|
SPOLETO
Le strade de New York no le xe solo viadoti ma vali tra grataziei,
canai che sforza el vento a cresser de velocità fin a permeterghe
de traversar la zità con forza furiosa.
Fora dela finestra dela camera del'albergo Vista, in fondo ala penisola
de Manhattan, nevigava tanto quel zorno e orizontalmente, apunto per l'efeto
dei canyon de fero-zemento.
Iero pena tornà da Bruxelles per incontrarme coi funzionari dela
Merrill Lynch e decider cossa far dopo del fiasco legal dela SWIFT che
gaveva, peraltro, anca ritardà l'acordo finanziario cola Merrill
Lynch. Dopo la monada de Yossie, che el gaveva respinto i sie milioni de
dolari, no i gaveva firmà ancora ma, inveze, causa la SWIFT i gaveva
ridoto l'oferta a solo un milion con condizioni che me imponeva un flusso
de cassa ssai duro. Come gavevo predito, la vitoria la se iera trasformada
in un disastro.
Continuavo a vardar fora dela finestra, sorbà dei lampi dei saldatori
eletrici dei operai che costruiva un habitat su una penisola artifizial
fata col material scavà durante la costruzion dele dò Tori
del World Commercial Centre. Traverso la foschia dela bufera podevo pena
veder la Statua dela Libertà sul'isola Ellis - el simbolo dei emigranti.
No la me pareva la stessa de quela che gavevo amirà dela zima del
grataziel dela Merril Lynch solo pochi mesi prima.
Desso la me ricordava solo la mia continua emigrazion scominziada co' mio
papà el iera pena morto e co' i me ga mandà a Spoleto, dove
che go incontrà Laura. Gavevo soli sie ani co' son rivà col
treno de Ancona - vegnindo via nave de Zara - compagnà da mia mama,
una sera subito dopo el tramonto. Gavemo ciolto un calesse in Piaza Garibaldi
che ne ga portà a una pension in Via dele Mura e semo andai subito
dormir.
I zimisi e la tristeza i me ga tegnù sveio tuta la note e no vedevo
l'ora che nassessi el novo ziorno. Ale prime luci matutine son sortì
e go caminà per le vecie strade medioevali. Go imbocà la
scura via di Fontesecca e de là in Piaza del Mercato, dove mia mama
la se iera fermada per comprar fruti e la me spetava. Non go mai capio
cossa che i turisti trovi de bel nei sporchi vicoli che traversa come bisse,
tra case in malora, la zità alta, perché per mi la iera ssai
bruta.
La Piaza del Mercato, dove che se comprava fruti e verdure, la xe là
dove ghe iera, secoli fa, el senato roman, desso dò metri soto tera.
Questo ghe dava dirito a Spoleto de usar le letere SPQS, Senatus PopulusQue
Spoletarum.
La parte antica la xe sul cole S. Elia, un'altura isolada del'erosion del
torente Tessino. La legenda volaria inveze che una frana gavessi distacà
la rupe dai Apenini. L'etimologia dela parola Spoleto, mai confermada,
la vegnaria del greco spao e lithos, cioè sasso distacà
del Monteluco, o locus sacer, bosco sacro fin del tempo dei Romani.
Per rivarghe in zima i gaveva fato una strada in tre ani co'le man de zentinera
de prisonieri croati e ungheresi a l'epoca dela prima guera mondial.
Originariamente etrusca, la zità la iera stada sogiogada dei Romani
e la se vantava de gaver fermà Anibale direto a Roma per distruzerla.
La legenda conta che i Spoletini i ga respinto i Cartaginesi a forza de
pignate de oio bolente butà de la Torre dell'Olio. Ma questo no
pol esser vero perché i la ga fata molti secoli dopo l'invasion
dei cartaginesi.
Comunque Anibale el xe sta dirotà, causa sta sconfita, per darse
ai bagordi de Capua. A Canne Sipion l'African - ricordà nel nostro
ino nazional per via de gaver fato la vitoria s'ciava de Roma - lo ga anientà.
L'influenza de Roma la iera visibile dapertuto, anca nel mercato dove che
la roba vegniva pesada con stadere che doprava pesi scorevoli de forma
de teste romane. I fruti i li lavava nela Fonte, con l'acqua de Monteluco,
che se doprava anca per carigar la Mostra delle Ore, orologio publico che
ghe ga ricordà a mia mama che iera l'ora de andar in convito.
L'edificio del colegio iera una volta la cesa dei SS. Simeone e Giuda (che
devi esser un altro Giuda e no quel dei trenta denari) tacada a un convento
ereto vizin dela Roca, una zitadela papal trasformada in un ergastolo.
