El Mercadindio de TuttoTrieste.net

 



 





 

Vendo bilieto per spetacolo in prima fila, otimo posto, poltroncina comoda con botilia de sciampagna oferta ai gentili ospiti




Aparato per la tomografia assiale compjuterizada identico a quel rubado al Burlo, vendo a clinica privata.

 

Belissimo quadro antico con disegnadi due veci che se bastona de bruto, vendo a intenditor.

 

Antica mumia egiziana identica a quela che iera esposta al Museo de Storia Naturale fin pochi mesi fa, vendo a colezionisti.

 

Vendo porto d'armi o scambio con patente nautica.

 

 

Moderna e rarissima scultura dell'arte culinaria, riproduzion in chiave dolciaria del famoso mascheron de Gigi Ganassa de via Crispi drio del Teatro Rossetti. Chi no volessi gaver in sogiorno vizin el televisor, o in camera sora la testiera del leto o in condoto a fianco de la specera o in entrata sora el stipite de la porta, el vero Gigi? Ben, questa xe una riproduzion fedele riproposta in chiave più moderna e sopratuto passandoghe vizin te pol stacar un tocheto e magnartelo. Porta a casa tua anche ti un toco de la nostra vecia Trieste.

 

 

La Dindio Corporation International organiza una conferenza al PalaDindio dal titolo “Pinochio ne fa un bafo”. Ospite e relator dela conferenza sarà Zvonko un muleto che stà gavendo un grande sucesso fora in Jugo dove tuti i fioi xe mati spanti per lui. Zvonko ve spiegherà che Pinochio iera un sfigado con la testa dura come el masegno e quindi diseducativo per tuti i fioi, Zvonko inveze xe un putel un poco s’ciavo duro ma senza esser de legno e inveze de andar in tel paese dei balochi, Zvonko va nel paese di cevapcici e dei raznici. Durante tuta la storia se Zvonko se comporta mal no’l diventa un muss ma i ghe da una Zastava de guidar e inveze de incontrar el gato e la volpe el incontra la cavra istriana che ghe ciol tuti i soldi con la scusa che xe per i beni abandonati. Se te vol legerghe una bela storia a tu fio, legighe le aventure de Zvonko! De no perder!

 

 

Se te ga problemi de incontinenza o semplicemente de susta mola, el nostro prodoto xe nato per ti! Se trata de una novissima invenzion: el “Condoto Portatile de Strada”. Te se lo pol portar drio come un borsel e a l’ocorenza basta pozarlo per tera in qualunque parte del mondo che te se trovi e svodarse de tuto quel che no ga più posto e motivo de tignirte dentro. No fartela scampar sta oferta perchè dopo tuto el resto te poderà fartelo scampar quando, come e sopratuto 'ndove che te vol!

Telefonar ala dita Condoti & Bucai



 

 

El Dindio in colaborazion col Cinghial regala a chiunque vien a ciorselo, el vecio tandul che ormai de zento ani el va in giro per zità in bicicleta con un penel grande perchè el ga de piturar una grande parede. No ga mai servido a gnente che el tubo ghe spieghi che per piturar una grande parede no ’cori un penel grande ma un grande penel, che par de no ma fa una bela diferenza. El Cinghial xe stufo che stò vecio insemenido vadi su e zo pe’l borgo teresian a farghe cativa publicità, per questo motivo el vecio vien oferto a gratis con vizin, sempre in omagio, la bicicleta e el tarlis che el ga sempre indosso. Telefonar Penei Cinghiai.


 


 

 

Causa Schengen, vendo prepusniza usada. Doprada ancora durante la ex Jugo e po rinovada per i paesi nati dal suo spapolamento, questa prepusniza ga i timbri de tuti i blochi da Plavije a Pesek, da Basoviza a Rio Ospo, da Santa Barbara a Caresana, da Rabuiese e Skofije fin a quel de Ciampore. Scrito in tre lingue, talian, sloven e crovato, xe un raro esempio de documento internazional e xe un simbolo esemplare dei raporti de bon vicinato tra stati e culture diferenti e el vol significar come ala fin fine se ga voludo darghe un taio a ste monade. Dismesso causa apertura confini per slargamento Union Europea, xe ogi un prezioso ogeto de colezion che no ga nissun. I timbri va dal 1954 fin l’ultimo fato ala mezanote del 21 dicembre domilaoto pena passà.

Se sè colezionisti seri e interessadi telefonar a Josko Brokolovich

 

 

 

Fantastiche cover per proteger el tuo telefonin. Le cover xe quei budei de plastica per involtizar el celulare che nol ciapi colpi, che nol se russi e che nol se rovini col fredo e con la piova. Per questo xe importante che le sia resistenti, stagne e magari anche cocole de veder. No stè comprar le prime che ve capita solo perchè le costa poco, mi ve posso dar cover veramente sicure e adatabili a qualsiasi marca e model de telefonin vista la capacità de slambrciamento. Sicure e valide ve garantisso mi che le go doprade per ani anorum e se trovè qualche sbrego ve lo cuso mi. Un vero afar per pochi schei, ideale come regalo de Nadal.

Telefonar a Ucio Budèl.

 

 


 

| torna su | home Mercadindio |






"El MercaDindio" è un copyright di TuttoTrieste.net di Massimo Barbo

Il disegno del MercaDindio è stato realizzato da Alessandro Bonin per TuttoTrieste.net

Tutti i diritti riservati - All rights reserved