|
MARIA
Caterina la gaveva emigrà nei primi del '900 con altri dalmati atrati
dela febre del'oro. Co' vivevo a Zara, la mama parlava 'ssai poco de ela
e solo quando che tiravo fora le foto che tegnivimo in una vecia scatola
de scarpe. In una se vedeva Caterina vizin de una baraca de legno, che
poi iera la casa che, come go contà, i ghe la gaveria brusà.
La mama e la nona le iera imbarazade de quela vista. Caterina no gavaria
dovù emigrar - le diseva - per finir in quela miseria. In ogni caso
emigrar iera una vergogna sia per noi, che per i italiani del tempo. Infati,
secondo i mii amici in Italia, se gavessimo spetà stariimo ben come
lori.
Ma xe stada proprio l'emigrazion a crear la base de sto benesser. Partindo
dela fin del scorso secolo in zirca 30 milioni, ghe gavemo lassà
posto e respiro ai rimasti de far scarpe, vestiti e spagheti che compravimo
e fazevimo comprar del paese che ne ospitava. E se questo no bastassi,
mandavimo a casa miliardi per impinir le cofe del tesoro italian.
A casa mia, però, l'emigrazion iera tabù, come ameter miseria,
anca se i Dragossevich iera emigranti politici pour excellence.
Le due guere mondiali li gaveva ridoti a miseria assoluta, gavendo perso
tuto ben dò volte.
Per mia mama, zia Caterina iera un segreto e de ela se parlava poco, come
se farìa de un parente in cheba. Ghe go, naturalmente, sempre volù
ben a mia mama, ma devo ameter che la gaveva idee strane. No la credeva,
per esempio, che l'emigrazion fussi una bona maniera de risolver i problemi
economici. La sperava inveze de vinzer una zinquina al loto. Perciò
el spirito de aventura che gaveva sburtà sia Caterina che mi stesso
a emigrar in Australia, non ghe 'ndava ben.
La mama però no la gaveva tuti i torti perché la gaveva vinto
una zinquina, anca se l'impiegata del'agenzia de Zara la se iera dismentigada
de timbrar la cedola e ghe ga volù mesi prima de incassar la vinzita.
La gaveva ragion anca perché la mia aventura migratoria no pareva
che gavessi el sucesso sperà, e pensavo de gaver sbaià.
Ma co' ricordavo quel che iera la vita prima del mio volo migratorio, penso
che gavevo bone ragioni de ciapar la strada verso l'ignoto austral. Strassinavo
una vita stentada a Mantova, zità circondada de paludi che i mantovani
ciamava laghi. Nel passato ghe ne iera quatro: El lago de Sora, de Mezo,
de Soto e de Paiuolo.
Questi stagni difendeva i mantovani dei invasori ma no dai mussati che
iera in legioni de miliardi per darse, d'estate, a orge de vampiri. De
inverno le stesse acque miasmatiche le evaporava in nebie cussì
fisse che iera fazile perderse per strada, anche al zentro, se - per combater
el fredo - ne riscaldavimo col vin o cola trapa.
Iera infati un zorno pien de nebia co semo rivai a Mantova in autuno del
1947, su camion del esercito de Sua Maestà Imperial Britanica, re
Giorgio d'Inghiltera, che ne gaveva sfratà dal campo profughi de
Padova per ospitar rinforzi causa una rivolta contro i sui camionisti imbriaghi
che gaveva butà soto le riode diversi padovani.
El campo lombardo iera molto simile a quel veneto, ma gaveva molti edifizi
demolii dela guera, che purtropo continuava contro de noi profughi istro-dalmati.
La metamorfosi del fassismo al comunismo gaveva un sucesso spetacolar coi
mantovani che i ne odiava col zelo tipico de acoliti apena convertii. I
ne acusava de voler sovertir la democrazia pena inventada in Italia. Iera
a questo astio che zercavo de scamparghe, domandandome chi che me lo fazeva
far de star in una patria che continuava darme peade in tel cul.
Ma xe sta un altro tragico evento che me ga decisamente sburtà fora
del vecio mondo. Mia sorela Maria, malada de tubercolosi, la ne stava morindo.
