El Mercadindio de TuttoTrieste.net


rubrica de consigli e proposte, una risposta per ogni tua question, la soluzion de tuti i tui problemi, l’analisi completa dei fati e dei misfati, ogni gropo sul suo petine

 

La zità dei congressi...

Cari polastri e care polastre, stemo per diventari i fortunadi abitanti de la "zità dei congressi". Tute le robe vece vien butade zo per tirar su centri congressi, i veci palazi vien ristruturadi per farli diventar i cassoni de moderni centri congressi, anche le piaze fra un poco vignera impinide de careghe per farle diventar centri congressi estivi. Difati no passa giorno che legendo el giornal o scoltando le notizie, se vien a saver dei novi lavori che se farà a Trieste ma ristruturazioni, demolizioni, ricostruzioni, ampliamenti e modifiche porta tute in tun unico risultato: un centro congressi novo! Visto che el Salon dei Incanti (perchè ciamarlo la Vecia Pescheria no xe fin!) no xe stà proprio quel che se disi un sucesso, i stà za pensando de ridoprarlo per far una sala cogressi (e mi digo che bel saria ciamarlo "Centro Congressi Madona del Guato"!!!). La vizin ghe xe anche la Stazion Maritima, l’unico vero edificio fato per ste robe, che spesso xe al centro dela cronaca per i sui progeti de slargamento dele sale per farle più bele e più moderne e per invoiar la gente a far incontri e riunioni la dentro. Sempre la vizin xe fermo e duro con tuti i sui ani sula schena, el fastidioso Magazin dei Vini che no vol vignir zo gnanche con le bombe. Anche un fioluz ghe pol rivar che la roba miliore saria quela de trasformarlo in un centro congressi. E la ‘ndove che iera la vecia pissina Bianchi? Za qualchedun ga espresso un’idea nova come quela de tirar su un centro conferenze. Po la vizin i ga za fato un picio centro congressi dove che una volta iera el distrubutor de benzina, ma la Stazion Rogers (cussì se ciama la ex pompa de benzina) xe proprio picia, intima come dir, e alora eco subito pronto un progeto mastodontico per far un palacongressi dentro el Palazo Carciotti. Se po vardemo tuti i progeti e progarmi de quel che, forsi, un giorno i poderia far in tel’area del Porto Vecio, un bel posto lo ocupa el progeto per far un centro congressi. Ve dirò la verità: anche mi l’altra domenica che go svodà la cantina me xe passada per la testa de far una picola sala riunioni, magari per afitarghela a chi vol far la riunion de condomigno cussì ciapo un do fliche per arotondar un fiatin. Ma tuti sti centri congressi che i ga de far in zità, qualchedun dopo anderà a doprarli? Qualchedun riverà a impinirli de gente senza dover meter un maxi schermo che trasmeti in direta la finale de copa campioni? E po', tuta stà gente cossa ga tanto de parlar drio man de dover far sempre incontri, riunioni, conferenze e fraie? Lavorar, lavorar, altro che ciacole!

Ciao polastri se bechemo sto altro giro…. in qualche centro congressi probabile e se proprio volemo contarsela tuta, basta che ala fine i organizi un rebechin, ops, un rinfresco, che de sicuro le sale sarà sempre piene de zente!
 

scrivighe al Dindio, lui un consiglio te lo darà

mercadindio@tuttotrieste.net

 

eco i argomenti tratadi a dighelo al Dindio

 

 

 

 

"El MercaDindio" è un copyright di TuttoTrieste.net di Massimo Barbo

Il disegno del MercaDindio è stato realizzato da Alessandro Bonin

Tutti i diritti riservati - All rights reserved