CATERINA
Iero in Australia da ormai do ani, finalmente libero del contrato
che me ligava al governo australian e stavo per rivar a Kalgoorlie.
Mia mama la me gaveva dito che la zia Caterina viveva a Boulder, ma dove
fossi questa logo no gavevo la minima idea finché un zorno lo go
trovà per caso in un atlante a zirca 500 km a est de Perth, la capital
del'Australia Occidentale, un dei sete stati australiani con capital Canbera.
Iero rivà anca a trovar i sete fioi dela zia - Luis, Mark, George,
Sam, Joey, Margherita e Palma - e scriverghe. In una letera ghe spiegavo
che stavo per rivar e ansioso de dimostrar che savevo l'inglese, ghe gavevo
descrito el vestito e dito che "probabilmente el gavaria dentro un
omo, e de vardar ben perché quel podevo esser mi". El mio inglese
nol scoreva ben, ma co' scrivevo credevo de esser più bravo. Quindi
tentavo esperimenti destinai a falir, come apunto me xe capità in
sto caso. Al mio arivo ghe iera solo George, i altri i me gaveva ciapà
per mato.
Mio cugin el me ga saludà in ciacavo, el dialeto slavo parlà
in Dalmazia, che mi però capivo poco e parlavo meno. Ma usando un
pocheto de inglese, dialeto dalmata e moti de man podevimo intenderne bastanza
ben.
Volevo conosser zia Caterina, sorela de mia mama, anca ela nata a Lissa
e batizada col nome de Paolina, come Paolina Bonaparte, forse per gratitudine
a Napoleon che gaveva creà el regno d'Italia in Dalmazia.
La zia e la mama iera fie de Viekoslav Dragossevich e Maria Mamut, de origine
ebrea polaca. El nono Vieko el iera un farabuto e co vardo l'unica foto
che go de lu, con mustaci e barbeta, un vestito elegante, cavei a spazola
e oci furbi, capisso perché che el ghe dava sempre un fraco de grane
ala nona. El iera capitan de lungo corso dela pesca del salmon nel Nord
Atlantico e Teranova. Son sicuro, però, che nol iera interessà
solo de nove tere, ma più de nove aventure co' l se remenava per
el mondo. El gaveva continuà a navigar fin ala pension, quando el
gavaria podù scriver la sua autobiografia e contar tuto perché
la nona Maria no la saveva lezer. Ai sui tempi solo i mas'ci studiava.
El nono el gaveva avù una vita molto ativa perciò 'ndar in
pension ghe xe sta molto difizile. Anca dopo gaverse comprà una
barcheta de diporto per andar a pescar el se noiava a morte. Infati un
zorno el ga vogà al largo e, messa una stecca de dinamite nele braghe,
sula panza, el gaveva impizà la micia, partindo cussì pel
suo ultimo viagio.
Del matrimonio de Maria e Viekoslav iera nati do mas'ci e tre femene. Una,
mia mama, apena sposda, la xe 'ndada a Trieste dove mi son nato. Un'altra,
Barberina, la viveva co un napoletan diventà milionario a Trieste,
dove i lo gaveva mandà durante la leva militar. ln fin ghe iera
Caterina, sposada con zerto Ruliancich, emigrada a Sydney in un rion ciamà
"Alessandria", che ne ga fato creder che la fussi in Egito. Da
là i se ga trasferì a Kalgoorlie in zerca de l'oro.
E iera apunto là che andavo per trovar i mii cugini, ma come go
za dito, ghe iera solo George ala stazion. El me ga subito portà
fin l'auto pena comprada, una Ford modelo "T" modificada a camionzin
che pareva la machina de Ridolini, el comico del muto. La gaveva però
ampio spazio per el mio bagaio, pien de robe eletroniche ingrumade in do
ani.
George iera orgolioso de Kalgoorlie, e 'l voleva mostrarmela. Boulder -
che in inglese significa "sasso" - xe la zità gemela.
Mio cugin combinava i do nomi nel'unica vose de "Kal". Fazendome
da "cicerone" con impegno e serietà, el me ga contà
che, da quando Kal la iera diventada una municipalità, la produzion
aurifera gaveva ragiunto el valor de molte zentinera de miliardi de sterline.
Ma vardandome intorno no lo gavaria dito. Sta granda richeza no la apariva
nel'urbanistica de Kal che, inveze, pareva un acampamento dei minadori
de oro del Yukatan.
