In memoria de Dave Cobau, ossia Dario "Cocolon" triestin a Canberra

colaborator de TuttoTrieste.net

Tuto xe comincià per caso quela volta che te me ga mandà una e-mail solo per complimentarte del sito e per farme saver che a Canberra in Australia ghe iera un triestin, TI, che navigava su TuttoTrieste. Cussì dal più afezionado utente te son diventà el coretor de bozze, e in più te ieri quel che me controlava che tuti i link funzionassi o se qualche foto no la se carigava.

"Cio, oservando TuttoTrieste con un ocio un poco critico, che figon de sito che te ga fato ara. El xe sai, sai grande (e mi me ricordo col iera picinin, xe l'eta...), ben fato, interessante. Me sento come un zio..." che bele parole e che sodisfazion spetando el fatidico giorno che te gaveria riportà un salto a Trieste. "Stà pur certo che co rivo te ciamo che 'ndemo a beverse un spriz ma desso no rivo, me go pena comprà l'auto novo e go de pagar le rate!"

E cussì i ani xe passai tra una e-mail e quel'altra fin a quel giorno che te me ga mandà l'ultima, 'ndove te me disevi quel che nissun volessi mai sentir... ben insoma mi voio ricordarte co'l tuo morbin, quel morbin tipico del triestin che no te ga mai abandonà gnanche dopo tanti ani vissudi de l'altra parte del mondo e gnanche dopo el mal; "...la del zervel e a mi i me ga sempre dito che no gavevo zervel, ara la !!!"

Ciao Dave, co'l cuor a Trieste te ghe son rivà!

Max (febraio 2012)