Poco tempo dopo l'antetato contro Togliatti, la morte inveze de smartelarlo
a lu, la gaveva falzado Maria. La xe morta implorando "No voio morir...".
La gaveva 23 ani.
A quel punto go deciso de emigrar: non volevo che un zorno i mii fioi gavessi
una vita senza speranze come la mia a Mantova. L'8 novembre del 1949, compleano
de Lidia - la mula che gavario sposà - son andà al'ufizio
del'IRO a Milan per meterme nela lista de quei che voleva emigrar.
La carta d'identità, no. 832, me definiva "sedicente italo-slavo",
idoneo de emigrar. Cussì xe stà che una freda matina piovosa
de fin otobre 1950 me son trovà a Melbourne e dò ani dopo
a Perth pronto a tornar.
|
|
BENITO
Tornar in Italia iera un problema, voleva dir molar el sogno de un
futuro e tornar ala miseria nera del campo profughi de Mantova, dove fazeva
'ssai fredo d'inverno e un caldo infernal d'estate. El magnar iera scarso
per i profughi, ma abondante per i mussati che - ignari dele diferenze
politiche dei mantovani e dei giuliani - i ciuciava sangue de mati, fin
de s'ciopar con imparzialità de dover amirarli.
In quel de Mantova se coltivava la bietola de zuchero che costituiva anche
l'unica pietanza estiva. Le bietole rosse le iera servie a pranzo e zena.
Dieta che me fazeva veder rosso. (I rossi i iera infati dapertuto, perfin
nei stramazi in forma di zìmisi).
Salvo qualche raro invito de compagni de scola, no go avù mai l'oportunità
de abandonarme ale magnade dela tavola mantovana 'ssai gustosa, ma anca
micidial. La ghe piaseva - per via dei guadagni - anca ai medici che, non
savendo coss'che fussi el colesterolo, i curava el "mal de fegato",
un "disturbo" del qual molti se vantava perché rifleteva
una qualità de vita che, nei ani Quaranta, pochi podeva permeterse
e che no ne includeva in nissun modo a noi profughi.
Questa ipocondria ga finì col crear una società che gaveva
otegnù el dirito dele cure termali, per "disturbi" che
non esisti ma che arichiva i dotori prescrivendo - indefessamente - la
dieta "bianca". El nostro placebo iera inveze "rosso"
(come la bietola) che me tegniva san ma afamà de grassi, de quela
volta la mia dieta preferia. E la xe ancora ogi.
Iera in sto ambiente che go incontrà Benito Dario, el più
duraturo amico dela mia vita e che resta ancora tal, malgrado i 15 mila
Km che ne separa. El suo nome rispecia le preferenze politiche de suo padre
(el mio, monarchico, el me gaveva batezà Amedeo Filiberto). Benito
ga sempre seguio el moto: "creder, ubidir e combater". Mi no
podevo creder, solo ubidir e combater, coi "titini" mentre lui
el iera coi "republichini". Questo no ne ga impedì de
scambiarne libri e memorie beliche, o condivider pene, spagnoleti e la
magrissima vita studentesca. La sua fedeltà per el Duce non se ga
mai indebolida e spesso lo ciogo pel cul domandandeghe se, caminando per
le strade de Padova, el evitava i tombini de ghisa dele fogne che gaveva
ancora el fassio.
Mussolini ghe gaveva insegnà che sbaliar xe umano ma perseverar
nel'eror xe diabolico, per cui el suo creder, ubidir ecc... podaria esser
considerà diabolico, ma sta a veder se el parametro inizial xe sbaià
no. Son sicuro che Benito, el mio amico, no Mussolini, gaveva ragion, o
perlomeno che mi go sbaià più de lu. La vita del emigrante
me ga insegnà che xe meio tegnirse el despota che se conossi, che
cambiar per pò gaver una bissa che te pol magnar, come nela fiaba
de Fedro del Re Travicello, che la nona ragusea me contava a Zara. El Duce
- per quante che el ghe ne gabi fate - non me ga tratà mai mal come
Tito prima e i inglesi pò. Questo no vol rifleter una simpatia per
Mussolini, ma solo el fato che tuto el mondo xe paese: Chi che ga la forza
ga l'aroganza.
