| I SERVIZI |



 


TEST PER NIENTE SERIO:

 

CAPISSI CHE TIPO DE VECIO TRIESTIN CHE TE DIVENTERA'


(de Igor Ota)

 

 


Ebbene si, gavè leto ben! Tuti noi zovini o quei che se reputemo tali (sic!) un giorno probabilmente diventeremo veci e quasi sicuro resteremo a viver a Trieste. Za vedo qualchedun che se agita e pensa:

“Ah, coi tempi che cori chi pol dir dove saremo de veci”. Per tuti quei che la pensa in ‘sta maniera ve regalo un per de ragioni per cui la posibilità che laserè sta bela zità xe alquanto lontane:

- Zervei in fuga: In sti tempi la television parla sempre de sta gente che xe sai sgaia, laureada e che trova lavor sai ben pagà all'estero. Trieste però ve ricordo che xe strana e tante volte quei più sgai no studia all'università. Quei sgai e studiadi inveze xe sai facile che gabbi un zervel che non pensa ala fuga perchè xe fadiga.

- No te podesi conviver con persone che no capissi: porzina/coto, senape, kren, capo in B, otavo in osmiza, clapa, Barcola, clanfa, pomigar, mula, Pedocin, Franz Josef, Carso ecc.

- “Bever un aperitivo” in tuto el resto dell'Italia e del mondo no vol dir far le 4 de matina strassinandose fin casa del mulon che ga ancora “una bireta in frigo!”

 

 

Bon basta perder tempo, passemo al

TEST



(Ciolè un toco de carte e noteve le risposte)

 

1) Te camini per città e te se inacorzi che xe sta verto un novo cantier. Cosa te fa:

A) Te pasi vizin ma no te vardi niente perché te ga furia de andar a beverte el sprizeto a Barcolla;
B) Te ciol una picia piera e te ghe la tiri ai veci che sta brontolando tra de lori come che i lavori no xe fati ben;
C) Te se fermi a zogar a balòn coi muleti ciamandoli: De Falco, Costantini, Godeas, Fava ecc.
D) Te se fermi col vecio a brontolar su come i lavori xe fati mal.
 


2) Xe una bela giornata de agosto e te decidi che te vol ‘ndar a farte un giro! Cosa te fa:


A) Te va a Barcola direto. Nanche no te ciami che sicuro i muloni xe là che i sta tirando clanfe tra un spriz e quel'altro;
B) Te monti su la moto e te va a farte un novo timbro per dopo andar a Barcola a mostrarghelo a le mulete;
C) Te va Basovizza a vardar l'alenamento dell'Unione e za che te son te buti un do razi e petardi ;
D) Te ciol la 36 e te smonti al primo cantier che te vedi;
 


3) El bugiardel anuncia che ogi el servizio del tram sarà inaugurado per la trecentesima volta e vista la particolare ricorenza el sindaco ga organizà el concerto de la Barcolana direttamente in tram. Cosa te fa quel giorno:

A) Te va in Piaza Oberdan che sicuro se xe ricorrenze un sprizeto gratis el riva;
B) Te se meti in canotiera anche se fora xe zima e te va a mostrar i muscoli a le mulete fora del tram che vol l'autografo de quei del gruppo che sonerà;
C) Te organizi un volantinagio de protesta contro la dirigenza dell'Unione perché con tuti i soldi che ga speso la Trieste Trasporti per meter de novo in moto el tram, se podeva pitosto far una squadra per andar in serie B;
D) Se el concerto no se fa in Piaza Granda vol dir che xe sicuro lavori in corso;
 


5) El novo movimento indipendentista triestin organiza una sagra in Carso in setembre e te devi proprio andar perchè el pare de la tua nova morosa xe tra i organizatori. Come te se comporti:


