|
LA BORA (a cura de Maria Zanier - Australia)
LA BORA Cossa xe sta roba da quatro letere che la disturba da quando esisti Trieste? da dove la vien? Mah... i disi dai CARPAZZI, i ne ciol pel fioco... si... la xe natural o una barzeleta tipica de Cecchelin? E la Jole Silvani ghe rispondi... che nova sior?
Dovemo averla!!! altrimenti no esisti la nostra amata cita'... ma xe mai possibile che la finissi da noi? Prima la gira e rigira per tuta l'Asia, la ne porta sta aria freda che co te camini la te da un senso de gelo, povereti quei vecioti che ghe scola el naso... (se forma le stalatiti ) Te va a scola, anche la i te ciol per fioco... cos'e' la BORA? Ah…….e' un vento freddo locale, che si abbatte sulle coste Istriane e Dalmate, con direzione NE, puo' raggiungere i 120 chilometri all'ora! Grazie siora maestra... go capì come prima.
Mama mia... ma ghe vol proprio esser inteligenti a rivarghe a sto punto? Si! ma ancora no xe una risposta coreta! Co vien do refolade, bisogna che te se guanti, altrimenti te caschi in mar, ma chi xe quel tandul che va' verso riva? Tuti xe disperai, d'inverno i meti le corde... no te va fora gnanche a cior el giornal! Papà me diseva... no sta caminar in mezo la strada, sta tenta ai copi... si! furbo, ma i copi cascava sotto i muri dele case, mai in mezo la strada.
Signorina... la se guanti! La scusi ma mi no dopro guanti no posso, no sento la presa …..ma la cioghi la corda, se no' la casca La corda? Quala corda? anche quela xe sparida...!!!
Adesso ghe xe un'altra version... el fredo e la Bora vien dala Siberia. Ma saria ora che se metti d'acordo , dopo tanti soldi spesi per saver da dove che la vien, alora anche i libri xe sbagliai? Arda che i la ga portada con l'elicotero oltre i Carpazzi!!! Mama che confusion! Ma ghe xe forsi qualche studioso dei venti che sa qualcossa?
Ma ghe xe un'altra version ancora: la Bora riva nel versante de l'Adriatico... e da dove altro?
Se manca la Bora non xe Trieste... dovemo averla per forza de natura... Si! La riva ma non la scampa, la resta tacada come la mosca al vis'cio... ghe xe un deto: 3 giorni la nassi, 3 giorni la cressi, 3 giorni la crepa! VIVA LA BORA! VIVA TRIESTE!
|