L'unica tecnologia de dar prova che ierimo nel ventesimo secolo vegniva
dai fili dela luce, anche se su pai tuti storti e ingropai come ragnatele,
che dominava la mezarìa dele larghissime strade. Gavevo l'impression
che i padri fondadori, impaurii del'eletricità, gavessi deciso de
meter la massima distanza fra questa e i marciapìe. Ma la vera ragion
iera che la posizion dei pai e l'ampieza dele strade iutava de darghe posto
ai longhissimi cari-treno, zucai de cubie de dozene de camei, co i doveva
far inversioni a "U".
I quartieri de Kal gaveva tuta l'aparenza de posti dove che se va solo
per magnar e dormir dopo zornade spese in quel stupro de madre natura che
se ciama industria mineraria. Kal iera ragion de orgoio per George e fassino
per mi, malgrado le lamiere ruzinie ricavade de fusti de cianuro de potassio
riciclade in teti.
Kalgoorlie la me piaseva nonostante la presenza dela ridicola statua de
Paddy Hannan, che gaveva trovà l'oro per primo e questo forsi perché
Kal iera più europea e meno britanica, per esempio, de Bendigo,
un'altra cità mineraria del Vitoria.
La xenofobia del Vitoria iera per mi un motivo de lassar Melbourne, ma
credo che la vera ragion iera la zia Caterina Dragossevich arivada a Kalgoorlie
al principio del secolo co Kal iera solo un vilagio nel deserto, senza
acqua e senza alcuna vegetazion e senza - gnaca pensar - condoti. Son sicuro
che la gaverà sognà de tornar ala serenità de la sua
verde isola nativa. Forsi la anelava a un ritorno a Lissa, dove la iera
nata e la gaveva vissù fin el zorno dela partenza, e a veder de
novo la casa e i genitori dei quai la parlava sempre.
Son sicuro anca che la viveva nela speranza che un zorno el suo omo el
gavaria trovà un mucio de pepite de oro, e alora sì, la saria
tornada. Go spesso rifletuto su quel che la zia podeva pensar in merito,
ma no podarò mai saverlo, perché al mio arivo Caterina no
la iera altro che un nome inciso su una freda lapide nel profondo silenzio
del cimitero de Kal. |
|
LADRI DE ORO
A Kalgoorlie no ghe iera lavor. Un ribaso dela Borsa gaveva portà
el prezo del'oro a un livel cussì basso che no convegniva sfrutar
le miniere de poca resa, quele che pò impiegava più operai.
A complicar le dificoltà ghe iera la polizia a blocar el trafico
del'oro robà e con questo l'economia dela zità.
El furto del'oro dele miniere de Kal no iera considerà roba disonesta,
fora che dei azionisti inglesi e dela polizia. Per la zente de Kalgoorlie
iera solo una forma de contrabando. Mi stesso no pensavo de esser disonesto
quando contrabandavo col tabaco, guadagnandome el pan nel'unico modo possibile,
nel dopoguera.
El punto de vista dei ladri iera che "quel che se trova se tien".
El trafico del oro iutava molti a gaver una vita agiada. Non ghe iera persona
in zità che no fussi coinvolta in quel trafico. Sta atitudine amoral
la me piaseva, come me piaseva la zente che iera coinvolta, tra la qual
ghe iera anca i mii cugini.
Ma robar l'oro no iera per un de cor debole perché domandava fegato
e un bon zervel. La polizia iera sempre in aguato, e obligava i ladri a
esser sempre più inzegnosi. Apena le pepite vegniva trovade se le
scondeva in loghi segnadi in modo che fussi riconossudi solo de chi doveva
ciorle a note avanzada, servindose dela tenue fiama de sicureza che i mindori
porta sul'elmeto. Mio cugin Mark gaveva questo compito. El se calava zo,
nel scuro più assoluto, nei pozi profondissimi dopo che tuti i iera
andai via. Se el se fazeva mal iera guai perché no ghe iera nissun
che lo gavaria iutà. Se tuto andava ben, el doveva tornar su col
pesante carigo de oro che rendeva la salitaa lenta e difizile.
El prossimo passo iera quel de trasportar el botin a Perth con l'auto.
