La più bela isola del mondo

(foto inviade da Marcelo de l'Argentina)

Nel favoloso Mar dei Caraibi tra l'isola de Porto Rico e l'isola dela Repubblica Dominicana, ghe xe una lingua de mar ciamada "streto dela Mona" con in mezo una cocola isoleta dove che ogni omo volessi rifugiarse:

L'isola de la Mona

(Isla de la Mona in spagnol)

Pareria che i primi omini che ga messo pie su stà isola sia stadi i indiani Arawak probabilmenti atiradi da quela meraviglia, e chissà cossa che i ga visto, sentido o nasado per darghe de la mona a stà isola. Studiosi disi che un nonzolo smontando dela canoa ghe gavessi mastruzado el pie al capo indian che gaveva una buganza sul dedo picio, cussì la prima parola pronunciada su l'isola doveria esser stada: "Mona!". Altri disi che quando un indian se comportava mal el vigniva mandà in esilio su stà isoleta e poderia esser che da questo fato sia nato el famoso deto "va in mona!". Ma esperti filosofi sostien che el nome deriva dal fato che questa isoleta probabilmente per vocazion fazeva parte dela Serenissima che qua mandava in esilio tute le babe che se comportava mal in laguna ed essendo quindi che nei tempi passai stà isola iera abitada solo che de babe, el Doge la gavessi batezada Isola de la Mona apunto.

Nel corso dela storia l'isola (ocio che questa xe vera), piena de busi e grote, ga ospitado anche un picio centro minerario per cavar fora el guano, ossia drek de usel. L'isola de la Mona xe ogi ciapada de mira dai studiosi che studia una bestia che vivi solo su stà isola: la famosa iguana de la Mona.

Tranquila e solitaria in mezo a l'Oceano, l'Isola de la Mona xe sicuramente una meta ambita per ogni omo che su isole come questa (che in triestin podessimo ciamar "Isola Pase de Casa") volessi butarse dentro e restarghe per tuta la vita.

Eco un grupo de fortunati amici che xe rivadi aprodar su l'isola dei sogni. Se volè far come lori, basta andar a Porto Rico col rioplan e de la ciapar una barca per ragiunger l'isola che xe a soli otanta chilometri, come andar do volte dela Sacheta fin Grado che sarà pur l'isola del sol ma no sarà mai l'isola de la mona. L'Isola de la Mona xe grande giusto quaranta chilometri quadrati, insoma xe posto per tuti i omini che vol rilassarse e spassarsela.

Se gavè problemi perchè la baba no ve lassa andar o perchè la vol vignir anche ela, problema risolto perchè vizin a l'Isola de la Mona ghe xe un picio isoloto ciamado Monìto dove le vostre sognore poderà spetarve godendose anche lore la beleza del teritorio.

by Max per TuttoTrieste.net

gennaio 2009