La scola stessa pareva una preson e no capisso come mai che i ga pensà
de far un monumento ala Libertà in mezo dela Piaza Campello proprio
davanti e ste dò presoni. Forsi iera questo che fazeva vegnir el
sghignazo sul viso del Mascheron, un paiazo de piera tacà al'esterno
del muro del colegio che'l spuava acqua dala boca.
El convito stesso iera sul cole de S. Elia, a forma de mezo cono dominà
dala Roca inatacabile de tuto fora che dela depravazion, famosa in quela
forteza dei papi. La fia de un de questi, Lucrezia Borgia l'andava spesso
ala roca. A parte le persone che no le ghe piaseva e che la invelenava,
Lucrezia trovava sempre qualchedun per darse a orge smisurade, e se no
la gaveva bastanza, la se dava a un muss. Fato storico importante per mi
perché i mussi xe stai le sole crature che me ga insegnà
cossa che sia la sessualità.
(I mussi dalmati iera pici, con testaze enormi, temperamento scorezivo,
e una passion tremenda per le sue femene. I me ga dà na volta una
dimostrazion de incontinenza orgiastica in una piaza zaratina che no dismentigherò
mai. Gavevo sligà un mas'cio con una erezion de mati. E el muss
el ga zercà subito de stuprar un compagna. Le bestemie del paron
no ga iutà, e gnanca co'l ga zercà de fermar el muss. Nel
tentativo de blocar la penetrazion el xe finì per esser tramezà.)
L'acqua a Spoleto iera portada da Monteluco in zità con un acquedoto
longo 230 m ereto su undise tori. La più alta misurava 80 metri.
Ciamà apunto Ponte delle Torri, i lo usava per butar paracaduti
sperimentali. Ghe iera anca mati con istinti suicidi che i se butava zo
del ponte, e i sui resti i vegniva portai via del torente Tessino che coreva
svelto nela vale de soto.
Lo gavevo visto per la prima volta vardando fora dela finestra del'ufizio
del "censor", un omo grasso che ghe somiliava al Duce e che censurava
la nostra posta a casa depurandola dele notizie che no ghe piaseva. Ala
vista de sto omo me iero spaventà cussì tanto che volevo
corer dela mama, implorandola "Te prego, no lassarme, mama!"
Ma no go dito gente gnanca co' go visto el portal de fero serarse drio
de ela.
|
|
PRESON
L'ordine, "Attenzione! Marcia! Uno-due, uno-due..." me
ga instradà nel convento dove che i me ga subito taià a zero
i cavei. Me ga ciapà una tristeza tremenda e volevo pianzer, ma
go tignù duro fin al'ora de 'ndar in leto e solo co' la pase dela
note la xe stada rota dela tromba che sonava el "Silenzio," son
s'ciopà in un pianto diroto.
El colegio no'l iera quel che un muleto dela mia età se meritava
ma, dopo la morte del papà, questa iera l'unica maniera che gaveva
mia mama per darme una educazion scolastica, anche se la iera dura. Tipica
de co' se credeva che solo una dissiplina senza cor fussi la giusta e sola
maniera de zucar fora el meo dei fioi e trasformarli in bravi zitadini.
Ne alzavimo ale sie de matina lavandone a peto nudo col'acqua jazada dela
spina, per poi marciar al refetorio a colazion che iera una cichera de
cafèlate e una feta de pan senza sal. Ne netavimo i denti con una
polvere che pareva sabia e via noi a marciar de novo zo dela colina fin
a scola per tornar, sempre marciando, su pela stessa colina a pranzo.
Studiavimo fin al'ora de zena e ale oto de sera, dopo le preghiere a Re,
Duce e Patria, marciavimo nei dormitori e po' in leto. Al sabato nova marcia
per andar in cesa a confessarne quante volte che gavevimo fato i ati impuri
e la domenica marciavamo de novo ala comunion. Marce dopo marce de matina
fin a a sera. Quanto me gavaria piasso marciar via de quela preson!
Passivimo un'ora de ricreazion nel pomerigio in una corte dove che ndavimo
inquadrai, tre per fila, a zogar a calcio con bale solide fate de noi con
tochi de carta e straze. Anche le nostre caminade iera fate a passo militar.
El percorso iera sempre l'istesso "Roca-ponte-prisonieri." Se
ndava intorno la Roca e se traversava el Ponte dele Tori per rivar ala
strada fata dei prisonieri dela Prima Guera Mondial e riprender la marcia
ala riversa. Sempre inquadrai, senza nissuna libertà.
