NEW YORK
Ierimo nei ani Otanta, co' a Perth se diseva che esser ingordi xe
una virtù, e gavevimo la percentual de miliardari più alta
del mondo (desso gavemo inveze la più alta de quei che xe in malora).
I bori vegniva spesi de mati, squasi per paura che i andassi fora de moda.
Questo no valeva però per le picole industrie come la mia, perché
nel'euforia del "boom" no iera el lavor, ma el colpo gobo in
borsa che nobilitava l'omo.
Yossie gaveva fato fortuna de boto gavendo comprà desine de miliaia
de azioni a un centesimo, per pò rivenderle, pochi mesi dopo, a
20 dolari al'una. Un mio socio de l'università, John, lo gaveva
incontrà durante un cocktail e el ghe gaveva parlà de mi
e Yossie el voleva incontrarme e che vegnissi trovarlo a casa sua per una
ciacolada.
Semo andai, infati, a casa sua una sera: la iera verta, ma svoda. Una nota
sula porta però ne invitava a entrar nel caso che no gavessimo trovà
nissuno. E lora ne semo direti al bar dela saleta de ricreazion, piturada
tuta in nero come quela dela storia de Juan e Monique. La moquete, el plafon
e i muri iera tuti in nero fulizine. Un tavolin, molto basso, iera dominà
de un calice fato de un teschio uman, autentico, che se pozava sula palma
de una man de argento massicio. Quell'ogeto cussì strano me ga preocupà
assai.
Savevo che Yossie iera assai rico e furbo, e questo me dava una bona ragion
per no stabilir una relazion co lù. Mi gavevo un sogno tecnico,
no una nova trapola per far soldi a palade. "Te sbai" me ga dito
el mio amico academico, "te devi parlar con lu. El xe una persona
magica, e i bori no i xe un problema per lù, credime."- Ma
mi no podevo crederghe.
Finalmente Yossie el xe rivà, in manighe de camisa, averta fin el
bugnigolo e tacada al peto no per via dei botoni, ma de una longa colana
de oro pesante. Al polso e forsi più pesante ancora, el gaveva un
orologio anca questo de oro. El ghe somiliava al Davide de Bernini, coi
oci fredi, intenti come quei dela statua co la varda Golia prima de mandarlo
nel mondo dei più. El suo soriso no'l podeva sconder la fredeza
del suo sguardo. I me lo ga presentà e gavemo scominzià a
parlar de afari, iutai de bicieri di whisky, che me ga calmà un
pocheto (o forsi tropo).
Saria sta meo se no gavessì bevù gnente. Comunque ghe go
domandà perché che el intendeva ingerirse nell'alta tecnologia
visto che no ghe iera maniera de far bori subito. Go continuà col
dir che quel che proponevo de far gavarìa ciolto assai tempo prima
de dar qualche risultato.
"Guarda", el ga risposto impazientemente "lassime le questioni
de soldi a mi, ti continua ad inventar." Ma subito dopo, imbarazà
per gaver perso le stafe, el ga continuà, "credime, i bori
no i xe un problema. Gabi fiducia!" Questo sonava come el nostro "pagherò
doman", mi no iero convinto per gnente. No me ga mai piasso le risposte
semplici a problemi difizili: quele che veramente funziona, de solito le
xe poche e de madre vedova, gavaria deto la nona de Luxio. Iera però
evidente che Yossie no'l gaveva problemi de schei. El iera rivà
in una Rolls Royce che, come le soluzioni semplici, no xe fazile de gaver.
El ga spiegà che sariimo andai a New York a parlar con Merrill Lynch,
un "broker" (Al tempo no savevo coss' che fussi un mediator,
ma go capì che i mediatori ga tanti bori de investir e i gavaria
podù darme quela stabilità finanziaria che me ocoreva). Co'
la boza de whisky la se iera calada al un deo, Yossie el ga scominzià
a piaserme e con una streta de man - che me sario pentio a vita - lo go
acetà come socio. Gavendo cussì fato un dei sbai più
grandi dela mia vita, son 'ndà a casa a dormir.
Poco dopo, a mie spese, son partì per New York insieme con dò
fioi, Tonio e Oscar. Gavevimo prenotà dò camere al'albergo
Essex un dei più costosi de New York, davanti al Central Park.
El zorno dopo, de bon matin, ierimo al grataziel dela Merrill Lynch, in
Liberty Plaza, subito vizin de Wall Street. Ierimo in anticipo, cussì
gavevo el tempo de osservar le atività del'ambiente nel'enormità
cavernosa del grataziel. El traffico iera roba de ciodi. Gente de tuti
i colori, taie e età, iera in una furia teribile, ma paziente bastanza
per star in pie, calma, sule scale mobili. I pareva squasi copi che venissi
issadi de una machina su un teto.
"Questo no xe una casa", pensavo, "questa xe una megalopoli
vertical". Iera un logo dove 15'000 mati 'ndava a lavorar ogni matina
e de dove che ogni sera i tornava zo per le stesse scale mobili per cior
la metropolitana dela stazion soto l'imenso World Commercial Centre.
Gavevo infilà l'asensor sbaià e, per mia fortuna, el se gà
ferma al pian dela mensa pien di gente che zercava di sveiarse a forza
de cafè nero e buzai americani. Iero fortunà perché
me iera vegnù un ataco improviso de diarea psicosomatica (de no
dir dala paura). El destin ga volù che trovassi subito un bagno
in quel momento de urgente bisogno.
