|
Dave's story
|
|
Cronaca vissuda de una giornada de paura nel'inferno de fogo in Australia Estate australiana 2003: Canberra in fiamme eco el raconto de l'amico Dave Cobau, triestin in Australia
'Stò ano in Australia xe sta la sicità più grave che sia mai esistida. Ma tutto bene quel che finisce bene, ga piovù a catinele nei ultimi dò giorni de ferie ma i disi che no semo ancora a posto, dovessi piover ancora un poco (mai contenti sti mati cio!).
Molte parti de Canberra xe ancora nere, i ruderi de le case distrute xe testimoni de quel bolide de fogo. Adesso par quasi impossibile che xe sucesso quel che xe sucesso! Sia el governo sia che le assicurazioni se ga spacà in due per assister le vitime de quel giorno. Speremo che no sucedi mai più una roba del genere.
Mi e la mia familia, amici e parenti semo tuti OK. Pero xe tanti che ga patì 'sai. Quel giorno (sabato 18 genaio), un bolide de fogo che viagiava a 120 Km/h (notizie da la radio, ma te sa come che xe la media no?) ga investido parti de Canberra vizin dove che stago mi e ga fato un pandemonio. Mi, purtropo, iero via de casa, spetavo un meeting dei Giuliani e, co mia molie me ga telefona per dirme che ierimo in pericolo, no go riva più tornar a casa. La mia no xe sta un gran che de tragedia se te pensi coss'che xe sucesso a tanti altri. Però, forsi, pol esser interessante quel che go passà quel dopopranzo. Iera roba de film americani!
Dunque, ghe iera un do foghi nel parco nazional vizin a casa mia (una decina de km de distanza) za da un 8-9 giorni. I pompieri forestali fazeva turni de adiritura 12 ore al giorno senza sucesso e i se spetava che sti foghi brusassi per altre dò stimane. Bon, tuti se iera abituadi al fumo continuo e, piu de tanto, non te ghe davi bada. Mi, mama, un'amica de familia e altre 6 persone, ale 2 semo 'ndai al meeting mensile per i giuliani, senza la minima idea de coss'che sucederà più tardi nel dopopranzo. Come go za dito, el mio caso non xe st 'sai serio, comparado a tantissimi altri, ma per mi xe sta 'sai dramatico. Fazo el resoconto qua soto, ma prima dago le ultime statistiche: 530 case distrute in tuta Canberra, de queste 230 solo che in un rion (Duffy) con intiere strade completamente distrute, $280 milioni (australiani - circa 140 milioni de euro) de dani, 39 case distrute in Kambah, dove che stago mi (7-8 vizin de casa mia), 1 su 4 case non iera assicurade, 4 morti, più de 200 persone ricoverade in ospedal in condizioni più o meno gravi, 10% de Canberra ancora senza eletricità (a noi, per fortuna, la ne xe tornada domenica dopopranzo). Acqua adesso xe OK ma a un certo punto la vegniva fora del rubineto che la iera infangada (ma no da noi). Semo fora del pericolo imediato ma dovemo ancora star sul atenti (gnente sospiro de solievo ancora.
Insoma casin!!! Quel che segui xe coss'che me xe sucesso sabato dopopranzo.
4.00 - Telefona Lorraine (mia moglie) sul telefonin (mi iero al meeting) e la me disi che Kambah (xe un rion de Tuggeranong, una de le 4 cita satellite de Canberra), dove che stago mi, xe in stato de emergenza. Saludo i altri membri del comitato (inclusi mama che andava a casa sua con Bruna, la nostra amica - mama e Bruna sta circa 25 km via de mi e non le iera in nessun pericolo) e vado con la machina verso casa. Nel stesso tempo, un'altra baba del comitato ga ciapa una telefonada con la stesa notizia. Sia ela e su mari, che el presidente dei Giuliani, sta dele parti mie ma più a sud de mi.
4.15 - Rivo sul' imboco de l'autostrada per andar a Tuggeranong ma la polizia la ga blocada e i me disi de tornar indrio e de provar dal'altra parte. Ghe iera un altro soborgo (Curtin) fra dove che iero e dove che la polizia me diseva de andar ma, sicome che 'sto soborgo iera nela lista dei soborghi in emergenza che la radio dava continuamente, go pensà che anche quella strada iera serada. Cussì son 'ndà 'ndove che la poliziota me ga dito de andar e inveze la strada che passava da Curtin iera ancora verta (a quel punto).
