|
UNIVERSITA'
El ritorno a Perth no'l xe stà bel per gnente. Dopo sie ani
in afito el nostro bungalow el iera come una stala de porchi. I inquilini
australiani, come CHE go zà contà in sta storia, no i bazila
drio la proprietà dei altri. La nostra alcova pareva come una baraca
dei bassifondi che se vedi nei documentari del Terzo Mondo. La fazeva schifo,
e, pezo ancora, i nostri mobili no i iera rivai cussì gavemo dovù
dormir sul pavimento nudo.
Vedevo la profonda delusion nei oci dei mie fioi e de Lidia, e me go sentì
come se gavessi mancà al mio dover de pater familias, ma
non ghe podevo far gnente, fora che prometer che gavarìa trasformà
la nostra dimora in una che gavaria fato tuti contenti e orgoiosi.
Cussì go scominzià a costruir, co le mie man, una camera
de pranzo, una cantina, una mansarda e una pissina, dopo gaver governà
i dani. Go fato onor ala mia promessa, dimostrando anca che xe sempre possibile
trasformar sconfita in vitoria.
Xe sta per caso che semo tornai al nostro vecio indirizo: gavevo fato domanda
per un lavor a Melbourne, che no la me gaveva mai piasso. Iero stà
acetà, ma de passagio a Perth go otegnù un lavoro al'Università
del'Australia Ozidental, (UWA) - con la qual gavevo avù contati
comerciali ani prima. Dopo la vendita del G-15, gavevo instalà un
marchinzegno ala Facoltà de Agraria, anca se no iero stà
mi a venderlo. El preside del reparto lo gaveva comprà lu dela dita
dove che lavoravo prima de andar a Carnarvon.
Ciamà Flying Spot Particle Resolver, ("scansor a punto
volante", per chi che se intendi), el doprava la stessa tecnica dela
mia trasmitente TV de ani prima. Sto mostro el iera stà ideà
per contar partisele nel rumine ovin. Le piegore gaveva un buso in un fianco,
stropà de un tapo de suro. Via sto tapo, se podeva cior roba dal
stomigo e po' analizarla per veder se el mangime el iera stà digerio
ben o no. No pareva che ste bestie le sofrissi causa l'operazion, anzi
le pareva normali al punto che i mii fioi credeva che tute le piegore le
fussi nate coi busi e tapi nel stomigo.
L'abilità dele piegore de soportar sto tratamento xe prova che el
Padreterno xe un inzegner più bravo de quei che gaveva ideà
la machina per contar le partisele, perché questa no la saveva contar
per gnente. La iera el prodoto de una società de Londra, Cintel,
acronimo che stava per Cinema & Television. La mia opinion xe
che forse la saveva far film, ma no la saveva far i conti in nissun modo.
Non capivo come che el marchinzegno fussi stà comprà dopo
che un altro, vendù ai Russi, el iera diventà famoso per
la stessa ragion de no saver contar. I risultati dei contegi i iera s'cetamente
casuali e i gaveva la stessa atendibilità dele mie dichiarazioni
dei rediti. Xe sai raro che le mie some corispondi a quele dell'Ufizio
dele Tasse.
Questa iera quindi una macia su de mi che no me meritavo perché
no la podeva darme, causa il mio coinvolgimento tecnico, una bona reputazion
per scominziar el lavor al'Università. Speravo de poder giustar
i erori (dela macchina, no i mii), ma oramai iera tropo tardi: el conta-partisele
i lo gaveva butà sul mucio dele scovaze dele robe inutili e condanà
a no capelar mai più.
Sti ricordi no i iera bei, ma el "campus" iera belissimo. L'Università
del'Australia Ozidental ocupa una zona campestre tra le più bele
che gabio mai visto. La iera un vero e proprio soborgo assai vizin de Perth
e sul fiume Swan. Là se combinava l'ambiente idiliaco dela campagna
cola convenienza de una zità assai moderna a soli dò passi.
La magior parte dei edifizi universitari i iera stai fati durante la depression
dei ani 30 usando manodopera no specializada. La piera calcarea per la
costruzion vegniva da una cava del campus stesso pò trasormada in
anfiteatro.
Winthrop Hall, l'Aula Magna, iera costruia con sta piera e la xe
semplicemente magnifica, anca se la porta ancora i segni dela depression:
i chiostri no i xe stai mai finidi e i segni dele forme del zimento i xe
tanto evidenti quanto le gavaria volù Nervi nele sue opere architetoniche
in piera artifizial: el calcestruzo.
Come quasi tuti i altri edifizi del campus, Winthrop Hall ga un
stile mediteraneo unico. I capitei dele colone dei chiostri i xe tuti diversi,
come nel Palazo dei Dogi a Venezia. Ghe xe anca una tore col'orologio,
copia perfeta de quela del Palazo Gonzaga a Mantova in Piazza Sordello.
La grande influenza mediteranea sui edifizi, coi copi mezi tondi, i chiostri
e el verde per tuto, fazeva creder de esser in Europa. Iera un vero paradiso
dopo la nudità del Nord-Ovest australian. La sua atmosfera serena,
la flora australiana e i prà curai a perfezion, dava un senso de
pase, ordine e santità. Ma sto tempio dedicà ala cultura
più ecelsa xe un'arena inteletual dove che i gladiatori academici
i combati bataie de mati, senza tregua, spronai dela necessità de
publicar o morir. Questo me portava spesso a trovarme nela situazion del
ripien de un tramezin: vegnivo morsigà de tute le parti.
