peacock!!!

E alora polastri miei adesso scata la rivolta dei automobilisti: quando andè orgogliosi de ciorve un auto novo, no ste lassarve intimorir da quei omini che par sempre disposti a contentarve pur de farve creder che l’auto che i ve proponi xe la meio al mondo, colpili ai fianchi domandandoghe un auto color grigio pantegana de Servola, verde matavilz, zalo limon spelado, rosso pomidoro de Coloncovez, blu fastidio, verde multa, arancio boleta del telefono, o meio ancora senza specificar el color de base fe come lori e spareghe che volè l’auto color asfalto, color pugno intel’ocio, color armelin, color boiler o el più bel: color strazadepiati

Ciao polastri se bechemo la prossima.
 

scrivighe al Dindio, lui un consiglio te lo darà

mercadindio@tuttotrieste.net

 

eco i argomenti tratadi a dighelo al Dindio

 

 

 

 

"El MercaDindio" è un copyright di TuttoTrieste.net di Massimo Barbo

Il disegno del MercaDindio è stato realizzato da Alessandro Bonin

Tutti i diritti riservati - All rights reserved