Semo ripartidi al 24esimo pian dove che ne spetava Yossie e John nella
sala conferenze. I iera tesi e no i fazeva nissun sforzo per sconder el
disagio che no ga iutà el mio o la mia complicazion psicosomatica.
Pian pian i consulenti tecnici invitadi dela Merrill Lynch per analizar
la mia proposta i ga sfilà, un ala volta, davanti de mi. Col'aumentar
del numero de questi ga aumentà anca el mio nervosismo e quel de
i mii soci. "Questo no sarà fazile" me disevo, ma fortuna
de Dio me sbaiavo.
John ga verto la riunion, ma el iera assai nervoso e dopo dò parole
el ga finì co'l dir: "E senza altre parole, ecove Monte Sala,
l'inventor."
Go ingiutì la saliva con gran dificoltà, ma alzando la vose
per sconder el mio nervosismo go scominzià el mio discorso cola
domanda: "Chi de voi conossi le propietà autosincronizanti
dele sequenze pseudo-casuali?" A questa domanda speravo che non ghe
fussi risposta. E cussì xe stà. Nissun lume de inteligenza
se gaveva manifestà su i visi dei esperti: "Bon!" go continuà,
"Lora spero che no ve dispiasi se me sofermo un pocheto sula teoria
che riguarda questo." Ma pensavo "Bravo, te li gà in scarsela!".
Lora me son butà a scriver equazioni sula lavagna come che gavevo
fato ani prima a Mantova, cola Signora Jahier.
Gavendo averto la presentazion in mio favor, go scominzià una discussion
su quel che proponevo de far. Go spiegà che no ghe iera modo che
el traffico stradal podessia continuar a cresser per sempre e che bisognava
crear un autostrada eletronica. Con questa se gavarìa podù
star a casa, lavorar col computer, modem e posta eletronica. Insoma, ghe
presentavo l'idea che desso la xe conossuda come "internet".
Ma per tradur sto conceto in pratica bisognava svilupar un sistema de critografia
che mantegnissi la "privacy". El sistema escogità cola
crisi del contrato dela polizia federal a Canberra - quel che voleva l'aiuto
dela boza de whisky - se prestava a l'indirizamento automatico.
Come zà spiegà, la critografia trasforma le comunicazioni
in dati casuali. Perché no doprar questi per indirizar i utenti?
El sortegio casual dei indirizi ghe gavaria dà la stessa probabilità
de acesso a tuti. L'idea la ga avù l'efeto de un fulmine a ziel
seren e la xe stada acetata de tuti quei che i la ga capida, e tac,
iero rivà in porto!
Dopo la riunion semo andai a pranzo al club dei dirigenti dela Merrill
Lynch, al'ultimo pian, in zima del grateziel de dove che se vedeva el fiume
Hudson e la Statua dela Libertà sul'isola Ellis. Zio Amedeo iera
passà de là co el xe sbarcà a New York, per esser
scrutinà de quei de l'imigrazion. Forse el se sarà sentì
come mi co' son sbarcà a Melbourne, pien de speranza, ma spaventà.
Fissavo la Statua dela Libertà, regalo francese ai americani per
la vitoria dela Guerra d'Indipendenza. Pensavo ala strada che gavevo fato
in trenta ani dela partenza de Zara per zercar la libertà, via de
Tito e dela fame. No! No gavevo sbaià a emigrar.
El scotch, servio in biceri de cristalo de camerieri in guanti bianchi,
me ga subito fato sentir ben. Al primo sluc go pensà, "Madona,
che bon che el xe!". Vardavo l'isola Ellis mentre Tonio ed Oscar i
se gustava sta esperienza unica. Ierimo in zima del mondo, fisicamente
e emotivamente.
Sì iero rivà, e quela sera go visto la luna nasser e tramontar
tra dò gratzei. La pareva contenta.
|
|
VITORIA DE PIRRO
Quela sera son 'ndà coi mii fioi a celebrar la vitoria al'Hotel
Vista, tacà al complesso del zentro comercial con le dò enormi
tori de zento e venti piani, dove, come pena dito, go visto la luna nasser
e tramontar.
Ierimo sentai tranquilamente co' un camerier, imberlandose, el ga lassà
cascar la guantiera cariga de biceri pieni inondando Oscar. Qualchedun
voleva dirne de star atenti, e no'l sbaiava.
El zorno dopo semo tornai ala Merrill Lynch per la prima colazion, questa
volta però vignui a cior al'Essex de una longa limousine guidada
de un autista in muntura. Mai, prima de alora, gavevo avù una colazion
de afari, iero quindi curioso ma anca nervoso perché gavevo paura
che qualcossa podessi 'ndar mal e rovinar tuto. Ma no ghe iera bisogno
che me preocupassi: tuto ga filà ben e me son gustà la colazion
servia nel stesso club de prima, con la stessa eleganza.
Finio de magnar semo andai nel'ufizio del vice presidente, quel che ne
gaveva invitatà a New York. El ga verto la conversazion disendone:
"Alora, signori, el Sala el ga veramente qualcossa che ne interessa.
El conceto del'autostrada eletronica el xe unico e co' ghe lo go spiegà
al presidente, el me ga autorizà a investir in questo progeto: xe
ora che la Merrill Lynch entri nel campo del "risk capital".
Volariimo investir, oh..." - qua el se ga fermà per vardar
fora dela finestra metendome sui spini, per poi finir con - "Semo
pronti a investir sie milioni per scominziar."
