|
COSACHI
Subito dopo l'ataco contro l'Union Sovietica nel 1941, l'esercito
cosaco el xe sta formà dei nazisti che gaveva ocupà la regione
intorno al fiume Don dove che la magioranza dela popolazion iera contro
i comunisti e pronta a cooperar coi gnochi. El potenzial politico e uman
oferto dei cosacchi ga sburtà i tedeschi, anca se contro l'opinion
de Himmler, a formar un esercito cosaco.
I comandanti iera russi: tra de lori el general Piotr Nikolaevich Krasnoff,
Sulyan Ghirei Klithc, Vladimir Naumenko e tanti altri che se iera aleai
ai gnochi in una crosada anticomunista. Co' la guera ga scominzià
a ndar mal per i gnochi, i cosachi ga lassà el Don e i xe ndai in
Polonia zentral con le famee, bestiame, camei e cari.
Sicome Hitler voleva gaver la strada proteta pei sui soldai nela region
alpina del Brennero minaciada dei partigiani italiani e de quei de Tito,
el ga creà una zona ciamada Kosakenland, trasferindo i cosachi dela
Polonia in Carnia dove mi li go visti nel 1944. I treni che gaveva portà
50'000 omini, done, fioi, camei e cari, vegniva po' impinidi de zivili
direti in Germania in modo de alimentar l'industria de Adolfo e i sui forni
crematori. I Italiani dela Carnia i xe stai butai fora e i cosachi xe diventai
paroni assoluti del teritorio. Questa nova nazion cosaca gaveva le sue
festività religiose, una aministrazion autonoma, scole e perfin
banche.
Nel 1945, quando la sconfita dela Germania iera ormai sicura, i cosachi
ga abandonà la Carnia e traversà le Alpi per trasferirse
in Austria e arenderse ai aleati che li ga acetai come prisonieri. El General
Charles Keightley, comandante del'esercito inglese, soto la pression de
Harold Macmillan e de Churchill el ga dovù trasferir i cosachi ai
russi del Maresialo Tolbukhin. Miliaia i se ga suicidà pitosto che
darse ai comunisti, spesso butandose dei camion sule baionete inglesi.
I sui comandanti i xe stai fuciladi a Mosca nel 1947, el resto xe ndà
disperso nei gulag in Siberia.
I cosachi insisti anca desso che i Inglesi i xe responsabili de un tradimento
senza uguali nei anai dela storia. Churchill saveva quel che saria stà
el destin dei cosachi, ma el iera un omo tipico de un periodo che in tuti
i sensi iera parte del Medio Evo. Un'epoca caraterizada de tirani e santi.
Mai, però in un numero più grando de quel del periodo tra
el 1920 e el 1950 co' ghe iera tipi come Chiang Kai-Shek, De Gaulle, Franco,
Gandhi, Hirohito, Hitler, Mao, Mussolini, Peron, Roosevelt, Stalin, Tito,
e un corteo de altri pici ditatori dei Paesi comunisti del'est.
De un novissimo pulpito, la radio, vosi tute simili vomitava solo odio
in un stile universal. El discorso de Churchill, per esempio, quel che
ga creà la "cortina di ferro che si estende dal mare Baltico
a Trieste sull'Adriatico", per mi gaveva toni mussoliniani.
Cliché istrionici e insulsi, iutai de mezi de comunicazion
de massa e de crudeli caricature, glorificava i oratori brutalizando i
nemici. I vinti, spoiadi de ogni sembianza umana e presentai solo come
mostri, no i gaveva nissuna via de scampo e no i ghe fazeva passion a nissun.
El sterminio dei cosachi de parte dei comunisti russi el xe sta ignorà
del mondo come anca el destin de noi istro-dalmati.
Ma anca se i cosachi i me fazeva paura perché i me pareva come i
mongoli de Attila, i tedeschi me fazeva paura ancora de più perché
i ne vardava come materia prima de doprar in guera. L'industria de Hitler
gaveva bisogno de man che i Tedeschi stessi no i gaveva più, ocupai
come che i iera ale pompe nel'inutile tentativo de salvar la sua nave:
el Reich, che gavaria dovù durar un milenio, ma che ndava oramai
a pico.
