|
NASA
Iera una bela matina de primavera, co' semo partidi dela nostra casa
oramai senza mobili perché i iera per strada - per scominziar l'aventura
più bela dela mia vita. Semo partidi col vecio ma afidabile bimotor
DC-3, dove che i mii fioi i xe entrai con ansietà. Per distrarli
ghe go spiegà le procedure de partenza. El pilota el gavaria avià
prima un motor a tuta forza per pò ralentarlo e scominziar la stessa
operazion col secondo. El gavaria pò portà l'aroplan nel
mezo dela pista, sburtà i motori al massimo e con un rugno assordante
el DC-3 el gavaria ciapà la rincorsa, guadagnà quota e virà
a destra per andar al nord, el terzo punto cardinal dela mia vita.
Durante sta fase - ghe gavevo spiegà ai fioi - i doveva ingiutir
la saliva per balanzar la pression nele rece. Questo li gavaria distrati
un pocheto fin che no i se fussi ambientai in un aroplan che vegniva da
un periodo aviatorio oramai passà. El DC-3 iera el pionier del trasporto
aereo nato nel istesso ano co' go verto i mii oci al mondo. Questo me ga
fato pensar che anca mi iero con pionieri che proponeva de andar, adiritura,
sula luna.
Questo pensier me fazeva paura: cossa sarìa sucesso se no gavessi
vu la grinta de afrontar i problemi che me spetava? Go pensà pò
al pilota che ne portava al decolo e go concluso che del momento che el
velivolo el rivava ala velocità de volo, no ghe iera più
tempo, o speranza, de frenar. De quel punto in avanti el podeva solo continuar
a corer per alzarse. Dovevo far come lu o come un'anitra che velegia serena
su un specio de acqua lissa come l'oio, ma co le zate, soto acqua, che
le pedala de mate.
L'aroplan intanto el se iera alzà e sbandandose el ghe fazeva veder
ai fioi l'incantevole panorama dela zità dove che i iera nati. I
rami dei fiumi Swan (che in inglese significa "cigno") e Canning
i se univa - come nela descrizion manzoniana - a Como, una località
de Perth che ghe devi il suo nome ala località de i Promessi Sposi.
El lago formà dei dò fiumi iera come uno specio incrinà
solo dela sia de un vaporeto che lo traversava.
Il volo xe aterà prima a Geraldton, per far sbarcar dei passegeri,
poi a Shark Bay (Golfo dei Pessicani), dove a spetarlo ghe iera una sola
persona, el postier, e dove che un ultimo compagno de viagio el ga smontà
De quel momento in avanti noi ierimo i soli a bordo, ma numerosi bastanza
per impinir mezo aeroplan. Un'ora dopo ierimo in discesa a Carnarvon, un
paese dove, una volta, i squartava balene copade a zentinera sula costa
australiana del'Oceano Indian.
 |
Lidia coi fioi pena rivadi a Carnarvon |
Co' semo rivai noi, però, l'industria baleniera la se iera trasformada
in quela bananiera: Le banane iera el prodoto più importante del
logo. Una industria fiorente come peraltro xe diventada l'economia del
paese per via dela stazion dela NASA che gavaria più che radopià
la popolazion local. La magioranza del personal vegniva de Sydney, e molti
del'America, e questi stava nel'albergo "Port", propietà
del sindaco, Wilson Tuckey, del qual parlarò ancora, e dove che
gavemo dormì fin che xe riva la nostra mobilia.
La nostra casa a Carnarvon la iera vizin del zimiterio e, vista la mancanza
de atività ricreative, questo atirava i fioi che andava a vardar
i soteramenti che se podeva far solo durante la bassa marea per evitar
che le bare galegiassi col mar alto.
La prima roba che go dovù far xe stada de distrarli, cussì
go deciso de farghe un "sandalin", la canoa che noi muli costruivimo
a Zara. Con la memoria come piano de costruzion, go scominzià con
dò longhe tole che go inciodà ale zime e po slargà
nel mezo. Questo ghe ga dà subito forma ala barcheta e co' ghe go
messo un fondo e una caregheta i gaveva un mezo natante pronto per navigar
nele mangrovie, che là ghe ne iera tante. I fioi 'ndava a pescar
e nuar, che iera più divertente che veder sepelir i morti anca se
nel mar ghe iera pessecani e i velenosissimi serpenti de mar, che però,
i ataca solo se i xe disturbai.
 |
Tonio e Oscar, i dò più veci, nel sandalin che mi ghe
go fato. |
Gavevo assai tempo a mia disposizion perché la stazion de rilevamento
no la iera ancora equipagiada coi computer. I radar però i funzionava
zà, ma senza computer no se podeva trasmeter dati a Goddard, a quel
tempo zentro operazioni dela NASA.
