|
ADIO AL COSMO
Purtropo anca mi dovevo andar via. Dopo sie ani a Carnarvon, causa
che là no ghe iera una scola media pel mio primogenito, gavevo deciso
de tornar a Perth. Un novo inzegner el xe vignù per cior el mio
posto. Le missioni spaziali le stava perdendo importanza e frequenza per
via dela guera del Vietnam. La chiusura dela stazion la iera iminente e
tuti voleva andar via. Infati mi iero fra i ultimi dell'équipe original.
I novi tecnici vegniva desso del'Inghiltera, dela marina de Sua Maestà
Britanica, la Regina Elisabeta. Iera fazili de riconosser perché
tuti i gaveva tatuagi sui brazi. Fra questi Francis, l'inzegner che gavaria
ciolto el mio posto. Francis, grande amirator del serial televisivo Dr.
Who, no'l podeva capir come che un italian fussi nela NASA: per lu
questo iera un oltragio!
No'l voleva che lo iutassi, pensando che el ghe la gavaria fata de solo
e el gaveva ragion, perché, co'l e me domandà aiuto, lo go
messo nei malani. Francis gaveva scoverto "TANGO", un programa
per usi che no iera operazionai. Un mio colega lo gaveva scrito simile
al FORTRAN (tradutor de formule) dela IBM, ma assai più versatile,
Francis voleva far creder che iera opera sua. El mio colega iera zà
partì e mi iero l'unico che conossessi i detai. Francis el ga cambià
el nome de TANGO a "FORTRANETTE" e el zercava de venderghelo
ala NASA.
Non me la sentivo de combater el plagio, ma co' Francis el me ga domandà
de iutarlo con el "vocabolario", cioè la lista de parole
in inglese che el programa doprava per tradur le formule, me xe vignù
l'idea de farghe un sgambeto. Lu voleva che ghe fazessi una copia del programa
per spedirghela ala NASA e el pensava de cambiare zerte parole del vocabolario
che no ghe 'ndava ben perché le iera tropo australiane. Go subito
sodisfà el suo desiderio, ma inveze de cambiar solo qualche parola,
le go cambià tute ma in italian!
Francis ghe ga mandà sta version ala NASA che no i capiva le lingua
de Dante, cussì i ghe ga domandà la version in inglese. Ma
Francis no'l ga podù farlo perché mi iero za 'ndà
via e gavevo distruto tute le copie originali. Le ultime notizie su questo
evento le go avude del'università de Perth dove che dirigevo el
zentro mecanografico. Francis ne gaveva scrito zercando un programator
che parlassi italian!
Tante volte me odio mi stesso per la mia cativeria!
Credo, però, che 'sta antipatia per i inglesi la vegni dela esperienza
con Robert a Subiaco ma anca de una tendenza che go svilupà contro
tute le esagerazioni campanilistiche. El multicuturalismo australian ghe
ga insegnà al mondo che la toleranza etnica pol funzionar ben. Ma
l'elemento anglosassone la ostacola ancora ogi.
Mi go zercà tante volte de no esser come lori e go assunto personal
britanico, ma sempre coi stessi risultati, cioè come quel del contadin
nela favola de Fedro che gaveva ingrumà una vipera iazzada e zercà
de scaldarla col suo corpo. El risultato ghe ga costà caro al benefator.
Ghe xe nei inglesi l'ossession de voler dominar el mondo che sono sicuro
che xe stada notada anca in Europa de co' el Regno Unito xe diventà
un membro del'Union Europea. Questa - in efeti - ciol la Svizera come model
dove che le gente se ga abituà a tolerarse: i etnici tedeschi i
tolera quei francesi e questi tolera i italiani e tuti insieme tolera el
mondo. E per quanto Cecchelin el gavaria dito che la Svizera xe una casa
de toleranza, la funziona ben. Anche come nel'ultima guera mondial co'
le diferenze tra i tedeschi, francesi ed italiani le iera in pratica inesistenti.
Un sbaio del'Union Europea xe quel de includer anca l'Inghilterra, che
ossessionada da un senso di superiorità completamente ingiustificà,
no la pol adatarse a cooperar a meno che no la sia in posizion de controlo.
Pochi profughi istro-dalmati, vitime politiche dela seconda guera mondial,
pol dir de gaver trovà nei paesi anglosassoni la toleranza che la
legenda del liberalismo inglese prometeva. La realtà xe che al livel
de vita de ogni zorno, del punto de vista del lavor, un emigrante no'l
godi dele stesse facilitazioni acordade a un zitadin de origine inglese.
Ma ghe xe un altro problema che mi considero fondamental: sti mone no i
ga gnanca una costituzion scrita, e i ga un sistema politico che no'l garantisse
la libertà personal gnanca minima. In confronto de quela in Italia,
i xe ancora ai tempi feudali, e con questo voio dir che i xe zitadini sogeti
dei sui sovrani e no sovrani dela sua vita.
Chi che no ga studià el sistema "Westminster", tanto elogià
de tuti, devi saver che questo ghe permeti solo a un terzo dei parlamentari
de esser eleti democraticamente, el resto xe nominà del monarca.
Questo, pò, ga poteri autocratici che no ghe permete ai sui fioi
de sposar un catolico. Roba de terzo mondo!
Se devi concluder che la democrazia inglese la esisti solo de nome e no
in realtà. Ma in un mondo oramai senza frontiere sta filosofia la
sta per sparir e l'aroganza dei inglesi influenza decisioni critiche che
li porta ala perdita de oportunità uniche.