Benito, finia la guera, el se gaveva iscrito al Movimento Social Italian
fazendo cariera fin a diventar segretario dela region, fato che ga istigà
un aversario a meterghe una bomba davanti dela porta de casa con gravi
dani. Non so se l'assicurazion lo ga rimborsà, ma el patriotismo
ga sempre costà caro, anca se espresso con lealtà per un
credo sbalà, che dopotuto el iera stà condiviso e poi respinto
de tanti italiani pochi ani prima. Penso che la sua "fede" no
iera altro che amor patrio, un sentimento che condivido anca se del fassismo
no me interessa un figo seco. In ogni caso - diferenze politiche a parte
- semo diventai amici a vita, unidi dala stessa tragedia: la perdita dele
nostre tere.
Noi italiani, o meio ancora, noi istro-dalmati, ierimo un problema che
Tito voleva eliminar dopo la vitoria dei aleati - che lo ga aiutà
a scapito dei serbi - massacrandone. Durante l'ocupazion de Trieste durada
quaranta zorni, el ga copà i italiani come mosche, spesso butandoli
nele "foibe". Infati in un libro de un inglese - Richard Lamb,
WAR IN ITALY, apena sortio - xe scrito che la gente del Litoral adriatico
ga soferto più per via dei titini che dei tedeschi.
Ma se qualchedun gavessi ancora dubi su questa "pulizia etnica",
basta che el pensi ala guera intestina in Jugoslavia de ogi per capir che
l'odio non ga mai tregua in quela tera. Nela seconda Guera Mondial credevo
che questa fussi la causa dela crudeltà balcanica, ma quela cosideta
"zivil" me ga convinto che i balcani odia solo per la passion
de odiar come Attila distruzeva solo per e gusto de distruzer.
Qualunque fussi el motivo de finir nel campo profughi de Mantova, mi iero
- tecnicamente parlando - un reduce "vinzitor", perché
de poco dimesso del'infame Guardia Popolar titina de Trieste nela qual
i me gaveva indoto a punta de un pistolon "magnum". Podevo vantarme
de gaver partecipà ala vitoria per quanto 'ssai più disastrosa
de quela de Pirro, perché no go trovà la fradelanza, ugualianza
e libertà sperada e per finir, go perso tuto. |
|
MARIALUISA
Iera ciaro però che, vinti o vinzitori, ierimo persone non
grate ai italiani che - causa la lota partigiana antifassista - i se diseva
anca lori vinzitori. Insoma tuti gaveva vinto la guera, meno che noi profughi
sogeti a continue aringhe dei avocati dela causa arivista del'ultima ora.
Quando che domandavo chi che iera quei che pochi ani prima i andava a scoltar
Mussolini in piaza, me sentivo urlare in viso: "Sì, ghe iera
molti che 'ndava baterghe le man al Duce in Piaza Venezia, ma quei iera
solo quei mone de i romani co no i voleva lavorar e l'adunata iera una
bona scusa.". Secondo sti neofiti, iera i romani a voler canoni inveze
del pan, e pò i se ga cagà in braghe e domandà che
Roma diventassi zità averta dopo i primi atachi aerei.
E i continuava, sempre urlandome: "Tuta colpa dei cabibi e de voi
fassistoni del cul. Mussolini ve ciamava "fedelissimi",
xe vero o no? Nostalgici, eco, sè solo nostalgici e volessi che
el tornassi. Tornè inveze voi, ale vostre zità per afrontar
el popolo che gavè sfrutà, bruti porchi de capitalisti opressori."
La realtà della mia vita la iera ben diversa. Cola morte del papà
i me gaveva mandà in convito a Spoleto de dove tornavo a casa durante
le vacanze estive inoltrade solo co' la mama podeva ingrumar bastanza schei
per el bilieto del viagio. Quando finalmente rivavo, spesso no ghe iera
bastanza de magnar, perché mia madre la iera nata a Lissa soto l'Austria
e - anca se moie de un che gaveva combatù con el grado de tenente
dei bersalieri - no la se meritava una pension normal per impinir un'altra
boca. Vedova a soli trentasie ani - con quatro fioi e pension ridota -
la gaveva una vita misera. Come questo podessi classificarne tra i porchi
capitalisti che sfrutava i poveri proletari iera difizile de capir e più
ancora de spiegarghe ai difensori dela democrazia de Mantova.