Me ga tocà a mi de trovar un modo de risolver sto problema. Infati
con tochi de ricambio go rivà a meter insieme un marchinzegno che
ga funzionà ben. I dati orbitali - assai importanti nela fase inizial
dei lavori lunari - dela mission Gemini, GT-1 (8 aprile 1968) e el primo
"Saturn", SA-5, i xe stai rilevadi e trasmessi senza nissun problema.
Combinazion ga volù che el SA-5 partissi el 28 otobre, quatordicesimo
aniversario del mio arivo in Australia e quel dela marcia su Roma, forsi
per dirme che iera ora che scominziassi la mia marcia verso la luna e le
stele.
Entrar nel cosmo no xe però fazile. Tuto devi funzionar ben, perché
el più picolo intopo basta a fermare la partenza. E per complicar
ste robe, co se manda astronauti nel cosmo, no basta solo che le astronavi
sia in perfeta forma, ma xe necessario che tuta la rede dele stazioni de
rilevamento concatenade cole missioni le sia in condizioni perfete.
Questo iera vero cola NASA, ma no coi pionieri inglesi che, ofesi che i
sui cugini americani gavessi tanto sucesso coi lavori spaziali, anche se
meno dei russi, i voleva zontarse ala fila dela conquista del cosmo.
Un zorno xe rivà un camion che rimorciava una roulotte. Soto una
tela zerada ghe iera un carigo che pareva longhi pai dela luce. Vardando
ben go trovà inveze che i iera missili a carburante solido. Tredise
in tuto. El numero istesso non portava fortuna e i eventi gavarìa
confermà che anca nela sienza el tredise porta pegola. Mentre a
Cape Canaveral i americani i usava "bunker" in zimento armà
de tre metri e più, pieni de computer e schermi televisivi, i inglesi
i gaveva deciso de usar solo una roulotte dove che el sistema "eletronico"
iera solo un acumulator e un grosso boton rosso contrassegnà "START"
- e basta.
I inglesi i ama far veder che i xe sparagnini e inzegnosi. Tipico esempio
iera el dotor Penny, che durante i esperimenti atomici a Maralinga (Australia
Zentral) per misurar la pression del'aria el gaveva usà tubeti de
dentifricio verti per permetere ala pasta odontoiatrica de sortir. Secondo
lu, la quantità de dentifricio espulso gavaria indicà el
livel dela pression. El ga perso tuti i tubeti e imparà gnente,
meno che el proverbio inglese, cioè che sparagnar i penny (zentesimi)
pol costar sterline, e xe vero. El deto el xe stà subito confermà
a Carnarvon: sie missili xe tuti partii per destinazioni ignote.
El setimo inveze el xe entrà nela traietoria giusta, ma el se ga
stuà e 'l xe tornà zo, schivando de poco un manoval stradal
vizin de Carnarvon. La località dei lanci la xe stada subito trasferia
lontan dal zentro abità, vizin del mar in un logo dove mi andavo
a pescar dentai. De là i ga tentà de lanciar el numero oto.
No xe sucesso gnente. Co i lo ga impizà, el ga fato un pocheto de
fumo, e rumoreti de protesta come volessi dir: "...non vo' che tu
paventi:/ lasciali digrignar pur a lor senno, / ch'e' fanno ciò
per li lessi dolenti..." Gavendo pò - gaverìa dito Dante
- "del cul fatto trombetta", el se iera serà in un silenzio
de tomba.
Ma co' el controlor del lancio el ghe xe 'ndà vizin, de un momento
l'altro el razo se ga impizà de novo e co' el iera a zirca venti
metri de alteza el xe s'ciopà come una bomba atomica. Dopo el necessario
cambio de mudande, l'inglese el ga spiegà che, malgrado i contratempi
che spesso sucedi, el gaveva fiducia assoluta che i prossimi lanci saria
stai perfeti.