La polizia, però, spesso fermava i sospeti e iera quindi necessario
inventar un novo metodo per ogni novo viagio. Uno dei più inzegnosi
- ideà de un mio cugin - iera de cavar do pistoni del motor dela
sua auto de sie zilindri e stroparli ala base, impinindo quindi le cavità
de pepite. Pararia che sto procedimento no gavessi efeto sul ritmo del
motor anca se la potenza calava. Un zorno un polizioto lo ga fermà
vardando dapertuto, anche soto el cofano. Nol ga trovà gnente de
strano ma el se ga congratulà col cugin per le bone condizioni del
motor. Poi, domandà un passagio, el gaveva dito che el motore filava
ben.
Un altro metodo iera de venderghe l'oro ai picoli minadori che i fazeva
veder de gaver trovà le pepite nela sua miniera, ma iera un truco
che no se podeva usar spesso. Un sistema che inveze funzionava ben iera
de coromper la polizia, sempre disposta a cooperar al prezo giusto. La
gente comunque preferiva i ladri ai azionisti inglesi, propietari de quasi
tute le miniere. Se se la godeva, infati, a robarghe a "quei bastardi
con bombeta e ombrel che no i sa cossa che xe el sudor dela fronte!"
Questo ategiamento me iuterà a capir la rivolta del'Australia Day,
1934, un evento ancora vivido nela memoria dei mii cugini e che conterò
più inavanti.
L'odio pei azionisti iera un aspeto dela xenofobia local, molto più
ampia de quela de Melbourne, direta solo ai emigranti del Sud-Europa. I
minadori de Kalgoorlie la gaveva su con tuti i foresti, causa la concorenza
pei pochissimi posti de lavor. Bob Alfirevich, marì de mia cugina
Pamela, morto recentemente, el gaveva emigrà al'età de quatordise
ani. Apena rivà dela Dalmazia el parlava poco inglese, e alora el
fazeva finta de tartaiar in modo che el suo azento no se sentissi e nissun
ga mai sospetà che el fussi un foresto, ma solo muto e sordo. Bob
el gaveva avù una vita molto più dura dela mia perché
el iera rivà nei ani 30, durante la grande depression quando esser
emigrante iera veramente un grave problema.
Nol podeva trovar lavor per molto tempo, ma ala fin i lo ga messo a costruir
bariere "anti-coniglio" - ghe ne iera do, longhe zirca 3'000
chilometri - che però serviva poco. I conigli i se muciava contro
de queste creando teste de ponte che i sui compagni usava per saltar la
bariera. Per fortuna de Bob i australiani no i ga acetà el consiglio
de un laboratorio italian che sugeriva l'uso dela peste dei conigli, la
mixomatosi; perciò l'impiego de Bob el ga durò a lungo. Co'
dopo - nel 1950 - se gaveva capì che i "teroni" no i iera
mone, la peste la xe stada introdota e i conigli i xe morti a miliardi,
ma Bob nol gaveva oramai più bisogno de quel lavor, e gnaca l'Australia
de quele bariere inutili.
Come Bob anca mi gavevo gravi problemi nel trovar un lavor e ala fin gavevo
deciso de autoimpiegarme: costruivo marchinzegni de uso domestico, un dei
quai consisteva de un afar per impedir che el fil del fero de sopressar
vignissi sopressà anca lu. Questo iera una copia de un prodoto simile
costruio in Italia prima de partir, ma, come quel, nol sburtava la zente
a far la fila per comprarlo. Giustavo anca radio, ma el guadagno iera misero,
e ala fin George me gaveva invità a vegnir a lavorar nela sua picola
miniera d'oro.
Per picola intendo la produzion, per via che la cavità la iera enorme.
Per calarme in questa no dovevo vardar zò dela scala a pioli per
no gaver giramenti de testa e magari cascar.
El pozo de acesso iera cussì fondo che George, visto de sora, pareva
una formigola. Co' andavo zo per la scala me se strenzeva el dedrio de
no far passar gnaca un ago. Infati lassavo le mie impronte digitali nei
pioli che strenzevo con la forza de una morsa! Iera un esercizio pauroso
"lo scendere e il salir per l'altrui scale" e spesso me
son domandà se i famosi versi de Dante no i se riferisse a una altretanto
altissima e pericolosa scala a pioli!