Una matina un soldà dele SS in montura de paracadutista, armà
de un mitra Schmeisser, el xe entrà in casa nostra. Parlandome in
italian - perché el iera altoatesin dela division Bozen - el me
ga ordinà de ndar in piaza e de no zercar de scampar che le guardie
per la strada che portava in piaza le me gavaria copà. No'l scherzava,
i Tedeschi iera dapertuto. Come suo solito, in ne ga diviso in dò
grupi, le gente vecia de una parte e i giovini de l'altra.
El mio grupo el xe sta mandà ala scola del paese dove l'ufiziale
più anzian, che parlava italian e sloven, el ga scominzià
l'interogazion, dividendone, de novo, in dò grupi. In efeti in "boni"
e "cativi". Sti ultimi i xe stai subito carigai sui camion per
far chissà che fin. El mio grupo, inveze, doveva ndar su un treno,
el stesso doprà dei cosachi, per la Germania.
Anca se savessi ssai poco dei campi de concentramento che ga reso la Germania
infame nela storia, capivo che me trovavo in un bruto guaio. Gavevo zercà
de convinzer l'ufizial a lassarme ndar, dato che gavevo solo 15 anni e
ndavo ancora a scola. Ma a lu no ghe importava: no dovevo preocuparme,
ghe iera scole anca in Germania. Che scole!
A quel punto mia sorela Maria la xe vignuda iutarme e in qualche modo la
ga rivà a convinzer el tedesco a lassarme ndar. Poco dopo i tedeschi
i ga portà via tuti meno che i veci, le done e i fioi. Se Maria,
nela sua brevissima vita, no la gavessi fato altro per mi, no importeria.
La me gaveva salvà la vita. Quel treno el xe stà distruto
in una stazion tedesca durante un massicio ataco aereo inteso a insegnarghe
a Hitler che copar cole fiame i inermi no iera una prerogativa solo sua.
Un bombardamento a tapedo, seguio de spezoni incendiari che fazeva boir
laghi e infiamava anca la pegola dele strade, gaveva rostio vivi no solo
i tedeschi in desine de miliaia, ma anca i prisoneri del treno.
Solo un omo, che go incontrà de novo ani dopo, orbo e senza man,
el se ga salvà. Sto novo Omero canterà pel resto dela sua
vita - come usa i slavi - una salmodia monotona per contar e ricontar de
novo la storia che gaveva stuà la vita dei suoi compagni e la luce
dei suoi oci per sempre.
|
|
TODT
A sto punto iera ciaro che dovevo sconderme nel'anonimia dela zità
de San Giusto, dove che son tornà ospite de mio zio Tonci Dragoni,
fradel de mia mama. El suo vero nome iera Gaetano Dragossevich, ma lu lo
ga cambià per via dele diretive fassiste che al tempo no ga trovà
nissun obietor fra i italiani, incluso mi.
Gaetano iera nato a Lissa dove che el se iera sposà e el gaveva
vù un fio, Vijeko, che - tra parentesi - desso el vivi a Belgrado
ciapandose le bombe dela NATO. Vijeko el gaveva combatù con Tito
e dopo la guera el ga lavorà come inzegner in una stazion televisiva
a Belgrado. Co' la Croazia la xe diventada indipendente lu xe ndà
in pension, ma no'l ga volù tornar a Lissa per via dela nova bandiera
croata che lu disi che xe la stessa dei ustascia. Insoma, come mi, el le
ciapa de tute le parti.
Comunque, zio Tonci el gaveva lassà sua molie e Vijeko per viver
con "zia Mary", che me ricordo per dò robe: la bestemiava
come un caretier e la me obligava a lavar piati. Zio Tonci iera apassionà
dele corse de cavai e ogni domenica el me strassinava al'ipodromo. El trapolava
anca nel mercato nero ma el ga finì col meter zio Majello in brute
grane.
Un "cliente" voleva comprar aze de coton e Majello ghe ne gaveva
a casse, aprovigionamenti militari che el se iera tignù dopo el
ribalton. Ma no iera un afar, solo un bidon, e i "acquirenti"
iera polizioti. I zii i xe stai arestai. Tonci i lo ga messo a piede libero,
Majello inveze el xe finì in cheba, quela soto el Tribunal - dove
i tedeschi i gaveva ciolto a caso, per rapresaglia contro i partigiani,
diese italiani per ogni tedesco copà in una imboscada, impicandoli
ale travi de un palazo distruto dele bombe nela strada che desso me par
se ciama Via dei Martiri della Libertà. Sta esperienza la xe stada
teribile per zio Majello.
