|
LIDIA
Sognavo de gaver una famea tuta mia. Dopo la morte de mio papà la
sua la se iera disfada e con questa el mio senso de sicureza. Desso el
sogno de farme una mia stava per diventar realtà. I documenti iera
pronti, el bilieto pagà, una cabina prenotada e i soldi per le picole
spese del viagio mandai via: Lidia la stava per rivar.
Gavevo scominzià a zercar casa ma in Australia i quartieri de afitar
no i esisteva, gnete come quel che anca un'Europa distruta da una guera
orenda gavaria podù ofrir. El mio sogno stava per diventar un incubo.
Trovar un logo de afitar no me xe stà fazile gnaca co zercavo solo
un leto co' son 'ndà via da mia cugina Palma. Gaver qualcossa de
simile a un quartier europeo iera impossibile. Col sbarco de miliaia de
emigranti, la domanda gaveva esaurì la disponibilità deliziando
i afitacamere che ghe dava ssai importanza al paese de provenienza del'inqulin,
ma solo per farghe pagar de più. Questo me dava l'impression che
la preferenza fussi inversamente proporzional ala distanza del paese de
origine de Londra. Ma anche se un emigrante nord-europeo iera preferio
a un dela Grecia, i greghi finiva per ciapar casa, perché quei del
sud no i parlava inglese e no i podeva contratar cussì i finiva
per pagar de più.
No podevo permeterme i alti afiti che i strozini australiani voleva, e
speravo de convinzerli che gavaria mantignù in bone condizioni la
casa in cambio de un afito ridoto. I europei, squasi sempre, i se ciol
cura dei quartieri in afito, ma i australiani se ne frega. I cura solo
quel che xe suo e no i va tanto drio ala propietà dei altri anche
se questo xe a scapito dela qualità dela vita in un ambiente malandà.
Emigranti come mi se sentiva imprisonadi tra dò mondi dei quai i
doveva soportar i pezo aspeti.
Sicome i locai in afito vegniva rovinadi dai inquilini australiani, i paroni
voleva un grosso deposito prima de poder entrar nel quartier. Mi no gavevo
i soldi per questo. La mia banca, anche se la se ciamava "Common-wealth"
- cioè "richeza comun" - difidava dei novi rivai e nel
mio caso la iera mal disposta a zogarse parte de quela richeza che la metava
in mostra nel suo nome. No la ga volù farme un prestito e cussì
go finì per afitar - de una copia inglese emigrada anca ela e che
no la iera gnanca parona - una singola camera con cusina no assai lontan
dela casa de Pamela a Subiaco, rion a sud dela zità.
L'acordo iera, però, sogeto ala condizion che no podevo traslocarme
là fin che Lidia no la rivasse. Al marìo, Robert - che insisteva
de no farse ciamar Bob de un cabibo, ma "Robert" - no
ghe piaseva l'idea che me stabilissi nel quartier de solo. El se preocupava
che un italian podessi farghe fora la moie. Ansioso de gaver el quartier
go dovù ciorme una camera in zità., cussì anca se
no podevo permeterme un solo alogio, go finì per afitarghene dò.
El quartier de Subiaco iera una vera baraca, ma "stuco e pitura, fa
bela figura", diseva la nona ragusea, cussì con un poco de
vernise, qualche mobile e un toco personal lo go trasformà in un'alcova
bastanza abitabile. Iera ben diferente, però dela casa molto moderna
de Lidia a Bolzano. Prima de questo la viveva in un paese dela Valsugana,
a 15 chilometri de Bassano del Grappa, dove la se iera rifugiada durante
la guera. Infati iera là che la gavevo incontrada.
El paese iera dò combinai in una singola località. El gaveva
dò cese, dò zimiteri e dò nomi, Carpané e Valstagna.
El fiume Brenta le divideva no solo fisicamente ma anca parochialmente.
Quei che viveva a Carpané i la gaveva su con quei de Valstagna,
ma i doveva condivider zerti servizi che no se podeva duplicar, cussì
Carpané gaveva la stazion feroviaria e Valstagna i negozi. Un ponte
sul Brenta permeteva de passar de un paese al'altro, ma, a meno che i Valstagnoti
dovessi cior el treno o i Carpanoti dovessi visitar l'unico dotor del logo,
el ponte no'l vegniva traversà e co i partigiani i lo ga distruto
nel 1944 no'l ghe ga mancà a nissun.
Durante la guera questi problemi i iera complicai sia dei gnochi che brusava
case, che da un aroplan aleato che planava regolarmente per mitraliar persone
longo la Valsugana. Una volta el ghe gaveva sparà anca a Lidia e
a sua sorela Mirela, ma, fortuna de Dio, senza dani, perché el pilota
el gaveva una mira balorda. I lo ciamava Pippo, come el mato mezo mona
dei giornalini de Topolino de Walt Disney.
