El Mercadindio de TuttoTrieste.net


rubrica de consigli e proposte, una risposta per ogni tua question, la soluzion de tuti i tui problemi, l’analisi completa dei fati e dei misfati, ogni gropo sul suo petine

 

La moda in tel vestirse

Ciao polastri e polastre de ogni logo de Trieste e dintorni, giovini o veci no ga importanza tanto col tempo che passa ogni generazion ga de dir la sua  su come che se vesti quei più giovini de lori. A proposito, gavè visto come che se vesti ogidì sta muleria? I polastri ga tuti stè braghe sbrindolade col cavaloto fin sui zenoci che i par tuti che i se la gabi fata indosso, papuze de ginastica de tuti i colori che possi far mal de oci, maioni de diese misure più grandi e cavei inverigolai che i par petinai coi petardi. Le polastre inveze de meter in evidenza la beleza dei sui fisici le se coverzi con bragoni slambricai e maioni col colo talmente largo che ghe vien fora la spala e mezo brazo, cavei impiradi e stivaloni grossi che co le camina par tanti clonzi! Quante volte gaverè sentì le persone anche solo un poco più vece de lori criticar e remenar sti novi costumi dela gioventù e pur anche lori che i iera muloni fin qualche ano indrio, no i se ricorda come quei più veci li remenava per quela strana moda dei Camperos, dele braghe strente che per metersele su bisognava onzerse de talco, giuboti de piume che pareva tuti omini-michelin e le maiete coi lustrini de argento che se sbiadiva e se scorzava za con la prima lissia. Ma anche queste critiche che le rivava de quei un poco più veci, altro no iera che un continuo de quel che lori stessi gaveva subido coi iera solo un poco più giovini, con quele braghe a zata de lionfante, i cavei impomatai ala Little Tony e i maioni strenti col colo alto fin sora el gargato. Insoma no xe moda che no ghe vadi ben a quei che no ghe va drio e la gioventù no xe degna de sto nome se no ghe va drio ala moda del momento, bela o bruta che la sia. E po chi pol dir che una moda xe bela o xe bruta? L'unica roba vera xe che de sempre come che se vesti la muleria no va ben ma xe anche vero che qualsiasi novo model de braga, camisa o flaida che vegni butado sul mercato, no poderà mai competer con un abiliamento che a Trieste xe sempre de moda e no sparirà mai: zavate, capel de paia e la vestaia pindolòn!!!
Ciao polastri se bechemo la prossima.

 

scrivighe al Dindio, lui un consiglio te lo darà

mercadindio@tuttotrieste.net

 

eco i argomenti tratadi a dighelo al Dindio

 

 

 

 

"El MercaDindio" è un copyright di TuttoTrieste.net di Massimo Barbo

Il disegno del MercaDindio è stato realizzato da Alessandro Bonin

Tutti i diritti riservati - All rights reserved