El mio lavor - che gavevo ciolto per no andar a Melbourne - no solo el
iera banal in confronto de quel de la NASA, ma spesso cagion de enormi
pressioni. El mio compito iera quel de tegnir i academici a distanza del
Retor. Sto guardian del bastion de l'alta cultura epistomologica no'l voleva
grane e mi dovevo difenderlo de queste.
Come Diretor del Zentro Mecanografico dovevo anche assegnarghe turni ai
studenti per iutarli cole tesi de laurea e anca protezer l'instalazion
contro sti stessi studenti, vandali che zercava de infetar el computer
con virus de ogni tipo per distruzer programi de altri studenti ma che
i distruzeva anca le informazioni de utenti del tuto inozenti.
Dovevo anca assegnarghe turni al'ufizio del Retor che stampava carta a
chilometri, sforzandome de ordinarla a tonelate per trasformarla in scovaze
inutili causa i soliti sbai che rendi la vita de un programator un incubo
e quela dei operatori un inferno.
Insoma iero cascà in una foiba senza scampo! Ma forsi che no. |
|
SE MARTIN NO'L XE DE BARCA...
El computer iera un sistema assai più avanti de quei dela
NASA, perché el primo del tipo "Multi task", che vol dir
che se podeva girar tanti programi tuti insieme. Ma no ghe ga volù
tanto per farlo squasi in tochi. Tuti quei che i se credeva esperti - e
in un ateneo tuti i se credi tali - i ghe gaveva tacà robe strane,
cussì che el sistema pareva come un de quei treni del Terzo Mondo
coi passegeri sui teti e che pica de tute le porte e finestrini.
El se rompeva sempre e anca se iero pena tornà dela NASA, cioè
pronto de iutar, la regola voleva che restassi aministrator e no me metessi
a far el giusta-tuto. Questi iera i ordini dela segretaria britanica, che
me ricordava una Fräulein nazista ma che gaveva assai influenza nel
dirizer el zentro mecanografico. Come al solito, gnanca a ela no ghe 'ndava
in testa che un cabibo podessi ver i zervei per governar un computer. In
ogni caso no ghe piasevo, forse perché la gaveva qualca defizienza
orgasmica, roba che no iera parte dele mie responsabilità anca perché
iero sposà.
Per zercare de risolver sti problemi i gaveva impiegà un neolaureà,
spaventà come se dovessi cior in man el controlo de un aroplan dopo
che el pilota iera pena morto de infarto. El mulo, comunque, no savendo
a chi domandarghe aiuto el xe vignù de mi e cussì gavemo
giustà tuto.
Sta mia prestazion la xe stada riconossuda subito e me ga iutà nela
mia cariera. De un momento l'altro iero come Figaro, el barbier de Sivilia,
perché tuti i me voleva: qua, là, su e zò! No ghe
ga volù assai vanti che vegnissi richiesto de altre facoltà
dove che go introdoto - per la prima volta - i minicomputer per automatizar
i esperimenti. Cussì i me ga beatificà elevandome al posto
- ve par poco! - de consulente personal del Retor. Go cul, o no!?
(No, Ameeo, cul xe qualcossa altro. Quel se ciama bravura! - N.d.r.)
L'uso dei mini iera una granda novità e ghe dava modo ai studiosi
de far esperimenti de tuti i tipi. Bastava cambiar programi inveze de crear
nove aparechiature per ogni novo esperimento, e con questo go averto un'era
nova. Me gaveva iutà el fato che, sicome che i gaveva serà
la stazion NASA de Carnarvon, iero rivà a farme dar tuti i tochi
de ricambio dela stazion. Un autocaro, stracarigo anca nel rimorcio, el
xe rivà al'ateneo e, malgrado che robe come i condizionatori de
aria i fussi finii subito nele case dei bravi professori, me xe restà
bastanza per far un fraco de computer.
El dipartimento de Psicologia, che fazeva rizerche su la stereo-otica umana,
me gaveva domandà de darghe una man. Le mie aparechiature ga subito
atirà l'interesse de l'aeronautica militar americana che voleva
capir perchè che fussi cussì difizile camufar ogeti a tre
dimensioni, come aroplani e missili. I gaveva zercà de mascherar
ste machine de guera in diversi modi, ma l'unica maniera iera quela de
ficarle soto tera. Questa xe la ragion che i Americani e i Russi ga finì
co'l crear silos soteranei per i sui ICBM. El mio lavor gavaria confermà
che un ogeto tridimensional crea in ogni ocio un'imagine diferente de l'altro,
un paralasse - che voi, che sè cussì ganzi, gavaré
subito capio che xe quela diferenza otica che ne fa veder in tre dimensioni
- impossibile de sconder.
L'aeronautica militar americana gaveva i schei e mi gavevo el tempo per
scominziar una serie de esperimenti che gavaria incuriosì tanti
luminari internazionali. Tra questi ghe iera el Professor Bela Julesz del
Bell Laboratory de New Jersey, in America.