Un'altra esperienza alucinante iera quela dele incursioni aeree. I edifici
publici, e quindi anca la sua preson, iera i obietivi più comuni.
Esser serà a ciave durante un bombardamento senza via de scampo
tra muri che pol diventar tombe de un momento l'altro, devi esser una esperienza
spaventosa, e per via de questo al zio ghe ga ciapà mal de cor e
el xe morto per un aresto cardiaco poco dopo.
Nel fratempo, malgrado la guera, el mio interesse per l'eletronica no'l
se iera stuà. Gavevo trovà un lavor in una dita che modificava
radio per impedir la ricezion dele onde corte dela BBC inglese, ma durante
un rastrelamento i me ga ciapà de novo e messo nela TODT, l'arma
dei genieri tedeschi, e spedio in una località tra Duin e Monfalcon
per far fortificazioni per l'ultima difesa de Hitler.
El mio compito iera de scavar tunel e trincee. Capo operazioni iera un
giovine ufizial tedesco, Herr Ernst, un'anima alegra. El scominziava sempre
la zornada con un "guten Morgen" compagnà de un soriso
che, pur essendo ragiante, doveva essere sforzà perché ghe
iera poco de rider visto l'andamento dela guera.
Gavevimo anca un sergente in carica dela dinamite, Walter Vesner, un tipo
alto e quieto che me ricordava Gary Cooper e che ciamivimo VW. Un zorno
el ga fato saltar le mine che gavevimo pena preparà e el xe sta
copà de un sasso che ghe spacà el cranio. Ernst el xe corso
per iutarlo e el se ga inzenocià vizin de lù, ma no ghe iera
gnente de far. El ghe ga serà i oci a VW e el xe s'ciopà
in un pianto diroto.
Ghe iera un altro gnoco che se meritava veramente la morte, e ancora pezo
de quela de VW. El iera quel del compressor de aria che dopravimo per i
trapani pneumatici. Tipo cativo, el ne zigava in tedesco e tante volte
el ne molava peade in tel cul coi sui scarponi pieni de ciodi che pareva
cari armati. El iera ssai sporco, anca se el viso - che pareva quel de
un gorila, coi oci infossai, fronte bassa e senza barbuz - el iera neto,
ma solo fin dove che el se fermava col savon co' el se fazeva la barba
de matina. Soto de questo el colo iera pien de cragna.
Lo ciamavimo "simia" e son sicuro che el ga rivà a scampar
via senza problemi. Ma se lo gavessimo ciapà noi, lo gavariimo sepelì
vivo fin ala testa per darne modo de cagarghe e pissarghe indosso.
Tuti sti eventi me ricordava che la morte iera roba de ogni zorno. I gnochi
i sbudelava i zivili a tera e i aleati de l'aria in numeri ssai più
grandi. No volevo morir, nè volevo esser segnà de qualche
mutilazion pel resto dela ma vita. Volevo viver perché savevo che
la fin dell'incubo la iera prossima. Dovevo farghela, lora son scampà.
Dopo una "longa marcia" de Monfalcon a Trieste, son rivà
nel tardo pomerigio e me son incontrà con un amico de Zara, Oscar,
che me ga ospità de lù per la note. No'l gaveva gnente de
magnar in casa e no se podeva sortir per via del coprifogo e a stomigo
svodo me son indormezà.
La matina, ancora afamà, son ndà a comprar pan che go pagà
a un prezo enorme. Trieste la pareva svoda: no se vedeva nissun tedesco.
Oscar me gaveva dito che i partigiani stava per rivar. Infati subito dopo
go sentio un comando seco, "alt!", che me ga iazà el sangue:
go visto un muleto slavo basar el calcio del fusil e poi farse el segno
dela crose. El ga mirà nela mia direzion e el ga sparà'.
"Gesummaria, el me vol copar", go pensà. El colpo iera
però direto a dò veci tedeschi che zercava, come noi, de
comprarse el pan. Dopo el secondo colpo i xe finii, tuti dò, morti
distirai in una poza de sangue.
Ga seguì un altro zigo: "Stoj!" (Alt! in lingua
slava). Un secondo partigian, con pistola "magnum" che pareva
un canon, el xe vignù per veder se ierimo armai. Riassicurà
che ierimo inermi, el ne ga zigà "marcia!" Così
go marcià fin a una piazza dove un sloven alto e gofo ne ga domandà
"taliano?" Ala nostra risposta afermativa el ne ga indicà
un punto dela piazza cola sua Luger disendo "va, va!"