Sì, perché sarìa stà ancora più difizile
spiegar che l'unica grazia che ne ga salvà dala fame nera, iera
la "Carità Fassista", un ente che ne dava pan, oio e pasta
bastanza per non farne morir de inedia. Mia mama no la gaveva el coragio
de prelevar quela carità e la mandava, inveze, la nona materna.
De bonora, co ghe iera poca zente per le strade, la nona 'ndava in Piaza
del Tribunal a Zara, nel negozio dell'ente de assistenza, per confonderse
tra quei che visitava parenti nela preson del tribunal. Zente vergognosa
e no tipi de far domande.
Ma no tuti i mantovani ne iera contro. Ghe iera una professoressa de matematica,
la signora Maria Luisa Jahier laureada in fisica ma con el cor in politica
del partito de Saragat, un socialista moderada del dopoguera, che la me
voleva ben.
Nata in Val d'Aosta, la iera calvinista, ma solo de nome, perché
agnostica, e per ela la religion iera l'opio dei popoli, un punto sul qual
iero d'acordo anca mi. La signora Jahier la iera una zima e anca assai
bela, con labri fati per i basi e gambe stupende. Ghe piasevo anca se la
me considerava fassista, sempre per via del mio patriotismo. Me ricordo
le discussioni che scominziavo per via dei mii compagni de classe che quando
no i gaveva voia de studiar i me istigava a farghe domande tipo come mai
Mussolini gaveva scominzià de socialista.
Se perdeva, cussì, ore e ore ciacolando de robe politiche italiane
e de quele dalmate. Non so come che la podeva sofrirme, perché iero
bruto, pien de bruschi e magro come un ciodo. Iero, però, el primo
dela classe, anca se Benito me bateva sempre nela date storiche perché
el gaveva la memoria de un computer. Volevo esser el più bravo in
tuto perché iero el più povero de tuti.
Questo lo se podeva capir con una sola ociada: gavevo braghe fate de una
coverta de lana, una giaca a vento che no cambiavo mai, e una unica camisa
che indossavo ala riversa co' el coleto diventava lurido. Per finir sta
eleganza, gavevo dò scarponi militari americani de diversa manifatura,
misura e color.
Naturalmente el sesso oposto no'l fazeva la fila per sedurme; questo iera
el privilegio de Benito, che gaveva un guardaroba più rafinà
de mi e no'l iera mai senza una lira. Lu, le mule le rastrelava a frote
e questo me ingelosiva al punto che gavevo giurà a mi stesso che
un zorno le gavaria conquistade tute. No volaria vantarme o esser indiscreto,
ma questo proposito el saria diventà realtà in diverse ocasioni
ani dopo.
La signora Jahier la ga scominzià a rispetarme dopo un esame oral,
co' dovevo risolver sula lavagna un fraco de equazioni. In questo genere
de lavor iero diventà bravo perché, con gnente de far nel
campo profughi, passavo ore e ore in esercizi de algebra quando me stufavo
de lezer libri de Giulio Verne che i me afassinava de morir.
El xe sta lu, infati, a darme l'interesse pela fisica, anche se ghe devo
a Tito el privilegio de gaverme mandà verso la luna grazie ala sua
lunatica ambizion de mandarme al'inferno, dove lu el ghe xe za. Ma per
mi la luna doveva spetare altri venti ani.
Comunque co' iero ala lavagna me son dà da far e in poco tempo gavevo
la soluzion Però la classe tuta insieme la ga zigà "Sala
el ga sbaià!", riferindose ale mie manipolazioni dei esponenti.
La Jahier alora la gaveva domandà - da vera socialista democratica
- "Chi pensa che Sala el ga sbaià?" Tuta la classe gaveva
la man alzada meno che mi. Co la ga domandà chi pensassi che gavessi
ragion, mi iero l'unico a farlo. "Sala el ga ragion" gaveva confermà
la profesoressa "e el se merita un diese". Questo me dava la
media del'oto, indispensabile per le borse de studio erogade da agenzie
de tuti i colori politici: neofassiste, democristiane e comuniste, senza
le quali no gaveria podù studiar.