Inveze no: la famosa fortuna britanica no la voleva iutar. Quei pai col
cul scaldà de gas surriscaldai a temperature infernali, i gaveva
una volontà tuta sua. El numero nove, el diese, el undise e pò
el dodise no i ga funzionà. I resti de quel che iera una dozena
de potenti missili inglesi, i xe tornai sconfiti e senza speranza per quei
loghi che i gaveva asceso con orgoliosa sicureza, gavaria dito el General
Diaz.
El tredise, inveze, el xe partì come un vero razo rivando al suo
obietivo, la stratosfera, dove che el ga sgionfà un balon che portava
i strumenti che gavaria mandà informazioni ai sienziati inglesi.
Ma solo se queste che un de lori doveva registrar le vegniva registrade.
Purtropo el tecnico, che gaveva ciolto el controlo del registrator perché
no'l se fidava de noi, el se iera dismentigà de cavar la sicureza
che protegi i nastri magnetici contro le registazioni acidentali.
Quel che l'unico missile gaveva rivà a trovar nel svodo spazial,
sarà per sempre un mistero. Forse Sherlock Holmes, con el suo famoso,
"semplicissimo dotor Watson!", gavaria dedoto che el marzian
visto dela navicela inglese iera alto decimetri sie punto trentadue, e
gaveva l'onza del'aluce sinistro incarnda.
Questo dimostra la diferenza fra i inglesi e americani riguardo la fiducia
nel prossimo de raza diversa de lori. I americani i xe solo interessadi
al'abilità del individuo. Iera apunto i americani a darme un'apertura
nel campo dei computer e dei lavori spaziali. Se el mio futuro gavessi
dovù dipender dai inglesi, mi saria ancora nele fogne de Melbourne
a spalar la caca.
|
|
PROBLEMI
Ghe ga volù ancora tanto tempo - dopo de questo esperimento
dei isolani nord-europei che ghe piase ciamarse "secondi a nissun"
- prima che i computer rivassi. Tanto che spetavimo ne tegnivimo ocupai
in diverse atività che no gaveva gnente cossa far col spazio. Nel
mio caso i me gaveva dà l'incarico de ciceron e quel de abelir el
paesagio. Inveze del tipico giardin inglese - con prà e rose - che
nel'ambiente tropical staria come cavoli a marenda, gavevo deciso de crear
una fontana "spazial".
Questa consisteva de un "piato" de zimento, simile a quel de
un radar nel qual tre retrogeti de una capsula Apollo in miniatura spruzava
acqua a alta pression. Questo emulava - per scaramanzia - el rientro dela
navicela Gemini sostegnuda da un tubo a forma de una orbita oval. L'idea
la xe stada subito aprovada e messa in pratica. Me mancava però
le piere aluvionali per completar el giardineto tropical che gavevo preparà
intorno dela fontana.
 |
Ecovela qua, quela famosa fontana. Stavolta la foto
la se merita un click per vèderla in grando. |
L'unico posto dove che le podevo ingrumar iera una fatoria a 100 chilometri
nord de Carnarvon. Go domandà dei volontari e squasi tuta la stazion
NASA voleva vegnir con mi. Cussì go selto solo dodise mati.
De bonora un sabato, la carovana de sie forastrada se ga messo in moto
cariga de ogni ben de Dio, per sfamar e calmarghe la sede ai esploratori,
che gaveva anca carigà, senza che mi savessi e contro i mii ordini,
litri e litri de bira, whisky e vin. Va ben che ghe gavevo promesso al
fator bira e whisky in cambio del disturbo, ma le quantità carigade
dai mii omini iera molte volte più grandi de quel che gavevo promesso.
Co' la carovana la xe rivada a destinazion la pareva una orda de visigoti
imbriaghi disfai pronti a sachegiar Roma.
Gavemo subito parchegià i forastrada in un circolo tipo "far
west", coi fusti de benzina nel mezo, pronti a magnar perché
ierimo afamai come ludri. Se ga zercà de impizar un fogo pel barbecue,
ma sicome che gaveva pena piovù iera difizile scominziarlo. Ivan,
il sedicente "cogo", che el iera cussì imbriago de no
poder star in pìe, el ga ciapà un bicer de benzina, e pontificando
a alta vose che i "boy-scout" i ghe gaveva insegnà cussì,
el lo ga butà sul fogo che ardeva mal. Questo se ga ativà
de colpo e corendo ala riversa fin al bicer, pò ala man ed infin
al corpo sul qual Ivan gaveva spanto molta benzina, lo ga infiamà.