Ma ghe iera ancora de pezo: el convito - come tute le presoni - el iera
un nido di pederasti. Spesso i muli più veci i molestava sessualmente
i più giovini e mi, che no iero ecezion, dovevo difenderme contro
de lori. El nostro convitto iera solo per mas'ci. Ghe ne iera un anca pele
mule gestio dala stessa istituzion, ma al tempo saria stà impensabile
missiar i dò sessi. No iera quindi permesso che mas'ci e femine
podessi condivider scole e alogi, ma iera perfetamente acetà de
crear una situazion che invitava pederasti a violar la roba più
sacra nela vita de un giovine: la sua inocenza.
Questa aberazion, cussì comune in colegi e altre simili istituzioni,
xe la ragion per cui no ghe go mai permesso ai mii fioi de partecipar a
qualsiasi organizazion unisex tipo Boy-scout.
Ma i pezo iera i adulti deviadi, e un de lori gaveva zercà de agredirme.
Per scampar ghe go butà in testa un vocabolario, che lo ga ciapà
in una tempia e lo ga fermà de colpo. Questo incidente me ga fato
notar tra i incoregibili, e vegnivo spesso castigà per picoli sbai
e tante volte per gnente. Iero - per i maestri - un mulo indisiplinà
de nissuna afidabilità e cussì son diventà un che
no gaveva più voia de studiar.
Per castigarme ancora de più no i me lassava ndar in cine, un evento
assai raro, e pranzi e zene li magnavo dopo che tuti i altri gaveva finio.
Mi dovevo star per un'ora sul "atenti" a fissar el muro.
Un giorno me son malà e mi ga mandà al'infermeria per el
cuciaron obligatorio de oio de rizino. El purgante el ga subito fato efeto,
e me son scagazà. I me ga portà a farme una docia. Me stavo
sugando co' el camerier adeto ale doce me ga atacà. No me dismentigherò
mai la barba setolosa del suo viso sula mia pele, come sono sicuro che
lu no'l gaverà mai dismentigà la mia reazion.
Spaventà son scampà nel cubicolo dela docia inseguio de lu.
Per mia fortuna el xe sbrissà pertera. Per no cascar go ciapà
e verto la spina del'acqua freda, che lo ga inondà bagnandolo fin
ai ossi. Co' el se ga alzà el me ga fato marciar fin al'ufizio del
censor che me le ga menade a sangue, castigandome de novo: no più
cine, passegio e qualsiasi altra atività ricreativa per tuto quel
ano scolastico.
Non gavaria mai pensà de poder odiar tanto el mondo.
La paura dei atachi sessuali me gaveva fato vegnir l'idaa de scampar, ma
questo iera impossibile data la distanza de casa. Oltre che esser aflito
per via del distaco dai mii e per la mancanza de afeto e calor che solo
una famea pol dar, la libertà iera quel che me mancava più
de tuto.
Spesso, de note, dopo che la tromba gaveva sonà "Il Silenzio",
sbrissavo fora del leto per rampigarme su un pianerotolo de una scala a
pioli permanente usada per rivar a una finestra del dormitorio; de là
ndavo sul teto de copi zentenari. Me sentavo a vardar el firmamento per
ore. Fissavo l'orizonte a est, là dove che oltre el mar iera mia
mama. Per questa libera uscita dovevo doprar l'ingano e ris'ciar de coparme.
De alora go incubidove che perdo la presa propio prima de rivare in zima
al teto, e casco.
Gavevo anca un compagno de aventura. El se ciamava Cicio e el iera inamorà
mato de Laura, una dele beleze de scola; spesso el vegniva sui copi con
mi e'l me parlava assai de sta muleta. Ciccio el gaveva ogni ragion de
esser atrato de Laura perché la iera bionda coi cavei zucai sula
nuca per finir in dò drezete ligade con nastrini cocolissimi. La
iera sempre ben vestia e la pareva una modela de vestiti per adolessenti.
Insoma la iera assai bela e anca la mia aversaria nele competizioni dela
coniugazion de i verbi iregolari latini.
No me ricordo chi che fussi el vero campion, ma no importa: Laura iera
el mio primo amor "che no se scorda mai!". La sognavo sempre
anche se dovevo concluder che no la gaveria mai conquistada. Imaginavo
che la se saria sposada con un omo rico per gaver una vita splendida, che
la gavarìa viagià dapertuto e la saria stada contenta per
tuta la vita.
A parte una sola letera, no gavevo mai più vù contato con
ela dopo la mia partenza de Spoleto, ma spesso la pensavo e sempre nel
contesto del'imagine che de ela me iero fato de mulo: bela e felice.
