Maria Zanier da l'Australia ricorda
LIVIO LORENZON
ciamado el "Barbaro"
Nessun ga' mai dubita' che i fradei Lorenzon no i gaveva desiderio de diventar bravi atori, el Gianni, col famoso pseudonimo de Gianni Solari, dopo gaver debutado a Radio Trieste, el iera partido per Roma a far del cinema, nela categoria dei famosi filmeti a puntade, grazie al fradel Livio che xe proprio lui el nostro prossimo personaggio da ricordar.
Livio
Lorenzon iera nato a Trieste nel 1922 e, come tutti i reduci de guera, el iera
bramoso de rivar a far del ben: el lavor sicuro iera solo de scavar busi intorno al Carso, per rimboscar de novo quel che durante la guerra iera stado
distrutto (e anche taiado per scaldarse).
El lavor consisteva in un introito de circa 17 lire per buso, digo circa, perche' bisognava sempre lassar un pocheti de spicioli indrio per mancia... iera dificile trovar lavori senza santoli.
El mio Riccardo (reduce anche lu) lo incontrera' al Governo Militar Aleato, dove, come lui, el guidava i camion per le trupe stanziade a Trieste.
Dopo el iera andado a far el scarigador in porto con la compagnia Scaramelli, famosi portuai (miei inquilini in via Caccia).
Con l'audacia e la brama de rivar, e anche avendo impara' l'ipica, Livio diventera' un coach (alenador) per i militari aleati acaparandose una sfilza de premi.
Sul fatto de l'ipica el iera veramente un cavalerizo, con la sua statura, el corpo forte, xe stadi la porta per entrar nel mondo del cinema.
Nei ani che segui, col nome d'arte de Elio Ardan, el gaveva fato un per de cortometragi, niente de importante, tanto xe vero che gnianche i triestini saveva che sto giovane desideroso de sfondar el iera triestin.
El suo debuto importante xe stado nel film La Barriera della Legge, con Rosanno Brazzi e Lea Padovani.
Seguira' tanti altri film e tuti piu' o meno nel personagio "ideale fisico del ruolo":
da spostarse sui merli de le tori dei Castei Spagnoli, a lanciar frecie, da la testa spelada da Mongolo ai costumi del Medioevo, insoma sta figura atletica de povero ex scavador de busi e ex portual che sfachina per ciaparse el companatico, el diventera' un famoso ator.
Dopo un bruto incidente stradale, con l'auto disfada, la sua cariera xe stada fermada e purtropo nel 1971 el morira' a Latisana.
Una vita cinematografica
la sua, piena de
sodisfazioni e anche se stanco credo che'l gaveria avudo ancora frecie da tirar e
moda da sfilar.