NO SON MIGA SPION!

Per contentar noi muli no ghe voleva sai,

un vecio balon fiapo, do piere per i pai.

Le guardie no lassava che zogassimo balon,

e noi co le vedevimo scampavimo in porton.

Un giorno che de squadra mi fora son restà,

vignindome de schena un "Cerin" me ga ciapà:

-Mi no go fato niente, balon no go zogà!-

-Dime el nome dei muli che desso xe scampai.

Lo go guardà spavaldo:-NO SON MIGA SPION-

-Se no te parli subito te porto a ti in canon !-

Gavevo diese ani, testardo come el muro,

parlar mi no volevo, gavessi tegnù duro.

El me ga portà via sucandome pel brazo,

el me ga messo in cela sentà sul tavolazzo.

Studado el gà la luce per farme spaventar

Pensando: in do minuti el tacherà parlar!

E dopo meza ora tornà col Brigadier,

Dove che mi stavo el voleva lù saver.

Mi no volevo darghe questa sodisfazion

E duro mi insistevo: no go zogà balon!

Ormai vigniva tardi, mia mama sé in pensier

E i muli ghe ga dito che son del Brigadier.

La xe vegnuda svelta in distreto in via Caprin,

La se gà messo a pianser davanti del "Cerin".

El Brigadier ghe disi che no go fato niente,

El me gà tignù là perché son prepotente.

Appena la me vedi la me ga dà un strucon

Zigandoghe ale guardie:- i fioi metè in preson !

Intanto i ladri bagola, la ghe diseva forte,

El mato mogio mogio, ne gà verto le porte.

Pei muli stando zito un eroe son diventà

Govudo el posto in squadra per sempre assicura'

TULLIO PICCINI   

Trieste