IN SACHETA

De muleto, iero tremendo,

andavo sempre a zogar,

in riva al mar

me piaseva sai le barche,

stavo la ore e le guardavo

e sognando a oci verti

me vedevo al timon

con le vele al vento

la mia fantasia galopante

me portava sempre

come un'onda

sai distante:

la Malesia, el mar della Sonda,

Sandokan

(quel fiol de un can),

oro, diamanti sepelidi

in piccoli isoloti qua e la

dove nissun saveva

la vera località

E, sentado sul molo, sognando,

guardavo el mar,

convinto, un giorno de trovar

galegiando

in acqua la in Sacheta

tra le scovazze

(l'acqua no iera mai propio tanto neta),

una botiglia ben tapada

butada in mar da un pirata

con dentro una mapa

de un'isola incantada

che me mostrava dove che iera sepelido

un bel "forziere"

pien de oro, de argento

e colane de piere vere.

E me vedevo saltar in una barca

(una barca che gavaria rubà)

nel cuor de la note

e senza dir gnente a mio papà

issavo la vela e partivo de Trieste

a mezanote.

e navigando, fazendo notolada,

afrontando teribili tempeste

per trovar quell'isola incantada

secondo le istruzioni della mappa

che diseva:

…"co te sbarchi sula spiaggia

tira drito e dopo un poco

te vedarà davanti a ti

un albero de cocco

e la vizin,

in una picola radura,

dove xe el covo de una tigre,

(te savessi che paura)

soto un albero de pomele

scavando troverai

un forziere

con tante robe bele"...

Ma i sogni dura poco, verzo i oci

e sento un mato che me ziga:

"ciò picio

movite de la

che devo ormizar

el mio caicio" 

Pino Peschechera

Melbourne (Australia) 1997