Co' i tedeschi i se ga ritirà, xe rivai i partigiani e i Pavcovich
ga dovù far fronte ala vendeta dei vinzitori, perché i profughi
iera considerai fassisti. I voleva taiarghe a zero i cavei a Lidia, ma
la xe stada salvada de quela umiliazion del fiio del farmacista, un simpatizante
dei partigiani, che se iera ciapà una cota per ela. Lidia no la
iera un'ecezion, perché in una maniera o nel'altra i profughi ga
dovù sofrir tratamenti umilianti per la sola ragione de esserse
fati netar de Tito.
La mama de Lidia ghe ga tocà cusinar e lavar per i partigiani, el
zio Franzi i lo gaveva arestà e messo davanti de un picheto de fucilazion
che ghe sparava sora la testa, senza tocarla. La finta esecuzion la iera
intesa come tortura psicologica e in sta maniera la xe stada de gran sucesso.
Zio Gigi el iera pena tornà dala Germania dove i lo gaveva internà
in un campo de lavor forzà per dò ani e liberà pena
in tempo dei americani. El fradel Tonio, che el se trovava in un'academia
militar, el se iera rifiutà de arenderse ai partigiani e el xe scampà
giusto in tempo per no esser copà con tuti i altri cadeti che i
se iera aresi.
Malgrado el costo enorme, la pase iera tornada. Ma la mia lota per viver
la continuava. Dovevo guadagnar e cussì son andà a taiar
legni nei boschi, e pò in montagna per venderla. Ogni matina, me
rampigavo per 4444 scalini, per taiar alberi che cresseva orizzontai dei
fianchi impirai per poi incurvarse insù in zerca de sol.
Quando ghe ne gavevo bastanza, li sbusavo con una viola ala base incurvada,
poi ficavo un cavo de aciaio traverso i busi per formar un bloco compato
che pareva sci ligai ale ponte. Fazevo sbrissar i tronchi zo per i 4444
scalini, spesso a velocità paurose tanto che zercavo de sterzarli
co l'aiuto de una corda. Rivà in fondo, ghe vendevo el mio carigo
a un mato che me pagava sempre meno dei altri perché no iero un
de lori.
Un giorno el sindaco comunista, che per sparagnar i soldi del comun incolava
personalmente i sui stessi editi sui muri del paese, el ga proibì
a chi che no iera residente de taiar alberi. Co el ga firmà la delibera
pena tacada e prima che la cola fussi suta, no gavevo più de lavorar.
|
|
MERCATO NERO
Cussì go scominzià a traficar nel mercato nero e xe
anca cussì che go incontrà Lidia. Andavo a casa sua a farme
taiar el tabaco e controlar el lavoro, ma vegnivo sempre distrato dal suo
corpo sensuoso.
Lidia la stava de casa in una logo ciamà Londa, zerto no granda
come Londra: consisteva de sole tre grande case, che forse una volta iera
usade come granai. L'apartamento iera stà diviso in "camere"
del papà de Lidia cola carta perforada dei ruli che serviva per
sonar le pianole, i CD dell'800. La musica vegniva registrada e poi sonada
grazie ai busi che serviva a riprodur le note musicali. Desso sti rodoli
valerìa un patrimonio, e sarìa tochi pregiadi per antiquari,
ma a Londa i iera solo el material più robusto che el papà
de Lidia podeva trovar per far i paredi. Non iera forte bastanza, però,
per fermar el cagneto, Flop, che coreva oltre ai paredi de carta sbusandola
ogni volta ghe vegniva el morbin. Cussì el padre de Lidia el iera
sempre là a giustare muri, che Flop insisteva a sbusar.
Lidia la ga risposto al mio amor che gnanca le frede acque del Brenta,
dove che andavimo a nuar d'estate, podeva fermar. El paroco del paese ne
condanava del pulpito e del'osteria, dove che el andava per le sue "ombrete",
perché secondo lu far el bagno senza una veste che coverzessi tuto
el corpo iera un pecato mortal. Lidia, più che idonea per el bikini
(pena inventà in Australia), usava un costume bianco che iutava
a mostrar le sue forme e contrastava col nero dei cavei de ebano, lissi
come la seda, ma che me dava el problema de complicar le mie careze, perché
tropo streto.
Sete ani dopo el nostro primo incontro ne semo sposai per procura. Mi iero
a Perth e Lidia la xe andada a Venezia per la nostra "luna de miel",
che infati la doveva spetar fin a che la rivassi per gaver efeto.