Ivan el xe diventà de colpo una torcia umana che coreva come mata
in tute le direzioni, fino a rivar ai fusti de benzina che per fortuna
no i ga ciapà fogo, ma contro i quai el ga sbatù ribaltandose.
Questo ne ga dà tempo de ciaparlo, butarlo in tera e stuar le fiame.
Ciamada via radio l'ambulanza aerea, gavemo disposto le auto ai margini
dela strada che l'aroplan gavaria doprà come pista de ateragio,
per iluminarla coi fari. L'ambulanza aerea la xe aterada poco dopo e la
ga carigà Ivan a bordo per ripartir subito dopo per l'ospedal de
Carnarvon.
El giorno dopo i forastrada i xe stai caricadi de piere levigade del mar,
e ala fine de questa fadiga semo andai in una grota, via dela piova, per
bever altra bira e riposarne. Me son acorto alora che ierimo in tredise!
In quel momento un aborigeno - impiegà dal fator - el me ga dito
che in quela grota se iera rifugiadi dei naufraghi, trovadi poi del nono
de Wilson Tuckey, el sindaco de Carnarvon. Venti ani dopo gavario discoverto
che i naufraghi iera dalmati e istriani, parte del'equipagio de un "bark"
fiuman, che el gaveva el nome de un mulo triestin, "Stefano".
Nel 1875 i mati dele Maldobrie iera za rivadi qua!
Al ritorno de questa indimenticabile aventura, el ritmo de installazion
dei computer el iera diventà frenetico. Se instalava machina dopo
machina, dela matina ala sera. Me ricordo un caso co' le robe le ne xe
andà mal. Ierimo stai per ore e ore a sburtar e issar un grande
casson de un computer che dovevimo trovar modo de far passar tra altre
machine. Rivai dove che el doveva star, e dopo fadighe enormi, co' lo gavemo
verto el iera ala riversa, i panei de controlo i iera contro el muro!
Se lavorava note e zorno come mati e co' xe vignù el momento de
colaudar el sistema penà instalà, tuto funzionava ala perfezion:
magia americana! Tuto, fora che un schermo de un computer, che doveva funzionar
per una mission pena anunziada. Non ghe iera un ricambio pel tubo a ragi
catodici - simile a un schermo TV - nel qual el filamento se gaveva roto
nel trasporto. Sto filamento, simile a quel de una lampadina eletrica,
el se iera molà de un dei dò eletrodi de metalo ai quai el
iera saldà. Come potevo risaldarlo visto che el iera fisicamente
iragiungibile nel svodo del tubo televisivo?
Iero pronto a arenderme, co' me son ricordà de Zara e del fusibile
che gavevo inventà per robar la forza eletrica. El filamento del
tubo el iera solo a pochi milimetri dal'eletrodo, e se a Zara gavevo rivà
a tacar dò piastrine de metalo con solo 120 volt, iero sicuro che
gavarìa rivà a far la stessa roba col filamento del schermo
doprando el potenzial eletrostatico de 20mila e più volt. Questo
gavaria podù far scatar una falisca calda bastanza de saldare el
filamento.
Co' go tacà l'alta tension el filamento el xe saltà per abrazar,
in un violento e caldissimo amplesso, l'elettrodo creando una saldadura
permanente. Questo permeteva che el contegio ala riversa el continuassi,
ma dopo el lancio i me ga zigà per gaver doprà una cura che
no iera autorizada. Sono zerto che nona Marietta la ghe gavaria zigà
indrio: "Per el muss no xe la sela!"
|
|
MISSIONI LUNARI
La pletora de romanzi del cosmo scominziada de Giulio Verne e continuada
nei giornalini a fumeti de Flash Gordon che lezevo co iero mulo, rifleti
ssai poco la realtà che go vissù come un che ga lavorà
nei voli spaziali.
Pensando a ste storie con la sageza del poi e lezendo le versioni moderne,
no posso fare de meno de paragonarle al'idea che un aborigeno del'Australia
zentral - che non gavessi mai visto una bici - el se farìa de questa.