Julesz el iera un emigrante ungherese, pionier nel campo dela stereotica,
che gaveva scoverto che xe possibile gaver una vision tridimensional anca
senza gaver un'imagine con dati mono-otici (vedi imagine qua soto). El
creava dò quadri che no iera altro che un mucio de puntini casuali,
ma se una copia vegniva vardada co i ociai stereotici se podeva veder imagini
de quadrati e triangoli che emergeva o i se sprofondava nela carta dove
che i iera stampai. Per no pindolarme su questi detai tecnici, ghe sugerisso
al letor de darghe un'ociada al'imagine che go riprodoto, dove che se vedi
tre mati che cori drio a una bala de fooball. Sta imagine usa el prinzipio
de Julesz pena discusso [per vèder l'imagine
fracar qua].
El studio dela percezion visual umana el iera entrà in una
nova fase. L'aprocio scominzà dal Prof. Julesz ga permesso de studiar
la vision umana col metodo dela "scatola nera". Questo vol dir
che no cori verzer crani o ficar sonde nei zervei dei animai. La vivisezion
iera molto usada in quel tempo, quando i poveri animai i li ciamava "bestie"
forsi per portarli a un livel infimo e quindi minimizar la crudele realtà
dele torture che i doveva sofrir. El novo metodo eliminava questo.
Bela Julesz gaveva scoverto anca che noi vedemo el mondo per via de un
singolo ocio "ciclopico", che saria poi el nostro zervel, un
super-computer come no ghe ne xe altri. Però el preferissi el caos
ale robe ordinade. El mio compito - in ste ricerche - iera de costruir
un sistema TV dove che le imagini le doveva esser fate con una scansion
casual. Go trovà modo de atuarla e Bela Julesz me ga dito che le
mie idee gaveva bone qualità comerciali e de scominziar una mia
atività fori dal'università, verzendome cussì prospetive
tute nove.
No iero sicuro che meterme solo in afari fussi una bona idea, ma de riff
o de raff dovevo provar, prima o dopo. |
|
CIAVE, SPIE E UN LITRO DE QUEL BON
Me capita de trovar, ogni tanto, una boza de whisky ancora piena
nei loghi più strani del mio giardin. No xe che la xe cressuda come
un fungo o che qualche satiro se la gabi dismentigada dopo un bacanal.
La verità xe che la go piantada mi là, ani fa.
Tuto ga scominzià cussì. Se sa che problemi difizili i vien
superadi dopo una bona dormida. "La note porta consilio" diseva
la mia nona ragusea. Perché? Perché durante el sono el zervel
el se azera, come, liberandose dele scovaze de pensier inutili che ghe
intriga. Rinovà in sto modo, la matina drio o anca la note stessa
el zervel trova squasi sempre una soluzion.
Oltre che dormir, un altro modo de azerar el zervel xe con l'alcol. Le
mie osservazioni sugerissi che un otimo "reset" se ghe lo pol
dar anca con un bon sluc del'elisir scozese. El bever forsi iuta a brusar
el zervel (se fato smodatamente), ma mi credo che assai prima el brusa
via le scovaze che ghe impedissi de pensar giusto.
De problemi ghe ne gavevo tropi, e le boze de whisky me iutava a superarli
e, per no far rabiar Lidia, le scondevo dapertuto. Go scominzià
sta pratica de "rinovo zerebral" per via de un problema tecnico
che no rivavo in nissun modo a superar e che riguardava un critografo.
Al'università me iero inacorto de esser, senza voler, nel campo
dela cifratura segreta. I numeri casuali che dopravo per la scansion dele
imagini stereòtiche iera ideali per codificar le comunicazioni dele
banche e dei servizi segreti de spionagio e controspionagio. Per capir
questo devo spiegar de come che se codificava i messagi fin dei tempi de
Marco Caco.
Za i Greghi e i Romani, secondo Erodoto, i usava la cifratura e Plutarco
el ga descrito la scytala dei Spartani. Questa iera una bacheta fata in
dò copie precise, dove che i involtizava su (a vida) una strica
longa e fina de pergamena, per pò scriverghe sora el messagio pel
longo. La pergamena vegniva disvoltizada e spedida a chi che la doveva
lezer, operazion che el fazeva involtizandola de novo su una seconda bacheta
identica. Ciaro che se la seconda bacheta la gaveva un diametro diferente
no se rivava a leger un boro.
Giulio Cesare xe sta el primo a doprar un vero sistema de scritura cifrada
cambiando ogni letera del testo con un'altra del alfabeto spostada de un
zerto numero de posti rispeto ala posizion original. Un altro metodo iera
quel dove che i carateri i vegniva missiadi secondo zerte regole.
La combinazion de sti metodi iutava la sicureza. Venezia, el Vatican e
i Re de Francia doprava metodi rafinai al punto che i saria difizili de
decifrar anca ogi col computer. Sti sitemi doprava ciave segrete che vegniva
adizionade al messagio. Per decodificar bisognava gaver una ciave identica
e far una sotrazion, e le tecniche moderne dopra "ciave" de numeri
casuali. El problema xe che ghe vol una sincronizazion dele ciave. Questo
xe el problema che me ga portà al bever.
Gavevo pena vinto un apalto per la fornitura dei aparechi critografici
ala Polizia Federal australiana, a Canberra, la capitale de l'Australia.
Iera un contrato prestigioso e finanziariamente assai importante per la
mia picola dita ancora in fase de svilupo.
Sto prodoto vegniva de un altro che serviva per le loterie nazionali, che
se ciamva ALPS, Automatic Lottery Prize Selector, e garantiva numeri casuali.