Quel giorno a New York - nel mezo dela bufera de neve - go deciso de zercarla. |
|
LAURA
Dovevo ndar a Roma per incontrarme coi funzionari de una banca e
po' a Venezia, cussì go nolegià un auto e me son fermà
a Spoleto. Volevo farghe una sorpresa a Laura.
Iera passai quarant'ani e più e no savevo come trovarla, un compito
difizile perché l'albergo AGIP no gaveva una linea direta ma solo
el citofono e me tocava usar la telefonista ogni volta che volevo ciamar
fora. Quela sera dopo tentativi inutili son ndà a dormir presto
perché vitima del fuso orario de New York, e iero ssai stanco.
Me iero pena butà in leto co' le luci dela enorme crose de Monte
Luco le se ga impizà e me son sveià proprio co' le se distuava,
come ai tempi dele mie caminade sui copi del convito. La crose onorava
San Francesco che viveva in una grota là vizin, quela dove che el
ga avù le stigmate che confermava la sua santità permetendoghe
de parlarghe ai useleti e ai pessi senza ris'ciar de esser ciapà
per mato e finir in manicomio, un logo teribile ai sui tempi.
El zorno dopo go trovà un amico de scola, Luigi, l'unico spoletin
in convito. Bravo mulo, el me contava storie del Pazzo, un tipo che'l gaveva
inventà per mi e che, come superman, iera un maciste fortissimo
che podeva fermar treni e far salti de chilometri. El me fazeva crepar
de rider.
Co' ne semo incontrai el me ga contà de tuti quei che iera in convito
con noi e, mentre che ierimo in un bar, gavemo visto passar una veceta
curva e scalmanada. Luigi el me fà "Amedeo, te se ricordi el
Diretor del convito? El general pensionà, sempre in montura?"
E mi, "Te vol dir el veceto che ghe somiliava al Re Vittorio Emanuale
III? "Sì." Luigi ga continuà "E ti te ricordi
come che ierimo invidiosi de sua fia, belina ma antipatica, che vegniva
servia con posateria de argento e finissimi piati? Te vedi quela dona?...
Quela la xe ela. La xe diventada mata co' la ga perso el suo mulo in guera."
Come pol cambiar el mondo! De no creder. E cossa ghe iera sucesso a Laura?
La gavarà vù sicuramente una vita più bela. Luigi
no'l podeva iutarme, o forsi no'l voleva.
Poco dopo, però, go rivà a parlarghe per telefono. La se
ga ricordà de mi co' ghe go recità la coniugazion del verbo
iregolare latin, "fero, fers, tuli, latum, ferre." "Tu sei
il convittore contro il quale coniugavo i verbi irregolari latini,"
La conversazion la xe finida là: no la voleva vederme. No volevo
arenderme e dopo gaver terminà el mio giro de afari in Italia son
tornà a Spoleto e la go ciamada de novo. Stavolta la iera disposta
a invitandome a casa sua. Mentre caminavo pel Vial dei Capucini, un corso
fianchegià de una fila de ipocastani, la pensavo cocola come co'
la iera picia.
Co' go sonà la campanela la xe vignda ela stessa ala porta. La iera
alta, curva e no più bela. I suoi oci però no i iera cambiai,
perché i oci no i invecia mai. Ghe go basà la man e la me
ga fato entrar. La casa, a dò piani, la iera moderna e aredada con
gran gusto. Ne semo sentai per un cafè e mi go scominzià
a ciacolar. Co' xe vignù el suo turno, pian pianin la storia dela
sua vita la xe vignuda fora in tuta la sua tristeza.
No la se iera sposada mai perché inamorada de un pitor che no'l
voleva disfar el suo matrimonio. L'intrezo iera continuà per ben
trenta ani e'l iera finio poco prima dela mia visita. L'omo voleva solo
el sesso e lo ga usà fin che a un zerto punto no'l ga volesto più.
El la ga molada co' la xe ga malà. Laura la ga pensà de andar
in pension ma solo per complicar i sui problemi perché non se la
sentiva più de viver.
Prima de ndar in pension la iera diventada Diretrice de banca, un posto
assai bon, ma anca questa sodisfazion la ghe xe stada distruta in poche
ore co' un giovine programator, magro come una schila, pien de bruschi
e cola barba che pareva Marx, el ghe ga cambià la contabilità
- che Laura gaveva creà dopo ani de lavor - con un computer impersonal
che ela no la podeva capir o acetar. La iera restada sola con gnente per
continuar de viver.
No la me ga mostrà nissun segno de autocomiserazion, ma la me ga
solo dito che mi iero l'unico al mondo a cui la ghe gaaveva contà
sta storia. Dovevo rispetar e tegnirla come un segreto fin ala sua morte.
