CHI LI CONOSSI MEIO DE MI ...
(a cura de Marieta "la cangureta" da l'Australia)
(parte terza)
Solo noi vecieti (scusè... noi non piu' giovani) se pol ricordar de ste maciete, tanto care ai nostri cuori. La carateristica de 'sti omini xe che, come dito in precedenza, i xe vegnudi da chissà da dove e sparidi chissà come.
El
CONZAPIGNATE, lui no'l xe una imaginazion, el xe veramente esistido, carsolin de nassita
(Doberdò) tradizional del suo mestier. El rivava a
Trieste con precision co rivava el quarto de luna per presentarse davanti de ste donete tute soridenti, perche' per riparar le
pignate el iera un mago vero e proprio, fato tuto con precision. De statura media
ben rasado, vestido con una giaca senza color, el sembrava come le statue de rame,
'sti vestiti chel portava, i guardava neti ma tarmadi. Nessun saveva che eta' che sto omo
podeva aver, ma sicuro nessun se aspetava che'l fussi giovane. Ma oltre a giustar tecie e farsore, el iera anche veterinario,
dotor, metereologico, insoma el fazeva un poco de tuto.
La traversa che'l gaveva davanti ghe coverzeva anche i ginoci, la borsa de corame la iera al suo fianco, dentro ghe iera fil de fero, straze, un per de punterioi, aio per disinfetar.
Ma sto povero omo, richiesto da le massaie, el iera diventa' el bersaglio de una ganga de muleria, che i fazeva dispeti a tuto ale', dopo che i ga savò che'l ghe praticava ai gati la famosa castradura. Sti muli ghe coreva drio a farghe dispeti, e anche se'l iera bastanza educato el perdeva le stafe e co la vose meza tenorile el rispondeva lasseme in pase. Cussì i muli pensava che iera meio che'l fazessi el nonzolo con quela voseta lirica, bona per quei che studiava canto, invece che giustar pignate, ma col zigava
CONZAPIGNATEMMMMMMMMMMM
la vose iera quela de un basso potente.
Sto suono iera come le campane de San Giusto, a cadenza regolar, el se fermava, el spetava che qualche babeta lo ciami:
Conzapignate la vegni su.
Co'l rivava sul pianerotolo el diseva; afari stanchi, malatie mal sane cara siora, dove la ga' ciolto 'sta pignata? De seconda man?
No! No! La iera nova poco tempo la ga durà.
Ma lui saveva che la pignata iera mal fata e el rispondeva:
Questa xe stada mal impastada, la sa? Per saver se la xe fata ben, co la la ciol in man la ghe daghi un colpeto de soto e se no la capissi la musica, cara siora mia, la vadi a studiarla, la sa che suono bel che fa saver se la pignata xe veramente de durata?
Tutte ste parolone iera per farse acaparar la simpatia, ma oltretuto anche el domandava sula salute dei muleti:
Cossa el ga? Perché el xe in leto?
Ma co se diseva:
El muleto mio no ga apetito, alora el rispondeva:
Vol dir che'l ga magnà tropo.
Conzapignateee, la me disi che tempo che fara' domenica!
El cioleva fora de la scarsela un taquin con sgiribizi che solo lu podeva decifrarli, sembrava un libro de le Sibile:
Domani domanenica vegnera' zo dal Monte Spaca' una bora gelada, le nuvole color de polenta de Sarazin, el mar buterà le scovaze verso tera, ma no la staghi aver paura dopo la seconda luna tuto tornera' bel, gaveremo primavera verso la fine de marzo!
Insoma sto omo che saveva tuto, anche far el comico, xe restà sula boca de tuti, tanto che co vegniva un esperto operaio a giustar le seradure, el domandava: Chi ga riparà prima de mi? El CONZAPIGNATE?
El Conzapignate se ritirerà subito dopo finida la guera, nela sua Doberdò polverizada. Go savù che'l gaveva spostà le dure piere del Carso, per seminarse un pocheto de verdura.
P.S.:
Ne xe stadi diversi Conzapignate, gavemo un due righe de canzoneta che disi:
un bon Conzapignate Trieste ga ligà,
se vien el teremoto el fil de fero la guanterà.