Speravo che Lidia la podessi adatarse presto al novo mondo; dopo tuto el
vecio no la gaveva tratada tropo ben. I sui genitori gaveva problemi finanziari
dopo la guera, la disocupazion in Italia iera ssai alta e i pochi lavori
disponibili ghe vegniva dài a chi che gaveva contati per iutarli
con le solite racomandazioni.
Ma speravo per el meo. Ghe gavevo prenotà una cabina turistica de
seconda classe per evitar che la finisse nei dormitori, magari come quei
del Gen. Muir. Speravo anca che il viagio fussi quela vacanza che mi no
go avù e che xe stà, infati, una bela esperienza per Lidia.
La ga ancora un bel ricordo de quel viagio durante el qual la gaveva fato
diverse amicizie.
Iera un bel zorno d'estate, pien de sol co la xe rivada - un ano dopo el
nostro matrimonio per procura - per meter per la prima volta el pie in
Australia, sula banchina del porto de Fremantle.
La gaveva indosso un elegante tailleur de seda blu, lezermente largo cussì
che la sinuosità del suo corpo giovine se la vedeva a ogni movimento.
Iero felice, ma preocupà de trovar cambiamenti avenudi durante la
nostra forzada separazion de tre ani. Non savevo cossa dirghe. L'emozion
della riunion la iera cussì forte che no potevo dir altra parola
che un gofo "Ciao." La separazion ne gaveva fato squasi foresti.
Una paura me ga ciapà el cor.
Semo partidi per Subiaco con mi che guidavo senza dir una parola per tuta
la strada fin che semo rivai a Kings Park, un grando parco de più
de 400 etari nel zentro de Perth con la vegetazion salvada al natural.
Ne semo fermai per vardar el panorama dela zità che se rifleteva
sul'acqua del fiume Swan (Cigno) crogiolandose placida nel calor de una
matina che saria stada calda, ma bela. El ziel blu el se speciava nel'acqua
tranquila del fiume lisso come l'oio. Un stormo de cigni neri el ga amarà
vizin dela sponda per pò navigar placido longo questa, forsi per
farse far veder davanti dela nova rivada. La sena che pareva che vegnissi
dal romanzo del Manzoni, I promessi Sposi, ga fato che Lidia esclamassi:
"Come xe bela sta Australia!"
Ghe go messo un brazo intorno ala vita per sentirla e assicurarme che quel
no iera un sogno. No iero più solo e con ela vizin me sentivo sicuro.
Sentivo che gavaria podù conquistar el mondo e, chissà, forsi
anca la luna.
Ma quando semo rivai a casa go capì la sua delusion. Malgrado una
letera nela qual ghe gavevo spiegà le condizioni primitive che la
gavaria trovà e malgrado che la me gavessi risposto de no preocuparme,
la se spetava qualcossa de meo; ma no la ga dito gnente. La ga scominzià
inveze a disfar el grande baul del coredo che la gaveva portà con
sè. Quasi per magia el picolo apartamento el se ga impinì
de ogeti che lo ga trasformà in un nido con echi dela nostra cara
Dalmazia a quel punto squasi dismentigada. |
Un tochetin de album:
 |
Qua xe Lidia a Carpané, in pie che la se poza sule spale
de sua sorela Mirela, i altri xe un fradel (Guido) e cugine. |
 |
Qua inveze ghe xe dò imagini: in quela a sinistra semo
a Bolzano,dove se ghe dà la destra ale signore, e nel'altra semo
a Perth, dove se ghe dà la
sinistra ale done per via de tegnir el pugno de la man destra libero in
caso de dover difendarla.
Paesi che vai usanze che trovi! |
|
|
ROBERT
La luna de miel la xe stada stupenda, anche se l'adatarse ala nova
situazion creava grane. Lidia la iera pena rivada de un ambiente rafinà
e la se scontrava contro la mia ruvideza de ex manoval e minador. Gavevo
perso anca el senso de vestirme e iero pitosto ridicolo con un vestito
fato de un sarto che dava l'impression de gaver fato l'aprendistato in
una fabrica de sachi de patate. No me iutava che usassi tirache enormi
come quele che i pompieri porta per tegnir su le grosse braghe de lana
antincendio.
A complicar sti problemi me xe vignù una infezion de bruschi sul
colo. Ghe go spiegà a Lidia che la pustola iera tuta colpa de MacAbro,
ma questo no ghe andava ben, perché no la podeva sofrir idee mone,
cussì la storia de Mac la xe sparia dela nostra conversazion per
sempre.
Malgrado tuto, Lidia no la se lagnava mai nè dela solitudine, nè
dela nostalgia, emozioni che tuti patissi co' se emigra lontan de casa.
La se tegniva sempre assai ocupada giustandose vestiti, cusinando e zercando
de abelir la baraca.