Po', de boto, la me ga mandà via e la se ga rifiutà de vederme,
ma no ghe dispiaseva che ghe telefonassi, cussì la ciamavo de ogni
parte del mondo co' viagiavo. Forsi volevo ripagarla per l'amor de muleto
che me gaveva iutà assai nela mia fanciuleza distruta dei pederasti.
Forsi gavario podù anca iutarla nel suo momento de bisogno. Ma no
go mai capì sta mia ossession per ela, diferente de quela de sognar
un'isola deserta piena de bele mule e ogni altro ben de Dio. Forsi zercavo
le radise o forsi gavevo solo paura de dismentigarme da dove che vegnivo.
Chissà!
Durante le vacanze estive el convito se svodava, e restava solo quei senza
nissun e mi: nel mio caso perché la mama no la gaveva mai i soldi
pel viagio. Co' la rivava, bona parte dela vacanza la iera zà passada.
Le aule e le camerate svode le me dava, però, un senso de libertà
come quela che sentivo sul teto del convento. La dissiplina vegniva aleviada,
no dovevimo caminar più in fila e podevimo ciacolar co' volevimo.
Iera apunto per questa libertà che in qualca rara ocasion incontravo
Laura per strada. La me vegniva incontro per saludarme e farme capir, senza
saver ela stessa, che el mondo no'l era fato solo de pedofili.
La incontravo anca nele gite, co' andavimo sui Apenini che me ricordo anca
per un'altra ragion. Ogni ano per "la festa dei alberi", introdota
de Mussolini, co' piantavimo arbereti a zentinera. In una de ste escursioni
gavevo perso la giacheta dela mia divisa estiva, fata de tela grisa che
pareva quela de scovazin. El censor el ga volù che pagassi per una
nova coi bori del viagio per Zara e quel'ano no son ndà a casa per
le vacanze. Bela ricompensa del contributo a una dele prime atività
ecologiche del secolo. Comunque el convito ga perso nel barato, perché
tre mesi de vito ghe xe costai più dela bruta giaca grisa. Ma, per
prinzipio, dovevo pagar.
Prinzipi altretanto sbaladi gaveva indoto l'Italia in una guera che ndava
assai mal. I americani i xe vignui de novo a iutar i inglesi cambiando
le sue fortune beliche. El Duce no'l fazeva più discorsi e Churchill
gaveva scominzià i sui, ancora più istrionici. Una valanga
spaventosa gaveva inondà l'umanità impinindo sta vale de
lagrime fin a farla trabocar con milioni de morti. L'Apocalisse iera rivada
come anca l'ora per mi de tornar a Zara. Nel 1942 son partì via
de Spoleto per no veder più Laura per più de quaranta ani.
Una volta, co' iero de novo a New York, ghe go telefonà per saver
come che la stava. Volevo rivederla al mio ritorno in Europa e ndra spasso
sul solito percorso "torre-ponte-prigionieri" e parlar del passà.
"No" la me ga zigà, "No me interessa e perchè
te continui a romperme le scatole?" E la ga butà zò
el corneto.
Poco dopo la go riciamada da Londra e la se ga scusà disendome che
un'amica americana sposada con un spoletin, stufa dela vita provinzial,
dei spagheti quotidiani e dele sieste, la se iera butada zò del
Ponte dele Tori. Ma desso la stava meo, e sì, se proprio volevo,
podevo ndarla trovar.
La go ciamada de Milan, me ga risposto un vose foresta: Laura no la ghe
iera più. La gaveva ciolto una boza intiera de indormio per cascar
in un sono senza risveio. |
|
LA PATACA
La morte de Laura me gaveva portà ala conclusion, alquanto
ovia, che tornar indrio del tempo no se pol e mi oramai in ogni caso no
apartegnivo più a quel tempo e a quei loghi. Volevo dismentigarmeli
per stabilirme in pase, ai antipodi, in quel posto al sol ciamà
in italian con un sinonimo unico: mezogiorno, parola che pare fata posta
per l'Australia. Ma per finir sta mia storia devo rivisitar el mondo dele
mie origini che go lassà ormai de più de mezo secolo.
Ala fin dei ani 80 gavevo una mia famea, un presente e un futuro più
che stabili anca perché, dopo l'evento dela SWIFT, gavendome liberà
de Yossie, la Merril Lynch gaveva finalmente firmà l'acordo versando
un milion de dolari, anche se poco dopo go comprà le azioni indrio
pagandole, però, più del dopio.