Me ricordo ancora che co son tornà al mio banco go borbotà
tra i denti un: "Andé tuti in mona, teste de cazo!" Perché
co' un xe povero e el fià ghe spuza dela fame, vien una fota che
no so pol controlar. |
|
CARNE DE CANON
Durante le vacanze estive, el 14 luglio del 1948, Togliatti el se iera
ciapà tre palotole de pistola de un studente, Antonio Pallante.
Questo gaveva sbalordio el mondo incluso mi, ma solo perché Pallante
gaveva fato cileca. (L'odio contro quei che credevo responsabili per la
perdita delle mie tere e per le stragi dei quaranti zorni de teror a Trieste
iera indomabile). Togliatti se la gaveva cavà ma no prima de gaverghe
dà ai comunisti una bona scusa per una rivoluzion che gavaria portà
l'Italia a un'altra ditatura.
Benito, mi e altri profughi - carne de canoni come al solito - semo stai
subito armai fino i denti per difender el vescovado de Mantova. A Benito
i ghe ga dà una mitragliatrice, a mi un s'ciopo e ai preti, pistole.
La crisi la xe passada presto e senza rivoluzion, con una vitoria suprema
per la mia panza perché ghe iera un fraco de roba de magnar: el
vescovo se iera ricordà del deto de Napoleon che un esercito marcia
sul stomigo, e quela la iera diventada una marcia memorabile per il mio
e per quel de Benito.
A dir la verità la vita de Benito in Istria non iera stata stentada
come la mia a Zara, perché el pan non ghe mancava mai. D'altra parte
el gaveva altri problemi, più gravi dei mii, coi comunisti. Benito
iera entrà nele forze fassiste dopo l'8 setembre 1943, co' i partigiani
i se ga calà nei paesi del Istria e ga copà molti italiani.
Questo primo esempio de "pulizia etnica" zinquanta ani dopo,
nella guera zivile dela Jugoslavia, el sarìa cascà sule teste
dei fioi e nipoti de quei che gaveva copado la nostra gente. Forsi vendeta
dele vitime tormentade dei cani butai nele foibe dei boia per negarghe
- grugnando ai morti - la pase in eterno, come una superstizion slava voleva.
Dovarà passar più de ziquanta ani prima che la giustizia
italiana se ocupassi de sti crimini, con un processo che dovaria scominziar
contro dò criminai de guera croati nel 1999, ma credo che no i lo
farà mai.
Capisso come che Benito zercassi de impedirghe ale orde comuniste de rivar
a Trieste e poi andar fin a l'Isonzo, che Tito gavaria usà per butarghe
dentro altri italiani. La perdita de pochi chilometri de tera carsica -
un'area equivalente a quela de Perth - xe banal in confronto ale soferenze
imposte dela crudeltà de Tito. Un teribile sentimento, che go eredità
de quel tempo, xe che no sento pena per le soferenze dela sua gente nella
guera zivil jugoslava. La strage che gavemo soferto noi ga stuà
ogni pietà in mi.
Questo me fa pensar che gaveria dovù esser con Benito in sta ultima
difesa. Ma la guera stava per finir e no vedevo scopo de morir - e forse
in una foiba - a soli 17 ani. Vivevo in sta paura quando i me ga sforzà
nei partigiani. Poco dopo iero nel'infame Guardia del Popolo 1º setor,
2º batalion, Gretta, per ciapar "sospeti fassisti e coperatori".
No gavevimo una preson e i arestai i vegniva messi nei gabineti. Un zorno
un finanzier sicilian el xe sta fermà e serà in cesso. El
comandante, un sloven co una montura blu dela Luftwaffe nela qual
el se pavonegiava, el xe entrà imbriago a tochi con un "Maschinegewehr"
che el doprava ala minima scusa e el lo ga scarigà contro la porta
del gabineto dove che iera el finanzier. Ciolto un altro carigador, el
gaveva svodà anca quel e el ga continuà a far repete fina
a ridur la porta de legno compensato a una straza che sventolava a ogni
nova scariga. El prisonier el se gaveva salvà solo perché
el se iera strucà drio el poco muro che tegniva la porta.