A) Te va de la mula e te se fa compagnar in sagra del pare cussì anche se te bevi do sprizeti no xe ris’cio che i te porti via la patente;
B) Te va in garage a lustrar i adesivi con l'alabarda e te va a farte el quindicesimo tatuaggio con el simbolo dei partiti che se riciama al TLT;
C) Za che te ga una mente che meti le man avanti, te va a volantinar domandando che anche in caso che se fazi el TLT la Triestina zoghi nel campionato talian e che il Ponziana fazi quel che vol;
D) Te va a la sagra e za che te son, te se informi dove che eventualmente venissi costruidi i confini;

 

6) Te se ga inacorto che manca la domanda n.4:

 

A) Pol esser ma chi se frega, me bevo un altro spriz!

B) Bu, no so, viva l'A e po bon!

C) Cossa manca? Fa niente, forza Unione e resto m...

D) Ovvio che si, manca la 4 e le prime tre xe comunque fate mal

RISULTATI:

- Più risposte A) – l'eterno MULON
Per ti el futuro riserva l'eterna giovineza mentale. A le soglie de la veciaia te sarà a Barcola a mostrarghe a le nove generazioni come se esegui una perfeta clanfa e una bomba e te gaverà in sogiorno le foto de tute le “Olimpiadi dele clanfe” che te ga partecipado (tute oviamente). Tua molie te rugnerà che sarìa anche ora de diventar serio e ti te ghe risponderà: “Ciò scolta vecia marantiga, te me ga ciolto cussì e se no te comoda va al Pedocin scoltar la cover band de Umberto Lupi!”

Più risposte B) – l'eterna NAGANA
Per ti el futuro riserva la pureza e l'orgoglio de esser restà cussì. Xe passadi i ani e purtropo no te poderà più guidar la moto, visto anche che i te gaverà ritirà la patente trope volte. Visto che però internet ormai xe diventà onipotente e i nipoti bastanza sgaioti, i riverà a trovarte una badante boba che la te porterà in giro con el sidecar per corerghe drio ale mulone. L'unico problema sarà che no te gaverà più un posto libero sul corpo dove farte un novo timbro.

Più risposte C) – l'eterno TIFOSO DELUSO
Per ti caro mio el futuro no riserva tante robe bele purtroppo. La Triestina dopo l'enesimo falimento i la ga iscritta al campionato carnico e cussì andar in trasferta xe diventà tropo dura. Anche le partide in casa no xe proprio fazile seguirle perché al posto del Rocco i gaverà costruido el novo parco acquatico perchè quando Bandelli iera diventado sindaco ghe stava forte antipatico che in Istria ne iera 4 e Trieste granche un. El Grezar inveze i lo gaveva za demolido ai tempi del primo mandato Furian per farghe posto alla filiale triestina del casinò de Buie. Oltre a questo per regolamento del campionato carnico, el stadio, no podeva eser a livelo del mar e cussì xe stado costruido uno novo a Grozzana. Purtropo però La Gradese (che ga comprà la Trieste Trasporti) ga taià tute le linee verso el Carso e cussì per seguir le partide casalinghe te tocherà cior la navetta de “Mahnič” che partirà da Valmaura e farte a pie da Kozina a Grozzana...almeno te gaverà la panza piena però.

Più risposte D) – l'eterno VECIO
Putroppo no te ga scampo... oddio visto le risposte che te ga da iera bastanza intuibile per dir la verità. Durante tuta la stimana te se farà giri per la zità in coriera e te scriverà segnalazioni al Piccolo su come el centro città sia diventado tropo rumoroso de note (anche se te abiti a Rozzol e te va a dormir ale 8), su come i cantieri xe tropo pochi e su come Via Giulia non xe ancora diventada pedonale. Meno mal che te resterà la domenica per farte un giro in machina per verificar se el mecanico cinese ga regolà ben el limitator de velocità a 50 km/h in autostrada e 20 km/h in zità come previsto dal novo codice de la strada per i guidatori VECI.

 






 





 | I SERVIZI |