Bona de Dio che la mia pena la xe finida co' el socio de George el gaveva
protestà che la miniera no la podeva pagar tre persone. E xe cussì
che me son trovà de novo in braghe de tela: bon, bravo e disocupà.
|
 |
Eco qua una foto de mi e George nela sua miniera de oro de
cui parlo in sta storia.
La foto purtropo la iera molto picia e no ghe xe modo de netarla.
Mi son quel a destra.
(xe poco de strucar sula foto, no nassi gnente, ve go dito che la
xe picia!) |
|
|
NATO DISGRAZIÀ
Scominziavo a preocuparme per via che no trovavo lavor dopo che me
gaveva tocà andar via dala miniera de George. Ma co' se credi che
le robe va mal bisognarìa istesso ringraziar Dio, perché
ghe xe sempre la possibilità che le vada pezo. Infati a questo punto
un altro cugin, Mark, el se iera oferto de "iutarme", disendo
che dovevo provar el two-up, el "testa o crose" australian.
L'esperienza - la nona ragusea Marieta la me ripeteva spesso - xe solo
l'abilità de riconosser i sbai co li ripetemo. La gaveva ragion,
visto che me gavevo dismentigà dela mia prima esperienza a Numurkah,
dove con quel stesso zogo gavevo perso tuta la paga de do setimane.
Il casinò de Kal iera vizin de una granda montagna artificial de
sabia fata dela masinatura dela rocia aurifera; el "tapeto verde"
consisteva de un pavimento de zimento zircolar del diametro de sie metri
dove el "spinner" - cioè el mato che tira le do
monede in aria - se dava un gran defar. Tut'intorno ghe iera la solita
massa de omini - ale donne non ghe iera permesso de partezipar - che tegniva
manade de banconote in pugno opur soto un pie, e trategniva el fià
co i butava le monede. El "spinner" le piazava su una
paleta de legno - el "kip" -, el le butava in aria poi
el se blocava in posizioni ridicole, spetando che le se fermasse in tera,
zigando con una vosaza stentorea, "teste" o "crosi",
opur, "vinze el banco"! Seguiva esclamazioni de gioia o rabia
dei puntadori co' i soldi cambiava de man.
In meno de venti minuti no gavevo più un boro dele trenta sterline
iniziali, l'equivalente de zinque setimane de lavor. Maledivo el destin,
quando lo gavaria dovù ringraziar per gaverme indoto al zogo d'azardo
el sabato, co le banche iera serade, altrimenti gavaria sicuramente prelevà
altri bori e persi anche quei. Mark, per consolarme el me gaveva sugerì
de andar el zorno drio ala copa ipica de Kalgoorlie, perché gavarìa
vinto tuto indrio coi cavai, e el me gaveva imprestà, a tal scopo,
altre diese sterline.
Le corse dei cavai no le me ga mai piasso, forse perché el zio Gaetano
me portava spesso a quele del troto a Trieste, dove me noiavo a morte a
vederlo perder soldi. No me andava, in ogni caso, la zente che si gira
intorno a ste povere bestie palpandole indecisa se puntarghe sora o venderle
ai negozi de bassa maceleria come "carne de puledro" o magnar
pei gati.
La corsa gaveva atrato zente a frote e le signore le se iera vestie in
in puzparada come se usa nei "derby" inglesi. Ma i omini
- intenti a bever etolitri de bira e puntar i sui pochi risparmi ai sportei
del totalizator - no le vardava gnanca.
No ghe iera nissun amor pei cavai che no vinzeva, come dimostrà
in maniera dramatica nela prima corsa. Un caval el iera cascà rompendose
una gamba e i lo ga subito copà la dove el se iera ribaltà
con un colpo de pistola in testa. Devo dir che xe quel che gavaria dovù
farme a mi stesso, visto che iero pronto a scometer con soldi imprestai.
Infati li go subito persi tuti e go dovù domandarghe a Mark un altro
prestito per andar a brusarme el zervel non con un colpo de pistola ma
col'alcool.
Son andà a un "pub" oramai pien de zente e go scominzià
a bever bicer dopo bicer, e in gran furia anche se a Kal, col numero de
"pubs" più alto del mondo, le spine de bira le
'ndava vanti tuta la note.
Me son ciapà una bala madornal, e quela note go dormio molto mal.
Co me son sveià gavevo un tremendo mal de testa, ma anche idee molto
ciare cirza quelo che dovevo far: andare via da Kal!
