Per chi che lo conosseva no xe stada una sorpresa: el mal che se lo ga portà via lo stava za tormentando de tanto, tropo tempo. E lu,omo forte e deciso fin al ultimo, el ga preferido tignirse i dolori e le soferenze senza sfogarse coi amici. El xe morto cola dignità con cui el xe vissudo, el xèndado via in punta de pie come per no disturbar. Ma, che ghe piasessi o no, el se ga lassà drio tanta tristeza fra de noi che lo gavemo conossudo: se el credeva che nòl ne saria mancado, el se sbaliava de grosso. El xe morto lotando come che lotando el xe vissudo, e stavolta el ga perso perchè con quela maledeta vecia cola falze no vinzi mai nissun. Cussì xe mancado un omo come pochi, un che partindo del gnente con solo le braghe che el gaveva indosso, el ga rivà a costruir tanto cola sua forza, col coragio, col'inteligenza e cola volontà. No ve stago a contar la storia dela sua vita perchè el ve la ga za contada lu qua: gavemo passado mesi lu e mi insieme su internet a ordinarla e a farghe i pulisi, e xe vignuda fora una storia interessante e afassinante come un romanzo - ma tuta vera. Dopo tanto lavorar insieme dovevimo incontrarse finalmente de persona a Trieste un giorno... un giorno che no riverà mai più. Adio Amedeo, me dispiasi tanto per tuti quei biceri che no beveremo insieme. Lidia, te ghe son stada vizin per una vita, te lo ga iutà, te lo ga consolà, te ghe ga fato i fioi, che desso xe omini in gamba. No sarà facile viver senza Amedeo, ma te son dona brava e forte, e semo tuti con ti a ricordarlo e a volerghe ben. Guanta duro, e ogni volta che te varderà in viso un dei vostri nipotini, te vederà nei sui oci un tochetin de lu. Fabio