El Mercadindio de TuttoTrieste.net


 

 



Vendo scarpe de ginastica usade poco, come nove. Puntal rinforzado, rinforzo esterno del calcagno, imbotidura completa con rinforzo su le linguete, spighete ultra sportive. Ideale per chi che ghe piasi far sport o passegiate per i prà o le campagne.

Astenerse perditempoKTMKTM, ciamar solo se veri sportivi interessadi.







, ciamar solo se veri sportivi interessadi.







Vastissimo assortimento de scarpe de baba a prezi imbatibili:
scarpe alte e scarpe basse, scarpe col taco e scarpe senza taco, scarpe lustre e scarpe opache, scarpe con la punta a punta e scarpe con la punta tonda.
 Basta che te passi de noi e te zerchi la scarpa che te piasi, co te la ga trovada te se la provi e se la te va ben te zerchi la stessa per l'altro pie. Cori provarle, la merce xe disponibile fin a esaurimento scorte.



Piova, vento, bora scura o bora ciara: no xe gnente che possi spacar le nostre ombrele, costruide 'positamente per contrastar le impetuose buriane triestine. Disponibili in tuti i colori, dal zalo limonandàdemal al verde pocasperanza, dal blu indigestion al rosso fastidio, xe tuti fati in material resistente ai urti e ai improvisi colpi de bora. De ogi in poi mai più slavazadi e tanto risparmio con ombrele sempre intiere, solo passando in tela nostra botega "el canton de la fregada", in via lemandeltacuin 84.

 

Pelicia ecologica ossia no fata con pei de bestie vere, color maron misto ossia tute le tinte de maron dal più ciaro al più scuro in quanto i orsachioti de pelush che go squoiado per farla no iera tuti del stesso color.

Franca ved.Orvisi

 

Chiodo originale in vera pele, nero, con sbrindoli drio la scena tra spala e spala, con teschio disegnà la del cuor, ex bobaza del viale vende a mulo giovane che volessi ciapar la qualifica de nagana.

Cianeto

 

Vecio imbriagòn vendi zavate, capel de paia e vestalia de portar a pindolòn, a seguito de dimissioni da l'otava division de San Giovani.

 

Sandaleti color fucsia con lustrini verde acqua, stringhe lilla e un bel fior giallo limon sul davanti vendo a chiunque ga el coragio de meterseli.

 

Donna: giachete taglia 52, invernali e primaverili, cotole de vari colori, braghe, braghete, calze de lana, calze de seda, calze de spugna, mudande, mudandoni, canotiere, combiné, regipeti, barete de lana, camise, camisete, vestalie, scarpe e papuze REGALO a chi se porta via la "donna" indicada a l'inizio de sto anuncio.

Un genero esaurido

 

Vestitini per fioluza, tuto color rosa, braghe e bragete, cotole e cotolete, tutine, bavarioi, mudandine, calzete e papuzete ricamade a man vendo causa sbalio de ecografia

 

Belissimo vestitin bianco per la cresima, con un bel velo bianco longo, fiocheto panna, cotola longa e lustra, mai usado, vendo perché sta sempia de mia fia ghe ga verto la porta ai testimoni de geova

 

Favoloso mantel nero, longo e lustro, strento in vita, con coleto alto e do grandi punte, vendo insieme a capel tipo cilindro, sempre nero, a baston da passeggio e a camisa bianca con qualche maceta de rosso. Contatar el Conte Vlad

 

T-shirt bianche taglia M, model streto, con vasto assortimento de scrite varie, slogan, disegneti, figurine, prosperosa ventinovene vende causa ritiro dall'atività professionale dei campionati de Miss Maieta Bagnada.

 

Siarpe e siarpete bianche, in lana per l'inverno e in coton per l'estate, eleganti per apuntamenti importanti e semplici per ogni giorno, vendo vasto assortimento. Silvio

 

Montone uomo chiaro taglia extralarge vendo. Forsi no me son spiegado ben: vendo monton ossia un capoto ciaro de pele de monton per omini robusti. Spero de gaver fato luce a tute quele gentili signore che me ga telefonado per provar sto monton extra large.

Rocco Siffredi

 

Te vol vestirte de baba el prossimo carneval? Go quel che fa per ti! Vendo vestito de carneval de baba, completo de scarpe numero 45 de pele de bissa con taco alto, calze a rede malia larga o, in alternativa collant neri 90 denari con paiet e lustrini, cotola rossa con spaco fin drio le culate e ghepier rossa in tinta, corpeto nero in pizo trasparente con sbrindoli de seda e brilantini su le cusidure, tete finte in plastica nona misura, giacheta leopardata maniga longa curta in vita con colo de pel de gato morto, paruca bionda coi rizi e velo nero. Ideale anche per chi ga un'atività extra lavorativa in zona Stazion o Cavana in quel caso posso zontar anche un frustin e un per de manete de pulioto.

 

Camisa model Basaglia, a righe bianche e celesti, taglia unica model unisex, senza scarsele, senza coleto senza botoni, se sera per dedrio, legera dificoltà de movimento de mani e brazi co se la ga indosso, vendo possibilmente a persona psichicamente instabile.

Giulio Treves

 

 

 

Anfibi neri con borchie de fero, numero 46, punta rinforzada, taco concavo per sconder picoli strafanici, alti fin soto el zenocio, gloriosamente usadi per le trasferte a Vicenza, Padova e Udine e per i vitoriosi assalti ai pulman dei suporter spezini e livornesi, ultras de l'Unione vende a giovane aspirante frequentator de stadi.