Forsi el la vedaria nela forma de un emù, el struzo australian,
con dò riode e el colo storto in un manubrio. Istesso se podaria
dir de un sotomarin che el nobile selvagio del deserto vedarìa,
cossa so mi, nela forma de un "platypus", el monotremo
che respira aria ma vivi soto acqua nei rarissimi fiumi australiani. Questa
strana cratura la ga el beco e le zate de un'anitra, la coda de un castoro,
la peliza de una lontra e i speroni de un galo. Inveze de siluri, l'aborigeno
forse lo gavaria armà de una lanza per inietare velen, che sto animal
usa come difesa e che xe più potente de quel de una vipera.
Il platypus, visto che el fa anca i ovi come una galina - traverso
un buseto tutofar, che ghe servi per i "bisogni" e per la riproduzion
- el iera ciolto, per scominziar, per un viz, fato da qualchedun che gaveva
cusì insieme diversi animai e - secondo tanti - no el esisteva veramente.
Ma sta bestia la xe una realtà zoologica, solo cussì differente
dei animai conossudi fin alora de no poderla gnanca imaginar. Per la stessa
ragion, chi che no ga partecipà ai lavori spaziali no'l pol gaver
idea dele realtà tecniche in sto campo.
Xe vero sì che el "laser" el pol esser el "ragio
dela morte" del qual se parlava tanto de muli, ma xe meno vero che
le aventure del Dottor Who - personagio assurdo creà dei stessi
inglesi che ga inventà i altretanto assurdi Sherlock Holmes e James
Bond - possi gaver un equivalente nel cosmo. Per questa ragion i giornalisti
del tempo, zercando descrizioni iperboliche per presentar in maniera spetacolar
i lavori dei tecnici come mi, i vegniva fora con dele storie sbalade.
Vegnivimo descriti come dei superomini dedicadi ale nostre atività
con tuta la passion dei santi. La realtà iera che ognidun gaveva
un sistema del qual el iera responsabile, e che ghe interessava poco de
coss' che sucedeva fora de quel. Insoma gavevimo el nostro "bidon
de benzina" de farghe la guardia e tuto el resto no ne interessava.
No me ricordo de gaver notà, nela NASA, emozioni equivalenti a "cuori
e motori", che dominava la storia dei Sorci Verdi descrita da Italo
Balbo, co' i suoi idrovolanti ga traversà l'Atlantico per glorificar
el Fassismo, fora che in zerti momenti veramente speziali, come co rivava
al'orizonte un veicolo spazial.
Le sale de controlo iera sempre in mezo scuro roto solo dei lumi dei schermi
televisivi e dele spie luminose dei panei de comando. L'unico rumor iera
quel del'aria condizionada e le rare conversazioni curte e seche fra el
controlor de volo - el Cap-Com, cioè el Capo Comunicazioni - e el
suo colega de Huston.
- "Huston" - anunziava el Cap-Com de CRO (sigla che identificava
la nostra stazion de Carnarvon) - "Semo OK per el lancio!"
- "Ah! Roger, Roger CRO Cap-Com. - Poi un'altra vose scandiva
el conto ala riversa:
- "Faif... Foar... Tarii... Tuah... Uanner... Lift off! Lancio!"
Dopo questo contegio nel qual i numeri in inglese vegniva distorti per
renderli più comprensibili, regnava de novo el silenzio. Ma co'
el modulo spazial "nasseva" al'orizonte, la sala operazioni s'ciopava
in una cacofonia de rumori de tuti i tipi precedui da un breve: - "Acquisition!..."
I rumori dele stampanti dei computer e dele telescriventi i dava - con
la sua cadenza regolar - un impeto tuto spezial ale atività - come
el rulo marzial dei tamburi nele batalie napoleoniche.
- "Apollo 10... Apollo 10... Questo è CRO... Mi sentì?"
Domandava el controlor.
- "CRO, Apollo 10!... Ve sento, forte e ciaro... Spetemo i vostri
dati de comando."
- "Apollo 10, CRO Cap-COM, i ariva: Uanner...Tuah...Tarii: OK!"
- "Ah! Roger, roger..., ricevudi OK!..."
Poi, nel istesso modo come gaveva scominzià, el caos acustico terminava
con l'anunzio dei altoparlanti:
- "Contato perso!" Con la capsula "tramontada"
el silenzio tornava supremo.
Ghe iera altre ocasioni che ne fazeva corer l'adrenalina. Come per esempio,
co' le capsule spaziali dopiava la luna per sconderse nela sua ombra e
tute le comunicazioni cessava. Se el retro-geto no'l gavessi funzionà,
adio lori! El modulo lunare el gavaria continuà in una traietoria
direta verso el sol per vaporizarse con tuto l'equipagio.