Nel fratempo i critografi fornidi del mio concorente ala SWIFT i iera stai
rimpiazai dei mii perché quei svizeri andava in tilt e perdeva colpi
e cussì anca i trasferimenti bancari. Tuta colpa dela sincronizazion
che i svizeri no i saveva come governar. Gaveva iutà però,
che nel fratempo Delos el se iera dimesso. De quel momento in avanti i
afari ga scominzià a ndar a gonfie vele e nel 1989 go vendù
le mie azioni realizando un fraco, anca se la borsa iera pena crolada in
tuto el mondo.
Go pensà de no spetar la morte per lassarghe ai mii fioi l'eredità,
ma de passarghela co' iero ancora vivo. Gavaria cussì evità
che i pagassi le enormi tasse imposte in Australia sui lassiti ereditari.
Speravo che no i gavessi le ristreteze finanziarie che gaveva spesso aflito
la mia vita e quela de Lidia. Insoma ghe go passà tuto quel che
gavevo a lori. Cussì ogni mulo ga podù comprarse la sua bela
vileta, un'auto nova de zeca e anche gaver un conto in banca equivalente
a dò ani de paga, che, tra parentesi, xe quel che la Mafia americana
paga per coromper una persona. Non gavevo più soldi mii, ma gnanca
responsabilità. Mantignudo dei mii fioi, continuavo a lavorar dopo
gaver fondà una terza - e che speravo ultima - società DSA
(Dr. Sala & Associates). Per completar el lassito go tirà fora
del cassetin dele opere incompiude un marchinzegno che gavevo inventà
co iero al'Università al tempo de Bela Julezs.
Questo el xe basà sul lavoro de uno studente, David Burr, desso
al'ateneo de Roma, co'l stava preparando la sua tesi de dotorato. David
voleva capir un fenomeno che tuti gavemo visto ma che pochi ghe bada. Co'l
ndava in treno o in auto, ogeti sconti dei alberi i diventava visibili
pena el veicolo se moveva. Perché?
La ragion iera l'efeto beta che l'evoluzion naturale gaveva svilupà
nei nostri antenati preistorici, le simie. Senza questa abilità
i animai de preda, sconti de le foie, li gavaria ciapai e magnai. Anca
se le tigri e i leopardi i xe mimetizai con mace e striche che li fa meno
visibili, i nostri antenati li podeva veder pena che i se moveva, iutandose
coi pochissimi indizi visivi, una abilità che gavemo eredità.
Usando questo prinzipio gavevo ideà un sistema per scriti scorevoli
con colone de LED, (Diodi ad Emissione Luminosa) sistemade a una zerta
distanza l'una de l'altra come le fessure de una palizada. El sistema podeva
riprodur scrite cinesi, giaponesi, ebraiche, indiane ecc., doprando solo
el diese per zento dei LED normalmente necessari. Gavemo brevetà
l'idea in tuti i Paesi del mondo, ma l'Università la se ga tignù
i diriti inteluatali, che, per via del cosideta "leze comun"
inglese, xe proprietà del dator del lavoro.
Sti diriti i ghe xe stai vendudi a un consorzio de trainer de cavai de
Sydney, pien de bori ma che i rivava pena a contar le gambe de un muss,
e che no ga capì mai la tecnica gnanca dopo gaver speso 990'000
dolari. Ala fin i ga puntà i ultimi 10'000 dolari su un caval che
xe rivà ultimo e cussì i ga abandonà el progeto. Malgrado
ogni mio tentativo, no go podù convinzer l'Università a tornarme
i breveti.
Go dovù spetar che i scadessi per poder continuar cola ricerca per
atuar una nova version. Sedise ani dopo, l'istesso zorno dela scadenza,
gavevo ripreso el lavor e col'aiuto de chip a alta integrazion i mii fioi
ga creà un novo e più valido prodoto.
El sistema pareva fato per i ideogrami cinesi, e lora son ndà a
Pechino, che peraltro volevo sempre visitar, forsi perché noi dalmati,
per scominziar co Marco Polo, semo stai sempre fassinadi dela Cina. Go
dà una dimostrazion in una Università dove i me ga domandà
de spiegar i prinzipi dela psicofisica dela vision umana dopradi nel marchinzegno.
Credo che qualcossa xe ndà perso nela traduzion, perché el
zorno dopo go notà che el mio aparato el iera sta smontà,
evidentemente per capir meo quel che gavevo contà a vose. Ma come
i orologi che fazevo in tochi de mulo, l'assemblagio no'l iera perfeto,
per cui go capì che i cinesi gaveva passà la note dandose
a un pocheto de spionagio industrial.
In compenso, però, i me preparava bancheti che iera la fin del mondo
come quel del 28 otobre del 1986, giusto 36 ani dopo el mio sbarco a Melbourne.