Questa iera un "cotage" a un solo pian, costruido ala fine del
secolo quando Subiaco iera solo una serie de piste disperse tra poche case
vizin de Perth. El cotage gaveva scominzià la sua esistenza con
dò camere de leto, una cusineta piutosto misera e un saloto altretanto
insignificante. Ghe iera un bagno, fato de lastre de eternit inciodade
su una strutura de legno senza nissuna finidura interna. Per andar in bagno
bisognava sortir fora de casa e traversar el giardin.
La cusina de Lidia pò iera un buso, che no sò per cossa el
iera servio. El cesso iera in fondo al giardin e el confinava cola strada
de servizio per darghe modo ai camion dei condoti de vegnir a svodar i
vasi sanitari simili a quei de Bonegilla. La costruzion de matoni iera
ssai picola col tetto de lata ondulada a forma de volta . El water consisteva
de una tavola de legno con un buso in mezo, per sentarse in un abitacolo
che no gaveva gnaca una finestra o luce eletrica, che dovù instalar
mi doprando un trasformator (perché no me iera permesso de interferir
co l'eletricità) e una lampadina de sie volt.
Come Lidia la ga avù pazienza de adatarse a sto mondo barbaro no
capirò mai, come gnanche perché no la me gabi mai rinfacià
la miseria de quel tempo e le robe che le andava de mal in pezo.
La casa gaveva una moquete lisa adornada de fioroni de colorazi smaridi
che coverzeva tuti i pavimenti, meno la cusina che gaveva un linoleum sbregà
e lurido. Sete anime viveva in quel tugurio: i sposi inglesi e i sui dò
fioi, più Lidia, mi e el gato che Joan - la parona de casa - tratava
come una persona. Credo che la ghe voleva più ben al gato che al
marìo, Robert, un omo strassinà dela passion de meter in
mostra el suo creapopoli spesso e volentieri a spetatori no propio disposti
a amirarghelo. Gavevo leto da qualche parte che l'olfato xe una funzion
che el zervel combina con quela del sesso. Che volaria dir che chi che
ga problemi col naso ga anca quei sessuali. E Robert gaveva "bolti
problebi cob suo daso".
Lidia la iera rivada pochi zorni prima de Nadal, in piena estate austral.
No la podeva adatarse al caldo e la sofriva al punto de pianzer. Joan la
iera sempre pronta a iutarla. La preparava cadini de acqua freda dove che
Lidia meteva i pie mentre la se sforzava de bever cicare de tè bolente,
per aumentar cussì la temperatura del corpo e sentir meno el caldo.
Ma Robert iera diferente. Ossessionà de mostrarghe el suo bimbin
a tuti - fazendose grande vanto de una roba picola - el se mostrava nudo
a Lidia co' i altri no iera in casa. Con l'aiuto de Palma, che la viveva
là vizin de noi e savendo che l'Adamo britannico gavaria scominzà
la solita mostra pena sua moie la saria andada fora de casa, Lidia lo ga
intrapolà.
Un dopopranzo al fin de un zorno invernal bel ma ssai fredo, Robert gaveva
scominzià la sua routine con una docia calda cantando a tuta forza,
per poi sortir dal bagno nudo per sugarse nel caldo del sol del tramonto
e farse vedere de Lidia. Lu e la sua cantada le se ga iazà de boto
co el se ga inacorto che Lidia e, per lu pezo ancora, Pamela, involtizade
in coverte calde, le se iera sentade in prima fila de quel teatro domestico
che iera el retro dela nostra casa.
Robert el se ga subito sconto drio dele piante con un picolo sugaman per
coverzer la sua modesta modestia, ma che no lo podeva iutarlo contro el
fredo intenso dela sera. Cussì i lo ga a abandonà a patir
el fredo fin che Joan, ignara de quel che iera sucesso, la xe tornada a
casa. Robert lora sbrissando come una bissa el xe tornà in bagno
per farse una longa docia calda e permeter che el sangue ghe tornassi a
circolar.
Poco dopo el xe partì per Singapore, abandonando Joan e fioi, forse
atrato dala pena per l'esibizionismo che comporta in quela zità
20 colpi de scuria sule culate con la cana d'India (el ratan). Questa
xe stada una dele poche bone decisioni che el gavessi ciolto in vita sua.
Co' Lidia la me ga contà quel che iera sucesso, me son incazà
al punto de volerghe taiar le ghiandole riprodutive e sparagnarghe le tentazioni
dela carne.
Poco dopo questo evento, go cambià a casa per star vizin al'ospedal
de maternità che pò Lidia la gavaria usà assai: tuti
i nostri quatro fioi i xe nati in quel'ospedal. Anca la nova casa la iera
nel rion de Subiaco, un nome che i padri Benedettini i gaveva ciolto imprestito
de un vizin de Roma dove, su una palude, Nerone el se iera fato una vila.