"SIE MILIONI DE DOLARI?!.... Ma questo xe diese miliardi de lire"
go pensà e solo pensar podevo perché no gavevo parole dela
sorpresa.
Sguazavo nela mia gioia co' la vose de Yossie me ga riportà ala
realtà. "Grazie de l'oferta, ma volevimo solo gaver la vostra
espression de interesse." Non podevo creder ale mie rece: gavevo pena
indoto un grosso investimento e Yossie me lo rifiuta! Volevo urlar "Sto
omo xe mato!" ma inveze, no go dito gnente...
Tornà al'Essex son 'ndà subito nela sua camera per urlarghe
in viso: "Ma coss'te xe mona? Perché te ga rifiutà i
sie milioni? Te son mato o solo insempià? Te ga zucà la sconfita
via dale zane dela vitoria! Perché i disi che te xe un zenio no
lo capirò mai! Come farò a spiegarghe sta tua cazada al mondo?"
Fissandome co i sui oci fredi Yossie el me ga risposto scandendo le parole
"El tuo problema xe che no te ga testa per i afari. No te vedi che
se i xe pronti a investir sie milioni nele tue idee, vol dir che le val
almeno sessanta milioni?"
Me ga ciapà una fota che iero pronto a ficarghe un pugno, ma i fioi
i me ga fermà anca perché i pensava che me sbaiassi: Yossie
iera un che gaveva fato assai schei e mi no, lora el doveva gaver ragion
lu. Ma i sbaiava: purtropo gavevo ragion mi.
Yossie el iera cratura del boom, diventà grande amico dei politici
che solo poco prima el ciamava "commies", cioè comunisti.
Nei ani 80 sucedeva robe strane in Australia. I laburisti iera tornai al
governo dopo una longa mancanza, guidai da un giornalista, Brian Burke,
assai ganzo nela publicità che'l doprava per cambiar l'imagine del
socialismo.
Soto molti aspeti Brian Burke me ricordava Mussolini. Tuti dò i
iera senza cavei e tondi e i gaveva scominzià col giornalismo, per
butarse nel socialismo e diventar ambassiatori dela Santa Sede. Sedoti
dei grandi afaristi, i gaveva svilupà un forte gusto per la borsa,
ma zogando de azardo i gaveva perso tuto. Tuti dò i iera scampai
dei sui rispetivi paesi. Per finir sto senario, visavì del'ufizio
de Burke a Perth ghe xe un hotel a zinque stele che ga nel atrio un specio
zà propietà del Duce. Son sicuro che Burke el se gavarà
vardà per amirarse la sua imagine che zercava de copiar quela del
Duce.
Burke gaveva scopiazà el stato corporativo, un'idea fassista che
la saria diventada la più granda catastrofe finanziaria nela storia
australiana e che la ghe ga costà più de domila dolari a
testa a ogni omo, dona, ziovine o vecia de sto stato.
Yossie el iera diventà cul e camisa co lù e col suo aiutante,
David Parker, che non podevo sofrir, al punto che durante un cocktail a
casa del console italian, Calogero di Gesù, lo go atacà verbalmente
per via che el iera coroto. Parker, infati, col crolo dela borsa del 1986
el xe finì mal e in cheba per dò ani per gaver robà
soldi del partito. Yossie el gavaria perso anche lu tuto con el crolo dela
borsa. El xe scampà in Spagna, un dei pochi paesi che no i ga un
acordo de estradizion con l'Australia e nissun, incluso mi, lo ga rivisto
mai più.
Questo saria sucesso dò ani dopo el nostro incontro a New York,
dopo che Yossie xe tornà a Perth e mi son 'nda in Europa dove che
gavevo stabilì una rede de distribuzion. Grazie a questa gavemo
ciapà el contrato dela SWIFT, za menzionà, che prometeva
altre ordinazioni.
Gavevo contatà sta grande società interbancaria poco prima
de visitar la Merril Lynch. La SWIFT voleva che mi andassi a trovar un
suo consulente in Israele, el matematico Adi Shamir, che gavarìa
esaminà la sicureza del mio sistema. Shamir xe la "S"
del algoritmo a ciave publica conossù col nome RSA.
Comunque una vendita xe sempre stada per mi più importante de qualsiasi
sogno de grandeza, come quel che iera aparso nela visual de Yossie o come
quel de Matilde, la contadinela che - secondo nona de Luxio - l'andava
al mercato con una puina sula testa. La gavarìa vendù la
puina e col guadagno la gavaria, un pocheto ala volta, creà un'industria
e la sarìa diventada rica e la gente la gavaria salutada inchinandose.
Matilde imitando sto gesto la ga fato cascar la ricota e con questa anca
i sui sogni.
I mii iera de gaver ordinazioni.
Son partì per Tel Aviv per iutar Adi Shamir a capir el mio prodoto.
Lo gavevo za conossù a Bruxelles ala SWIFT durante le prove del
critografo. Ma no pensavo a lù. Per tuto el viaggio no podevo cavarme
dela testa el Yossie.
Xe possibile che i fioi de Israele i sia tuti ingordi?
|
|
CHE RAZA DE MONDO!
Fin che no go conissù Yossie, no me iero mai inacorto che
ghe fussi diferenze tra i gentili e i ebrei. Quei che conossevo a Zara
e a Trieste, dove che i vivi oramai de secoli, i iera persone brave, solo
che i gaveva una strana roba, la circoncision, che no capivo. Le lezioni
de catechismo no le me ga mai spiegà cossa che fussi, a parte che
quela de Cristo la iera celebrada con una festa.