Si'... Dovevo scampar se no volevo finir come zia Caterina, ciapada in
trapola in un logo senza futuro, tanto più che no gavevo nissuna
voia de finir nele miniere e no gavevo ancora ciapà quei malani
incurabili che par che gavessi infetà tuti i mii parenti: la febre
del'oro e i zoghi d'azardo.
Iera ora de moverme de novo. Per quanto mi dispiasessi separarme de George,
fate le valise, el zorno drio iero in treno per Perth. Dopo gaverghe tornà
a Mark i soldi che gavevo ciolto imprestito, me restava ancora squasi trezento
sterline nel mio conto in banca, fruto de do anni de risparmi: bastanza
per viagiar verso ponente.
Se le robe le gavessi continuà a andarme mal, gavarìo continuà
in quela direzion che ala fin me gavaria riportà in Italia e a casa
mia. |
|
I MOTI DE KALGOORLIE
El viagio in treno per Perth el gaveva scominzià con un mezo fis'cio
dela vaporiera che strassinava a stento i veci e scomodi vagoni con scassoni
che un pocheto ala volta i se iera calmai in moto uniforme. Gavevo giusto
el tempo de veder sparir la banchina dela stazion, che ierimo zà
in averta campagna.
Go vardà fora del finestrin fissando un panorama semi desertico
che saria continuà per tuto el viagio. Quela vista me ricordava
quanto che fossi unica questa Australia; solo un'isola, la più granda
del mondo. La gaveva scominzià come colonia penal, ideal per inchebar
senza scampo i galeoti, spesso mandai ai antipodi solo per gaver robà
una struza de pan. Mi inveze iero là sperando de guadagnarmela.
I binari che me guidava a Perth no i gavaria podù colegarse con
quei de l'Europa. L'Australia iera isolada dei oceani e questo me fazeva
paura, cussì gavevo deciso che me saria fermà per un pochetin
a Perth per pò tornar in Italia.
Margherita e Pamela iera ala stazion de Perth a spetarme e, come George,
le me ga saludà in dialeto ciacavo, squasi per no farme dismentigar
el nostro retrotera. Tuti noi vegnivimo originariamente da quela parte
del Litoral Adriatico che gavemo sempre ciamà Dalmazia. Una logo
colonizà nei secoli dai romani e poi dai veneziani e perso al'ex-Jugoslavia
dopo la prima guera mondial, meno che Zara, persa dopo la seconda guera.
Ma molto prima de questi confliti la fazeva parte del'Impero austro-ungarico,
che, seben acusà de divider e conquistar, el tolerava el multi-culturalismo
permetendo l'uso ufiziale dele lingue etniche. Questa tradizion la xe stada
confermada nel 1989 al funeral del'Imperatrice Zita d'Asburgo, a Vienna,
quando i elogi funebri i xe stai leti nele zinque lingue ufiziai del'ex
Impero.
La nazionalità del'individuo iera una roba personal influenzada
spesso dal matrimonio per cui Paolina - mia mama - la iera diventada italiana
sposando mio padre, mentre Caterina, sua sorela, la iera slava gavendo
sposà un slavo. Quel che, però, go sempre trovà afassinante
xe che mia nona Mamut e quela de mia moje Lidia, che la se ciamava Cvitanovich,
che no le parlava gnanca una parola de italian, le gaveva optà per
l'Italia.
Ghe iera una volta, dise le fiabe, una toleranza che ormai non esisti più.
Ma esisti, però, la Croazia e la Slovenia che volarìa unirse
al'Europa - dove che la toleranza verso le minoranze etniche xe essenzial
- però no le xe disposte a darla. Comunque queste considerazioni
puramente personali e introspetive no ghe le gavevo spiegade ale mie cugine,
anca perché no savevo come articolarle in inglese.
Palma la me ga subito ospità nela sua casa a Subiaco - un quartier
de Perth - in una cocola palazina de due piani de stile vitorian, apena
restaurada nel suo splendor original. Me son fermà per un pocheto
da ela e durante quel periodo la me parlava molto de sua mama Caterina,
che la iera una tipica dalmata. Go imparà, infati, che zia Caterina
e mia mama le se somiliava da creder che le fussi gemele. Questo iera particolarmente
vero nei casi de crisi e la più granda per Caterina iera i tumulti
de Kalgoorlie, "colpa" i mii cugini i continua a dirme "de
voi cabibi!".