De sta zona ciamada "subaqua" vien la parola "Subiaco"
come anca xe sta el caso de quela australiana.
"Casa nova", capimone, xe un modo de dir, perché la iera
malandada, con mobili veci e una moquete de seconda man za usada nel atrio
de un cine, quindiò sbusada de ciche, imbevuda de gelati cascadi
e impiastrada de zentinera de gome americane. Questo "aredamento"
fazeva la casa "amobiliada" con un un afito che me costava più
della metà del mio salario.
Per iutar cole spese, Lidia la ramendava calze con una machineta che la
doprava pei sui nailon. Iera assai difizile sbarcar el lunario nel paese
che i australiani ghe ciamava "fortunà" e che se vantava
de no gaver povertà. Se 'ndava avanti a forza de pasta e fasoi o
spagheti al sugo de carne masinada de seconda categoria.
La casa no gaveva gnanca un bagno, che go dovù farme mi con scarti
de matoni spesso meno de un terzo dela lungheza normal. Grande felicità
iera trovar un maton intiero. Compravo el zimento a scapito de qualche
alimentar, ma ala fin quel toco de servizio sanitario de cui Lidia no la
podeva fare de meno, el xe stà fato.
Se la qualità dela vita lassava poco de invidiar, el problema co
le gente local iera ancora più serio. I vizini, John ed Anne, gaveva
però cambià questa situazion. Ierimo diventai amici. Lidia
gaveva visto che John iutava Anne a lavar i piati e poi el ghe fazeva el
bagno al primogenito nel stesso lavandin dela cusina. Iera una sena che
fazeva tenereza.
Quando che ghe iera dele feste familiari ne invitavimo l'un co l'altro
anche se, come che conterò più avanti, i amici de sti nostri
amici no i aprovava che Ann e John se missiasi coi cabibi come mi e Lidia.
La discriminazion iera ancora dapertuto e gaveva efeto negativo anca sul
mio lavor, e naturalmente sul mio guadagno.
Dopo la nassita del primo fio, no potevo permeterme più l'afito
dela casa "amobiliada", cussì go afità un'altra
ancora e anca questa a Subiaco, ma senza mobili. Go dovù farmeli
solo con ordegni imprestai de una famea russa in atesa del visto de imigrazion
pei Stati Uniti. Inna e Volodja Strukov iera i nostri aleati nela bataia
per la sopravivenza. Tipico esempio: pena finio el nostro Nadal ghe imprestavimo
l'albero con tute le decorazioni ai Strukov per el suo Nadal (Ortodosso)
che el vien dopo del nostro. Condivider xe la gioia dei poveri.
Iera tempi difizili, co' Lidia sognava de gaver bastanza per comprar bisteche
inveze dela carne masinata per sfamarne coi spagheti. Malgrado che l'afito
fussi più basso, la nostra dieta no la iera cambiada, ma no gavevo
el coragio de domandarghe a Lidia - co' la cusinava pasta e fasoi per l'enesima
volta - perché. Ghe consegnavo la busta dela mia paga in contanti,
tegnidome una picoleza per le mie spese personali. Non me interessavo del'economia
domestica. Un zorno però Lidia la me disi: "Xe ora che ne compremo
una casa."
"Questa xe bela," ghe go risposto sorpreso, "E i bori dove
li trovemo?"
"Nel mio conto in banca. Go salvà 300 sterline bastanza pel
deposito. Per el resto podemo far un mutuo che costerà meno del'afito".
Come che Lidia gavessi rivà a meter da parte quei soldi e anca a
sfamarne, sarà sempre un mistero. Cussì poco dopo ierimo
nel bungalow novo de zeca, e per quanto picio, el iera la nostra casa:
"Parva, sed apta mihi".
La casa, in efeti, la iera in campagna, tra bisse, sanguisughe, lusertoloni
che pareva cocodrili e canguri, un dei quai, grando come un caval e in
calor, gaveva zercà de farghe la festa a Lidia. La se la ga cavada
solo per via de un mato che passava con l'auto e che el ga doprà
per per scazar via el marsupial sburtandolo col paraurti.
Mentre omini e bestie ne iera tuti contro e i ne tratava come cani, l'Europa
la se stava riprendendo. Quindesi ani dopo la guera la Germania gaveva
el sopravento sui vinzitori, come del resto anca l'Italia, che la se fazeva
strada al livel internazional. El mondo stava cambiando, ma quel che lo
gavaria trasformà completamente xe stà el sputnik e po el
computer che cambiarà no solo el mondo intiero ma, fortunatamente,
anca la mia cariera. Stavo per ciapar parte in una rivoluzion senza precedenti.
