UNA FIABA DE ESOPO

(da Fabio, triestin in Germania)

LA FIABA

Su in Carso tra Opcina e Padrician, un maledeto inverno iazà cola bora a zentoequaranta, i alberi nudi e incrostai de neve, el ziel color gorna. Par che voli piover, o magari anche nevigar de novo.
Un povero pagnarol tuto solo, duro de fredo, salta de qua e de là zercando de scaldarse, el se sera el corpisin cole alete e'l ziga tuto disperà:
"Mama mia che fredo, mi qua moro, che fredo, CHE FREDOOO!!!"
Combinazion passa de là una vaca senza gnanca vederlo, la ocia un zufetin de erba suta, la tira zo la testa per magnarselo... e intanto, come che fa spesso le vache, ploooufff, la ghe mola una bela cagada giusto in testa al povero pagnarol.
Sto qua, a sentirse tuto torno quel calduz benedeto, ghe torna improvisamente dosso un pochetin de vita e tuto beato el taca a zigar:
"Mama mia che bel calduz! Desso sì che stago ben! Grazie vaca, grazie!!! Che bel, CHE BEL, SON FELICEEE!!!"
In quela passa de là una volpe tuta ossi, nera de fame e meza morta de fredo, la senti sto pagnarol che ziga, la lo cuca e... ahmmm, la se lo magna in t'un bocon.

LA MORALE:
primo: no sempre chi che te meti in tela merda xe tuo nemico
secondo: no sempre chi che te cava fora dela merda xe tuo amico
terzo: co' te son in tela merda xe meo che te tasi.

www.tuttotrieste.net

Fabio - Tuttotrieste.net

le bestie e bestiuze riportade in sto raconto xe puramente voludi