DAGHE UNA MAN A TUTTOTRIESTE
E DAGHE ANCHE QUALCHE FLICA

Te se ga mai domandà come mai che TuttoTrieste ga cussì tanti argomenti? Za de quando che mi iero picia [se parla de prima de la prima guera, ndr] me piaseva notarme tute le parole in dialeto che ghe sentivo dir ai mii veci perchè no volevo che un doman me li dimenticavo e nissun li gavessi dopradi. Cussì sul mio quaderneto me scrivevo "buiol", "farsora", "basabanchi", "vacas'cenzaboia", "tandul" e via via tanti vocaboli triestini fin che go impinido zentinere de quaderni. Cussì oltre a far content Pigna e Fabriano per i quaderni vendui in più, me divertivo con amici e amiche a far quiz dialetali, tipo:

"chissà coss'che vol dir zapabacoli?"

opur "Cossa ga perso el frate?"

e soradetuto "Che diferenza xe fra tocodemona e tocodefiga?"

E cuss' via per ani anorum a divertirse in compagnia.

Ma un giorno, grazie al avento de internet, go capì che podevo sparagnar i soldi de la carta publicando tante bele robete onlain. Me son messa a navigar e go visto che el sito più boba per svodar la mia cultura iera TuttoTrieste.net 'ndove che se pol trovar de tuto e de più e, come che disi el uebmaster, "ben no proprio tuto ma se fa quel che se pol".

Con questo cossa voio dir? No so, anche perchè go una zertà età e l'alzheimer procedi ma, se me ricordo un poco ve posso dir che TuttoTrieste xe dal 2000 che ingruma testi, cavolade, viz, monade, strafanici e tampagni ma schei gnanche un!

Quindi, visto che no gavè capì più de tanto l'apel che el uebmaster ve gaveva butà tempo fa, ve invito caldamente a farghe un'oferta a TuttoTrieste.net perchè senò ve capiterò de note in camera meno che ve spetè. E vardeme ben: fazo paura de giorno figuremose co'l scuro!

Marta Zaflaucich, colaboratrice de TuttoTs.net