El Mercadindio de TuttoTrieste.net


rubrica de consigli e proposte, una risposta per ogni tua question, la soluzion de tuti i tui problemi, l’analisi completa dei fati e dei misfati, ogni gropo sul suo petine

 

Che bel "Il Mercatino" xe tornado

Insoma cari polastri e mie bele polastre, voi no gavè gnanche la più minima idea de che piazer che me ga fato ciapar la e-mail de Lina che me informava che "Il Mercatino" xe de novo in edicola. In un primo momento go pensà a un scherzo tardivo del primo de aprile, ritardo giustificado de la paura de far scherzi per quela ocasion visto el ris'cio de 'ndar in canòn, ma pò me son reso conto che stò ris'cio xe ligado solo ai viz sul cosideto "ponte curto" e cussì go incomincià a creder e sperar che l'informazion fussi reale. Comunque per sicureza son subito corso in edicola e con stupor missiado a felicità lo go visto la in bela mostra e go pensà: "Ulo, alora xe proprio vero, el xe tornà per bon!".

Bituiai come che semo a sentri solo de boteghe, fabriche e magazini che sera e stropa, el nostro zervel no pol gnanche più imaginarse che qualcossa possi sopraviver o meio ancora, che possi tornar a nova vita. La tristeza che a mi e a tanti come mi, ghe iera vignuda co xe stada anunciada la fine de una rivista storica de la zità, xe stada ben che dimenticada grazie a la piacevole sorpresa del suo ritorno.

Adesso savemo denovo 'ndove zercar de vender o de comprar, de cior o de dar in afito, de imprestar, regalar o scambiar qualsiasi roba, machine de scriver e machine de cusir, tavoli e careghe, vide e tampagni, scatole e coverci, baui e cassoni, biciclete e tricicli, auti e motorini ma anche, riode, cercioni, maniglie, scarpe, siole, taconi, biechi, straze e tuto quel che te vanza de dar via o che te servi de cior.

Speremo che el ritorno de "Il Mercatino" sia el primo segno de risveio de Trieste e de vitoria su la crisi, che tute le dite che stà combatendo le vinzi stà batalia e che quele che ga serado le riverzi con novo vigor.

Bravo Mercatino, TIEN DURO, bentornado e no farne più de sti scherzi!

Trieste, 14 aprile 2013 

 

 


 

scrivighe al Dindio, lui un consiglio te lo darà

mercadindio@tuttotrieste.net

 

eco i argomenti tratadi a dighelo al Dindio

 

 

 

 

"El MercaDindio" è un copyright di TuttoTrieste.net di Massimo Barbo

Il disegno del MercaDindio è stato realizzato da Alessandro Bonin

Tutti i diritti riservati - All rights reserved