|
rubrica de consigli e proposte, una risposta per ogni tua question, la soluzion de tuti i tui problemi, l’analisi completa dei fati e dei misfati, ogni gropo sul suo petine
Cossa che NO funziona con le poste...
Ciao a tuti miei polastri e mie bele polastre, ogi afrontemo un problema che de qualche mese ga sconvolto le nostre abitudini. Me riva difati un mucio de segnalazioni de polastri che se lagna che le poste no funziona, che le racomandate no xe più racomandate, che la posta celere no xe per niente celere e sopratuto che el postier no vien più sul pianerotolo perchè la direzion ghe meti furia. Purtropo mi no son el numero verde de le poste ma posso confermar le lagnanze che me riva da parte de tuti questi che volessi de mi un consilio su come comportarse. Vero xe che subito dopo la privatizazion dele poste, el servizio funzionava ogni giorno meio, tuto pareva ordinato, preciso, puntuale come le poste de l’impero austro-ungarico. Dopo xe nato qualcossa che ga fato si che inveze de ‘ndar avanti semo tornadi indrio. Difati sicome tuti usava la posta celere perché la roba rivava drio man, qualche fenomeno dele Poste ga ben pensà de unificar el servizio, ossia far tuto posta celere. Con un problema però: che la tarifa pe’l francobolo xe quela più cara dela posta celere ma i tempi de consegna xe quei lenti de la posta ordinaria. Le racomandate po’ stà un mucio de giorni per rivar e la ricevuta de ritorno la te torna anche dopo un mese senza contar le volte che no la torna gnanche indrio. I postieri no vien più in pianerotolo a portarte i pachi e le racomandate ma i te disi de vignir zo in porton a ciorte la roba. Questo perchè, sempre in una probabile otica de risparmio e otimizazion del servizio, i ga diminuido el numero dei postieri fazendoghe far giri più longhi a quei che xe in servizio e sempre nele sue ore de lavor. Cussì va a finir che quei che una volta iera dei matarani, dele mace de omini, sempre pronti a scherzar, a scambiar do batude con la gente, diventerà una dele categorie più stressade: i postieri. A poco servi esser avanti tecnologicamente, gaver sistemi compjuterizadi che smista, timbra e spedissi, se per la consegna la dirigenza dele poste volessi gaver dei postieri robot che senza tante cicole e ciacole imbuca la posta saltando de porton a porton. A poco servi gaver un sito internet a l’avanguardia che te disi minuto per minuto dove che xe la tua busta o el tuo paco se po’ questi vien portadi de un che ga el muso longo e scampa via de furia per no ‘ndar fora con l’orario. Care poste un poca de umanità produsi el meo servizio che l’utenza possi domandar e se una volta el postin “sonava do volte” adesso xe sai se el sona una e se no te son pronto a verzerghe el porton el fila via! Ciao polastri se bechemo la prossima. . scrivighe al Dindio, lui un consiglio te lo darà
eco i argomenti tratadi a dighelo al Dindio
"El MercaDindio" è un copyright di TuttoTrieste.net di Massimo Barbo Il disegno del MercaDindio è stato realizzato da Alessandro Bonin Tutti i diritti riservati - All rights reserved
|