E la luna, desso la gavaria ssai de meno cossa spetar.
|
|
UNA PARENTESI
Xe difizile creder che possi esserghe una relazion tra Zara e la
NASA, l'agenzia spazial americana, a parte che tute e dò le xe parole
de quatro letere. Credo che sia ancora più difizile pensar che Aidussina,
zà in provinzia de Gorizia, la sia colegada in qualche modo coii
voli spaziali. Ma una relazion la ghe xe e voio quindi spiegarla.
Aidussina e Zara, come le stesse iniziali le sugerissi, le rapresenta la
parentesi che va dalla "A" alla "Z" della mia infanzia,
co' go avù el primo incontro con l'eletricità. Un zorno a
Aidussina, dove el papà el se iera trasferì da Trieste, con
la guida de fero che dopravo per sterzar el cercio che rodolavo per le
strade, alora squasi senza auto, go tocà la parte metalica de una
lampadina eletrica. I 220 volt i gavù l'istesso efeto del'ordegno
bi-metalico de Alessandro Volta sule famose zate de rana. Me son ciapà
una scossa enorme che me ga fato saltar apunto come un rana, a una granda
distanza. Xe cussì che go avù el primo contato con la forza
eletrica che dopo sto incontro violento ed indimenticabile, la xe diventada
parte dela mia vita.
Al terzo pian de Cale Gabriele D'Annunzio, numero 12 a Zara, propio soto
el campanil del Domo, dove ne ierimo trasferidi dopo la morte de mio papà,
l'eletricità no la ghe iera, anca se Zara la xe importante nel suo
svilupo. La capital dela Dalmazia xe stada la prima zità in Europa
a gaver una zentral eletrica che, dopo quela di New York, generava corente
continua. Questo quando Edison e Tesla i se sbarufava su quala dele dò
corenti - continua o alternada - fussi la meio. La storia ne insegna che
Edison gaveva torto e Tesla ragion, ma questo no iera importante per noi,
che iluminavamo le noti dalmate cole candele de zera. Co' queste i le ga
trasfomade in quele eletriche mi gavevo pena tredise ani.
Pena che la mama la ga instalà la luce eletrica go scominzià
costruir radio a un triodo, la famosa "valvola termoionica".
Son rivà cussì nel magico mondo dele comunicazioni, che me
gaveria averto le porte del cosmo.
A Zara ghe iera, però, el problema dele bolete assai costose, almeno
per mia mama che, vedova con quatro fioi, la fazeva sforzi enormi per sbarcar
el lunario. Col'incossienza tipica dela mia età gavevo deciso de
iutarla con un strumento de mia invenzion: un manigo de scova al qual gavevo
tacà un amo. Lo gavevo doprà la prima volta per robar - oltre
le finestre lassade averte - le sigarette dele machine dela fabrica de
tabachi, lassade incustodie durante l'ora del pranzo. Nel caso dela forza
elettrica, usavo l'istesso ordegno per inganzarme al fil ativo dela corente
che passava sora la finestra dela mia camera de leto doprada anca come
laboratorio. Mediante un condutor, colegavo la corrente dal ganzo ala spina
eletrica dela mia camera. Mia mama, ignorante del fato, ringraziava intanto
la Madona dela Salute - che la pregava durante le novene de magio - per
le bolete dela luce che, grazie ala Madona, iera diventade ssai meno costose.
E xe a questo punto che la relazion fra Zara e la NASA ga scominzià.
Mia mama la se saria acorta prima o pò che robavo, anche se lo fazevo
per iutarla; e per no insospetirla gavevo inventà un sistema in
modo che no coreva cavar le valvole de sicureza durante el furto. Questo
iera un interutor automatico che pareva un fusibile normal, ma inveze del
fil de sicureza ghe gavevo messo dò piastrine de metalo che le se
separava co' tacavo el manigo de scova, cavandoghe la corente al contator,
ma le se tacava - per atrazion eletrostatica - co' el "by-pass"
vegniva tirà via. El mio crimine no'l pol esser copià, perché
el marchinzegno funziona solo co la corente continua che no esisti più.
Questa trovada me iuterà durante il contegio ala riversa de un lancio
spazial trenta ani dopo e del qual parlerò più in avanti.
Al momento dirò solo che l'eletricità la me ga iutà
a fare salti notevoli. Voio dir, no come quel de Aidussina, ma sul lavor.
Dopo Kalgoorlie me iero trasferì a Perth, dove dopo el lavor con
Mr. Rogers e la Philips, son sta el primo a doprar un computer, gavendoghene
vendù e instalà un al'azienda stradal del'Australia Ocidental.