4.40 - Xe un trafico de mati e più me avicino a dove voio
andar più caldo Comunque davanti de mi iera 3-4 machine, lori se ga fermà, i gira e i torna de dove che i xe vignui. Mi pensavo de continuar avanti e provar a andar a casa ma quel toco de autostrada xe circa 3 km lungo, e chissà se ghe la fazo con tuto quel fogo e fumo che ingolfa la strada? Cussì son tornà indrio anche mi (e adesso credo che no ghe la gavesi fata, ma iero seriamente tentà de provar).
5.00 - E adeso dove vado? Son ancora sul'autostrada ma adesso vado nel verso contrario, via de casa mia e verso el centro de Canberra. Fazendo la strada go pensa de tornar al club italian dove che gavevimo el meeting e veder, se per caso, mama e Bruna iera ancora la. Naturalmente non le iera. La prima roba che go fato co son riva la xe sta de bever un bicier de acqua. Iero suto come un bacal da l'arsura creada sia dal fogo che dal caldo estivo (iera 37 gradi quel giorno). La seconda, naturalmente, iera de telefonar a mia molie Lorraine (meno mal che gavemo i telefonini - i xe quasi tanto boni quanto l'internet). Sta povera mula iera sola a casa con foghi tuto intorno a dove che stemo. Naturalmente non la vedeva i foghi per via del fumo, ma la gaveva tuto serà in casa e, ogni tanto, la andava fora a bagnar el teto e l'erba del nostro giardin. La gaveva la nostra cagna (Missy) dentro per compania e anche per sicureza. Ghe go fato impinir el bagno de acqua, giusto in caso...
6.00 - Decido de andar a veder come che xe con mama, ghe iera sai fumo e mama ga certe dificoltà col respirar. La ghe gaveva telefonà a Lorraine ma sicome che mama iera in stato de panico, inveze de esser una presenza calmante, la ga fato ciapar ancora de più paura a Lorraine. E co son riva la (altro biceron de acqua - iero 'sai suto ma anche 'sai stanco a quel'ora) go dovù farla calmar, iero za 'sai in pensier, no ocoreva che la causassi ancora de più problemi. A quel punto pensavo che Lorraine fossi seriamente in pericolo mortale. Bon, visto che mama xe OK, go pens de provar un'altra strada secondaria per 'ndar a casa. Ala fine de 'sta strada te pol girar a destra per andar a Woden (un'altra de le 4 cità satelite de Canberra - i altri xe Tuggeranong, Belconnen, e Gangallin) e a sinistra per vignir de mi. Naturalmente la strada ala sinistra iera blocada da la polizia. (Se andavo per una strada secondaria più in su la gavessi trovada verta, ma chi se l'imaginava - i soborghi che 'sta strada 'traversa iera sula lista de emergenza, e el fumo e el fogo veniva da quela parte, el ciel iera color rosso scuro. Po el trafico che vigniva da quela parte iera enorme. Mi iero sicuro che la iera serada cussì no go gnanche provà a passar de la.). Bon, torna de mama.
6.45 - Altro bicer de acqua, altra telefonada a Lorraine (a sto punto non la ga più eletricità) e vado in polizia dove che ghe spiego che mia moglie xe a casa sola a Kambah e che la ga paura e che non posso rivar a casa perché tute le strade xe blocade. Lori, 'sai gentili, me consiglia un'altra strada secondaria (perché no ghe gavevo pensà mi a 'sta strada secondaria?), co rivo la la xe blocada anche quela. Torna de mama, almeno la posso bever acqua.
7.30 - Altra telefonada a Lorraine, altra visita ala polizia - gnanche lori sa tanto. Magnar? E chi ga fame? Scolto la radio, guardo la television senza interesse, sbigolo su un piato de salumi e formaio. Ma de più son che scolto la radio dove che le notizie xe sul momento. Ma son piutosto deluso e anche un poco rabi perché no i te diseva le strade che iera verte e quali che iera serade. I diseva i rioni dove che iera el fogo e tuta sta roba ma gnente su come viagiar da una parte al'altra de Canberra. Comunque, scoltando la radio, a un certo punto me son reso conto che forsi gavevo la speranza de tornar a casa atraverso 'sta ultima strada secondaria.