I ebrei de Zara i iera come noi e boni amici sia dela mia famea che de
quela de Lidia e i iera lassai in pase. Questo iera vero anca co' xe rivai
i tedeschi col ribalton, ma solo perché ierimo zircondai dai partigiani
de Tito e i gnochi no i gaveva modo de mandarli nei campi de sterminio.
I iera stai abandonai, come noi, al destin de morir o de fame o per via
dei bombardamenti a tapeto dei "Liberatori".
La prima prova che i fussi odiai dei nazisti la go avuda de un film tedesco,
Juss l'ebreo, un tipo che no'l ghe piaseva a Bismark. Ma anche se
la propaganda tedesca voleva che partegiassi per Bismark, Juss el me parevo
meno cativo de Scrooge, l'avaro dele storie popolari inglesi che odiavo,
non perché de raza diferente, ma perché el iera cativo. Ma
a parte questo, no savevo dele brutalità naziste fin che no son
rivà a Trieste dove go capì che qualcossa de teribile tormentava
sta gente.
Dopo l'armistizio del'8 settembre 1943, tanti xe stai arestai ma no i xe
stadi deportai perché Trieste gaveva le sue propie camere a gas
e i forni crematori, i soli a sud dele Alpi. Sti povereti i gaveva serà
a ciave le sue case sperando de tornar. I pochi che i ghe la ga fata i
ga trovà solo i muri nudi. La plebaia gaveva netà tuto quel
che i gaveva.
Co' i me ga invità a Trieste, ani dopo, ospite del sindaco, go conossù
quei che i iera scampai in Svizera; tra questi la propietaria de un negozio
de zogatoli, fia de un che comprava de mio papà zogatoli mecanizadi
nel 1930.
Ghe go domandà come mai i ebrei i xe cussì dedicadi a far
schei. La signora me ga spiegà che per secoli la sua gente la iera
stada perseguitada e questo, inveze di distruzerla la ga rafinada in una
super-raza che pol afrontar persecuzioni de ogni tipo.
Quei che podeva scampar iera i più furbi perché i meno destri
i xe stai eliminai nei secoli. Cussì i ga tramandà geneticamente
ste qualità ala progenie. Esser richi voleva dir poder sopraviver
e Yossie, gavendo eredità questi mezi de difesa, el iera un vero
capolavoro de sta selezion indota del razismo.
Sta schifosa opinion de chi che credi de esser meo de un'altra raza la
go trovà per tuto. La Magna Charta, per esempio, ordina, senza meze
parole, che ai ebrei, contro i quai i baroni inglesi - no so perché
- voleva difenderse, no ghe iera permesso de portar armi.
Anca noi Italiani atiremo i razisti. Me ricordo, infati, poco dopo che
son rivà a Melbourne un ministro australian ghe gaveva spiegà
a un fachin del porto - forsi quel che me gaveva robà la valisa
- che no ierimo negri, che al tempo dela politica de l'Australia bianca
no ghe iera permesso de vegnir qua. Secondo lù, noi italiani semo
"in sostanza" ariani ma meno bianchi dei nordici. (Mi son una
missianza de sangue ebreo, musulman, milanese e chissà cossa altro,
e meta anelada dei razisti.)
Comunque el razismo anglosassone no fa distinzioni tra mi, i calabresi
o i milanesi. Per lori semo tuti "waps" (Without Any Papers)
"teroni", titolo doprà a carateri cubitali in prima pagina
dei giornai al mio arivo.
Malgrado che i "bianchi" pensi de esser superiori, la realtà
xe che le raze de color le xe dominanti, e i bianchi zerca de protezer
el color dela pele dei fioi, anche se d'estate i se brusa vivi soto el
sol per abronzarse. Va ti a capirli. Ma la materia grisa del zervel xe
precisa in tute le raze, fato provà dei studenti asiatici che nele
scole i bati i compagni inglesi che i ga un vantagio: quel de esser meno
zime.
Secondo un ebreo assai famoso, Gesù Cristo, el regno del ziel ghe
apartien ai poveri de spirito. Madona quanti inglesi ghe sarà là!
Parlando del nostro Signor no capisso come l'antisemitismo no lo gabi tocà
durante la "soluzione final" de Hitler. Credo però che
nele imagini Gesù el iera biondo coi oci ciari e questo lo fazeva
creder arian. O forse Hitler no'l ga mai capì che il fio de Dio
iera ebreo. Adolfo iera un bon manipolator del popolo ma povero de spirito
e chissà che no'l se gabi guadagnà el paradiso per via de
questo anca lù. Le vie del Signor le xe infinite...
La teoria dela signora triestina, però, la iera giusta. Non go mai
incontrà un ebreo stupido e Adi Shamir no'l fazeva ecezion.
Rivà a Tel Aviv son subito 'ndà a visitarlo al'Istituto Weizmann
dove che el lavorava e 'l insegnava. Adi pareva assai più ziovine
dela sua età, coi oci ciari e i cavei castani e i lineamenti mitteleuropei.
El gaveva indosso sempre e solo jeans e una maieta tipo T-shirt che atirava
sempre l'atenzion dela polizia de frontiera co'l viagiava.
Sempre assai ordinà e ben sbarbà, el gaveva comunque un modo
tuto suo de far che atirava el sospeto dele forze anti-droga. Una volta
go dovù spetarlo per più de un'ora al'aeroporto de Roma perché
i finanzieri no i podeva creder che 'l fussi "neto".
