Triestini sparpagliai pe'l mondo
parenti partidi e mai più visti
eco el
raconto de l'amico Dave che trova i parenti dopo tantissimi anni.
Tante volte la vita xe più strana dela finzion. Condivido sta
storia con tuti quei che ghe interessa a legerla, go cambia i nomi dele
persone involte per protegerghe la privacy e el nome de certi posti ma
tuto el resto xe storia vera.
Nel lontan 1954 mio zio paterno Ricardo e su molie Maria xe partidi da
Trieste sula nave Castel Verde per emigrar a Adelaide, Australia e noi
a Trieste non gavemo mai piu senti de lori. Nel 1965 co anche mi e mia
mama semo venudi in Australia, me iero spesso ripromeso che un de sti
giorni saria anda a Adelaide a zercar de rintraciar sti parenti, ma
iera un de quei progeti che se rimanda sempre ala prosima setimana. E
cusi xe pasai 39 ani.
In febraio 2004 go ciapa una letera da un, organizazion governativa de
Adelaide (sud Australia) che domandava se conosevimo sto Ricardo e se
savevimo dove che el iera al momento. Telefono ala persona de contato
nominada nela letera e ghe spiego quel poco che savevo. La baba me
informa che ghe xe una persona involta con la ricerca de sto mio zio e
che se ghe laso el mio numero de telefono sta persona se podesi meter
in contato con mi. Cusi ghe go lasa el mio numero de lavor e non ghe go
piu pensa.
El giorno dopo un’ altra baba me telefona sul lavor e, tira para e
mola, vien fora che la xe mia cugina Silvia, dada via in adozion el
giorno dela sua nasita. La storia iera cusi.
Nel 54 Ricardo e Maria riva a Adelaide. Lui trova un bon lavor e tuto
va benon.
Nel 56 nasi Marisa e le robe continua andar avanti ma non piu tanto ben
fra Ricardo a Maria.
Nel 59, co Maria sta spetando Silvia, Ricardo e Maria se separara.
In quei giorni el governo austalian non dava nesun aiuto finanziario a
mamme singole e Maria, gavendo za una fia (Marisa) decidi de adotar
Silvia a ‘porte chiuse’ cioe con l’intesa de non zercar dove che la xe
finida.
Silvia xe stada adotada da una copia de polachi e, oltre al’inglese, la
parla e scrivi el polaco e diverse altre lingue slave.
La lege Australiana proibiva a gente adotada de zercar i genitori
naturali ma nei ultimi ani la lege ga cambia un poco. Adeso la gente
adotada pol rivolgerse a altre organizazioni, tipo quela che se gaveva
meso in contato con mi, e ste organizazioni pol diriger le ricerche. E
cusi son venu fora mi.
Nei ultimi 2 ani se gavemo visto speso e tenudi in contato ancora piu
speso. Ela abita a Adelaide e mi a Canberra. Xe circa 1500 km de
distanza fra de noi ma se volemo ben e semo contenti co se femo ste
visite.
Silvia ga anche savu, sempre tramite sta organisazion governativa, el
nome de sua mama, de su sorela e de su papa che iera morto nel 82. Pero
non se saveva gnente de su mama e su sorela e, naturalmente, Silvia
voleva saver dove che le xe finide. Le ricerche ormai durava da piu de
10 ani e, aparte de averme trova a mi, sempre senza risultati o finindo
in un vicolo cieco.
Ma o semo stai fortunai con una serie de coincidenze quasi incredibili.
Un 3 ani fa, ancora prima de conoser Silvia, un triestin de Adelaide,
Furio, me ga telefona. La conversazion non gaveva gnente de far co sta
storia e, per dir la verita, gnianche me ricordo de coss che gavevimo
parla. Co la telefonada ga fini mi me iero za dimentica de sto mato.
Nel fratempo anche mi gavevo comincia le ricerche de Maria e Marisa a
Canberra e, atraverso el dipartimento del archivio nationale Australian
go trova una copia dele pratiche che Ricardo e Maria gaveva fato nel 54
per venire in Australia con tanto de foto e particolari. I particolari
dichiarava anche che Marisa iera nata morta nel 54.