Questo sburtava el CapCom a anticipar la domanda:
- "Apollo 10... Apollo 10, CRO CapCom, me sentì?
- "Shh..." i rumori di fondo dela radio sintonizada sul'emitente
sconta drio la luna, iera la sola risposta. Tuti fazeva veder de no bazilar,
ma i trategniva el fià perché no i podeva inalar l'aria gravida
de tension.
- "Apollo 10... Apollo 10, CRO CapCom, me sentì?"
Ripeteva el controlor.
- "Shh..." - Ma poi: "...ento... shh... orte e...shh...iaro,
CapCom. Semo in orbita lunar e OK!" - E tuti tornava a respirar.
La stessa tension se ripeteva ai rientri nel'atmosfera che i se sarìa
conclusi col'amaragio nel oceano Pacifico. Durante sta fase l'atrito del'aria
creava el plasma - gas ionizà - che agiva de schermo e iera impossibile
doprar la radio. Ma co' rivava la segnalazion: "splash-down"
(amaragio) distudavimo tuto per sortir fora a "riveder le stelle".
Le missioni finiva nele ore antelucane, per cui ne sgranchivimo i arti
nel'oscurità iluminada solo dale stele che sbusava la cupola del
istesso ziel austral che gavevo visto per la prima volta a Bonegilla. A
Carnavon vardavimo de una finestra ancora più granda el zentro dela
nostra galassia piena de astri in un numero veramente astronomico.
Ne spetava sempre un camion carigo di bariloti de bira e molte cassete
de gamberi coti in acqua de mar. Quel iera un ristorante, no de zinque,
ma de miliardi de stele, dove che se magnava e se beveva a sazietà
spetando l'alba de un novo ziorno che saria stà ricordà dala
storia, scrita anca col contributo de un mulo triestin.
|
|
ASTRONAUTI
I tipi più interessanti dela NASA iera, naturalmente, i astronauti,
tuti piloti dela Forza Aerea Americana. Anca nel caso del Cap-Com, ma nissun,
grazie a Dio, ghe somiliava al dotor Who. Ghe ne go incontrati tanti e
conosso le sue deboleze e le sue paure. Che ghe vol capir, considerando
cossa voleva dir andar in un de quei veicoli spaziali.
Durante le missioni Mercury, Gemini e Apollo, no ghe iera ancora i Shuttles,
in efeti simili ai Boeing passegeri, ma ancora più spaziosi e fornidi
de doce e leti. Nei ani 60 i piloti vegniva ficai in busi claustrofobici,
insacai come salami nei scafandri spaziali e ligadi a sostegni che serviva
de vasi de note, careghe e suporti per i sensori fisiologici che includeva
anca un termometro ficà nel dedrìo.
Xe sta apunto in ste condizioni che fermava ogni movimento, che tre astronauti
i ga trovà una morte teribile in un incendio a bordo de una capsula
Apollo durante una simulazion de lancio nel 1967 a Cape Canaveral, in Florida.
Tra i piloti spaziali me ricordo molto ben de Dave Scott, Al Sheppard,
Pete Conrad, e Wally Shirra, vegnui a Carnarvon per svilupar le procedure
operazionali che sarìa stade usade in tute le stazioni de rilevamento.
Queste includeva la creazion de vocalizazioni de zerte parole, come per
esempio "surgeon" (chirurgo) che diventava "Sir John"
e la pronunzia dei numeri - zà ilustrada nel caso del contegio ala
riversa - per capirli meo nele comunicazioni radio.
Dave Scott me piaseva più de tuti perché el iera un col qual
se podeva parlar fazilmente. El ghe piaseva anche a Lidia perché
el iera un bravo balerin, fato scoverto durante una festa a Carnarvon fata
per onorar i ospiti spaziali. Pareva che el gavessi un futuro sicuro: iero
zerto che - per via dela sua personalità e inteligenza - el sarìa
diventà diretor general dela NASA. Purtropo el xe finì malamente
per ver vendù francoboli portai con lu sula luna. Cussì i
lo ga licenzià e lu el se ga distudà come una stela cadente.
