|
rubrica de consigli e proposte, una risposta per ogni tua question, la soluzion de tuti i tui problemi, l’analisi completa dei fati e dei misfati, ogni gropo sul suo petine
Anche stò ano xe San Nicolò!
Ecolo ecolo, xe denovo San Nicolò!!! Per i putei triestini xe el giorno più bel de tuto l’ano. Gnanche Nadal, l’ano novo, l’ultimo giorno de scola o el giorno del compleano no xe cussì bel come el sei de dicembre. Stò ano el casca de sabato, gnente de meio per i picinini che va ancora in asilo, dato che de sabato i stà a casa e i poderà giogarse subito, ma gnanche tanto mal per quei più grandeti che va a scola perchè dopo i ga comunque tuto el fine setimana per sfogarse coi novi zogatoli. Gnanche parlar che la ricorenza de San Nicolò xe un giorno de festa anche per i botegheri che vedi svodarse le scanzìe de tuti i pupi, autini, piste, bambole, balete, trenini e, come che se svoda le scanzìe cussì ghe se impinissi la cassa. Con lori fa festa anche tuti quei che vendi zogheti per i compjuter e la pleistescion, ma gnanche mal per quei che vendi vestitini, pistaci, libri e libreti. Insoma una bela festa per tuti sperando che l’unico a no pianzer sia el portafolio de mama e papà! Che el consumismo comandi anche in ocasion de sta festa no xe una novità e più passa i ani più se senti parlar la gente che sti fioi ga de tuto e che no i sa più ganche lori cossa che ghe manca. Ma no ghe vol sminuir stò bel giorno con ‘stì discorsi materialisti, no stemo sempre portar tuto a parlar dei soldi, vardemo la beleza de sta festa nela sua genuinità, pensemo che bel che xe per un putel andar a dormir co’l pensier che quela note vegnerà in casa un vecio stanco vestì de rosso con una barba longa e bianca e che lasserà una bela sorpresa. Pensemo che bel che xe veder sti putei sveiarse bonora e corer in cusina a veder se xe rivà qualcossa e come che ghe brila i oci davanti a tanta meravilia: anche stò ano son stà bravo e quel vecio con la barba se ga inacorto de mi! No importa se ogi i fioi trova pien de regali, se i fioi de ieri trovava un pochi de meno ma sempre bastanza e se quei de l’altro ieri trovava un toco de ciocolata e basta, perchè el sentimento xe sempre quel e nissun poderà cavarghelo a un putel. Fioi triestini si ma anche i novi fioi triestini che ga la pele nera o zala se ga imparà in asilo a spetar San Nicolò e una roba che forsi nissun sa xe che la festa de San Nicolò xe una ricorenza che ghe tien anche a tuti quei che xe vegnudi a lavorar a Trieste de lontani e meno lontani paesi balcanici. Cussì per un giorno i fioi dela caiva e razista Trieste se trova tuti d’acordo e per man i fa un girotondo de colori intorno al suo adorato e tanto spetado San Nicolò. Bon San Nicolò a tuti grandi e pici!
scrivighe al Dindio, lui un consiglio te lo darà
eco el San Nicolò de l'ano scorso su dighelo al Dindio e eco i argomenti tratadi a dighelo al Dindio
"El MercaDindio" è un copyright di TuttoTrieste.net di Massimo Barbo Il disegno del MercaDindio è stato realizzato da Alessandro Bonin Tutti i diritti riservati - All rights reserved
|
