Fin che la barca va!

Raconto del Prof.Anzlovar de un suo sogno

(ricordemo che el prof. xe un triestin de ani trasferidose in terra teutonika)

Voio contarve un sogno che go fato stanote:

Iero imbarcà su una barca balorda, la carena cariga de denti de can, i condoti imbunidi, ruzine per tuto e gnente che funzionava come che doveva. Quasi tuti a bordo iera tropo ocupai a comandar per far qualcossa de utile, cussì quei pochi de noi che gaveva voia de lavorar i finiva per dover far de tuto perciò che la barca la 'ndassi vanti almeno un poco.
Cussì, capo-tecnico che iero, me tocava lustrar otoni, dar una man in cambusa, far su zime, forbir cache de cocal del ponte, imbiecarghe le mudande al comandante e roba del genere. E ogni volta che mugugnavo me sentivo sempre risponder "se no te comoda cussì te pol 'ndar via quando che te vol".
Un giorno che gavevo le bale piene perchè dopo che gavevo terminà de spelar patate i me gaveva messo a netar le latrine, vardo fora bordo e te vedo una bela barca che la ne sta superando senza sforzo. Tic, tac, me ciapa el cinciùt, molo tuto, meto in mar un caicio, salto dentro e vado.

Xe passà sai tempo de quel giorno, e qua su sta nova barca xe tuto un'altra roba: ognidun fa el suo, el magnar xe decente, el comandante xe una brava persona e nissun ghe rompi le bale ai altri solo cussì per viz, perchè che el pol.
Ogni tanto, tapà nela mia montura de primo uficial, vado sul ponte, tiro fora el canocial e vardo a pupa, lontan lontan, la mia vecia barca sempre più in remengo. No se capissi come che la fa a star ancora a gala, xe za sai se la va vanti e no indrio: l'acqua ghe riva oramai ala falcheta perchè nissun bazila de imbiecar le fale, o de sgotar le sentine, o magari de butar in mar quei quatro disgraziai sul ponte de comando che i se fa i afari sui e i se la passa con babete alegre senza gnanca più far finta de governar la barca.
E vedo le face rassegnade dei mii veci compagni che, ognidun per conto suo, i zerca disperai un salvagente perchè oramai xe ciaro che quela trapola scavezada no la starà ancora a gala per sai tempo.
I me fa tanta passion, ma anche un pochetin de rabia!

Muenchen, Februar 2011

Herr Prof. Alois Anzlovar

- tutti i nostri racconti -