Iera el 26 genaio - Australia Day 1934 - co' un barista italian, Claudio
Mataboni, provocà da un imbriagon australian, Jordan, che domandava
ancora de bever, el ghe gaveva molà una pel muso. El mato el xe
cascà batendo la testa sul marciapie e el xe restà seco.
Jordan iera un sportivo ben conossù e anca benvolù. El suo
problema, però, iera che - a parte l'abitudine de alzar el comio
- el gaveva un cranio de "scorza de ovo", cioè molto fragile.
Perciò l'istrutoria no la gaveva acusà Claudio Mataboni de
omicidio, ma solo concluso che la morte de Jordan iera dovuda al fato de
gaver batù el cranio de scorza de ovo contro el marciapìe
e no per el pugno direto che Mataboni ghe gaveva ficà.
Ma questo no gaveva convinto nissun e subito iera s'ciopada una rivolta
contro i foresti. I primi atachi iera contro le propietà dei emigranti,
specialmente i negozi che i xe stai svalizadi e poi dadi ale fiame. Poco
dopo i gaveva inzendià anca la casa de zia Caterina, scampada coi
fioi sule coline intorno de Kalgoorlie con solo quele poche robe che la
podeva portar a man.
Luis e Mark - Sam iera militar e Joey ancora un muleto - i iera restaii
a fabricar bombe a man fate de vaseti svodi de lata e dinamite, decisi
de vendicarse non solo dei piromani ma anca de tuto el sistema australian
del tempo. Mark, che lora gaveva disdoto ani, iera pena tornà da
una reclusion de undesi ani in un istituto de corezion de reputazion infame,
desso zentro de atenzion dela stampa e particolarmente quela de Kalgoorlie
che ga dedicà diversi articoli a Mark. Mio cugin el iera sta arestà
per gaver fato piz al'età de sete anni, nel 1921. Suo padre iera
morto da poco de "spagnola" e la famea no gaveva un guadagno,
per cui Mark nol podeva 'ndar a scola ma doveva lavorar per sfamar sistesso,
madre e fradei.
Zia Caterina, rivada de poco, no la parlava inglese bastanza ben per difender
el fio, che el giudice, arogandose anca el ruolo de avocato acusator, el
lo ga condanà ala reclusion de undise ani in un istituto de corezion
nel rion Clontarf de Perth. Quel che i fioi ga soferto da parte de i preti
xe incredibile e la stampa australiana in questi zorni scrivi continuamente
de queste brutalità. I padri irlandesi infati violentava sessualmente
i sui aluni e quei che i se ribelava vegniva punidi in maniera bestial.
Parlando con Luis per verificar sti fati, el me ga dito che lu stesso el
iera sta distirà in tera senza sensi da un pugno de un prete. 80
ani dopo l'evento Luis sente ancora un astio intenso per quel "padre
cristian". Fortuna che el xe riussì a scampar nel Queensland.
El gaveva oto ani.
Mark inveze no ghe la gaveva fata. A 14 ani i lo gaveva trasferì
ai lavori forzai fin a l'età de 18 ani quando che i lo gaveva mandà
a pié libero. Questo xe un esempio dela giustizia britanica de sedise
ani prima del mio arivo. Gnanca i fassisti no i iera cussì disumani.
|
|
SORELE
Disgustai dala brutalità del sistema giudiziario britanico, i mii
cugini gaveva tute le ragioni de esser infotai. I iera quindi combatenti
tremendi durante i moti del 1934.
El resto dela famea iera scampà nel bosco, in tende alestide con
mezi 'ssai primitivi in campi messi su in furia e dove che ghe mancava
l'acqua, non ghe iera da magnar e el fredo che vigniva dal deserto de note
iera intenso, visto che no se podeva impizar foghi per no atirar i insorti.
Nel fratempo la furia dela plebe aumentava. Molti australiani diseva che
i italiani taiava gole con suprema fazilità. La morte de Jordan,
secondo lori, iera un assassinio a fil de cortel, probabilmente eseguio
no de un singolo ma de grupi de quei teroni bastardi. Iera una vergogna,
i diseva, che no fussi possibile bever una bira in pase in publico senza
corer el ris'cio de esser copai vigliacamente dei "cabibi". Persone
come Mataboni le dovaria esser impicade. (Fato sta che el xe morto solo
poco tempo fa a 98 ani).