Basta vardar le atività spaziali dove che i inglesi i xe noti solo
perché i manca. No i ga mai partecipà se no in forma negativa.
El paese de Newton produse desso solo astronomi con otica miope. Come xe
stà el caso de "l'Astronomo Regio" pochi zorni prima del
lancio del Sputnik russo, co el ga pontificà che i sateliti artificiai
iera "pura fantasia" No i saria mai stadi messi in orbita perché
ghe voleva un'energia che no la iera, secondo lu, disponibile al'omo.
La storia ne insegna diferente e el solo contributo de dimensioni astronomiche
del'Astronomo Regio xe stà el suo sbaio. El telescopio Hubble xe
desso in un'orbita stazionaria de dove che - malgrado i primi problemi
- el ga ripreso imagini spaziali de una nitideza mai ragiunta de un osservatorio
terestre. Cossa saria sucesso se ghe gavessimo dà reta a quel regio
sior astronomo? |
|
INGRATA PATRIA
Saria ingiusto se dovessi far creder che solo la mentalità
inglese la xe mona. La mia stessa patria se meritava, al tempo dele missioni
lunari, una medaia al merito per la sua idiozia burocratica. Durante la
mission Apollo 8, che gaveva dopià la luna per la prima volta, ghe
gavevo mandà una cartolina con francoboli comemorativi a diversi
amici e giornai italiani. Poco dopo go ricevù una letera con l'emblema
del Console Italian de Perth che go verto con emozion: "Finalmente",
me iero dito, "un riconossimento!"
La letera, però, la parlava de altre robe. El rapresentante d'Italia
me informava che il distreto Militar de Trieste ghe gaveva scrito che,
per quanto no gavessi più la zitadinanza italiana, dovevo istesso
- ai sensi dela lege 555, articolo 8 del 13 giugno 1912 - presentarme per
la leva militar. Dovevo quindi completar i moduli alegadi No 414 e 415
per regolarizar la mia posizion.
Iera ciaro che la giustizia me gaveva finalmente trovà per via dela
mia cartolina comemorativa. Me saria spetà una risposta del Console
al distreto militar che lo informassi del fato che gavevo zà quaranta
ani sonadi, perciò no iero idoneo per la deta leva, e che me trovavo
in un punto del mondo per cui me iera difizile de presentarme al deto distreto
militar.
No gavendolo fato lu, go risposto mi co 'na letera dove che spiegavo sti
problemi de età e de logistica, finindo col dir, e con molta amareza,
che se anca gavessi podù farlo, non gavarìa ubidì
ala diretiva. Credevo che no fussi giusto che la mia patria se spetassi
de essere difesa dal molto probabile nemico d'oltre Isonzo, al qual la
continua a lecarghe el cul e nele man del qual - taiando la corda - el
stesso distreto militar el me gaveva abandonà, a mi, ala mia famea,
ai vizini de casa e a tute le mie conossenze.
Ma forsi no: se l'Italia dovessi essere vitima d una agression, mi saria
mona bastanza de presentarme tra i primi a difenderla, anche se son vecio
de più de setanta ani..
Ma zerte amareze ga radise assai profonde e nel 50esimo aniversario dela
distruzion de Zara, nel 1993, gavevo mandà un'altra cartolina comemorativa
ai stessi amici e giornai, alcuni dei quai la ga publicada (ve la mostro
ala fin de sto capitolo). Ghe go mandà una anca al console de Perth,
che me ga tacà l'epiteto, ben merità, de "attaccabrighe",
nel qual trovo un'afinità con Sipion l'African - el personagio principal
del nostro ino nazional, che gaveva anca lù abandonà la patria
lagnandose "INGRATA PATRIA, NE OSSA QUIDEM MEA HABES!"
Poco dopo la letera del Console General go scominzià a prepararme
per partir. Iero assai zò de corda. Andar via dela NASA no me xe
stà fazile, apunto perché lassavo un'équipe americana
che me gaveva iutà a rivar a mete che credevo impossibili. Ma no
gavevo alternativa: i mii fioi doveva andar ale scole medie e no iero disposto
a meterli in un colegio, gavendo soferto assai mi stesso co i me gaveva
mandà in un convito a Spoleto dopo la morte de mio papà .
La mia famea la doveva restar unida.
Questo però no podeva cambiar el fato che me sentissi come me iero
sentido el zorno co el Gen. Muir el se iera distacà dal molo de
Bremenhaven per portarme in un mondo che in tuti i sensi rapresentava i
antipodi, pur verzendo un novo capitolo de quela odissea che xe la vita.
Chissà, me domandavo, se questa continuerà dopo la conquista
dela luna.
Iera un zorno belissimo co semo partii per el sud, acompagnadi da l'astro
de Venere per tuti i mile chilometri del nostro viagio in auto da Carnarvon
a Perth. Pensavo che la gavevimo invasa, no con la canonada descrita da
Giulio Verne, ma coi mezi che domandava la cooperazion de miliaia de tecnici
e sienziati tra i quai ghe iero anca mi.
Pensavo ala canzon: "Guarda la luna come che la camina..." perché
la ne coreva drio: el suo percorso no'l iera cambià. La iera ancora
là, libera e maestosa nel ziel stupendo mentre mi andavo zò,
al sud e ancora più in zò: in quel momento me pareva de calarme
nel'Ade.
Chissà se la luna la me gavaria spetà de novo?
 |
Eco qua la cartolina del 50º dela distruzion de Zara. Ma
per vedrela ben dovè farghe click sora. |
FINE DELLA TERZA PARTE |