 

Capoto scamosciado curto, con pel interno donna, cioè capoto de dona con pel interno no con dentro pel de dona, vendo comunque con dentro dona ossia mia moglie, vecia caramp... ops... stagionata signora borghese abile nele pulizie domestiche e campionessa de ciacolada longa.

 

Capoto de legno vendo causa improvisa e inaspetada guarigion de la suocera. Zerco in alternativa velen per vipere in modo da non vender più el sudeto capoto.

 

Per collezionisti, vendo majeta usada con spuza de sudor soto i scàj, decorada con paietts de fregole de osteria, braghe in panno quadrettà con macia de garbo sul devanti + scarpe in pelle de giovenca, bareta sbusada con forfora incorporada in avanzato stato de mumificazion. Regalo inoltre set completo de botiglie svode coi nidi de vespa. No perditempo.

Cajo Mrd

 

Magnifiche scarpe anti-infortunistiche, model grampa-e-scampa, resistenti ai urti e praticamente impenetrabili da la piova, otime per lavori de carpenteria, fachinagio, carigo-scarigo, falegnameria e ideali per el tempo libero sopratuto per chi ga la passion de andar a ingrumar castagne, sparisi o funghi pei boschi. Come nove, numero 42 slambriciado che pol andar ben anche per un 44, siole pena fate de Piero el caligher de via de la Zonta ma spighete de comprar sicome che le vece le go doprade per impicar el gato de la vicina che me sgrafava le piante sul pianerotolo. In omagio un per de calzini de spugna usadi poco.

Livio Gropo.

 

Vendo papuze de straza come nove, usade poco, color fuxia con balini verde pisello, numero 38 slambriciado ideale per pie soferenti. Le papuze xe bone sia per casa che per andar fora a butar le scovaze o a portarghe el magnar ai gati. Provade sia sul suto che sul bagnà le xe a prova de reumatismi e con lore xe praticamente impossibile che ve vegni i cali. Astenerse perditempo.

Siora Genoveffa.

 

Gato scamosciado color sorzo, come novo xe meio de un shearling, taglia robusta longo fin ai calcagni se se alte sul metro e zinquanta. Legermente consumado zona culate, tacòn sul comio destro, ghe manca un o due botoni.

Carmela Scovaza

www.tuttotrieste.net/mercadindio

Vestito de sposa, novo mai doprado, con tul e strass, pizzi e lazzi, spaline con perline, misura 44 completo de combinè e cercio per i cavei, se po ve ciamè Ucia e el vostro sposo Nando go anche do bele vere de ocasion.

Ucia

 

Vestito de sposa, avorio, molto fin e de classe, usado zinque volte in quindixe ani, signora ultrasessantene  vendi a giovane promessa sposa.

Siora Maria Paci ved.Rossi ved.Stuparich ved.Ferluga ved.Slocovich ved.Simcich

 

Vendo vestito da sposa taglia forte, ampia cotola, bustino anzi bustone in pizzo e strass, giachino anzi giacheton in coton leger, velo largo tre metri e longo diese. Consigliado a novelle spose zemele che da sto vestito ne pol ricavar do.

Pina Balòn

 

Capoti, traverse, cotole, maie, maioni, camise, mudande, canotiere, barete e scufioti, vendo causa cambio taglia. Telefonare a Nadia la s'gionfa

 

Colbacco originale ucraino che tien 'sai caldo co sufia la bora, vendo. Se ve intaressa go anche un bel capoto grosso de militar ex kgb, color verde scuro.

Caterina Baretov.

www.tuttotrieste.net/mercadindio

Pelicia de folpo, belissima, color folpo, come nova la ga ancora su l'odor del folpo spelà. Rina dei Gati

 

Abbigliamento donna in ottime condizioni vendo, cioè l'abigliamento che vendo xe in otime condizioni no la donna che xe un grembano piegà in due

 

Vasto assortimento de vestiti de carneval, vendo. Vestito de zingano con finte pignate rote de giustar. Vestito de becher con traverson e cortelaz. Vestito de marangon con sega circolare. Vestito de caligher con gamba zota. Vestito de politico con portafogli rubadi in scarsela.

 

Scarpe de baba leopardate, con punta e taco alto, eleganti ma sportive, tipo stivaleto alto fin meza coscia abinabile con ghepier rossa, vendo causa cessazione attività. Ugo

 

Borsel ani '70 color maron, con cerniera lampo scusida in zima, apena apena sbiadido de color e poco poco consumado sui cantoni, ideale per andar in giro con dentro i documenti e le ciavi de l'auto, el tacuin e la tessera sanitaria, facile de portar messo soto scaio. Ricky

 

Naso rosso tondo de paiazo con fis'ceto incorporado abinabile a finto fior che schiza acqua de meter sul taschin de la camisa, ideale per serate in alegria tra amici sopratuto se se ga fioi. Se interessadi go anche el balon che messo sula carega co un se senta fa el rumor de la scoreza.

 

Valigia de carton model profugo istrian, color carton bagnà, con dopio fondo sconto per portar cafè oltre confin, completa de tasca interna sul covercio per meter calze, calzini e mudande, resistente ai colpi, un poco macada, vendo. Disponibile spago per chiusura.

 


| torna su | home Mercadindio |




"El MercaDindio" è un copyright di TuttoTrieste.net di Massimo Barbo

Il disegno del MercaDindio è stato realizzato da Alessandro Bonin per TuttoTrieste.net

Tutti i diritti riservati - All rights reserved