I più moderai, per quanto no i ghe credessi ale esagerazioni dela
plebe, i iera d'acordo che i foresti iera diventai spavaldi. Per esempio,
i se grupava sul marciapie sforzando le signore a caminar in strada per
evitarli. Questi "cabibi" pensava forsi de esser paroni del mondo
giusto perché i gaveva fato do schei?
L'antipatia contro i foresti iera scominziada co' qualchedun gaveva ciapà
un lavor che i britannici pensava che fussi suo de lori. Per cui l'odio
contro le persone "diferenti" iera talmente radicà che
el spetava solo una falisca per s'ciopar e questa la iera rivada co la
morte de Jordan.
La rivolta la ga scominzià col bar "Casa Via De Casa"
del Mataboni, messo a fogo. Co' i pompieri i xe rivai, la plebe ga taià
le pompe de l'acqua mentre i giovinastri robava tuto el robabile. Fortuna
de Dio che nissun ga perso la vita nel'inzendio. I più zovini gaveva
scoverto el paese dele lecornie, svalisando i negozi de dolzi molti dei
quai no iera gnaca de foresti!
Un omo che gaveva robà una tromba, el ga scominzià a sonar
"al'ataco", mentre la plebaia se iera impossessda de un tram
riversandose a Boulder. Due hotei italiani, Cornwel e Main Reef
i xe stai subito brusai, ma el "Quartier cabibo" - dei europei
- no i lo gaveva tocà, forsi perché italiani e dalmati iera
là a difenderlo, con Luis e Mark in prima fila. El zorno dopo la
polizia ga serà i bar e la fola ga subito perso el spirito de combater
co'ghe ga mancà quel de la boza.
Ma la pase ga durà poco. Esplosioni nel "Quartier Cabibo"
indicava che la bataia per impossessarse la iera scominziada. Luis e Mark
butava le bombe a man fate in casa dopo che i australiani iera entrai prima
in un bar per incarigarse de alcool, pò in un negozio de armi svalizandolo.
Armai fino i denti, i se gaveva butà contro i dalmati e italiani,
a scapito dela vita de un de un australian copà de una cortelada.
Un montenegrin, a sua volta, el se ga ciapà una palotola mortal
e molti i xe stai ferii fin che i rinforzi rivai dela capital, Perth, ga
rivà a ristabilir la pase.
Le propietà brusade le xe stade rifate e zia Caterina la ga finì
col gaver la casa rifata - de baraca che la iera - in un domizilio vero
e proprio, parzialmente ereto sul tereno del vizin, per cui anche questo
el xe diventà proprietà dela zia.
Cussì ga finì un incubo spaventoso. 56 ani dopo un pronipote
de Caterina, Filip, diventava membro del "Club dei 26esimi" per
esser nato nel'aniversario de quel'evento crudel, Australia Day, 1934.
Come già dito l'afinità de caratere dele due sorele, Caterina
e Paolina, in caso de crisi iera incredibile. Le perdeva el senso dela
realtà, come quando Caterina gaveva mandà Palma a cior vivande
in un zentro alestio per iutar le vitime. Palma la se iera persa per strada
e la iera tornada con molto ritardo. Per strada la iera cascada dela bici
perdendo una quantità de risi. Al ritorno zia Caterina la ghe zigà,
no per el ritardo, ma pei risi persi!
Un evento simile me xe capità a mi a Zara la domenica del 28 novembre
1943. Iera una bela matina de autuno co' la pase dela mia famea la xe sta
distruta per sempre. Un stormo de aerei aleati, rivà a motori distudai,
ga scominzià a molar bombe a tonelate. Semo tuti scampai zo per
le scale e soto el campanil del duomo vizin de casa. Subito dopo una seconda
ondada 'ssai più forte no ga fermà mia mama de domandarme:
"Amedeo, go lassà el sugo dela pasta sul fogo. Valo a cavar!"
Chissà cosa fazeva scatar queste reazioni, ma sono zerto che nissun
intervento uman o divin gavaria mai cambià ste Dragossevich, perché
le iera dalmate e le seguiva el deto de san Girolamo che implorava Dio
con la preghiera: Parce mihi Domine, quia dalmata sum.
|