Gavevo l'onor del primo assagio de tuti i piati che rivava in tavola. Gavaria
preferì de no, particolarmente co xe rivai i scorpioni friti che
go mastigà a longo, ma che no podevo ingiutir in nissun modo. Fortunatamente
Lidia la me ga ciamà al telefono da Perth e me son liberà
de "quell'orrido pasto" spudandolo nel condoto.
Lidia la me ga spiegà che Il Piccolo de Trieste el gaveva scrito
de mi, ciamandome "esempio che val per tuti" tra i giuliani in
Australia che la nostra zità gaveva pena onorà col premio
San Giusto d'oro. Questo in seguito ala comenda dell'Ordine d'Australia
(AM) - equivalente a quela de "Cavaliere del Lavor" in Italia.
Pensa ti: el Governator de Australia, in nome dela Siora Lisa Windsor,
regina de Gran Bretagna, el me ga tacà una pataca sul peto in una
zerimonia con tube sonade de trombetieri in giacheta rossa, braghe nere
cole striche, lustrissimi botoni de oro falso e elmeto de suro bianco con
un grosso ciodo impirà in zima, anca questo de oro scampà,
come ai tempi de Cesco Giusepe: "Roba de ciodi!", gavaria dito
la nona Marieta.
L'articolo de Il Piccolo me gaveva fato piaser ma anca sorpreso perché
no savevo gnente né del premio, né della zerimonia a Melbourne
dove che no iero stà invità. Ritornà a Perth, go telefonà
ala persona responsabile de Trieste che el se ga scusà per el disguido
disendome che el gavaria coreto el sbaio la prossima volta che me fussi
trovà nela zità de San Giusto.
Go risposto che saria partì subito, el zorno dopo. E xe cussì
che me son trovà nela mia zità nadal dopo un'assenza de squasi
quaranta ani, acolto calorosamente de el Comandante Staffieri sindaco de
Trieste, la stampa, la TV, el tapeto rosso e no mancava la picola muleta
coi fiori, realizando el sogno de ogni emigrante: quel tornar in patria
vitorioso.
(click sula foto per vèderla in grando - 78 Kb) |
Eco la foto de quando che son onorà del sindaco de Trieste,
el Comandante Staffieri, nel Salotto Azzurro del Comun de Trieste. Sula
patela sinistra dela mia giaca porto la pataca dela regina Elisabeta. E
in zima dela poltrona, sora de la mia testa, xe el stema de Trieste col'alabarda.
Bei ricordi. |
|
|
TRIESTE
No contando el mio arivo de neonato in Piaza del Perugino, questo
iera el mio secondo rientro a Trieste. El primo xe sta nel 1944, pena scampà
de Zara, oramai totalmente distruta dei "liberatori" e assediada
dei partigiani de Tito.
Iera una matina assai calma, senza gnanca un fil de bora, co' son sbarcà
con tuta la famea del Sansego, una motonave che fin al suo afondamento
la iera l'unico mezo de scampo de Zara.
Dopo gaver scaricà le nostre poche robe sul carel de un fachin,
ne semo direti verso la granda vila de zia Barbara, in via Romagna. Per
rivar là gavemo traversà Piaza Oberdan, se me ricordo ben,
nome de un iredentista volontario nel'esercito italian durante la prima
guera mondial. Oberdan voleva Trieste anessa al'Italia. Ma i austriaci
i lo ga ciapà e lo ga impicà per tradimento, perché,
per quanto de sentimenti italiani el iera pur sempre zitadin austriaco
come, peraltro iera el caso de mio papà.
I austriaci rispetava le minoranze e permeteva l'uso uficial dele lingue
etniche, in un sistema de governo equo. Questo ghe gavaria risparmià
un fraco de guai a tuti se l'ategiamento del mondo verso l'Impero fussi
stà l'istesso che Ceco Bepe gaveva nel governar la sua complessa
etnia. Per quanto liberal in tempo de pase, l'imperator iera tremendo in
tempo de guera. Le reclute doveva spesso combater contro gente dela stessa
origine e nazionalità. Quei del Litoral Adriatico, una colonia veneta
de secoli, ma anessa al'Austria dopo le guere napoleoniche, no i iera considerati
leali per cui i vegniva mandai al fronte oriental: i Carpazi. D'altra parte
gnanca i italiani se fidava de noi: nela seconda guera mondial i ne tegniva
via dei fronti slavi.
Mio papà, ciamà ala leva nel'esercito austriaco pochi zorni
prima del'assassinio del Arciduca Francesco Ferdinando, a Sarajevo de un
studente nel 1914, el xe scampà via per combater contro l'Austria
col grado de tenente dei bersalieri, co l'Italia xe entrà in guera.
