l'indimenticado
EMILIO COMICI
ricordado da tanto lontan
... la Napoleonica, la Val Rosandra...
(a cura de Marieta la Cangureta)
El mio vecio me disi: Te parli sempre de ti! e mi? cossa son? el tacon su le braghe?
El ga ragion! Xe tante robe da ricordar, specialmente quele passade con triestini diventai famosi sportivamente.
Essendo un apassionado de montagna e avendo passa', come se disi a Trieste, piu' fora che dentro (ma non in preson,) ma a l'aria aperta andando su pe'l monte, de la Napoleonica, che se la ciamava la Valle in miniatura, dove che ghe iera un futio de gente quasi ogni domenica, con scarponi, picoze e tuto el necessario per la scalada, che credo ancora oggi la esisti.
L'amor per la rocia xe sta sempre el forte del mio Riccardo, e avendo anche conossu', come el xe stado bateza' dai triestini, l'Angelo delle corde (EMILIO COMICI), e avendo impara' la tecnica de lui che'l iera famoso per le sue arampicate ... avicinarse a la montagna anche nei momenti critici, xe un ricordo indimenticabile.
Comici , diventera' capo scuola , el suo nome brilera' sempre nela rocia de la Val Rosandra, nato nel 1918, e conosudo da tute le parti del mondo , el ga lassa' una spiegazion logica perche' i triestini xe amanti della montagna….perche' ghe xe anche el mar, co te giri le spalle te vedi el blu' del golfo, la passion de la natura, e la resistenza de arrivar all'apice.
Come mai el triestin xe sta sburta' a far si che migliaia de abitanti, in una cita' de mar, gabi opta' per la montagna? Semplice: chei i triestini veci, amanti de le pasegiade, fra le piere del Carso, e le sue Doline de tanti colori, con la voia de l'aventura el desiderio de rivar come ga' dito Comici in cima.
El mio Riccardo, me conta tante robe sucesse in quelle matinade, de aventure che solo lui sa', mi per la verita' dopo el funeral dado in onor de un'amica cascada zo' e lassa' due fioi pici, me go talmente strento de paura, che quel sport me ga' lassa' come una canocia svoda.
Ma la spiegazion logica sta' che l'amor per la montagna, l'amor dei triestini per el Carso, xe piu' grande de l'aventura, la resta nel sangue, una deboleza fisica che fa' mal, ma che fa' aumentar el spirito de aventura, e la stabilita' mentale.
Durante el periodo , dove che non esisteva ancora el VIBRAM (vegnudo fora nel 46) Comici e la sua trupa de muli giovani incalzava scarpete fate dai furlani, tipo zavata, dove ghe iera ancora la possibilita' de presa contro la roccia, opur le pedule, famose per i giogadori de pallacanetro.
Ogidi' esisti, tutto! Scarpe, ganzi, corde... tute robe che la mano d'opera Italiana xe rinomada in tuto el mondo, ma quando se entra in un negozio , el mio Riccardo nomina solo la parola Rosandra... tuti se gira e i ghe domanda se'l vien da la cita' de COMICI.
Anche sel iera riva' a l'alteza de esser Sindaco de SELVA, una region della Val Gardena, per el mio Riccardo el restera', sempre el suo idolo triestin , quel che ga' inculca' a la nostra muleria de amar no solo el mar, ma anche la Montagna.
Maria Zanier