Se basava a sua volta su un metodo per crear el "caos eletronico"
che gavevo doprà per studiar la psicofisica del sistema visivo al'Università.
De bon triestin e dalmata, credevo che far caos - o casin - fussi fazile.
In realtà la casualità xe un fenomeno difizile de copiar
in un laboratorio. Ala fine go deciso de usar el zogo de "Testa o
Crose" che nela version australiana ga dò monede e che el me
iera costà un ira de Dio co son rivà.
I critografi i ga bisogno de una condizion squasi assurda: la creazion
de numeri casuali sì, ma che sia i stessi e nela stessa sequenza
per tuti i utenti legitimi. Che saria come dir che i muli Fabio, Fulvio
e Bruto - che vivi via l'un de l'altro - ciolessi dela scarsela un stesso
numero de monede, le butassi in aria e i se spetassi de gaver el stesso
numero de teste e de crosi.
Quela volta go dovù doprar sequenze pseudo-casuali, che se pol generar
con la versione eletronica dele carte de zogo. El total dele combinazioni
che se pol otignir missiando 52 carte xe un numero de 68 zifre. Se tuti
al mondo contassi un milion de combinazioni al secondo, 24 ore al zorno
per 80 ani, no i riverìa a contar un milionesimo de un miliardesimo
del un per zento de tute le sequenze possibili. Xe un bon modo de crear
numeri pseudo-casuali come ciave critografiche.
Ve fa confusion? Spero de no perché devo continuar con sta storia.
Spetarse che tuti i mazi de carte i sia missiadi nel stesso modo in località
remote xe impossibile. Una soluzion xe de missiar i mazi nela stessa maniera
e de consegnargheli a Fabio, Fulvio e Bruto. Ogni carta nela sua posizion
corispondi a un codice critografico, con un valor acordà tra de
lori ma sconossù ai altri, cussì la codifica la xe valida
solo per lori. Metemo che mi voio trasmeter un numero telefonico - per
esempio, 276 3000 - in forma critografada, mi faria cussì:
1 - Ciolarìa la prima carta del mazo (identico a quei de Fabio,
Fulvio e Bruto), che, disemo, la val 19. Pò farìa la soma
del mio primo numero, el 2, e trasmeterìa cussì la soma,
cioè 21.
2 - Fabio, Fulvio e Bruto ghe cavaria al 21 la ciave, cioè el 19
dela prima carta dei sui mazi, (missiai nel stesso modo del mio) et
voilà, i gavaria el 2.
La carta la vegnaria messa pò in fondo del mazo, e el processo se
ripeterìa per tute le altre cifre del numero telefonico. Bisogna
però esser sicuri de scominziar coi mazi nela stessa posizion, ossia
cola stessa carta in zima. Come far? Gavarìa podù doprar
un preambolo, tipo "un, dò e tre, trova un fante e dò
re che un messagio per ti ghe xe", o qualcossa de simile. Ma gavaria
dovù interomper la comunicazion per mandarlo. Tute le idee che mi
vegniva in testa no le andava ben. Iero disperà perché ris'ciavo
de perder l'apalto.
Xe sta a sto punto che l'alcol me ga iutà. Dopo gaver slucà
meza boza de whisky son cascà in un sono profondo e co me son sveià
gavevo un mal de testa de mati ma anca la soluzion, che iera de una semplicità
unica. Inveze de doprar le carte dela zima del mazo le gavaria ciolte insieme
col codice.
Per esempio, somandoghe al 2 (cioè la prima cifra del numero telefonico)
el 19 (cioè la ciave critografica) gavevo avù 21, lora gaveria
ciolto la 21esima carta del mazo per codificar la prossima cifra.
Se la soma me gavessi dà 45, gavaria usà la 45esima carta
per la prossima codifica, e cussì via. No conossendo l'ordine dele
carte nei mazi o el valor dela prima carta, cioè la ciave, una spia
gavaria poca speranza di decifrar el messagio critografà.
Me dispiasi de gaverme pindolà con sta fazenda, ma la xe importante
per capir el resto. Per consolar el letor finirò sta storia con
quela de come che Bacco ga inventà el vin. Un zorno co' el iera
in campagna el ga trovà l'osso de un useleto e 'l se lo ga messo
in scarsela. Più inavanti el ga trovà un più grando,
quel de un leon, che el ga messo in un'altra scarsela. El iera squasi a
casa co el ga trovà un de un muss. Fato un buso el ga sepelio i
ossi e pò el se ga dismentigà de lori.
De questi xe cressuda una pianta che ga fato un fraco de ùa. Bacco
el ghe ne ga magnada un mucio, lassando però un pèr de graspi
schizadi in una piàdina, indove che i se ga fermentà in vin.
Co' Bacco lo ga zercà, el se ga subito sentì alegro come
un useleto, pò forte come un leon, ma ala fin el ga scominzià
a comportarse come un muss.
Morale dela favola: se te bevi te diventi mona. La storia, però,
non tien conto che l'alcol pol esser anca de aiuto.
 |
Ecome qua con una dele mie crature... ma no, cossa gavè
capì?! Con un critografo! Quei altri i xe assai più fazili
de far, anca se magari più difizili e più longhi de programar. |
|
|
CRICK E CROCK
De tuti i eventi dela mia vita che me ga sburtà al bever,
come la distruzion de Zara e i disastri finanziari, no me ricordo che ghe
sia stado nissun più forte dela critografia per farme slongar la
man ala boza de whisky. Ancora pezo se me fermo a pensar ale agenzie segrete
de spionagio col nome - puramente eufemistico - de "inteligenza
militar", MI.