Xe cussì che son stà fagocità dei comunisti nela famigerata
Guardia del Popolo, e là go incontrà el mio comandante, Scatto.
Nomi de bataia i iera spesso usai per protezer le famee dei partigiani.
Alcuni de questi iera selti dechi che li portava, ma altri iera per via
dela reputazion. E ghe iera una grande selta: Assassin, Matto, Pimpernella,
Cane Pazzo, Gattopardo, Tito e cussì via.
Scatto el vegniva dele Puglie. El iera el tipico meridional basso e stagno,
de forsi 30 ani, bruto ma no proprio sgradevole, e l'indossava la montura
de garibaldin: camisa rossa, fazoleto al colo e braghe ala zuava che doveva
esser quele de un avanguardista fassista. Il suo attire iera completà
de una bereta cola stela rossa, falze e martel.
Dopo el discorseto per dirne che el comandava lù i ne ga trasferio
in un palazo pena sgombrà dei tedeschi, meno che el Gauleiter, che
el se iera sparà in boca e el iera ancora sentà ala sua scrivania
co' lo gavemo trovà. La sua ora la iera rivada: no'l gaveva podù
scampar e cussì el gaveva scelto el suicidio come la soluzion meno
dolorosa pei sui problemi.
Nel edificio un finanzier fazeva de guardia ma i partigiani i lo ga subito
arestà. L'omo gaveva sostegnù i partigiani, ma questo no
lo ga iutà. Lo go riconossù nela foto de un libro publicà
qualche ano fa, Trieste Diary, mentre i lo fazeva marciar con altri soldai
italiani ala morte in una foiba zà piena de cadaveri
|
|
SCATTO
Comandante Scatto no'l iera Napoleon, solo un soldà de leva
che dopo l'armistizio el se iera tacà ala Resistenza e messo in
comando dei soldai italiani che no ghe la gaveva fata a taiar la corda
l'8 setembre.
Anche lu gavarà pensà: "scampo", parola che forse
ghe ga dà l'idea del nome Scatto. No'l capiva un bel niente de strategia
militar, ma el iera el mio comandante a Gretta, dove che me trovavo al
momento. Dovevo ubidir ai sui ordini de piazarne drio un parapeto e sparar.
Intanto la bataia per la "liberazion" de Trieste la se iera ingrandia.
I partigiani voleva spaventar i tedeschi tirando colpi a una zatera completamente
fora tiro. I gnochi i rispondeva con scarighe massice de almeno una dozena
de mitralie antiaeree a quatro cane dei pontoni ancorai al largo del porto.
Mi me iero sconto soto un albero drio del parapeto co' i tedeschi i ne
ga risposto con un'enorme mitraliada che ga spoià l'albero de tute
le sue foie coverzendome completamente. Per fortuna un squadron de cacia
americani xe entrà in combatimento contro le zatere, che le ga subito
perso interesse in noi per focalizarse sui Mustangs P-51.
Me son alzà per vardar la pirotecnica più esplosiva che gabio
mai visto in vita mia. Iera un zogo mortal ma che pareva divertir tuti.
El ziel se ga impinì de miliaia de rosete bianche in un sbaramento
antiaereo che iera tanto impressionante quanto ineficace: nissun aereo
o ponton xe stà ciapà. Co' i aerei i xe restai senza più
munizioni, i xe ndai via sbandando le ale per saludar, mi credo, solo i
gnochi.
Nel fratempo mi gavevo trovà un elmeto tedesco che me son messo
in testa, ma i partigiani i me ga sparà contro e, dopo questo, Scatto
me ga dà lavori più consoni ala mia "preparazion"
militar.
El primo xe stà quel de portarghe el rancio, un pignaton pien de
brodo, ai combatenti col'aiuto de Oscar. Dovevimo ndar, in piena vista
dei tedeschi, coi 50 chili dela pignata su per i scalini che colega la
Salita di Gretta ala sua paralela in basso, via Tor S. Pietro, poco prima
de rivar al Viale Miramare, davanti dela stazion.
Co' semo rivai ai primi scalini ne semo guardai l'un co l'altro per po'
partir come razi su per le scale co' credevimo che fussi el momento giusto.