Lavoravo con un colega australian che, naturalmente, parlava l'inglese
meio de mi e el iera el mio portavose, ma la sua abilità nel'eletronica
iera simile ala mia nel campo minerario. Gavevimo cussì forma un
"team" dove lu parlava, mi pensavo e insieme vendevimo.
Comunque, anca nel campo dei computer le memorie de co' iero mulo le me
ga iutà. Gavevo l'abitudine de tacar un toco de carton ale riode
de un triciclo che dopravo per portar pachi co iero fatorin a Trieste.
Me piaseva far finta de guidar una moto tacandoghe un carton che tocava
i ragi dela rioda davanti e che el s'ciopetava che pareva una moto co'
vegnivo zò dele rive impirade de Zitavecia corendo come un mato.
Questo me gavaria iutà a giustar el mio primo computer.
Roba de ciodi: go studià matematica e fisica, ma no xe stà
la mia abilità nel calcolo diferenzial o quel integral a cavarme
dale magagne. Xe stà inveze le memorie de un manigo de scova e un
cartozin per far un casin de s'ciopetade cola bici che me gavaria iutà
nel'alta tecnologia e nela conquista del cosmo. |
|
GIORGIO
Iero cascà nela cibernetica solo perché no iero un
venditor. No gavaria podù vender gnanca un bicer de acqua a un che
moriva de sede nel deserto.
Malgrado questa mia incompetenza dovevo piazar un tot de prodoti al mese,
come dir, balanze eletroniche che pesava zucaro, orzo e acqua nele fabriche
de bira. Questi strumenti richiedeva de tacar sensori sui lambichi de rame
dove l'orzo vegniva boì. El ramaio se iera oposto ai mii grumi de
cola "araldite" che dopravo per fissar sensori sule sue opere.
Gotliebe iera tedesco, forse pena dimesso dele "SS", ma assai
bravo. El te ciapava una granda lastra de rame e'l te la smartelava fin
a incurvarla in una semisfera. El ripeteva l'operazion con una seconda
lastra per far un'altra semisfera del istesso diametro. Poi el tacava le
dò parti con un incastro a coda de rondine cussì perfeto
che co'l lo saldava, el stagno iera pena una finissima strica grisa. El
lustrava la sua opera come un specio de poderseghe far la barba dentro.
Ciò!.. iera de capir che la vista dei mii sensori lo mandassi in
bestia e che lo sburtassi a doprar epiteti indirizai a mi, Dio, Santi e
Madone, che no posso ripeter.
Gotliebe, malgrado el suo temperamento scorezivo tipico de un nazista,
el iera indispensabile ala bireria perché el suo prodoto xe importante
per un australian come l'acqua santa la xe pel Papa. Mentre Napoleon credeva
che l'esercito marciassi sul stomigo, Wellington, che lo ga sconfito a
Waterloo, gaveva capì che el suo navigava meio sula bira. Prova
xe la rioda de scorta che l'australian medio porta a meza vita.
Xe fazile capir come Gotliebe gavessi vinto la disputa contro l'instalazion
dei mii prodoti e perché l'ordinazion fussi stada anulada. El mio
diretor de vendite, che i mii problemi con Gotliebe no i ghe interessava
gnente, voleva solo che la mia quota fussi ragiunta e xe cussì che
go scomesso sul computer richiesto de un apalto dell'azienda statal dele
strade.
Iero sicuro che le probabilità de sucesso fussi come una vinzita
al loto, ma come la nona Sala spesso la me diseva, "chi no risiga
nol rosiga". Fortuna de Dio xe che go vinto, ma sta vitoria la iera
come quela de Pirro. No gavevo nissuna esperienza nel campo dei computer:
no savevo come proveder a una manutenzion, anca se me iero impegnà
a farla. Per complicar i mii malani, no ghe iera nissun altro esperto in
Australia de poderme dar una man. Iero saltà in alto mare senza
saver nuar.
Giorgio, cussì gavevo batizà el computer tipo G-15 dela Bendix
Corporation, el iera un poco più alto de mi, ma assai più
grosso. Lo gavevo incontrà per la prima volta a Sydney, dove el
me gaveva lassà a boca averta co go visto la sua machina de scriver
stampar a tuta bira senza nissun ala tastiera. El gaveva una "memoria"
a striche magnetiche su un tamburo che pareva el volano de una FIAT 500.
El iera anca assai lento, ma el podeva calcolar assai più presto
de mi, senza far i sbai che mi fazo sempre in aritmetica.
Questo però co' no'l perdeva la bussola, in quel caso el te vigniva
fora con risultati de mati. E iera apunto questo el mio compito: mantegnirlo
in forma in modo che "un più un" risultassi sempre in
un "dò" e no in un "quaranta-quindise"! Durante
l'uso normal dei inzegneri che i lo doprava no'l sbaiava mai, ma solo grazie
al mio metodo de manutenzion preventiva. Scominziavo de venerdì
dopopranzo, co' i inzegneri 'ndava a impinirse ale spine de un "pub".