I Inglesi i xe assai orgogiosi dela MI e i ne volaria far creder che l'agente
007, James Bond iera una persona vera. Albert Broccoli, che produseva i
film de Bond, se vantava che i sui antenati gaveva "inventà"
i brocoli, una bala che se acorda ben con tuta le monade dei MI, brocoli
per ecelenza, anche se in realtà quei veri i vien dal Medio Oriente,
importadi in Europa fin del tempo dei Romani. Come Sherlok Holmes, James
Bond no solo no'l xe mai esistì, ma nissun dei agenti dela MI che
go avù ocasion de conosser mi no iera nel lista de zime mentali.
Spero che quel che vien tra poco possi convinzer chi lezi sta storia. Scominzerò
col contarve che entrar nel mondo dele spie vol dir entrar in una società
dele più infami e corote, ma anca in una dele più sempie.
Darò un esempio ciolto dele memorie de una spia, Peter Wright, che
ga scrito The Spy-catcher, che in triestin vol dir "Ciapa-spie".
El libro - che dimostra quanto poco che sia rispetada la libertà
dei scritori nela patria de Shakespeare - el xe stà messo al bando
nel Regno Unito per ordine de Margaret Thacher. Peter Wright lo ga publicà
cussì in America e col'aiuto dela publicità gratis dela "Signora
de Fero", l'opera la xe andada a ruba e lo go fato miliardario.
La carateristica più evidente de sta opera xe la sua stupidità.
In un esempio - a pagina 72 del'edizion original in inglese - un colega
del Wright - John Taylor - gavaria inventà un sistema d'ascolto
"ativà de onde corte, alta frequenza e megacicli",
definizioni che però xe la stessa roba. Saria come dir che Wright
gavessi fato l'amor con una "mula, putela e donzela". Xe ciaro
che Peter Wright parlava a vanvera.
L'unica descrizion coreta xe quela dela "sofisticazion" dei strumenti
usai dale spie: - cazavide, martei e lime - per piantar microfoni primitivi
nele ambasiate russe. Son convinto che la ragion per meter al bando el
"Ciapa-spie" iera che i metodi dei inglesi iera cussì
primitivi de imbarazar e i gavaria distruto l'aureola de i MI che i romanzi
del'agente 007, per no dir i sui film, zercava de crear.
Gnente de quel che l'agente 007 dopra nei sui romanzi e nei film, xe mai
esistio. No ghe xe stade mai pene stilografiche che se trasforma in telecamere
per trasmeter imagini al GCHQ - Centro dele Operazioni, né elicoteri
tascabili e gnanca canoni sconti nele spile de cravate: solo cazavide,
martei e lime! Tuto el resto xe solo bale, bianche, rosse e zale, bale
in quantità, come vol la famosa canzon!
Un altro esempio che volaria contar, visto che semo in argomento, xe quel
dela cifrante "Enigma" che doprava i tedeschi nel'ultima guera.
La lezenda volaria che i codici i sia stai decifrai da Alan Touring.
L'idea de sto tipico inglese "calmo e rassicurante con la sua bombeta
e ombrel" col genio tipico dei albioni, che riva a decodificar l'"Enigma",
la xe falsa. La realtà storica xe che dopo l'armistizio del'8 setembre
1943 un soldà italian ghe ga consegnà i codici segreti ai
aleati senza che i Tedeschi savessi. Co' sti codici e una cifrante che
i inglesi gaveva trovà, Touring con un suo calcolator eletronico
- el MASTODONT - provando e riprovando diverse ciave, el ga rivà
a decodificar l'Enigma. Questo iera possibile perché le ciave del
tempo le iera semplici. Se i tedeschi gavessi doprà un mazo de carte
nela maniera che go pena descrito, l'intelligenza militar inglese la saria
ancora là a decodificar.
Malgrado le rivendicazioni dei aleai, no risulta che i gavessi mai inventà
un suo propio sistema critografico. Infati, in un elenco publicà
nel 1928, cioè undise ani prima del'ultima Guera Mondial, i inglesi
gaveva solo un sistema de cifratura mentre i Francesi i ne gaveva oto,
i Tedeschi sie e noi Italiani dò. I americani i ga un che se usa
nei bancomat, el DES, Data Encryption Standard, che ga 56 "carte".
Il mio critografo ghe ne doprava 32mila, e xe fazile capir perché
el preocupassi i servizi segreti internazionali: no i gavaria avù
modo de decodificar i messagi cifrai col mio sistema. La sua "forza"
iera rispetada in tuti i paesi dove che li go esporti, inclusa l'Italia,
la Francia, la Svizzera e la Germania.
El mio cliente più prestigioso iera, però, la SWIFT, l'organizazion
bancaria internazional de più de 2'500 banche. La SWIFT usava il
sistema per protezer i trasferimenti bancari eletronici. Su questa società
i ga scrito perfin un romanzo dove che la sua critografia - che poi iera
el mio sistema - la iera cussì robusta de indur i Russi a scambiare
un satelite dela SWIFT con un de lori.