Adi xe un dei pochi personagi che anovero fra i più inteligenti
del mondo che gabio vù el privilegio de conosser personalmente.
Tuti i mii altri idoli xe gente che no go mai incontrà, come per
esempio Claude Shannon, del Bell Laboratory dove lavorava anche Bela Julezs.
La sua teoria del'informazion me gaveva fassinà per ani e credo
de esser tra quei pochi che ga veramente capì la sotilieza dele
sue teorie. El mio lavor dele comunicazioni (inclusa l'autostrada eletronica,
che desso xe la realtà de l'INTERNET e l'auto-indirizamento casual
che gavevo pena presentà a New York) le iera fondade sule sue teorie.
Pensavo che 'l fussi morto, ma un articolo in una rivista americana spiegava
che el iera pena andà in pension e che el gaveva inventà
un trampolo a susta ativado de un motor a benzina con un singolo piston
tacà diretamente al trampolo. L'invenzione no la ga mai funzionà
ma la fazeva crepar de rider tuti.
Le grandi menti xe squasi sempre strane, e anca Shannon e Shamir, pena
onorà de una comenda del Papa. Sti dò i ga teste che le xe
certamente fora serie.
Questo xe vero anca nel caso de Yossie. Pecà, però, che far
bori fussi la sola sua ragion de vita. |
|
TEL AVIV
Yossie gaveva una mente creativa, come nel caso del suo ristorante
cinese a Tel Aviv. Son 'ndà subito a visitarlo per zercar la cusina
del cogo polaco che doprava un libro de cusina oriental, e go ordinà
una de porco in agrodolze.
Questo no se lo podeva gaver al Hilton de Tel Aviv, dove che me iero sistemà
durante la visita, perché - come che diseva un aviso messo ben in
vista nela hall del'albergo - tuti i magnari per la consumazion dei ospiti
iera kosher scrutinadi dal rabinato. E questo me creava grane.
Se volevo bever un bicer de late co' me magnavo un tramezin de carne, no
me iera permesso: no iera kosher. De sabato pò no i lassava guidar
l'auto: no iera kosher. Un zorno, ignorando el fato, go guidà in
un rion ortodosso e squasi che i me copà tirandome drio sassi. Questo,
sze vedi, iera kosher.
Durante la mia visita, el ristorante che Yossie gaveva verto ani prima
el iera gestio da Mandy Rice-Davies, la signora che gaveva sedoto el parlamentar
inglese Profumo, el qual - tra l'altro - el iera de origine giudeo-romana.
La storia del ristorante me la gaveva contada un zio de Profumo che go
conossù a Santa Marinella, una località balnear vizin de
Civitavecchia, a 50 chilometri nord de Roma, dove che vado spesso co' passo
per l'Italia.
Forsi l'agrodolze del'aventura extramatrimonial de Profumo gaveva qualcossa
de far con l'acquisto del ristorante cinese de Tel Aviv. Zerto xe che el
scandalo de Profumo el gaveva sorpreso tuti solo per via che el iera un
parlamentar del sistema Westminster. Mandy no la gavaria vù nissun
problema se la gavessi sedoto un De Michelis, l'ex ministro ai afari esteri
italian, el grande dongiovani del politica italiana.
(El che, Amedeo, te dimostra che cativo gusto che gabi tante babe
in Italia - n.d.r.)
Go sempre trovà la sua persona schifosa per via de la sua testa
discalza coi pochi cavei rizi che i ghe cresseva longhi e ontolai. Anca
de più dopo che lo go visto in un programa internazional de atualità,
60 MINUTES, co el balava con zerte mule bele come angeli. El suo corpo
saltelava a sinistra ma la sua panza restava stazionaria a destra, per
poi ossilar come che la fussi fata de gelatina, prima de stabilirse anca
ela a sinistra. Malgrado questo el foteva no solo tuto quel che iera in
cotole, ma anca noi esuli istro-dalmati co'l continuava a ripeterne "i
confini non se toca" nei intervai tra una pompada e l'altra.
Ma forse no'l me piaseva anca perché la Farnesina no voleva i mii
critografi, rifiutandoli senza gnanca analizar el mio algoritmo. Cussì
me me son trovà che i australiani i iera pronti a doprar le mie
idee ma i mii compatrioti no.
Però no ghe xe dò senza tre, diseva la nona, e dopo la bota
dela banca de risparmio milanese e quela del ministero dei esteri doveva
vegnirme el numero tre. Questo portava un grando nome italian: Olivetti.
I me gaveva zercà perché i voleva entrar anca lori nela critografia,
e i me vegniva a cior davanti el Castel Sforzesco de Milan, e i me portava
in machina a Ivrea. Devo dir che iera una bela scarozada, quela de Milan
a Torino, che traversava le risaie che Silvana Mangano gaveva fato famose
co'l suo film "Riso amaro".
El mio inveze el iera co i tartufi, servido con fiumi de Barolo. Ala mensa
dela Oliveti i me incoconava anca de papardele, torteloni e tute le altre
specialità piemontesi. Son 'ndà a Ivrea una dozena de volte,
ma sempre per gnente.
No i iera interessai al mio prodoto, ma solo a imparar, perché al
tempo l'arte dele codifiche la iera ancora un segreto conossù de
ssai pochi. Insoma no ghe iera afari per mi e a parte le magnade e le bevude
interminabili son sempre partì valisa e tornà baul. Moral
de la storia xe che tuto el mondo xe paese e se i te vol bidonar no ga
importanza de che raza che i xe.