El ga dovù cambiar nome, da Umberto Sala a Italo Spini e i ghe dà
documenti falsi, per no esser impicà anca lu se fato prisonier.
A guera finia el se ga stabilì a Trieste verzendo una fabrica de
zogatoli che fazeva pupe e animai mecanizzadi. El gaveva brevetà
anca un sistema antincendio che però son sta mi a realizar in Australia
trenta ani dopo el mio arivo.
I pionieri ga spesso poche abilità comerciali e mio papà
no'l iera un'ecezion, per cui la fabrica la xe falia. Dopo sto evento i
lo gaveva trasferio a Aidussina, al tempo in provinzia de Gorizia, dove
che el ga lavorà nel'ufizio del Registro fin ala sua morte nel 1938.
De lù ricordo solo le piume del capel de bersalier sula cassa de
morto che ondegiava col passo dei soldai come che i lo portava in spala
ala sepoltura in una tomba profanada dei Sloveni dopo l'ultima guera. Cussì
no go mai podù lassar un fior sul luogo del suo ultimo riposo.
Gavendo bisogno de aiuto in fabbrica, el gaveva fato vegnir de Lissa la
sorela de mia mama, Barbara, che là ga incontrà zio Majello,
un ganzo de no dir, napoletan de leva a Trieste dove che el fazeva un fraco
de bori lavorando come sarto per i milirari. Tuti i ufiziai i se fazeva
far le monture de lù. Co' el general d'armata ga ordinà la
sua, aparentemente molto sodisfato, zio Majello el ga ciapà l'apalto
de fornitura esclusiva de tute le divise militari a Trieste.
Devi esser che el guadagnava assai ben, perché el se gà fato
una vila a tre piani al'angolo de Via Romagna e Via Artemidoro su dò
isolati. La xe ncora là, e la se pol riconosser per via de una scaleta
a chiociola de fero tacada in canton del muro de l'ultimo pian e la porta
sul teto. Zà nel 1936 la gaveva le comodità più moderne,
come el frigo, le scafe de aciaio inossidabile, la cusina eletrica, el
riscaldamento zentralizà e diversi telefoni, tute inovazioni che
al tempo in Europa no le esisteva. Zio Majello cioleva ste idee dei film
americani. Se el vedeva qualcossa che ghe piaseva, el la comprava o el
se la fazeva far.
No'l gaveva gnanca finio le elementari e el saveva pena lezer e scriver,
ma el iera al'avanguardia in tuto. El se vestiva con una rafinateza che
tirava come mosche el sesso oposto. El iera anca un bravo omo de afari
e'l provedeva ben ala famea che el mantegniva nel lusso. Zia Barbara la
iera totalmente l'oposto anche se la vegniva de una famea benestante e
studiada. Suo papà (mio nono) iera capitan de longo corso nela pesca
del merluzo, con una bona educazion e qualifiche.
Barbara inveze - dona belissima, cola vita streta come quela de una vespa,
ma anca col zervel de una formigola - ghe piaseva solo una roba: zogar
d'azardo. La passava tuto 'l suo tempo al casinò del Lido de Venezia,
dove che la perdeva in una note quel che gavaria podù mantegnir
la mia famea per un ano. Co' zio Majello xe morto la ga impegnà
la casa (che ogi valaria, mi diria, molte zentinera de milioni) e in meno
de un ano la ga perso tuto. Sua fia Ada, che gaveva vù una vita
agiada de mula, la xe finida in una bicoca a Verona dove che la xe morta
in miseria nera.
Semo rivai casa dela zia Barbara stanchi e afamai, ma felici de riveder
mia sorela Adda che la viveva coi zii per via che la ndava ale scole magistrali
de Trieste. Barbara iera la missianza dela matregna e sorele dela cuzazenere
Zenerentola. Senza una fata che la iutassi, la vita coi zii iera un inferno
per Adda, fin che xe rivà un principe in forma de un bolognese che
la ga sposada e portada via de Trieste.
Zia Barbara no la ne voleva tra i pie e pochi zorni dopo l'arivo la ne
ga mandà in un paeseto vizin de Sistiana, là dove che el
Timavo sorti dei scuri budei dela tera prima de ndar finir in mar.
Là podevimo dormir in pase perché no ghe iera un obietivo
de bombardar che interessassi i "liberatori". Ghe iera però
i partigiani, i ustascia (fassisti croati) e i Cosachi, soldai russi anticomunisti
che se iera aledi coi gnochi e i gaveva vù in regalo de Hitler el
teritorio dela Carnia vizin de Trieste.
Cussì son diventà anca testimonio de un evento storico unico.
|