Comunque col mio contrato dela SWIFT pensavo che finalmente i mii sogni
de stabilità economica i stava per realizarse. Ma no gavevo fato
i conti con le spie, perché le xe stupide ma questo no vol dir che
le xe inocue. Un zorno, infati, me vedo rivar in ufizio dò de lori,
che go batezà subito Crick e Crock. I iera del servizio "segreto"
australian che agiva per conto del'MI-6 inglese e dela NSA, National Security
Agency, un'agenzia americana tanto segreta che i la ciamava anca No Such
Agency.
Crick e Crock iera vestii in griso e i caminava sbandai per via del peso
dele vintiquatrore fate de lamiera de zinque milimetri. I me ga domandà
che sgombrassi i ufizi vizin del mio, i ga verto quele sue casseforti portatili
e i ga tirà fora una copia dei detai del mio critografo, mai fati
veder a nissun per ovie ragioni de sicureza. Xe ciaro che i lo gaveva robà
del mio ufizio. I me ga domandà de far 24 cambi che go rifiutà,
perché stavo fornindo aparechi con specifiche garantide. No podevo
vender un canon come quel de Giulio Verne per spararghe ala luna, e po'
ficarghe un che no'l sparava più de dò metri.
Crick e Crock no i iera conteni. Se mi no me fussi adeguà ala diretiva
- me ga dito Crick - me saria trovà nei guai: el mio conto in banca
el gavaria soferto, comento ribadì da un soriseto mona de Crock.
Go capì lora che sti signori no i scherzava; infati pochi zorni
dopo al'aeroporto de Perth sie aparati critografici, che intendevo dimostrar
al Banco de Roma e ala CARIPLO de Milan, i me li gà sequestrai.
Con Lidia, che la partiva con mi, i ne ga arestà per el tempo necessario
a svodar le nostre valize, causando un ritardo de meza ora nela partenza.
Quando l'aereo dela QANTAS el vegniva sburtà dal rimorciator per
andar ala pista del decolo, go avù l'angossiosa esperienza de veder
i mii aparechi de cifratura abandonai su un carel. Iera come la partenza
de Zara, e vedere la linea del mio campanil sparir nela penombra de una
freda matina invernal tra le macerie de case martirizade dala furia dei
"liberatori". Ma come nel caso de Zara, no solo distruta, ma
persa ala patria, i disastri - come che vedaremo - i vien tuti insieme
D'altra parte, gnente, meno che la morte, xe permanente. Malgrado i malani
pena contai, sentivo che gavaria rivà ae zucar la vitoria via dale
zane dela sconfita. Ma no saria stà fazile. |
|
BACO, TABACO E VENERE
Pena rivà in Italia, dovevo presentarghe la mia tecnologia
a un cliente importante, una granda Banca de Risparmio de Milan, e senza
aparechiature. Dovevo afrontar anca el modo de pensar che ga creà
la Lega Lombarda. I milanesi ga poca simpatia per la gente del sud, e mi
- anca se de Sala ghe ne xe più de dò mila nel'elenco del
telefono de Milan - vegnivo da un sud meridionalissimo, l'Australia.
La sera prima del mio arivo, peraltro, la RAI gaveva messo in onda un film
con Alberto Sordi, che el fazeva la parte de un emigrà italian impegnà
a scavar el deserto australian e che, varda caso, el se ciamava come mi:
Amedeo. Questo no me ga iutà.
L'Amedeo del film el se iera sposà per procura con una romana, ma
el gaveva mandà la foto de un amico più bel de lu inveze
dela sua. Però no'l iera el solo a imbroiar: la romana no la iera
una signora, ma una mula che vendeva favori amorosi. La gaveva fato un
"lavoreto svelto" prima de scamparghe al magnaza per partir in
aereo, dove un svelto cambio de vestiti la ga trasformada de "professionista"
a sposina per procura e la se ga presentà cussì a Amedeo
al arivo.
Il film fazeva veder la copieta in un viagio da Sydney a Brisbane, nel
Queensland per pò finir in una località nel mezo del deserto
Nullarbor. Nela scena final, Amedeo el iera là che el basava la
romana sula porta de casa, fata de eternit, cola machina fotografica che
zumava ala riversa per ridure la copia a dò picoli punti nel mezo
del gnente.
Con sta imagine dei antipodi ancora fresca nele teste dei inzegneri dela
banca, dovevo venderghe i mii critografi senza gnaca un de mostrarghe.
Ai meneghini no ghe piasi i foresti e meno ancora i conazionai che vivi
al'estero. Co' i ga savù che mi iero un de quei e che gavevo el
stesso nome de Amedeo, quel dela comedia dela sera prima, i devi gaver
pensà che iero mona o un contabale de prima categoria. Me considero
fortunà che no i me ga butà fora dela Banca a peade in tel
cul.
L'incontro xe stà un fiasco completo. Cola coda tra le gambe son
tornà al mio albergo, l'Hotel Executive, che el xe vizin de la stazion
Garibaldi, me son sarà in camera e, slucada una boza de whisky,
me son indormenzà. Forse che la note me gavarìa portà
consilio.
De matina bonora me son sveià con la boca seca, el stomigo in fiame
e un mal de testa fenomenal, ma col zervel ciaro, anca se el interpretava
el minimo rumor come una bota de bomba atomica. Ghe go dà subito
el pronto socorso al stomigo domandoghe al camerier, che me vardà
incredulo, una abondantissima colazion: tre ovi con panzeta, luganighe,
patate, late fredo, pan tostà e cafè nero a litri. Gavendo
stabilizà cussì el stomigo ghe go dà un'ociada al
giornal. Sfoiandolo distratamente, go notà un'inserzion publicitaria
per un apalto bandì de una banca svizera per la fornidura de aparechi
critografici!