A Tel Aviv me son trovà ben e Adi Shamir el xe sta de grando aiuto,
come penso che mi lo go iutà a lù a acertarse che el critografo
gavessi quei elementi de sicureza che iera essenziai nele aplicazioni bancarie
e per protezer i circuiti transatlantici dela SWIFT, tra Bruxelles e New
York.
Prima de questo, gavevo zercà aiuto dei matematici de l'Università
de Perth che i gaveva acetà la proposta subito, perché li
pagavo, ma i risultati tardava a rivar, cussì un sistema per misurar
la forza dei algoritmi de cifratura lo go dovù trovar me con l'aiuto
de Adi Shamir.
La mia visita a Tel Aviv la xe stada un sucesso sia del punto de vista
tecnico che de quel personal. Go imparà assai robe de Shamir, un
omo che amirerò sempre anche perché go concluso che lu iera
la regola e Yossie l'ecezion in un popolo che go sempre rispetà. |
|
BRUXELLES
Finia la relazion de Adi Shamir - che la iera favorevole - son partì
per Bruxelles con novi aparati che mio fiio Mickey gaveva portà
de Perth. Stavimo al Hilton, a pochi passi dela SWIFT, acronimo per "Società
Mondial de Telecomunicazioni per i Trasferimenti Interbancari".
La SWIFT la gaveva al tempo 2'500 utenti - banche de tuto el mondo comprese
tute quele italiane e australiane - e la sua importanza se la pol capir
dei trasferimenti finanziari che amontava a diversi miliardi de dolari
al zorno. Un'agenzia de sto tipo doveva atirar - prima o dopo - l'atenzion
de qualche romanzier.
Infati co Ken Follett el gaveva publicà un libro del titolo "SWIFT",
no me ga stupì ma iero inveze contento che i mii critografi fussi
el sogeto de sta storia dela Società tra el 1985 e el 1987, che
corispondi ale date dela mia instalazion critografica.
I fati però no corispondi al romanzo de Follett. Secondo lù
el mio codificator, che no'l podeva esser decifrà dei Russi, el
iera stà inventà de un tedesco, un zerto Dott. - varda ti!
- Crick, mentre Crock, el "cativo", doveva esser per forza Rossini,
un italian che copava sienziati e li meteva in un masinecarne mecanico
che el tegniva in valisa, per pò butarli, co i iera ridoti in carne
per luganighe, nel condoto.
Ma, come che gavemo visto, la cosideta "inteligenza" militar,
cioè le spie, iera quei che masinava l'inventor, un italian, che
- porca malora! - iero mi. Devo ripeterghe a chi che lezi ste righe, a
ris'cio de anoiarlo, che la mia aversion per i inglesi la xe subito aumentada
dopo sta nova bala. Noi Italiani semo sempre idioti, viliachi e malfatori
per lori. Chissà se quei del Belgio i la pensava nela stessa maniera.
Co' son rivà a Bruxelles una matina d'inverno assai freda, me son
messo subito in contato telefonico con un dei direttori, Monsieur Delos,
che iera un omo simpatico . El parlava inglese perfetamente ma con un acento
francese piasevolissimo. El me ga fato sentir subito benvignù e
el me invità a far la mia presentazion tecnica e a provar dò
unità.
La sicureza del'instalazion la iera cussì alta che no me xe sta
permesso de entrar nel reparto mecanografico, go dovù, quindi delegar
un dei sui tecnici a instalar le machine cifranti. Iero comunque sicuro
che el mio equipagiamento el gavaria funzionà ben, e infati xe sta
cussì. Ala fin del colaudo go vù comenti lodevoli, dato che
no xe roba de ogni zorno tacar aparechiature complesse a un computer senza
qualca dificoltà.
La fiducia nela mia competenza tecnologica la xe saltada subito ale stele.
Delos el voleva che ghe fornissi i nostri prodoti de sicureza su una base
esclusiva ala SWIFT via una sucursal che el gavaria ciamà STEN,
per SWIFT Telecommunication Encrypted Network.
Le robe, quindi, scominziava andarne ben e, a parte el guadagno che prometeva
de esser ssai bon, ghe iera un'altra ragion per mi altretanto importante.
Me iero fissà con quela che un zorno gavaria creà un zentro
de alta tecnologia in Australia. Volevo crear una Silicon Valley a Perth.
Per ani gavevo sburtà sto sogno che i mass media gaveva copià,
anca se i politicastri che doveva iutarme i se limitava solo a copiar le
frasi fate che gavevo conià per l'ocasion.
El mio sogno gavaria podù crear lavor e un futuro per i mii fioi
e per quei de lori. Iera solo natural, quindi, che acetassi le idee de
sinistra. Gavevo ativamente e vigorosamente sostegnù i laburisti
per ani e desso che i gaveva pena vinto le elezioni, quela federal e quela
statal, speravo che la mia fiducia in lori la saria stada ripagada.
Gavevo perfin mandà de Bruxelles un telex de congratulazioni al'omo
che gavevo iutà assai ativamente, el Deputato Mel Bryce. El mio
telex no'l ga vù risposta causa le feste per la dopia vitoria dove
che, però, mi no iero stà invità. Co' son tornà
a Perth tuto iera cambià: i socialisti i socializava con l'alta
società e sedoti dei richi e dei potenti i iera sempre fora a colazion,
pranzo, o zena, e nei momenti liberi a cocktail interminabili, cussì
che ogni mio tentativo de parlarghe iera inutile.
