el vero tifoso de l'Unione

ORGOGLIO ROSSOALABARDATO

 - inviado da Paolo - traduzion in triestin de Massimo -

UUn tifoso del Verona, un tifoso dell'Udinese e un de la Triestina i iera su una spiagia in Arabia Saudita a sbevazarse una cassa de bira de contrabando, quando tut'in t'un riva la polizia e li ingruma. Per el solo fato de gaver alcool in Arabia Saudita xe za un crimine grave quindi, per el fato ancora più grave de verlo anche bevù, i xe stai condanadi a morte.

Dopo un casin de mesi de ricorsi in appello e grazie a la man che ghe ga dado un avocato 'sai sgaio, i riva a tramutar la sentenza de morte con l'ergastolo.

Per fortuna che el giorno del processo in Arabia Saudita iera festa nazionale e per fortuna anche che el Sceicco, grande omo de onor,  iera de bona voia tanto che el ga deciso de graziarli tramutando la pena con una punizion de 20 frustade per omo.

Fin che i se preparava per la punizion, el Sceicco ghe ga dito:
- Ogi xe anche el compleano de la mia prima molie e ela me ga domandà de darve la possibilità de esaudir un desiderio a ognud'um de voi prima de farve frustar.
 

Per primo ghe tocava al tifoso veronese (che gaveva bevudo un cicinin de meno). El pensa un atimo e pò el disi:

- Ligheme un cussin in schena!
E cussì fu, solo che purtropo za dopo diese frustade el cussin xe 'ndà in fregole e el resto de le frustade el veronese se le ga becade in schena che a la fine i ga dovù portarlo via che el iera senza sensi

Dopo iera el turno del tifoso de l'Udinese (che gaveva bevudo bastanza) che, vista la
scena, el ghe disi:

- Ligheme do cussini in schena!

Ma dopo 15 fristade i do cussini iera za in fregole e anche lu xe  'ndà quasi insieme e i lo ga portado via che el frignava come una putela.

Iera el turno del tifoso de la Triestina (che gaveva bevudo più de tuti) ma prima che'l verzessi boca el Sceicco ghe ga dito:

- Ti te son un tifoso de la squadra coi colori più bei del mondo. I tifosi de l'Unione xe i meio e i più fedeli del mondo per questo motivo a ti te concederò ben do desideri.
- Grazie, Sua Altezza! - ghe rispondi el tifoso de la Triestina - In amirazion de la Vostra clemenza come primo desiderio voio che me de zento frustade inveze de vinti.

- No solo te son una persona de onor, bel e simpatico, ma te son anche coragioso! - ghe ga dito el Sceicco con grandissima amirazion - Eh bon ah, che zento frustade sia! E desso dime mio omo, qual xe el tuo secondo desiderio?
E el tifoso de l'Unione senza pensarghe tropo el ghe rispondi: - Ligheme el furlan in schena!!!

www.tuttotrieste.net

Max

giugno 2007

- tutti i nostri racconti -