Ma questo no lo ga iutà: poco dopo i lo ga butà in una foiba.
Lo go rivisto tempo fa in una foto de soldai italiani che vegniva portai
al'infoibamento. Esser testimonio impotente de questa crudeltà e
no poder iutar un conazional vitima de un tratamento bestial xe un'esperienza
che me tormenterà fin che morirò.
Ma no iero el solo; anche Benito el ga avù esperienze brute. El
iera de servizio in una compagnia comandada de un tedesco che 'ndava a
interogar la mula de un partisan. Durante l'ispezion Benito doveva far
de guardia al porton de casa. Ad un zerto momento el ga sentio una finestra
del secondo pian verzirse e un rumor: vardandose torno el ga trovà
una baleta de carta involtizada.
Iera la letera de un partisan scrita ala mula che el gnoco voleva interogar,
e dove che ghe iera i nomi de altri partisani. Sto toco de carta ga messo
Benito in crisi, perché nol voleva crearghe dispiazeri ala mula,
ma el doveva informar el comandante del fato. Al ritorno el se iera consilià
col tenete italian, che ghe ga promesso che nol gavaria agì contro
le persone dela letera, ma el le gavaria solo amonie. Benito, lora, ghe
gaveva passà el toco de carta, ma le persone le xe stade subito
arestade e mandade in un campo de lavor in Germania.
Tuti dò ierimo solo pedine de un zogo barbaro. Le nostre esperienze,
però, le ne pesa sula cossienza che ne condana a un ingiusto e per
gnente merità rimorso dal qual xe impossibile scampar.
Perché dovemo continuar a sofrir per colpe che no le iera nostre?
(Chissà, forsi perchè quei che le ga ordinade no i
ga mai vù bastanza cossienza per saver coss' che xe el rimorso?
N.d.r.) |
|
PRIMI PASSI NEL'ELETRONICA
Ma desso ste memorie le me sburtava a provar de novo. Nel 1952, falopa
o no, iero via da quela mata de Europa. E zà che iero qua a Perth,
valeva la pena continuar a provar in un logo dove, fra l'altro, gavevo
parenti.
Per un dò mesi son stà a casa de mia cugina Palma e Bob,
suo marì, ma son andà via pena che me son abituà ala
zità. Preferivo viver solo e go scominzià a zercar un alogio
altrove.
In fin go trovà una buso de una afitacamere iugoslava de James Street,
a Northbridge, un rion de North Perth che atirava molti emigranti perché
vizin dela stazione del treno, al tempo unico mezo di trasporto per quei
de noi che no podeva permeterse un auto o una moto, che i iera la magioranza.
Trovar qualcossa de afitar iera difizile e costava molto, al punto che
spesso i emigranti i afitava un solo leto per usarlo in turno. Mi inveze
go finì per condivider una camareta con Frane, uno vecio slavo che
parlava poco con mi ma molto con se stesso, contandose robe evidentemente
spiritose perché ala fin de ogni soliloquio el se fazeva una ridadina.
Iera difizile far amicizia con lu, ma no importava. Dopo tuto volevo solo
un teto sora la testa e un leto e quel che gavevo trovà gaveva el
vantagio de esser a solo pochi metri de La Tosca, l'unico ristorante italian
in quel quartier, al tempo fra i pochi de Perth.
No podevo adatarme ai tramezini, cussì pranzavo spesso ala tavola
calda de La Tosca dove el menù iera sempre l'istesso: galina e spagheti.
El ristorante iera anca un logo de ritrovo, dove che incontravo altri emigranti
per scambiarne le ultime notizie e babezi. Per quanto questi contati iera
importanti, non i iera tanto quanto la tavola italiana che me mancava ormai
da dò ani.
Mentre desso ciogo pel cul i mii conazionai per l'insistenza de magnar
solo i nostri piati e per insister che la nostra cusina la xe la meo del
mondo, co iero apena rivà in Australia gavevo anca mi quel punto
de vista. Zerte abitudini no se pol cambiare fazilmente.