Pete Conrad gaveva paura dela luna. In una intervista ala television el
gaveva dito che questo iera perché no'l xe stà mai cussì
lontan de casa. No'l se fidava de noi, o del'eletronica per la qual el
gaveva poca abilità. Questo xe stà dimostrà durante
el suo primo volo lunar co' el ga puntà la telecamera contro el
sol brusandola, butando cussì el mondo intero nel scuro più
assoluto su quel che el fazeva sula luna.
Wally Schirra, che gaveva scominzià coi primi voli spaziali de le
missioni "Mercury", no'l iera una persona affabile. Lo ricorderò
solo per gaver lassà le impronte dele sue man in un bloco de zimento
- come fa i artisti del cine a Hollywood - che po' go doprà come
pavimentazion dela fontana spazial e grande atrazion per i turisti che
visitava la nostra stazion regolarmente.
 |
In questa foto son mi con Wally Schirra che lo fazo stampar le man
nel zimento per ricordo.
Ostia, ma iero giovine!
(click sula foto per vèderla in grando - 106 Kb) |
Infati nei periodi tra una mission e l'altra continuavo a farghe de
ciceron a sti turisti, un lavor che fazevo volentieri per schivar la noia.
Un zorno go incontrà un turista che go riconossù subito.
El iera el maestro de scola media che el se iera rifiutà de vegnir
a una festa a Subiaco, el quartier de Perth dove una volta mi e Lidia abitavimo.
Come go za contà, la festa la iera stada organizda dai nostri vizini
de casa australiani, John ed Anne, ma l'insegnante no'l ga volù
vegnir dopo che el ga savù che anca dò italiani, mi e Lidia,
i iera stai invitadi. Per lu tuti noi ierimo solo "teroni", e,
nela sua opinion, otusi e mone, ssai più bassi del suo livel inteletual.
El gavaria preferio, el gaveva dito, andar a farse una bira col'idiota
del rion, zertamente più inteligente de noi.
Me xe difizile spiegar l'efeto de sto incontro, che me gavaria dà
modo de ciorme una granda rivinzita. Usando le parole più difizili
che podevo pensar, ghe go spiegà per fil e per segno tute le minuzie
tecniche e sientifiche che mi vegniva inamente. Me fermavo solo per invitarlo
a farme domande che no el se azardava a pronunziar.
Co' vegnivo a curto de un argomento, ghe ne inventavo un novo. Sto turista-insegnante,
cola capacità de invelenar i zovani co'l suo razismo, el gaveva
zercà de evidenziar el contributo de Newton nela matematica del
cosmo, ma mi ghe go ricordà che el calcolo diferenzial el iera stà
inventà da Cartesio e no da Newton. Riguardo l'astronomia ghe go
parlà del'astronomo Ruggero Boscovich de Ragusa, sul lavor del qual
- De Orbita Planetae - gavevo pena leto, per puro caso, alcune note
nel'enciclopedia britanica solo la sera prima.
Tropo mona per capir el mio "bluff", no'l ga verto boca e ne
semo lassai con molta efusion de parte sua. Pochi zorni dopo el me ga mandà
perfin una cartolina ringraziandome per la mia "lucida" presentazion.
Forse podarìa perdonar le umiliazioni che go soferto per via dei
anglosassoni co' el mio inglese no'l poteva darme modo de difenderme, ma
no podarò mai dimenticarle. Desso che conosso l'inglese ben, no
perdo ocasion de ripargarle.
Madona, ma son cativo!
|
|
ED
Go un bel ricordo dei americani e tra questi quel de Ed Van Del,
uno dei più competenti controlori dei voli spaziali che gabio incontrà.
El saveva farse rispetar ma anca el rispetava e per mi el gaveva una granda
simpatia. El me parlava nel dialeto del Bronx, quartier popolar de New
York, dove parole come "ghiro" e "ghirlanda" le sonava
come "goilo" e "goilanda", che, mi go sempre trovà
piasevolissimo.
I popolani del Bronx i xe assai svelti de parlantina e anca quei con un'educazion
minima no i xe mai a curto de parole, particolarmente co' i vien intervistai
ala radio o ala television. I ga la parlantina pronta in circostanze che
richiedi spontaneità, come i nostri meridionai. La parlantina dei
australiani inveze xe praticamente inesistente, simile a quela dei ciclisti
sportivi milanesi: "Sono contento di essere arrivato primo!"
Ale volte Ed doprava la sua abilità verbal in maniera trivial, che
richiedeva la conossenza dele sue idiosincrasie per capirlo e no sentirse
ofesi. Farò un esempio per dar un'idea de questo.