Semo rivai in zima ala scalinada e gavemo girà a sinistra su per
Salita di Gretta, drio de una palazo, senza gaver perso gnanca una ioza
de minestra e pena in tempo per evitar una mitraliada furiosa dei tedeschi
che i ne gaveva visto, ma per fortuna tropo tardi. Sto impegno no'l ga
durà assai perché i aleati, i soli ai quali i Tedeschi iera
pronti a arenderse, iera rivai con in testa i Neozelandesi benvegnudi dei
Triestini che, terorizai dei drusi, li considerava i veri liberatori.
E mi iero per mia sfortuna tra i partigiani, assai malvisti per via che
Tito gaveva portà a Trieste solo che teror. Le trupe jugoslave no
le ga mai ga guadagnà el rispeto dei triestini, che vedeva solo
la parte tragicomica dele dimostrazioni de forza dei slavi. I ndava torno
dapertuto in ronde, discalzi e armai fin i denti, con metri e metri de
nastri de palotole involtizai torno a spale e peti sui corpi spesso de
done grasse che pareva pena tornade dela campagna in monture sotomisura
che le strangolava e braghe che iera tuto culi.
Po' ghe iera el kolo, balo fato in piaza. Partigiani imbriaghi, tegnindose
per man in cercio (kolo in slavo) i ghe dava peade a l'aria cola musica
de una fisarmonica e de una guzla, stridente violin con una sola corda
tignù sul zenocio del sonador. I Triestini no i credeva ai sui oci:
i ghe ne gaveva viste de tuti i colori, ma mai robe come quando xe rivai
i titini.
Per no farme veder, no portavo bombe a man impicade ala cintura come i
partigiani. Gavevo trovà tochi de monture che go combinà
in una de farghe invidia al famoso Douglas MacArthur e che me ga iutà
a sconder la mia afiliazion con la XII Armata Proletaria de Tito.
Ma gnanca mi no go iutà i titini con un incidente che per fortuna
non ga vù conseguenze serie. Una note una dele nostre guardie se
gaveva indormenzà, e Scatto che lo gaveva trovà ghe ga cavà
el mecanismo de carigamento del s'ciopo. El zorno dopo el ga ordinà
un'ispezion e co' la guardia no ga podesto presentar la sua arma intata
el ghe ga fato un cicheto de fronte a tuti disendo anca che chi che fussi
trovà che el dormiva el saria sta subito fucilà.
Al mio turno de note stavo per indormenzarme anca mi co' go sentio un rumor.
Pensavo che fussi Scatto e lora go messo la palotola in cana e go sparà
nela direzion de dove vegniva el rumor. Una cainada xe stà la sola
risposta: iera solo un can.
Poco dopo son ndà dormir, finì el mio turno de guardia de
quatro ore, ma ale prime luci del zornome ga sveià zighi de mati.
Una dona la urlava che la gavevo squasi copada quela note, e la ga ciamà
Scatto che el vegnissi a vardar quel che la mia sparatoria gaveva fato.
A zirca 200 metri dela garita ghe iera la sua casa, un bungalow, insolito
in Italia, fato de legno de pino. La mia palotola la gaveva sbusà
un muro proprio sora el leto, dove ela e suo marì dormiva e, gavendo
perso forza, la se iera ficada nel pavimento, soto la cuna del neonato!
Fortuna ga volù che nissun fussi stà tocà. Scatto
però me ga mandà a far la guardia interna dela "caserma"
- una vecia vila che ricorderò per l'odor dei glicini e per el nome:
"Guardia del Popolo, 1º Settore, 2º Battaglione, Gretta
Superiore."
Verso le diese de sera el vice comandante, compagno Kunje, el xe vignù
a farne visita ordinando de verzir l'armeria. El gaveva bevù assai
come quando che el gaveva sparà contro la porta del gabineto dove
che ghe iera quel povero finanzier dela storia che go zà contà.
Comunque el xe entrà per sortir subito fora zigando come un mato,
mezo in italian e mezo in sloven: "Jebenti tvoga, qualcadun ga rubato
mia puska automatica Bereta. Desso mi voio ti dirghe mi chi sh'e stato."
"Druze, mi no capisso cossa xe che te vol" ghe go risposto. "Ah,
no? Desso c'emo viditi. Brzo, marcia! Su aide, brzo! Desna, leva, desna,
leva" el ga continuà a urlarme. E el me ga fato ndar contro
un muro e, messa la palotola in cana ,el ga scominzià a contar:
"Iedan, dvà, tri, stiri ..."