8.15 - Rivo su 'sta strada, xe poco trafico adesso pero xe quasi scuro sia dal fumo sia dal'ora tarda. El ciel xe ancora rosso, infati venindo zo da una colina dela strada de Queanbeyan (dove che sta mia mama), no rivavo a capir se el ciel iera rosso per via del tramonto o per via del fogo. Iera per via del fogo. Dunque, son che viagio verso Kambah (semo ancora un 15 km via de casa) e vedo de fronte de mi el sol. Solo che non iera el sol, iera una colina in fiame. E mi devo pasar de la. Riverò? Boh! Finora la strada non xe blocada dala polizia cussìi continuo in zo. E più me avicino a sta colina più me rendo conto che xe tute le coline che ardi, più me domando se riverò a passar. Rivo su la strada principale che me portera al penultimo soborgo prima de casa mia. Le coline sula mia sinistra le xe tute in cenere, el fogo xe a circa 5 metri dala strada dove che stago viagiando. E mi go de girar a sinistra. Dove che xe tante case sul de drio dele coline che sta brusando. De sicuro sarà un disastro. De sicuro la strada sarà blocada. La strada xe verta. El fogo se ga fermà a 1 metro via dela prima casa in 'sta strada. Percorro la strada e quasi non rivo a creder che gnanche una casa xe brusada. Un poco de speranza per rivar a casa mia. Forsi ghe la fazo 'sta volta. Xe 'sai fumo ma non vedo più fogo nela zona che stago percorendo. Rivo sul'ultima strada che me porta a casa. Xe de novo 'sai trafico e ancora de più fumo. A 'sto punto son 'sai stanco, piu stress che altro naturalmente. Rivo a casa e tuto xe ben e tranquilo. La stancheza me xe pasada subito.
8.45 - A lume de candela, Lorraine xe sentada vizin ala finestra dela camera de pranzo. Gnanche forza de alzarse la ga avù, la iera come stremida. Credo che non la xe mai stada cussì contenta de vederme tornar a casa. E mi no credo che son mai sta cussì contento de vederla de novo. Gavevo veramente paura che ghe fossi sucesso qualcossa. Anche Missy iera contenta de vederme. Impizemo ancora candele per far più ciaro in casa. Ogni tanto vado in machina a scoltar la radio e veder i bagliori nel ciel per zercar de capir se el fogo se avicina de novo o se i pompieri 'sta vinzendo la batalia. I disi per radio che a Kambah se ga brusà 39 case. Mi finora no gavevo visto nessuna che brusava e pur, come che me diseva Lorraine per telefono un per de ore prima, co certi nostri amici xe andai a vederla nel pomerigio i gaveva dito che una casa drio el canton de dove che stemo stava brusandose. Forsi iera el fogo o forsi iera el solievo de esser rivà a casa, comunque mi non go visto nessuna casa che brusava.
10.00 - Le notizie per radio non me dava una bona idea de quel che sucedeva la intorno de casa mia. Cussìi decido de andar a darghe un'ociada a pie. Fazo el giro del bloco de case dove che stago. 'Sai trafico e 'sai fumo, non posso quasi respirar, e 'sai ciel roso ma gnente de capirghe tanto. Torno a casa e decido de andar a controlar la casa de uno dei mii amici spagnoi che sta vizin de mi, un do strade in zo. Da lui tuto xe a posto, gnanche non me fermo e continuo drio el canton. Shock. La xe colline che 'sta ancora brusando. Xe meio filar via.
El giorno dopo..... Come che se se pol imaginar, quela note no go dormì chiss cossa. Andando dentro e fora dela porta sia a scoltar la radio sia a veder la posizion del fogo, xe rivà circa le 2 prima che me son indormenzà. La matina iero su ale 6, e dove vado a farme el cafe? Non xe eletricità qua in Kambah. Forsi xe qualche posto verto un poco più in la? Parto in machina e, subito drio el canton, vedo che el parco fato per fioi pici xe tuto brusado. E la casa un poco più in su xe anche brusada, solo un muro xe restà su. A quel punto no savevo, ma piu a destra de quela casa ghe iera altre 2 che se ga brusà. E da l'altra parte de la strada altre 5.
Tuto el teren in giro xe brusà nero. El fumo, adesso che no xe più vento, resta in giro come che iera co el fogo iera ativo. Te speri che un fià de ventisel che neti l'aria. Gavemo comincia a viver de novo ma semo sempre sul chivalà. 'Sto week end che vignira i disi che farà 37 gradi e che de sarà venti 'sai forti.
Come che go dito a l'inizio de sta storia (scuseme se la fazo longa), ghe xe 'sta vento fin a 120 Km/h che portava el fogo da un albero a l'altro. Non ghe iera maniera de poder evitar 'sto disastro. Xe un 'freak accident' che sucedi una volta ogni 200 ani. Son contento che no vederò el prossimo incidente. Semo ancora sul'atenti ma credo che adesso saremo OK. 'Sai dani ma semo ancora fortunadi che gavemo perso solo che 4 vite in tuta Canberra. Gavesi podù esser 'sai de piu.
Semo vivi e sani, non gavemo perso gnente de personale. Tuti
quei che Dave gennaio 2003
|
| Dave's story |