! Dave's story !

 

Nadal in Australia

usanze triestine e usanza australiane

missiade per la festa Cristiana più importante

 

Mi e mia moglie non gavemo avu fioi ma semo sempre stai coinvolti con i nostri genitori, parenti e amici per festegiar el Nadal.

 

Devo dir che la vigilia de Nadal non xe un gran che come che la xe de noi (anche se son Australian da tanti ani me sento sempre principalmente triestin), infati noi la tratemo come una serata normale – al piu come un venerdi de sera prima del week end.

 

Zerte famiglie xe piu occupade de altre durante sta giornada. Per la mia iera un casin...

Dunque, oltre che a mi e mia moglie Lorraine, de xe altre 7 famiglie coinvolte:

Mia mama

I genitori de Lorraine, i Walkers
La sorela de Lorraine, i Reynolds
I amici de mia mama, i DiBitonto (Benito, triestin e Judy Australiana)
I nostri vicini, i Simpson
I nostri amici, i Gumm

Aparte mi, mia mama e Benito, el resto dela gente xe tuti australiani patochi

Parte prima dela giornada

Se alzemo verso le 7.30 – 8.00 per una quasi inesistente prima colazion e se preparemo ala svelta e semo pronti per la prima tappa della giornada...

che xe i nostri vizini Simpson. Lori ga avu 13 fioi (co la vecia xe morta l’altro ano de xe sta un conto fra fioi, nipoti e pro nipoti: un total de circa 150 persone. Una vera tribù!!! E se i iera aborigeni son sicuro che i la fazeva la tribù!). Co rivemo de lori de xe pochi dei fioi, forsi uno o due de quei che sta via de Canberra e che xe venudi per le vacanze natalizie. Primo scambio de regali (giusto qualche monadina, piu per el pensier che altro). L’allegria e ciacolade interessanti xe sempre stade presenti in quela casa (lui, tra l’altro, iera sta prigionier de guera dei giaponesi) e el bicer no mancava mai. Prima bira o due (e scotchetto) del giorno cominciava sempre la. Dopo un’oreta partimo per la seconda tappa...

 

che xe mia mama, circa 25 Km via de dove che stago mi (Canberra xe sai estesa, ma mia mama sta in una picola citadina fora de Canberra). La femo un piccolo spuntin de salumi e paneton. Naturalmente femo un altro bicier, solo per mandar zo el spuntin naturalmente! Altro scambio de regali, altra oreta de alegria. E semo pronti per la terza tappa...

 

che xe i DiBitonto. Lori ga avu solo che 4 fioi (fra i quali do gemele). De xe solo che una decina de fioi piu pici la. Altro spuntin, ancora allegria e un altro per de bicieri per butar zo el spuntin (ma gnente regali la, mi e mia moglie non semo tanto vizini con lori). Mia mama spendi el resto dela giornada con lori ma, dopo una meza oreta, mi e Lorraine semo pronti per tappa numero 4...

 

che xe el piu importante evento dela giornada a casa de o i mii suoceri o de mia cognada, e con lori se fa el pranzo de nadal.

A parte Lorraine, i mii suoceri ga altri 3 fioi, Ron el solo mas'cio e Elaine la piu vecia xe via de Canberra e non se li vedi quasi mai. Rhonda, su mari Allan e i 3 fioi che i ga xe sempre stadi parte del nostro giorno de Nadal. Co i fioi iera pici ierimo solo in 9 la. Adeso che i fioi xe sposai semo una ventina (senza i genitori de Lorraine che adeso i xe morti).

La prima roba che se fa, a parte verzer una bira naturalmente, xe el scambio de regali. Tuti i pachi/pacheti xe ben mesi soto l’albero (che xe finto - e pansadoghe ben, non go mai visto l’albero vero qua in Oz). Alora, el matre d’per sto evento xe mia cognà Alan. El se senta su una carega, e tuti i fioi se senta per tera in circolo atorno de lui. Noi piu veceti gavemo poltrone o sedie, i piu giovai (e adeso parlemo sui 30-40 ani) sta in pie ma sempre semo in giro de lui. Bon, el ciol un paco ala volta e el ciama el nome dela person e tuti contenti demo a ciorse sti regali. Una roba de cine te digo! Ma sai intense e emozionante.

Finalmente, dopo circa un’oreta de sto circo, semo pronti per pranzar. E ormai xe quasi le 2 de dopopranzo! El pranzo tradizionale dela cusina australiana xe caldo. Se ga un 3 tipi de rosti: agnel, manzo e porco acompagnadi da varie verdure lessade: patate, bisi, fazoleti e seguidi da el paneton australian che saria una specie de pan dolze pesante impastà con zibibe e rum servi coverto con una crema pasticera calda e, spesso, con gelato. Una volta se misiava dentro anche soldini de 6 pence ma oramai sta tradizion xe stada persa.

Non steve dimenticar che Nadal in Australia xe in pien estate e che se riva anche sui 38 gradi. Durante i ani sti piati tradizionali ga cambia abastanza. La gente non ga piu tanta voia de cusinar tuto el giorno con ste caldane e xe addiritura familie che va a pranzo nei clubs (non ristoranti perche quei xe seradi el giorno de Nadal).

Dopo el pranzo de vol un poco de alegria no? Altre bire o vin, forsi tiro fora la chitarra e femo un coreto (ma malamente). I fioi non ga tanto morbin per sta roba cussi non lo fazo tanto spesso. Ma forsi xe anche perche a sto punto l’efeto del bever e del magnar se fa un poco a sentir e xe piu de un de noi che se fa un pisoloto per una meza oreta. Verso le 5 semo pronti per la quinta e finale tappa...

 

che xe i nostri amici Gumm. Semo amici de Allan e Ann da un 14 ani e gavemo formà la tradizion de spender el resto del giorno de Nadal assieme tanti ani fa (sui dieci me par). Lori ga solo una fia cussi stemo abastanza in pase la. Spesso riva anche altra gente per un per de ore, ma noi de solito se fermemo per la note (e spesso per ancora un giorno o due come che xe za suceso – che baldorie cio!). Se magna ben la, e se bevi ancora de piu. Sta gente canta e sona profesionalmente e non se vergogna a tirar fora la chitarra e far un coreto o sei. La parte piu bela dela giornada. 

Co riva le undese mi de solito son pronto per andar a spavar. Xe stada una giornada lunghissima e, se no ciolemo el taxi per andar a casa, vado a dormir. 

 

******

 

Oramai el Nadal non xe piu quel de una volta. Quel che go descrito de sora xe miscia un poco con quel che iera una volta e quel che xe adesso. Purtropo tropa gente che se conoseva xe morti (a parte ai genitori de Lorraine xe andai anche el partner de mia mama Tullio – altro triestin, i nostri vicini Simpsons, e anche el nostro amico Patrick, irlandese speciale che ne fazeva compania a casa de i Gumms) e noi diventemo un poco vecioti. Per i fioi xe, naturalmente, sempre un giorno speciale ma per noi el lucido de Nadal xe diventa opaco e, piu o meno, lascia a desiderare.

 

Ma me piaseria veder ancora una volta un Nadal bianco.

Dave

gennaio 2005

 

 

 

 

 

! Dave's story !