TI CHE TE SON NATO PRIMA DEL 1965

(di Giuly - adattamento in triestino di Paolo Gostan)

A pensarghe ben, xe dificile creder che semo vissudi fin a ogi!
De fioi andavimo in machina (quei che gaveva la fortuna de gaverla) senza cinture de sicureza ne air-bag. E montar su una precoliza in un caldo pomerigio iera un regalo speciale.
Le botigliete dele medicine no gaveva chiusure speciali, bevevimo acqua de la cana e no de una botiglia! CHE ORROR!!!
Pensa che andavimo anca in bici senza casco.
Passavimo i dopopranzi a costruirse i careti con le baliniere e se molavimo per le discese senza freni e quando se intacavimo contro i muri o contro i alberi se ingegnavimo a trovar el modo de fermarse... noi de soli!!!
Andavimo via de casa de matina e zogavimo tuto el giorno, i nostri genitori no saveva dove ierimo, ma i saveva che no corevimo nissun pericolo. No ghe iera i celulari, incredibile!!!
Se sbregavimo i zenoci, se rompevimo i denti, ma no ghe iera mai denunce, iera solo incidenti; nissun no gaveva colpa.
Te se ricordi che barufe, che pugni che se se tirava, a volte gavevimo qualche bugna nera, a volte se pianzeva, ma quasi sempre passava tuto senza che i nostri genitori savessi niente.
Magnavimo dolci con tanto buro ma nissun iera obeso, se passavimo una Fanta in quatro amici, ma nissun ga avù i vermi o le epatiti.
No gavevimo Playstation o Nintendo, no iera videogiochi, videocassete, PC o internet, gavevimo solo tanti amici.
Andavimo a casa de un o de l'altro senza avisar, sonavimo el campanel e andavimo a giogar con lori.
Come semo sopravissudi?
Se inventavimo i zoghi coi bastoni o coi sassi, zogavimo coi vermi e le lucertole, a magnatapo con la britola, ma nissun se ga mai cavà un ocio o ga magnà vermi.
Pensa che a scola iera qualchedun talmente muss che veniva bocià in seconda elementare, ma no se cambiava voti, per nissun motivo, e no se meteva mai in discussion quel che diseva i maestri. I problemi più grossi de la scola iera quando te rivavi tardi o te mastigavi una cica in classe.
Le nostre iniziative iera nostre, nissun se nascondeva drio de l'altro e l'idea che i nostri genitori ne difendessi se faxevimo qualche monada, no ne sfiorava nianche, lori i iera sempre dela parte dela lege.
Se te se compartavi mal i genitori te meteva in castigo senza che nissun li metessi in galera e quando che i diseva NO, iera proprio NO!!!
I zogatoli li ciapavimo per San Nicolò o per el compleano, no ogni volta che se andava in botega. I regali i ne li fazeva con amor, no per sensi de colpa.
Questa generazion ga creà tanti inventori, amanti del ris'cio e otimi solutori de problemi.
Iera tanta libertà de idee, sucessi, insucessi e responsabilità; e la mularia de quela volta ga imparà a gestirli.

- tutti i nostri racconti -

uttotrieste.net