DAGHE UNA MAN A TUTTOTRIESTE
E DAGHE ANCHE QUALCHE FLICA

LEGI L'APEL DE MAX, FONDATOR DE TUTTOTS

Quando che più de diese ani fa ghe disevo a qualched'un "pensavo de meter su internet qualcossa in triestin" me sentivo dir le robe più diverse: chi che me diseva "ma come te se insogni? Su internet legi tuti quanti e 'lora bisogna scriver in lingua!"; altri che me diseva "... fa quel che te vol!", altri ancora "...ndemo dei...!!!" e adiritura qualched'un me ga dito "...tse..." ma soradetuto me fazeva pensar quei che me diseva: "bel, ma te pensi che a qualched'un ghe poderia fregar?". Con tuti sti stimoli e incoragiamenti go messo (lostesso) onlain le prime timide pagine: proverbi, modi de dir, la storia dei veci mestieri e no go spetà sai per veder che el contator dele visite scominziava 'ndar su. Po rivava qualche imeil de complimenti e scominziava a rivar imeil de triestini, da Trieste a l'Australia passando per l'America, la Groenlandia e Coloncovez, che se proponeva de darme una man. De quela volta el sito xe cressudo e ogi xe tante de quele monade (ma anche robe serie) che ogni tanto me zerco anche mi che doveria gaver tuto soto controlo! Gnente schei, nissun sponsor, no se parla de guadagni ma solo voia de condivider con tuti el famoso morbin triestin, la storia de la zità, fotografie, ricordi, eventi e insoma un poco tuto quel che xe Trieste.

E desso parti la manfrina becada del capobanda de Uichipedia e debitamente modificada e tradota in triestin:
Tanto lavor a tempo perso de zente che ga voia de condivider una ridada e per questo mi ogi ve domando de proteger e sostignir TuttoTrieste.net! Solo cussì poderò tignir in pie el sito, farlo cresser e farve partecipar a tuti, quindi mandeme pur diese, vinti, zinquanta, zento Iuri magari anche qualche milin in carta prepagada ma pol andar ben anche zinquanta zentesimi, insoma tuto fa brodo e, come la scala musicle istriana: SOL DO FA SOL DO!
Perchè dirè ancora voi! Perchè se lo fa sior Wales de Uichipedia perchè no posso domandar soldi anche mi?
 

Max, fondator de TuttoTs.net
 

PS: ah si, sicome i contributi a TuttoTs no xe deducibili de le tasse e gnanche rimborsabili de l'assicurazion, ve prometo che coi schei che ciaperò beverò un spritz alla vostra salute!.

...e grazie a CayoEffe pe'l banner.