|
rubrica de consigli e proposte, una risposta per ogni tua question, la soluzion de tuti i tui problemi, l’analisi completa dei fati e dei misfati, ogni gropo sul suo petine
...solo che tasse de pagar!
Ciao a tuti miei polastri e mie bele polastre, son el vostro Dindio de fiducia, no un Dindio qualsiasi ma el meo, ossia el MercaDindio. No se pol comprar mezo chilo de pan o un eto de radicio in pase senza sentir i sfoghi e le lamentere dei botegheri: “…qua xe solo che tasse de pagar!”, “…cossa mi lavoro per mantegnir el governo!”, e cussì avanti. Del resto come darghe torto a sti poveri botegheri: Irap, Irpef, Ires, Ici, Tarsu e la più bela de tuti la Tosap che co i la ga sentida nominar tuti i veneti ga molado le morose per paura de dover pagar sta nova tassa sula “tosa”. A mi me par che ala fine xe un circolo vizioso, come el gato che se magna la coda: bottegheri e artigiani ga tante tasse de pagar, no resta che aumenter i prezzi e aumentando i prezzi ghe vien de pagar ancora più tasse… insoma no vedo una fine e sopratuto aumenta ti che aumento mi e a la fine quel che paga son sempre mi “el cliente”. De una parte xe el Stato che disi che no xe soldi, che tuti frega e tuti evadi le tasse, da l’altra xe i enti publici che disi che el Stato ghe passa sempre meno soldi, de qual’altra ancora ghe semo tuti quanti noi, polastri, che paghemo e paghemo come sempre. Ma la roba che me fa impirar le piume del daur come un pavon, xe i “studi di settore”, ossia quel calcolo astruso co’l qual la Finanza stabilissi qual xe el minimo de tassa che te ga de pagar sula base de quel che te ga per le man. Per farla semplice saria come che a mi i me venissi a dir che siccome che ‘ntela mia caponera go diese galine, ogni galina fa almento un ovo al giorno, ogni ovo lo vendo a un Euro significa che in un ano go guadagnà 3650 Iuri e meno de quel no posso dir de gaver ciapado, anzi se in caponera tegno anche un galo, alor significa che son rico se posso permeterme anche el galo e sicuro sicuro ciapo qualcosa de foravia perché senò come ghe dago de hangar a ‘sto galo? Ma questa no me par una roba bela perché col ragionamento sul quale se basa ‘sti “studi de setor” xe come voler dir che semo tuti ladri, xe come partir del presupposto che tuti frega; eco no xe proprio un bel comportamento verso tuti i citadini e sopratuto verso quei tanti che le tasse le paga. Ma noi no semo sofistici e no se la lighemo, anzi partimo co’l contrataco de tuti i polastri e de tute le polastre che paga le tasse: cari politici noi le tasse le paghemo, paghemo tuto quel che ne disé de pagar, però in cambio femo che l’auto blu la usemo un mese noi e uno voi, femo che el bilieto del tram, del treno, del cine, e l’autostrada e anche quel del casin lo paghemo metà noi e metà voi e no tuto noi e voi gratis. Cussì se sentissimo anche noi più partecipi de la vita politica e economica del nostro paese e pagassimo le tasse sai più volentieri visto che la cosideta “spesa publica” saria proprio la nostra
Ciao polastri se bechemo la prossima. scrivighe al Dindio, lui un consiglio te lo darà
eco i argomenti tratadi a dighelo al Dindio
"El MercaDindio" è un copyright di TuttoTrieste.net di Massimo Barbo Il disegno del MercaDindio è stato realizzato da Alessandro Bonin Tutti i diritti riservati - All rights reserved
|
