El Mercadindio de TuttoTrieste.net


rubrica de consigli e proposte, una risposta per ogni tua question, la soluzion de tuti i tui problemi, l’analisi completa dei fati e dei misfati, ogni gropo sul suo petine

 

Come difenderse dale telefonade fastidiose

Ciao a tuti miei polastri e mie bele polastre, son el vostro Dindio de fiducia che ogi ve conta una bela. Quante volte ne xe capitado a tuti de ciapar una telefonada de qualchedun che vol ofrirne un’ocasion unica? Opur la possibilità de aderir a un’oferta imperdibile? Xe oramai a l’ordine del giorno telefonade de quei che te vol far cambiar compagnia del telefono perchè secondo lori adesso te paghi tropo e passando con lori te pagheria meno dela metà. Dopo xe quei che ne vol vender vin, oio, tapedi, straze, creme, mobili, qualsiasi roba a prezi che i vol farne creder che i te li tira drio. Po xe quei che te ciama per farte far corsi de lingue, corsi de compjuter e corsi de balo, insoma a starghe drio a tute ste oferte no basta una paga. El tragico xe che i ciama a tute le ore: ora de pranzo, ora de zena e de sera sul tardi ma del resto quele xe le ore che xe più fazile trovar a casa la zente. Grave xe co no te se li rivi scrostar de dosso tanto i xe insistenti, del resto xe el suo lavor rivar a far afari con voi altri polastri. Niente paura se no gavè voia de perder tempo el vostro MercaDindio qualche suggerimento ve lo dà. Per giusto voi dovessi farve dir el nome esato de la dita e l’indirizo e po cior un toco de carta e scriverghe che per la lege sula praivassi volè esser scancelai da le sue liste, po far una racomandata e tuto se risolvi ma visto che ve partiria un capital per tute le racomandate che ve tocassi spedir, eco qualche picio e utile consiglio che ve permeti de no passar per scorbutici e de no tratar mal quele povere polastre che ve ciama che xe de solito studentesse e comunque gente che ga bisogno de ciapar do lire. Bisogna esser scaltri e pronti a ogni evenienza zercando de passar voi da la parte de quei che meti paura. A la frase “la sa che femo sconti” o “…xe un’oferta incredibile” voi rispondeghe con un sonoro “MA VA!”  opur “NOOOOOOO… SUL SERIO?” e za qua xe un punto a vostro favor. Quando segui la manfrina de l’oferta prepareve una risposta per ogni tipo de prodoto, ossia a quei che ve vol far cambiar compagnia del telefono diseghe che vostro zio lavora nela compagnia concorente, a quei che ve vol vender vin, oio e formaio diseghe che lavorè in un agriturismo in Carso, a quei che vol portarve a casa el depurator per la spina per farve risparmiar i soldi de l’acqua minerale fe i signori e diseghe che voi lavè anche  i piati con l’acqua minerale e che in tavola bevè solo che sciampagn, a quei che ve vol vender linzioi o mobili diseghe che ve gavè pena sposà e gavè el coredo novo. Insoma con un poca de fantasia e tanta gentileza podè chiuder velocemente la telefonada e, senza tanto bazilar, vederè che nissun più ver omperò i bisi sul più bel che distirè i crachi davanti el televisor o co sé ancora col bocon in tola.

Ciao polastri se bechemo la prossima!
.

 

scrivighe al Dindio, lui un consiglio te lo darà

mercadindio@tuttotrieste.net

 

eco i argomenti tratadi a dighelo al Dindio

 

 

 

 

"El MercaDindio" è un copyright di TuttoTrieste.net di Massimo Barbo

Il disegno del MercaDindio è stato realizzato da Alessandro Bonin

Tutti i diritti riservati - All rights reserved