Bona de Dio che in quel momento Scatto, come un deus ex machina,
el xe rivà chissà de dove e el ga domandà cossa che
iera tuto quel casin. Iero tropo spaventà per capir, ma credo che
el ghe ga spiegà al sloven che la pistola la gaveva ciolta lù.
Iero salvo e libero de ndar via, ma un pocheto tropo tardi.
No podevo moverme, perché me la iero fato indosso dela paura.
|
|
EPILOGO
La vita no la valeva gnente in quel tempo, particolarmente coi titini
che a Trieste i gaveva scominzià i quaranti zorni de teror. Ma mi,
per fortuna, go visto solo poco de questa orenda tragedia, per via de un
evento che in una maniera balorda me ga fato ndar via de Trieste nel momento
più teribile dela sua storia.
Come Mussolini, pena impicà a testa in zò in Piazal Loreto
a Milan con la sua Clareta Petacci, anca Tito el ga scominzià gaver
le sue Clarete. L'interesse se ghe gaveva calà de quel che el gaveva
tra le rece a quel che ghe picava tra le gambe: un idolo novo stava alzandose.
La stessa roba ghe xe capità anca a Scatto. Un zorno lo go trovà
che el iera tuto ocupà nel'ato inventà de Adamo e Eva co'
i magnà el pomo proibio. El me ga visto ma el ga continuà
e no'l ga perso gnaca un colpo. La dona iera la sua iutante e quel che
i fazeva iera contro le regole dei titini, de no far sporchezi soto pena
de morte. Subito dopo el me ga ciamà nel suo ufizio.
Iero preocupà, perché pensavo che'l fussi un omo senza pietà,
ma inveze, anca senza voler el me ga iutà più de una volta.
El iera ala sua scrivania, sentà soto un quadro de Tito e dò
più picoli de Lenin e Stalin. Sul muro bandiere italiane e iugoslave,
con la stela rossa, vizin quela russa.
"Compagno Sala" el ga scominzià" vedo che te ga
miliorà assai in sti ultimi zorni." Questo no me spetavo, visto
che el me conosseva da solo tre setimane e che ghe go creà più
malani de tuti i altri.
"I me ga dito che te vien de Zara", el ga continuà "e
che te ghe ne manchi de dò ani". El se ga fermà un cicinin
per gratarse una recia e el ga continuà:
"Te piaseria una licenza? Te la se meriti."
Volevo riveder Zara ma in quel momento iera più importante de scampar
più lontan che podevo via de Scatto. Fortuna che no'l voleva altre
grane de mi, perché credo che el ghe ne gaveva vù bastanza
e cussì el me fazeva un'oferta che no podevo rifiutar. Guardandome
nei oci el me ga passà una busta disendome: "Questi xe soldi
per le picole spese. Bon viagio! Libertà ai popoli! Morte al fascismo!.
Viva Tito!..." e el me ga mandà via, ma son sicuro che el gaverà
pensà: "Va in mona via de mi e no farte mai più veder
intorno!" .
El zorno dopo con la mia carabina tedesca Mauser, unico mio bagaio, ma
con le scarsele pien de bori son partì per Zara. El viagio via mar
no'l ga vù intopi perché i schei de Scatto iutava: l'oio
capitalista iera bon anca per i comunisti. Dopo tre zorni son rivà.
Iera una matina splendida co' el nostro barcon se ga tacà al molo
dela Riva Vecia de Zara.
Ma Zara iera solo un muciaron de macerie dove che se gaveva stabilì
i slavi del retrotera. La zità gaveva soferto l'istesso destin de
Dresda, completamente distruta dei bombardamenti aerei e brusada dei spezoni
inzendiari al fosforo, ma po' ripopolada dei stessi zitadini tedeschi e
rifata.
Zara inveze gaveva perso per sempre l'urbanistica e la sua popolazion,
netade dei jugoslavi. E no le ghe iera più, come gnanca la mia casa.
Per un miracolo el Domo de Santa Anastasia e el vecio tempio roman, San
Donà, adibio a museo, i iera ancora in pìe, come anca el
campanil che mostrava el buso là dove che una volta iera incastrado
el travo maestro del teto dela mia casa. L'angelo in zima al campanil alzava
ancora le man al ziel, sta volta però no per invocar Dio ma per
mostrar la sua resa ala marea atea che gaveva invaso una zità che
solo poco prima la iera tra le più bele del Litoral Adriatico.
