El Mercadindio de TuttoTrieste.net


rubrica de consigli e proposte, una risposta per ogni tua question, la soluzion de tuti i tui problemi, l’analisi completa dei fati e dei misfati, ogni gropo sul suo petine

 

L'esercito de le bestie de casa

Son sicuro che anche voi, cari polastri e bele polastre, o picia o grande sicuro gaverè in casa una bestia. No, no parlo de vostro marì o de vostra molie o de vostra suocera, parlo de bestia de casa tipo can e gato! Le statistiche disi che xe una popolazion grandissima de bestie de tuti i tipi che vivi in tele nostre case ma no solo cani, gati che go nominà prima, o canarini e sorzi, e no parlo gnanche de pulisi e simisi ma de bestie strane come iguane, scarpioni, bisse, draghi de Comòdo e diavoli dela Tasmania, insoma un esercito de esseri de tuto el mondo. Dindi però gnanche un! No so perchè ma nissun tien in casa un dindio che tuto somado xe una bestia che ga bisogno de poche cure e che sporca poco o gnente, basta darghe de magnar, farlo papuzar e lassarlo in pase. Ma inveze no, meio ciorse un can che, grande o picio che’l sia, bisogna portarlo in strada a far i sui bisogni che dopo bisognassi anche ingrumar, bisogna lavarli, netarghe le cagole e cavarghe i strazacavei, petinarghe e taiarghe el pel, darghe vitamine, comprarghe ossi, zogatoli e pirole pervìa che no ghe caschi i denti. Po’ xe chi ga el gato che xe la bestia più sufisstica per magnar. El gato magna solo quel che ghe comoda e nei ani el se ga talmente vizià che i sorzi ghe bala davanti al muso senza paura perchè lu li varda e ridi. Rufian come pochi, el se scondi dentro ogni buso e el vien fora solo co’l ga voia lui e solo se te ghe ga cambiado la sabieta senò el fa un casin de l’ostia.  Xe chi inveze tien in casa sorzi, che pol esser cavie, criceti, gerbili, scoiatoli, insoma sorzi de ogni tipo. Chi ga inveze cunigi, porcheti d’India o cavie peruviane e se impinissi el quartier de paia e paiuze e chi se contenta de bestiuze classiche come un canarin, un gardel, un parpagal o un pesse rosso, una tartarugheta o un bel acquario de pessi esotici. Fin qua tuto normale, o quasi, ma pol far impression, inveze, sentir chi che ga che gira per casa pitoni, iguane, cobra, manguste o tarantole, che po bisogna anche saver cossa darghe de magnar, come netarli e come farli divertir. Comunque sia, polastri miei, le bestie che se ga in casa xe beate come principi e principesse, curai e cocolai i fa la bela vita. Ma fra tuti el più sgaio resta secondo mi sempre el can tanto che una volta un comico ga dito per television che se i extraterestri ne vardassi de l’astronave i penseria che la bestia che comanda sula tera xe el can perchè l’omo ghe tira su anche el drek.

Amici miei, qualunque bestia che gavè, voleghe ben e tratela più che ben e co se stufi soportè perhè no le xe zogatoli ma esseri viventi e no xe umano e civile molarle in strada, zo pe’l condoto, in giardin o, pezo ancora far finta de dimenticarseli in qualche logo.

Ciao a tuti se bechemo la prossima e anche sto giro, volenti o nolenti, gavemo rivà a parlar de drek!


 

scrivighe al Dindio, lui un consiglio te lo darà

mercadindio@tuttotrieste.net

 

eco i argomenti tratadi a dighelo al Dindio

 

 

 

 

"El MercaDindio" è un copyright di TuttoTrieste.net di Massimo Barbo

Il disegno del MercaDindio è stato realizzato da Alessandro Bonin

Tutti i diritti riservati - All rights reserved