El Mercadindio de TuttoTrieste.net


rubrica de consigli e proposte, una risposta per ogni tua question, la soluzion de tuti i tui problemi, l’analisi completa dei fati e dei misfati, ogni gropo sul suo petine

 

Vigile: no solo guardia del radicio

Caro MercaDindio, xe mai possibile che co i me sera l’auto ciamo i vigili e no i pol mai vignir” – “Caro MercaDindio perchè co ciamo i vigili pervia che quel del pian de soto fa scandal col stereo no i me dà una man?” Una question che spesso vien tirada in balo de tanta zente che me scrivi (mercadindio@tuttotrieste.net) , xe in efeti quela che i tubi no xe mai co ocori e i va a piturar indove che no ocoreria. Oramai in tela testa de tuti xe el ciodo fisso che i tubi servi solo per far multe ai auti ma in verità i ga tanti de quei compiti che ghe ne volessi tre volte tanti de più de quei che i xe. Trafico, divieti e parchegi xe solo una parte del lavor de quel che vien anche simpaticamente ciamado “guardia del radicio”, anche la question dei rumori fastidiosi, del comercio abusivo, del evasion dele tasse comunali, del ocupazion del teren publico, del drek dei cani che i paroni no ingruma, xe tuti problemi che i vigili devi, anzi  dovessi, starghe drio. Cussì va a finir che no i xe in bastanza per poder far tuto, che i resta indrio cole carte, che più che i strussia più ghe riva ordini novi de distrigar. E cussì in sta maniera la zente se bitua ben concedendose parchegi che dir selvadighi xe poco, fazendo casin in strada anche a note fonda, lassando in mezo el marciapie drek de can che gnanche un muss no faria tanta roba e cussì via. Veci problemi questi in tuto el mondo ma a Trieste desso gavemo qualcossa de novo e de potente che risolverà tuti i problemi: noi gavemo i NIS ! No xe una parola per zakaj come poderia parer ma xe la sigla del “Nucleo Interventi Speciali” dei tubi triestini, una vera e propria task force per le vie de la zità, un organismo che se ocupa in maniera eficace de eliminar tuti i problemi, dal trafico imbunì al rispeto dele ordinanze comunali, passando per vandalismo, abusi edilizi, mendicantismo, postegi selvadighi, tacomachi abusivi e, gnientepopòdimenochè, de le “deiezioni animali” come dir del drek! Eh si, cari i miei paroni de cani, cagnolini, cagneti e cagnazi stè ben atenti, de ogi in avanti no poderè far più i furbi vardandove torno come se no ve inacorzessi che la bestia la stà molando, se no ingrumerè el drek ve salterà fora un NIS e Dio solo sa dopo cossa che nasserà. Ma no finissi qua cari i miei polastri, perchè la Comun se sta za organizando per istituir un'altra task force de tubi ancora più cativi: i “Pretoriani” con tanto de pistola! E qua ve voio dopo, chi gaverà più el coragio de postegiar l’auto sule striche, in seconda, sul scalin, o sula fermata de la coriera? Chi gaverà el coragio de domandar la carità in Piaza dela Borsa? Chi lasserà el ricordo del can pertera? Chi ris’cerà qualcossa co’ de un momento al altro poderà saltar fora un tubo armado che in perfeto stile Starski & Ac ve punterà la rivoltela intimandove: “o el drek o la vita!

Ciao polastri se bechemo la prossima e la cartina dela caramela tignila in scarsela, la buterè in bidòn co sarè rivadi a casa. Ogni bene!

 

 

scrivighe al Dindio, lui un consiglio te lo darà

mercadindio@tuttotrieste.net

 

eco i argomenti tratadi a dighelo al Dindio

 

 

 

 

"El MercaDindio" è un copyright di TuttoTrieste.net di Massimo Barbo

Il disegno del MercaDindio è stato realizzato da Alessandro Bonin

Tutti i diritti riservati - All rights reserved