|
rubrica de consigli e proposte, una risposta per ogni tua question, la soluzion de tuti i tui problemi, l’analisi completa dei fati e dei misfati, ogni gropo sul suo petine
El problema dei postegi a Trieste
Ciao a tuti miei
polastri e mie bele polastre, gavè visto che cine che xe in zità? “No
xe un buso in zità dove se possi parchegiar l’auto…!”. La question
dei parchegi a Trieste, xe una roba che tuti se lamenta e tanti me
domanda consili e possibili soluzioni. Cossa posso dirve mi se no robe
che ve disi za tuti, come andar in filovia e farse qualche caminada.
Trieste xe un buseto, le strade xe strete e le machine xe tante quindi
sperar de trovar postegio con facilità xe un pensier de gnanche no
farselo vignir. Pensando al centro me vien in mente tre parchegi a
pagamento: quel davanti el tribunal, el Silos e quel drio el Lloyd a
Sant’Andrea ma sicome la gente xe pigra sti ultimi do vien snobadi
perchè, almeno che no se gabi de far qualcossa la intorno, i xe
legermente fora man e te toca far quatro passi. Quel de Foro Ulpiano
inveze xe el più getonado ma i posti disponibili xe quei che xe e a una
certa ora capita spesso de veder la luce rossa che te segnala “esaurido”
che significa sia che i parchegi xe esauridi sia che i automobilisti che
no trova postegio xe esauridi anche lori. De tuto questo discorso no fa
parte i automobilisti che gnanche no pensa a sti postegi, primo perchè i
xe a pagamento e anche se i ga soto el daur una machina de trentamila e
passa Euro, spenderghene do, tre Iuri per el postegio li manda in crisi,
secondo perchè i devi fermarse con l’auto davanti al logo dove i devi
andar per caminar el meno possibile e no stancarse tropo. L’altra
categoria xe quela dei parchegiadori sedentari, ossia quei che lavorando
o abitando in centro i ga constatado che un abonamento ai postegi
privati o l'afito de un postegio, ghe costa de più che lassar l’auto in
divieto visto che in divieto el postegio xe gratis o, mal che vadi, se
anche i ciapa una o al massimo do multe in tuto l’ano xe sempre una
spesa più bassa che pagar un abonamento o un afito ogni mese per un ano
intiero. Tuto cambierà oviamente con l’arivo dei NIS e dei Pretoriani!
No, no stago parlando del prossimo film de Guere Stelari ma de tubi duri
e inflessibili che ghe farà passar a tuti i autisti sti bruti vizi de
lassar l’auto pei cantoni. E intanto che sti tubi controlerà ‘ndove
lasseremo l’auto, la Comun farà far i novi postegi soto le rive. La
soluzion parchegi difati xe in studio tra esperti nominadi dai vertici
de Palazo Cheba, nientemeno che fiorfior de geologhi e oceanografi che
studierà come far che l’alta marea no impinissi sti postegi che tegnerà
tanti de quei auti che gaveremo l’imbarazo de sceglier ‘ndove molar la
machina; sempre sperando che tornando a ciorla no i ne consegni un
canoto con le scuse de la direzion per el mancato funzionamento del e
pompe che ga trasformà el postegio in una grandiosa piscina soteranea
con tanto de reperti sotomarini: i nostri auti apunto!!
scrivighe al Dindio, lui un consiglio te lo darà
eco i argomenti tratadi a dighelo al Dindio
"El MercaDindio" è un copyright di TuttoTrieste.net di Massimo Barbo Il disegno del MercaDindio è stato realizzato da Alessandro Bonin Tutti i diritti riservati - All rights reserved
|