(Chi ga scrito "La fattoria degli animali"? No iera Orwell?
- n.d.r.)
Nel mezo de sta granda confusion la Merril Lynch me ga domandà de
vegnir imediatamente a New York e spiegarghe come mai che la SWIFT gaveva
introdoto sul mercato un prodoto con carateristiche identiche al mio, ma
che la gaveva comprà de una dita svizera. Go capì che iero
in grane, anca perché i miei rapresentanti del Belgio i me gaveva
informà che Monsieur Delos gaveva scanzelà l'ordinazion.
Questo non era semplicemente un fulmine a ziel seren, ma una bomba atomica
in paradiso. Go subito zercà de capir cossa che fussi sucesso, ma
l'unico indizio iera che Yossie e Monsieur Delos i se iera incontrai a
Perth durante la mia assenza e che Yossie gaveva zercà di massimizar
el suo vantagio tentando de far un acordo personal con Delos. A Delos questo
no ghe ndava ben e, per bona misura, el gaveva deciso de taiar le tratative
con Yossie e cussì anca con la mia dita.
Doprando le specifiche del mio critografo, Monsieur Delos el ghe gaveva
pò piazà un'ordinazion a una dita svizera. Mi dovevo verificar
che solo le specifiche iera simili e no i circuiti. In altri termini dovevo
assicurar i mii partner americani che no ierimo vitime de un plagio industrial.
L'esperienza me aveva insegnà che una volta che un'idea la viene
copiada xe assai difizile riacquistarla. El mio sugerimento xe stà,
quindi, de no zercar una soluzion legal, ma de proceder come gnente fussi
sucesso malgrado sto imbroiez.
Ma la Merril Lynch gaveva i bori per pagar le spese legali e mi no podevo
far altro che diventar - ancora una volta - carne de canon in una guera
tra dò ziganti finanziari. Forse sario finì in un masinacarne
anca mi!
Purtropo sta predizion la stava per diventar realtà. |
|
WATERLOO
La Merril Lynch voleva difender a tuti i costi la mia invenzion.
Dovevo ndar a New York e incontrar visavì i legali Rogers &
Wells nel ufizio de fronte ala stazion zentral, nel grataziel dela PanAm
dove che ga residenza i più prestigiosi studi legali americani.
Rivà al pian giusto go caminà nel labirinto dei longhissimi
coridoi fin la sala conferenze piena de avocati tra i quai el senior partner,
nientemeno che el consulente del Presidente Reagan. No i me ga fato paura
ma solo rabia perché - dele domande - go capì che i voleva
saver se mi stesso gavevo fato qualche sbalio. No volevo farghe causa ala
SWIFT e iero risentì de esser sotoposto a un interogatorio soto
granda pression. Ma iero disposto a cooperar in quel che i coleghi dela
IBM ciama, co' i perdi una ordinazion, "pissar sula zenere".
E, visto che la Merrill Lynch pagava, no podevo oporme.
Gavevo, sì, dà detai tecnici per spiegar le funzioni del
critografo, ma solo con l'assicurazion che le informazioni restassi confidenziali;
iera ciaro che ierimo vitime de una trasgression del'acordo de confidenzialità
Dovevo ndar a Bruxelles e scominziar un recupero. I me gaveva spiegà
che un mandato de perquisizion, steso de un giudice belga, saria sta otegniù
dal nostro legal de Bruxelles per gaver le informazioni ale quali gavevimo
dirito, e quindi stabilir se i detai del nostro critografo i ghe iera stadi
mostradi ilegalmente ai nostri concorenti. La sera prima dell'incursion
ghe go spiegà a Bill, l'avocato dela Rogers & Wells, che l'azion
me pareva pericolosa perché gavariimo ris'cià una contropeada
legal. Bill el ga subito scartà sta eventualità come del
tuto impossibile.
Iera una matina grisa co' me son incontrà con Bill - insieme al
maresialo dela polizia belga col l'ordine de sequestro e perquisizion del
giudice - al'angolo tra l'autostrada E 40 e el Vial Ernest Salvay, l'indirizo
dela SWIFT, a 30 chilometri de Bruxelles vizin a Waterloo de fama napoleonica.
El campo de bataia no'l me piaseva perché no'l iera certamente de
bon augurio.
Iero nervoso, cussì ghe go domandà al'avocato: "Bill,
te son sicuro de saver quel che sta per far? Scometo che ne metaremo nei
guai." Ma lu el me ga risposto: "Monte, no state preocupar, te
assicuro che te farà schei come no ti li ga mai fati prima, o te
li farà in vita tua. Andemo!"
Semo entrai nel'edifico dela SWIFT che el iera un non plus ultra de modernità
cole sue finestre ovali e la finitura esterna in polvere de marmo bianco
sintilante. Dopo gaver registrà el nostro arivo nela lobby el maresialo
el ga piazà el suo assistente ale porte de entrata dichiarando che
nissun podeva entrar o sortir fin a novo ordine: l'edificio iera soto sequestro!
Ne semo direti al'ufizio del Monsieur Delos che pena entrai, rivolto a
Bill, el ghe domandà:
"Voulez vous ôter votre jaquette? Je suis d'accord, allez-
y...
Mi go capì e spiegà a Bill che Delos lo invitava a cavarse
la giaca.
