El Mercadindio de TuttoTrieste.net


rubrica de consigli e proposte, una risposta per ogni tua question, la soluzion de tuti i tui problemi, l’analisi completa dei fati e dei misfati, ogni gropo sul suo petine

 

Le coriere a Trieste: riva la MercaDindio Trasporti

Ciao a tuti miei polastri e mie bele polastre, son el vostro Dindio de fiducia, son el vostro MercaDindio. Legemo subito una tra le tante letere che me xe rivade: “La coriera riva sempre tardi e co’ la riva la xe piena che no se riva montar, con quel che costa el bilieto…”. Cari miei polastri, tante lamentele e segnalazioni come questa me gavè fato rivar, ma mi che son ecologista me sento istesso de invoiarve a cior la coriera pitosto che andar in auto, magari soportando qualche picio disguido. Del resto ogi per Trieste gira tute ste coriere nove e praticemente tute ga l’aria condizionata per l’afa e el riscaldamento per la zima, le xe bastanza silenziose e, se no te capita un sofer che gabi sai furia, el viagio pol esser anche un piazer. Eh sì, bele, nove, lustre, anca silenziose e tute cola scrita in alto in grande che te ricorda che le xe anca “ecologiche”. Si ma ricordeve che questo vol solo dir che, in teoria, le inquina de meno dele coriere vece, ma pur sempre le inquina el suo. Volè meter i cari veci filobus che girava per Trieste fin torno ai ani setanta, con sei riodone grosse e quel troley picà sui cavi che coreva in aria per tuta la zità. Quei si che iera silenziosi e sopratuto ecologici. Ma un bel giorno i ga smantelà tuto, filovie e cavi, e i ga mandà tuto a Caserta dove i nostri filobus ga girado ancora un diese ani abondanti. No se ga mai capido perchè i ga rinunciado a sto tipo de trasporto visto che in altre zità le filovie, più nove e moderne se capissi, le gira insieme ai tram. Ma no voio far polemiche perchè ogi xe un altro “problema” che preocupa un poco tuti: el gestor unico dei trasporti. In pratica pareria che del domila e oto la region tegnerà in man tuto e la ghe afiderà tuti i trasporti de tera, de mar e de strada ferada a una unica dita che doverà organizar tuto. La roba che me preocupa più de tuto xe che la gara per l’assegnazion del servizio sarà de tipo “gara al ribasso” e quindi no voleria che se concretizi el famoso vecio deto istrian: “poco ti paghi, poco ti ga!”. Cussì altro che lamentarse che le coriere le riva tardi e le xe sempre piene, basta che no le sia anche sporche e guidade da autisti sotopagai che ga fato la patente tramite fascicoli setimanali ciolti al chiosco drio el canton. Ma no ste preocuparve, per prevenir tuto questo go deciso de partecipar ala gara de apalto con la mia MercaDindio Trasporti che meterà a disposizion de tuti i utenti una coriera con tanto de hostess che ofrirà cafè,  caliceti, quartini, rodoleti e rebechini vari. Quanto costerà el bilieto? Ben quel se metermo dacordo sul momento!

Ciao polastri se bechemo la prossima.

 

 

scrivighe al Dindio, lui un consiglio te lo darà

mercadindio@tuttotrieste.net

 

eco i argomenti tratadi a dighelo al Dindio

 

 

 

 

"El MercaDindio" è un copyright di TuttoTrieste.net di Massimo Barbo

Il disegno del MercaDindio è stato realizzato da Alessandro Bonin

Tutti i diritti riservati - All rights reserved