La ragion per scominziar l'ultimo giorno dela setimana iera semplice: se
gavessi incontrà grossi problemi gavaria lavorà tuto el week-end
- zorno e note - fin a giustarli. Questo xe sucesso tante volte, co' li
giustavo solo minuti prima de scominziar el lavor del lùnedi.
Giorgio no'l me ga mai fato diventar mato, meno che co' lo gavemo instalà.
Come go zà spiegà, la memoria de Giorgio iera un "volano"
con striche magnetiche dove che vegniva registrai i dati e le sincronizazioni
che i computer devi doprar per funzionar. Queste informazioni doveva restar
indisturbade, ma durante el colaudo l'esperto che la Bendix gaveva mandà
per iutarmi con l'instalazion le gaveva scancelade.
Per capir questo se devi pensar ai dati del tamburo magnetico come ai denti
de un ingranagio. Scancelar alcuni dati xe come perder denti e l'orologio
de Giorgio no'l podeva funzionar più, perché el perdeva colpi.
Solo un novo tamburo gavaria risolto el problema. L'esperto el se gà
squasi ciapà un colpo perchè el dano, secondo lu, non podeva
esser giustà, e un altro volano sarìa costà orori.
Mi iero meno pessimista e la mia conclusion meno drastica, perché
go pensà a Trieste e al toco de carton che tacavo ala bici per imitar
le moto. El volano de Giorgio iera simile a questo. Iera, infati, una rioda
che gaveva perso ragi, per cui el rumor cessava al punto dove che i ragi
mancava. Se gavessi perso questi nella mia bici a Trieste gavaria tacà
un cartonzin al'altra rioda e, fra le dò, gavaria podù sostegnir
un rumor regolar. E questo xe apunto quel che go fato con Giorgio: ciolte
diverse striche magnetiche go trovà bastanza "ragi" per
un numero regolar de pulsazioni, che poi go trasferio là dove queste
iera stade scancelade. Pena che lo go rimesso in moto, Giorgio el me ga
saludà alegramente cola sua campanela che el sonava ala fine dei
programi de colaudo per dirne che el stava ben!
Da quel zorno in avanti Giorgio e mi semo diventai amici; lu pensava -
o forse solo calcolava - che ghe gavevo salvà la vita, mentre mi
ghe volevo ben per gaver cambià la mia.
 |
Eco qua el mio amico Giorgio, con mi sentado de fronte ala
sua machina de scriver.
(se volè fe pur click, ma la foto la ve vegnerà solo
più granda, no 'ssai più bela) |
Ghe iera, però, quei che lo vardava con difidenza perché
i pensava che Giorgio li gavaria sfratai. Inveze el computer el creava
tanto lavoro che xe sta necessario impiegar altri inzegneri, anche se qualchedun
no'l se fidava del zervel giorgian. Un zorno un geometra el xe vignù
nel mio ufizio e el ga butà un plico sula mia scrivania disendo
con sarcasmo: "Questa xe una poligonal che no se pol serarr, perché
no te provi ti col G-15?"
Serarr una poligonal nel zergo dei geometri significa misurar tuti i angoli
de una propietà, che se de forma triangolar insieme i fa 180 gradi,
e se de forma quadrangolar i ghe ne fa 360. Se in sto ultimo caso, per
esempio, se riva ala soma de 356 gradi, vol dir che la poligonal no la
xe serada ben. Comunque el problema ghe lo gavemo dà a un programator
cinese che lavorava per la Bendix. El programa ga subito indicà
che el geometra el se iera dismentigà de alcuni angoli girando torno
a un ostacolo. Questo el xe stà presto trovà e il problema
risolto.
El fato che una machina americana instalada de un "cabibo" e
fata funzionar de un "zalo" gavessi risolto un problema che gaveva
confuso i inzegneri anglosassoni, ghe ga causà al picolo mondo professional
australian assai costernazion. "C'est la vie!" gavaria dito la
mia cara nonna de Luxio. Sentivo de gaver finalmente ragiunto el punto
indove che la mia funzion in Australia no iera più quela di esser
direto, ma di dirizer. Incoragià da questa realtà me sentivo
pronto a afrontar el futuro nel qual no vedevo limiti.
Poco tempo dopo me saria trasferio, con Lidia e fioi, a Carnarvon, a mile
chilometri nord de Perth. Iero invità a conquistar la luna.
La strada del cosmo la se iera averta per mi: Viva là e po bon!
FINE DELLA SECONDA PARTE
|
