LA BORA

La sufia de soto,

la sufia de sora,

la va soto el capoto;

si, xe la bora.

la riva senza dir gnente,

la scazza la bonazza,

la sufia sula gente,

la sufia in ogni piazza.

De dove la riva?

nissun no sa gnente,

forsi la riva dai Carpazi,

cussì disi la gente.

la xe cativa

freda e prepotente.

xe tuto un fis'cio,

un gran sufiar,

la te distaca i copi,

i scuri,

la te soleva el mar

sbatendolo contro i muri

fazendolo iazar.

Però per noi muleti

iera un divertimento:

verzevimo el capoto

e slitavimo sul iazo

portadi via dal vento.

Si, iera bel zogar,

ma mi iero più contento

co la finiva de sufiar.

Batù de fredo,

matina e sera,

pien de buganze, no vedevo l'ora

che tornassi primavera.

Pino Peschechera

Melbourne (Australia) luglio 1998