Son partì de boto per Linate per cior un aereo per Zurigo. Co' son
rivà me son sistemà al Dolder Grand Hotel, che de una colina
dominava la zità e un campo de golf dove che ghe iera vache svizere
che pascolava serene. Sta sena bucolica me gà subito calmà
e dopo una zena parsimoniosa son cascà in un sono profondo.
La porta dela Banca de Risparmio milanese per mi se gaveva serà,
ma una assai più granda se gaveva verto a Zurigo. El zorno dopo
iero a Zug (dove che i gaveva ideà l'Enigma), zirca 20 Km a sud
de Zurigo. Go scominzià un dialogo cola Banca Popolar Svizera, che
se ga concluso con una grossa ordinazion. Cussì go salvà
la mia dita rivando anca a bater quela che gaveva ideà l'"Enigma".
Tornà a Perth, go scominzià el contrataco per superar i problemi
posti da Crick e Crock, che, gavendo abandonà el tentativo de farme
cambiar el crittografo, i voleva farme calar el numero dele "carte"
de 32'000 a solo sedise. El metodo consisteva nel generar le limitatissime
- in termini critografici - 65'536 combinazioni fate con solo 16 carte,
e poi doprar metà - 32'768 - che le aparissi come el mazo original.
Cola velocità de un computer moderno el metodo vegniva decifrà
in meno de 30 secondi. I agenti segreti, anca se aroganti, i iera incredibilmente
stupidi, e no me xe stà difizile imbroiarli.
Sicome el mazo di carte eletronico vegniva missià de un computer
doprà separatamente, esportavo i critografi e anca el generator
dei mazi insegnandoghe al cliente come crear le 32'769 carte. Go esportà
moltissimo prima che le spie se inacorzessi, ma co i ga scoverto quel che
fazevo i ga reagì bestialmente con metodi che no podevo combater.
Il primo iera de no darme el permesso de esportazion in Paesi che, anca
se amici, no i doveva gaver segreti per i americani e inglesi. Xe stade
infati le deboli cifranti americane a iutar i inglesi a decodificar i messagi
cifrai del'esercito argentin durante la guera dele Isole Malvines che ghe
ga costà la sconfita ai sudamericani.
Se Crick e Crick no i se fussi oposti ghe gavaria vendù mi i mii
critografi ai Argentini, e i Americani i saria ancora là a zercar
de decifrarli. L'altro metodo, ancora più de efeto, iera de contarghe
(falsamente) ai clienti che i miei critografi doprava solo le 16 carte
che Crick e Crock gaveva zercà - ma senza sucesso - de imporme.
Go perso cussì dò contrati.
Go de novo zercà rifugio nel'alcool dandome a sbornie enormi. Per
no preocupar Lidia compravo boze de whisky a cassete e le scondevo nel
mio giardin, per slucarle de scondon. Sta volta, però, nissun dei
foghi cerebrali causai dal whisky rivava a darme una soluzion. El bosco
no'l voleva cresser più, lo gavevo brusà fin ale radise.
Durante una ciacolada con un amico, nel giro de meno diese minuti, gavevo
ripetù per ben tre volte la stessa roba. La nona ragusea la gaveva
ragion: "Baco, tabaco e Venere, manda l'omo in zenere" però
i litri de whisky, i dò e più pacheti de spagnoleti al zorno
i me iutava ancora de meno nel caso de Venere.
Iera ora de cambiar le mie abitudini. Go ciapà paura e cussì
go terminà de boto e per zinque ani no go tocà gnanca una
joza de alcool. Iera anca ora che vendessi la mia dita. Co' el mio computer
biodegradabile (quel instalà tra una recia e l'altra) ga tornà
a funzionar ben, i me ga fato un oferta che no podevo rifiutar: go incassà
bastanza de goderme un pocheto de pase.
Me restava solo de saldar i conti con Crick e Crock, ricordandome de quel
che la nona ragusea me diseva, "zerca el paregio". Col muro de
Berlin pena butà zò e la guera freda finida, ghe ne go scominziada
mi una ssai calda contro Crick e Crock. Le spie odia i mass media più
de quel che che Dracula odiava el Cristo, e lora go doprà sti mezi
per ciorme la rivinzita. Durante una mia intervista ala TV nazional, ABC,
go contà la mia storia.
La paura del comunismo iera oramai passada e le spie gaveva dificoltà
a tegnirse l'impiego. La mia publicità no li ga iutdi. De là
un poco Crock el xe sta mandà in pension. Crick inveze el se iera
trasferì nel'industria, ma i lo licenzià poco dopo per incompetenza.
Pecà, però, che i se la sia cavada con cussì poco.
|
|
YOSSIE
Zercando un documento tra le mie straze che ciamo "archivi",
go trovà una letera con una testada ssai ornada e che go riconossù
subito: iera una del mio avocato de New York del 1984. Me la gavevo squasi
dismentigada, ma no podaria mai dismentigarme le circostanze che la gaveva
originada. De tuti i eventi dela mia vita questo xe tra i più memorabili
perché doveva darme una vitoria senza pari, ma che inveze xe diventà
la mia Waterloo, anca perché sti fati i xe sucessi vizin quela località
che xe stada la fine de Napoleon.