Ma la iera anca italiana, e un stizo rovente nel cul de Tito che la ga
fato distruzer dei "liberatori". Col'aiuto de questi, l'ultimo
bastion Veneto dela Dalmazia e la popolazion de 21'000 abitanti xe stai
netadi via per sempre.
Zara iera un clonagio de Venezia: la gaveva le stesse calete orientade
longo i venti prevalenti, folclore, tradizioni e dialeto veneti, che ga
indoto un poeta croato, Vladimir Nazor, a doprar per la prima volta la
funesta vose del verbo "ripulire" nela storia dei Balcani scrivendo:
"Ripuliremo dalla nostra terra le pietre della sconfitta torre nemica
e le consegneremo alle acque profonde dell'oblio." Cussì squasi
tuti i segni dei veneziani, inclusi i leoni de San Marco, i xe stai scalpelai
a zero.
Xe poco de far, i slavi e i italo-dalmati i ga culture cussì diferenti
che una coabitazion la xe stada sempre difizile. Ma sto problema el ghe
xe anca tra de lori perché i Croati, Sloveni, Bosniaci Serbi, Macedoni
e cussì via i se copa l'un co l'atro oramai de secoli, e che Dio
ghe daghi.
Comunque co' son rivà no ghe iera più nissun che conossessi.
Gavevo trovà solo la casa de Oscar dove che me son fermà
per le dò setimane dela mia permanenza. I bori de Scatto i gaveva
iutà assai a comprar de magnar perché la mama de Oscar le
iera in miseria nera. Go domandà dele conossenze ma tra chi che
iera scampà, chi che iera morto soto i bombardamenti e chi che iera
stà copà perché gaveva cooperarà coi fassisti,
no go trovà più nissun.
La mia casa la iera stada subito soto el campanil del Domo, nel zentro
de Zara, proprio al prinzipio dela Calle Larga che i drusi desso ciama
Kalelarga. Me incontravo spesso coi muli del convito Tomaseo la vizin de
una zentinera de metri. Go zercà, ma senza fortuna, de trovar Tonio
Pavcovich, un traurin che po' el me saria diventà cognà,
e Marino Bettiza, un spalatin che - varda ti - el xe el fradel de Enzo
Bettiza, quel che el ga scrito el libro "Esilio". Ma i iera
zà scampai via tuti.
Sperando de riviver la mia fanciuleza go leto "Esilio", ma devo
dir che la memoria de Enzo devi esser partia prima dela mia perché
el xe vignù fora con dele robe sbalade, come per esempio che el
ponte zirevole iera, secondo lù un ponte levatoio e altre banalità
che no val la pena de contar qua.
Go capio, lezendolo, che el odiava Zara, come che el odiava anca sua mama
che lo ciapava a s'ciafe per le strade de Spalato, suo papà perchè
el ghe coreva drio ale cotole, e suo fradel Marino, perché el se
sentiva italian.
E questo me fa concluder la mia storia con quel che diseva Albert Einstein:
"No tuto quel che conta se pol contar, e no tuto quel che se pol
contar conta", che val per tuti quei che vol scriver una autobiografia.
Nel caso del Betiza, scampà de Spalato pien de bori, dirò
che el ga contà assai de quel che conta solo per lù, in un
lavor che però ga vù grande sucesso. Mi go zercà de
dir la mia, ma non son un scritor e lora devo dir che no tuto quel che
conta go savù come contarlo.
Ma mi so che go vù una vita che no cambiarìa con quela de
nissun altro. Go conossù miseria nera nel mio esilio, scominzià
subito dopo co' son ripartì de Zara per Trieste pena sgombrada
dei i titini, nel giugno del 1945.
De quel momento son diventà un vagabondo che ga visità tuti
quatro i cantoni de sta tera, e anca le stele fin a rivar a ciapar la luna,
per finir de contar sta storia ogi, 21 april, 1999, el primo zorno de primavera
in Italia, e el primo de autuno in Australia, perché, come gaveva
dito un famoso storico inglese, Thomas Carlyle, "La storia è
l'essenza di innumerevoli biografie".
E mi no volevo che la storia mia e dela mia zente l'andassi persa per i
mii fioi e nevodi.
FINE
|