Naturalmente go pasa una copia de ste pratiche a Silvia che la pol
almeno veder come che iera fati i sui genitori nel 54.
Un ano dopo, dopo de aver conosu Silvia, sto Furio me telefona de novo
e, parlando de questo e de sto altro vien fora che el iera sta sai
amico con mio zio Ricardo. Infati el gaveva salva adiritura una copia
de un’articolo publica da uno dei giornai de Adelaide sul funeral de
Ricardo. Grazie ala tecnica del giorno de ogi el me manda una copia
eletronica via email e mi, a mia volta, ghe mando una copia a Silvia.
Naturalmente, la prosima volta che son anda a Adelaide, semo andai tuti
a casa de sto Furio dove lui e un’altra persona che iera sta amico con
mio zio ne ga conta la version de come che iera andade le robe come che
i le saveva lori. Furio ne ga dito de aver visto Maria e Marisa per
l’ultima volta a Adelaide nel 1967 e che el pensava che la se gaveva
mosso via de la.
Ma, alora se domandemo, sta Marisa xe nata morta? O ghe xe una seconda
Marisa? Semo sicuri che parlemo dela stesa gente? Le robe stava
diventando un poco misiade.
Gavemo lasa la casa de Furio savendo un poco de piu de quel che
savevimo prima ma anche con domande che non gaveva risposta. Le
ricerche doveva continuar.
L’articolo sul giornal de Adelaide che Furio me gaveva manda includeva
el nome del’ agenzia che gaveva condoto el funeral e un per de nomi de
persone che gaveva pertecipa/organiza el funeral. In giugno de sto ano
Silvia telefona a st’ agenzia per veder se i gaveva ancora el record
del funeral e le persone coinvolte. Si, i ga el record e in piu anche i
nomi e numeri de telefono dele persone coinvolte. Vien fora che una de
ste persone xe un avocato che iera un amico de infanzia de Silvia.
Naturalmente la se precipita al telefono e la ghe telefona. E de novo
si, el ga el nome e numero de telefono de Maria ma l’averti che el
gaveva el numero za da sai tempo. Forsi Maria non stava piu la. Pero,
el continua, volendo saria facile de rintraciarla perche la xe membra
del committato de un club de triestini in Sidney. E el ghe da el numero
de telefono del club.
Eureka!!! Finalmente se stemo avicinando.
Ma a Silvia ghe trema un poco el cul de telefonar cusi la me pasa a mi
le informazioni e la me domanda de telefonarghe.
Beh, adeso gavevo un peso sule mie spale. Cosa ghe digo a sta baba. Mi
gavevo un vago ricordo de mio zio, gavevo 5 ani co i xe venudi in
Australia ma de ela proprio non me ricordavo gnente. E po’ cosa posso
dirghe “Cio, ara che conoso tu fia, quela che te ga dado via co la xe
nata?” Qua ghe voleva un poco de tato e mi son notorio per non
averghene tanto. In piu Silvia, co la me gaveva telefona per darme ste
informazioni, la ga fini la telefonada dixendo “Non sta rovinar tuto
sa!!!”. Ben, me tremava un poco el cul anche a mi dei.
Cusi go telefona e, al week end de 31 giugno 2006 le ricerche xe finide
con l’incontro de Silvia, su mama Maria, su sorela Marisa e mi. E come
bonus gavemo anche una sorelastra, nata dal’union de Maria con el
secondo mari anche lui deceso. Anche se sta ultima non xe mia parente
la xe ben acettada losteso.
Xe sta gratificante finalmente conoser st’altra mia cugina e la sua
familia (un fio e una fia sposada con una picia – 3 generazioni de
cugini). Adeso in luglio se incontreremo tuti a casa mia a pasar una
setimana per conoserse meio. La mia familia dala parte paterna se sta
ingrandindo sempre de piu. Peca che xe tanti cugini/zii a Trieste che
non go mai conossù.
Dave
Cobau
luglio 2006
on linw 02/2007
|