Eco la traduzion dela letera:
Rogers & Wells
Park Avenue - 200
New York - N.Y. - 10166
"In base all'analisi dei documenti presentati da Lei, all'incontro
nel nostro ufficio a New York, il 20 gennaio 1984, le nostre ricerche e
le opinioni ricevute dal collega belga, crediamo di avere una buona ragione
per iniziare un'azione legale contro la SWIFT per aver violato, ai sensi
delle leggi vigenti nel Belgio, i Suoi diritti brevettuali."
"Non potevamo e non volevamo iniziare un'azione legale prima di essere
di essere certi di aver raccolto tutti i fatti necessari per sostenere
la nostra causa. Ora, però, abbiamo tutto pronto e siamo ad un buon
punto di partenza."
Distinti saluti, ecc...
L'avocato me diseva che i me gaveva scopiazà l'invenzion dei
critografi, ma che gavevo una bona probabilità de recuperar i mii
diriti de inventor e anca un grosso indenizo che me gavarìa sistemà
a vita.
Causa un destin insempià gavevo sucesso, come nel caso de co' lavoravo
per Mr. Rogers, no per l'invenzion stessa, ma perché i me la gaveva
robada. Questo xe un riconossimento, diseva la nona Marieta de Luxio. Gavevo
sfondà, anca se i me i gaveva copià el breveto del critografo.
Spero de no confoder nissun contando sta storia che xe parte de quela che
go pena finì, per pò tornar ancora più indrio per
terminarla.
Torno a co' son 'ndà via del'università. La mia aventura
la iera un'esperienza assai dura perché nissun gaveva fiducia in
un cabibo con l'audacia de meter in piedi gnentedemeno che una dita de
alta tecnologia.
Per complicar ste robe ghe iera anca el fato che, per quanto la critografia
fussi el mio interesse più importante, dovevo progetar e vender
altri sistemi per gaver un flusso de cassa cussì de poder continuar
le mie ricerche. Gavevo inventà un modem, che - mi sempio - go smesso
de produr perché no pensavo che gavaria fato bori. Dopo go svilupà
un sistema de alarme pei pompieri, ancora ativo a Perth, ma che no podevo
finanziar. Go dovù far un mutuo ipotecario impegnando tuto quel
che gavevo: casa e pension.
Non podevo continuar senza una bona base finanziaria e co' i me ga domandà
de vender le mie azioni, go subito acetà. Una condizion iera che
gavaria continuà le mie ricerche, ma in pratica questo no xe stà
possibile.
Ghe iera un altro poblema: l'aministrator delegato dela società
che gaveva comprà le azioni iera un bigoto che me mandava versi
dela Bibia in continuazion. Dopo l'esperienza de Monique e Juan con Sir
Bruce, questo me fazeva sospetar che el suo interesse no'l fussi solo per
la mia anima.
Ma, più importante ancora, no podevo soportar de lavorar per un
paron. Gavevo zà zinquanta ani, pronto per andar in pension. Me
son licenzià e go fato una vacanza, che però la ga durà
poco perché me noiavo a morte.
Son tornà in campo. Un ente governativo me gaveva domandà
de svilupar le mie teorie in un prodoto critografico. Dò fioi, Mickey
ed Oscar, i me iutava in ste ricerche svilupando una formula (algoritmo
come dise i esperti) che go ciamà OSCAR, un acronimo che no solo
riconosseva mio fio, ma stava per O-cculted S-ignal C-oding A-nd R-ecover.
El iera anca el nome de un personagio ssai simpatico de un programa american
de fioi, Sesame Street, che el se ciama Oscar e che ghe piase viver in
una scovazera. Visto che i messagi in cifra ga tuto l'aspeto de scriti
boni per finir in scovaze, el nome el pareva fato aposta per OSCAR, el
critografo.
Fata la rizerca preliminar, i altri dò fioi i se ga unio al'équipe
familiar: Tonio, el primogenito, gaveva pena finì el dotorato in
chimica e Rodd, el più giovine, gaveva abilità comerciali
dimostrade fin dala tenera età e el moriva dela voia de meterle
in pratica.
Forsi ghe la gaveriimo fata de soli, ma gavevo i mii dubi dopo l'esperienza
del mutuo che, per quanto saldà, me iera costà noti in bianco
e tante bale de whisky. I me gaveva proposto un incontro con un imprenditor
del cosideto "Ponente dorà" (Golden West), Yossie, che
gaveva zà stabilì un contato con uno dei mii soci.
De lui savevo solo che no'l podeva farse la pasta e fasoi cola panzeta
o l'osso del persuto e che, a diferenza dei lussignani, che i xe cussì
spinaze de imprestarse bori a turno, Yossie no'l li gavaria imprestadi
per ragioni religiose.
El gaveva anca un alevamento de porchi, ma che no'l magnava, cussì
no ghe iera pericolo de finir nela danazion eterna. Yossie el iera nato
a Tel Aviv. Là el gaveva averto un ristorante cinese - con un cogo
polaco e un libro de come che se cusina nel zeleste impero - dove el porco
no se magnava con quel nome, ma con quel de "carne bianca".
Le sue regole le iera a posto. |
![[per vèder l'imagine fracar qua]](BELA.JPG){kind=link}