"Monsieur Delos", Bill el ga protestà "questo xe
afari seri. La invito a cooperar" Dopo gaver ciapà fià
el ga continuà: "Monsieur, gavemo un ordine de perquisizion
e volemo veder i suoi archivi."
"Voilà les porte-manteaux, Monsieur, prenez ce que vous
voulez", xe sta la risposta de Delos, fazendo finta de no gaver
capio e indicando la stampela in un armadio.
El se ga poi girà verso el maresialo disendoghe che, visto che l'ordine
iera in francese, el gavaria doprà solo quela lingua. Ghe go passà
l'informazion a Bill, che parlava solo l'inglese de Brooklyn, zontando,
"Bill, sto omo el ne ciol pel cul. Cossa femo desso?". Bill no'l
saveva.
Semo sortidi per decider cossa far, mentre el Maresialo el xe restà
con Delos che, ciaramente, el ne gaveva messi in scaco mato con una sola
mossa. Per via de sta pronta reazion de Delos no podevimo studiar i documenti
comprometenti.
La mia predizion la se stava averando. Go dovù acetar un arbitragio
che gavaria fato esaminr i dò prodoti de un esperto, che pò
ga concluso che le specifiche pareva identiche, ma i detai del circuito
no. Su questa base, qual presidente dela mia dita, no podevo far altro
che asogetarme ala mercé de Monsieur Delos che me ga domandà
de disconosser in scrito ogni presunto dirito e de domandar scusa per gaver
sequestrà l'edificio dela SWIFT causando perdite de affari. Go dovù
firmar el documento sentindome come un che magnassi merda licando ogni
picola ioza.
Bill, imbarazà, el me ga evità quela sera. Lo incontrà
a prima colazion la matina dopo. El iera stanco perché no'l gaveva
dormì tuta la note, passada con una mula: "Mama mia, che dona!
Gavemo scominzià con una boza de champagne nela vasca de bagno.
Che guade! Te vol el suo numero?"
Gavevo altri piani. Dovevo pensar al prossimo passo, ghe go spiegà,
ma pò ghe go domandà el conto. "Oh, zirca venti, spese
escluse".
"Gesù Maria" go zigà "Ventimila dolari per
un fiasco! Come te ghe lo spiegherà ala Merrill?"
"Ah, Monte, no ghe penso gnanca. I pagherà."
El sburtava le parole con dificoltà per via de un bocon che el ga
ingiutì con l'aiuto de un sluc de cafè nero.
"Te sa cossa che i disi a New York!?" Con la boca desso svoda
ma col piron carigo a mez'aria, el ga continuà "I disi che
ghe xe dò categorie de persone nel mondo".
El se ga fermà per impinir de novo la scafa, el ga mastigà
per un pocheto, po', sburtando el magnar de una parte al'altra dela boca
el lo ga ingrumà per ingiutirlo rumorosamente e el ghe ga continuà:
"In sto mondo ghe xe solo chi che ciava e chi se fa ciavar. Mi ciavo
e che vadi in mona qualche causa persa. Ghe xe poco de far, la vita la
xe fata cussì: zerte volte xe perde e altre xe vinze, perché
smagnarse?"
Ciolto de novo un sluc dela cicara, movendo el café intorno in un
vortise, el se ga resentà la boca sburtando el liquido in modo de
gonfiar le ganasse in turno e el ga ingiutì con sodisfazion.
"Monte," el ga concluso, "No te savarà mai quanto
me dispiase per come la xe ndà ieri. Credime, volevo vinzer per
ti, perché te son un signor." El se ga fermà per un
momento, po', messa una man sula mia spala el ga continuà, "Volaria
che te fussi mio papà. Credime." El se ga alzà e strendome
la man tengnindola tra le sue, el se partì via. El doveva tornar
a New York per iutar un altro cliente.
Quella sera go caminà per ore e ore, senza meta, per le strade de
Bruxelles fin che me son inacorto de gaver fame. Tornà in albergo
ghe go domandà al portier se el podeva racomandarme un ristorante
italian.
El ga sugerì "Il Perugino", al 42 Rue du North - a zinque
minuti da Rue Royal nela zità vecia - dove i serviva tortelini spetacolari.
Entrando, go capio el perché del nome. Ghe iera manifesti de Spoleto
dapertuto e go subito riconossù el convito, la Roca, el ponte dele
Tori, tutto quel che me ricordava la mia infanzia.
Spoleto xe in Umbria con capital Perugia, cussì el pitor Pietro
di Cristoforo Vannucci, che iera nato là, i lo ga ciamà el
Perugino. El ristorante iera gestio da dò spoletini, molie e marì.
Co' ghe dito che iero italo-australian e che gavevo vivù a Spoleto
i me ga fato un bancheto luculian. Dopo el cafè la signora la ga
ciamà sua fia Laura che voleva saver tuto del'Australia, dei canguri
e dei koala. Dopo la partenza la me ga scrito un letera che go risposto
e che - durante una seconda visita con Lidia - go trovà tacada sul
muro dela sua camera.
Me sentivo come Napoleon dopo la sua Waterloo, ma gavevo anca trovà
de novo tre nomi de co' iero muleto e che pensavo de no sentir mai più:
- Perugino, come la piaza de Trieste dove che son nato, Laura, e Spoleto
dove che son ndà in convito subito dopo che el papà xe morto.
Che, pensandoghe ben, iera meo del'isola de Sant'Elena. |