Qualunque fussi la mia opinion de alora, o quela de ogi, resta scontà
che la cusina australiana dei ani 50 iera un disastro. L'agnel, che poi
iera quel che noi in Dalmazia ghe ciamavimo "cavron", spesso
morto de veciaia, el iera servì a colazion, pranzo e zena. Le verdure
e le salate vegniva preparade senza nissun condimento e el butiro, salà
come el mar, iera de no poderlo magnar. La cusina local iera semplicemente
barbara.
La mia opinion xe sempre stada che la cusina rispecia la cultura de una
nazion. L'Australia iera una società senza veri contadini, i maestri
della bona cusina che nei secoli gaveva prodoto capolavori gastronomici
perché, assai poveri, i doveva far pietanze nutrienti e gustose
con poco o gnente. Basta pensar ala jota dove i buta drento fasoi, capuzi
garbi, luganighe, crodighe, magari anca patate e tuto quel se pol pensar.
I australiani gaveva ciapà le abitudini culinarie inglesi, basade
sula carne fazile de preparar, ma anca de andar de mal, cussì i
ga inventà la conservazion a base de sal e fumigadura. Questo la
fazeva ancora meno gustosa e alora i ga inventà quel maza-cavai
che xe la senape inglese, la più forte del mondo, creada, apunto,
per sconder el gusto dele carni meze marze brusando le papile gustative.
Gaver i ingredienti per sta roba e el bisogno de un continuo rifornimento,
iera stada la ragion per farse un impero. La mia conclusion xe che se la
cusina inglese no la fussi stada quela calamità disastrosa che la
fa unica al mondo, no ghe saria stado un impero sul qual el sol nol tramonta
mai!
La cusina iera qualcossa che gavaria volù cambiar, ma questo iera
el compito de altri emigranti, quei che verzeva ristoranti italiani, e
dei portafoi dei australiani. La mia preocupazion iera de trovar un mezo
de viver.
Dovevo gaver subito un lavoro che ala fin go trovà in una dita de
sistemi audio. Dopo Bonegilla, dove i amplificatori me stordiva da matina
a sera, gavaria dovù odiarli, ma dati i miei lavori de prima, sta
prospetiva iera iresistibile. Me iero preparà ben per l'intervista,
lezendo tuto quel che rivavo a trovar sul sogeto nela biblioteca publica.
I amplificatori, derivai dela radio, me verzeva una porta dela tecnologia
del tempo e iera un'oportunità per sodisfar el mio desiderio de
inventar qualcossa de novo nel campo del'eletronica. Forse gavario creà
una nova trapola de sorzi e el mondo me gavaria fato la fila davanti la
porta de casa, e mi molti soldi. No savevo, però, cossa far de lori
perché no gavevo la minima idea de come che i fussi fati. La necessità,
i dise, xe la madre del'invenzion, ma questa, a casa a mia iera la madre
dela necessità. L'ossession de mio padre de inventar ne tegniva
poveri. I soldi iera importanti solo perché a Trieste i ne mancava
sempre.
Purtropo el bisogno de crear robe nove xe genetico nel mio caso. El trapianto
nel continente "novissimo" no iutava a liberarme de questa ossession,
pezorada dal fato che in un paese novo come l'Australia el futuro, pensavo,
iera la tecnologia. Il mio sogno, quindi, iera quel de esser un dei pionieri
in questo campo. El conceto no'l iera del tuto sbalà.
Nei ani Zinquanta l'Australia galopava sula goba dele piegore e nudava
in un mar de gran. L'Europa del dopoguera comprava tuto quel che l'Australia
produseva e questo iera fin tropo, anche se la iera disadata al'agricoltura
per la scarsa fertilità del teren sabioso, acido, povero de nutrimenti,
fazilmente erodibile e sogeto a una rapida salinazion.
L'Australia viveva nell'aspetativa del cosideto "assegno bancario
dela lana," per poi spenderlo e spanderlo comprando prodoti inglesi
de povera qualità e anca costosi; ma, importai che i iera senza
dogana, no i ghe dava al'industria de qua modo de consolidarse. L'isola
più granda del mondo iera radicada nele tradizioni rurali e l'industria
no ghe interessava a nissun.
Perché pensassi che il mio sogno gavessi qualche speranza de realizarse,
no lo savaria dir, ma sentivo che el lavor che me preparavo a far iera
l'inizio de quel sogno.
|
