CHI LI CONOSSI MEIO DE MI ...
(a cura de Marieta "la cangureta" da l'Australia)
(parte seconda)
Varda che roba, scrivo un nome e me ne vien fora un'altro!
Si, un me domanda: chi xe el NEGUS? No'l se ciamava TRIPOLI?
No! mi ghe rispondo, Tripoli iera quel povereto contadin (chissa' de dove ch'el vegniva) vestido a la bona ma sempre ridicolo, el caminava su e zo e pena che se nominava la cita' el andava su tute le furie come Monfalcon, che rinominandolo de novo, me xe vegnu' ancora in mente che tra sto' Monfalcon e Nando Susta anche i controlava el trafico, specialmente dove che ghe iera el sgabuzin de la guardia del RADICIO, Proprio tra la via Carducci e Largo Ascanio Canal... chissa' se esisti tutte ste strade, anche quelle i le ga cambia'?
Cecchelin, iera famoso per farne ricordar tuti sti omini che purtropo no i esisti piu'. La popolazion triestina se ga aferma' in un lato piu' aristocratico e dimenticade le xe tute ste machiete che ne fazeva rider e sembrar piu' allegri. Fra questi ghe iera quei con i famosi capotoni lunghi incapuciai e el steco per ingrumar le ciche che dopo i vendeva el tabaco in Bariera Vecia (e anche ni andavo con mio papa' a comprarlo in via Sorgente... a borsa nera...).
Michelin de le forchete? un altro famoso, che el tradiva ste povere done, pena le pagava... e la canzoneta disi:
...a tute le done el ghe toca le tete
diese forchete per un soldo...
e dopo vegniva el resto.
L'omo Vespa? Insidioso... el tocava el c... a le mule ma no con le man ma col'ago!
E anche qua la canzoneta fa...
da San Giacomo a Roian
iera un vecio zarlatan,
che sponzeva le culate indrio man
Mi iero picia ma gavevo una paura de mati, co andavimo
fora tuti e tre me metevo in mezo tra de mama e papa' perche' me pareva de averlo de drio...
mah... no so gavero'avudo 5 ani
GIUSTIZIA... povereto, se fossi sta per lu ghe iera sempre giustizia... el portava un
cartel intorno al colo con sta scrita giustizia, tuti lo fermava per domandarghe cossa che
l'invoca sta giustizia. Noi mule de scola (al Volta) ghe urlavimo: te ga trova' Giustizia?
...el se rabiava e l'alzava el pugno...
TITA MANCA UN ...questo iera sempre al Fenice, dove el impizava i lumini a gas,
lu se ciamava Tita, ma el dimenticava sempre de impizar un. De questo gavevo
sentė parlar da Adolfo Leghissa, scritor triestin famoso, che lo go conossu' in via Caccia al spacetto
de Alzetta. (forsi al tempo de Tita no iero nianche nata...)
ZORZI
DE LE CREPE... un picioleto calvo, el tirava la gamba, ma no'l stava mal, iera idea sua, el
meteva un fazoleto intorno el genocio per far veder che'l xe infortuna' ma iera
tuta una trufa bela e bona solo per far girar la gente che passava. El gaveva la mania anche de andar a
tuti i funerai, specialmente de chi che ghe faseva del ben, ma piu' i
macelai perche' el questionava sui ossi e le carcasse dei manzi. El se meteva un capel a cilindro, el baston, ma se moriva un
rico, cioe' el macelaio, el meteva un vestito nero bel, el piu' scarto iera per i poveri.
El Turco coi fistik? Iera nose brustolide su un steco, te vegniva l'acquolina in boca apena te sentivi l'odor, iera tuta una gioia a magnar qualcossa fora casa.
Quei dei petorai, dei mussoli, de le castagne, limonade, gelati, caramei, fruti infiladi su'l steco... che bonta' che iera.
A far quel mestier per ciapar una flica, a noi muleria ne sembrava che tuti iera stupidi, ma ghe iera anche, fra tanti, gente inteligente e studiada e purtropo come per tuto el mondo ghe esisti ancora, dei malandadi come lori,
A Trieste ste machiete no le esisti piu', gavevimo un motivo de viver, rider, scherzar e anche de criticar, se senti la mancanza, perche' i xe sparidi nel niente, come che i xe rivai cussė i xe andai, forsi che la gioventu' trovera' qualche giornal con tante altre storie per ricordarse dei veci che li ga conossudi e anche per dimenticar, come che se fa ogni ano a Carneval,
opur, leggerle
qua che Massimo sta fazendo el possibile per farve
veder a oci serai quel che NOSEPOL piu' aver...
...ma conservar le memorie.......
Maria Zanier (Marietalacangureta)