Nei periodi prima dei lanci, Ed ciamava suì interfono tute le posizioni
operative e el ghe domandava a ognidun le condizioni dei sui sistemi. La
conversazion doveva esser laconica, se podeva doprar solo parole come "rosso"
per indicar che el sistema no el funzionava, o "verde" per indicar
che no ghe iera problemi.
Durante la mission Apollo 8, che gavarìa portà i astronauti
torno ala luna, a soli pochi minuti prima del lancio el mio computer se
ga roto in una maniera che gavessi fermà imediatamente el contegio
ala riversa.
Con tute le stazioni de rilevamento in ascolto e mi soto granda pression,
col ris'cio che senza el mio computer el lancio vignissi scancelà,
ghe go ordinà ai mii tecnici de usar la "dopieta", tecnica
con cui, come cole s'ciopetade, se sperava de far zentro sparando zentinera
de balini in un colpo. Cambiavimo desine de tochi per volta nela speranza
de ciapar quel che se iera roto, ma senza fortuna.
Ed, impaziente, el me ga ciamà sul interfono:
-"Computer tech, dame el tuo status"
-"Cap-com, Computer tech," go risposto, "semo
"rossi" per memoria".
-"Quala xe la tua predizion de operazion, computer tech?"
-"Go un problema", ghe digo, "con el scambio de
..."
-"No mi interesa un cazo, predizion prego!"
-"Roger", go risposto, pensando 'bruto fio de putana!',
"30 minuti."
Fortuna de Dio che gavemo rivà a trovar el malan! Ed el ne ga subito
ringrazià. El saveva che podevimo cavarnela, ma el pensava che la
scuria iera el metodo più bon per farlo più presto.
El gaveva, inveze, una grande intoleranza per le persone mone. Un giorno
el diretor dela stazion el xe entrà nela sala operazioni con una
scatola de legno che el ga averto per farghe veder a Ed cossa ghe iera
dentro: un grosso piton australian che no'l xe pericoloso e che se pol
anca domestigar. Ed, che odiava i retili de ogni tipo, el xe restà
senza parola, ma co el se ga ripreso el ga ciapà el diretor per
la cravata urlandoghe in viso: "Se no porti via subito sto stronzo
te lo infilo tuto intiero nel cul"
Ma con mi el iera assai afabile e ghe piaseva farme scherzi. Un zorno -
subito dopo una mission - el me ga ciamà al'interfono per domadarme
imitando el napoletan molto ben, "Ah, cumpà', te sei lavate
oggi? Pecché nun te fa u' bagno alla schiuma?" Al momento
no savevo de cossa che el parlava ma co' semo sortii per la tradizional
cerimonia antelucana dela bira e gamberi lessi, me son inacorto che la
fontana spazial no la ghe iera più. Ed gaveva butà una boza
de savon liquido nela vasca creando cussì una montagna de spiuma
de tre metri.
Ma me son vendicà. Ala sua partenza da Carnarvon ghe gavemo fato
una festa. Ghe go regalà una cadena cola bala de fero che se doprava
per ligar i galeoti. Gavemo insistio che la se provassi sul pie. Co gavemo
serà el lucheto, ghe gavemo dito che la ciave per verzerlo lo spetava
al areoporto de Perth, cussì Ed el xe ndà dormir ligà
ala bala e ghe ga tocà svolar, sempre ligà, per mile chilometri
fin a Perth...
Ed el xe tornà a Huston, dove el xe diventà famoso controlando
dal zentro operazioni le video camere lunari guadagnandose el nomignolo
de "Captain video". Lo go rivisto 'na volta in un notiziario
TV, e un altra ani dopo co son 'nda a Huston con un mio fio a visitar el
zentro NASA.
Xe la che Ed el me contà la storia de l'astronauta Neil Armstrong
co 'l xe rivà sula luna. Non solo el ga pronuncià la ormai
famosa frase "Un picolo passo per un omo, uno salto zigante per l'umanità",
ma prima de tornar nel modulo lunar, pararia che el gavessi esclamà:
"Bona fortuna Sior Gorsky."
Molti de noi ala NASA gavevimo pensà che iera un comento casual
riguardo un concorente sovietico. Ma no ghe iera nissun Gorsky nè
nei programi spaziali russi nè in quei americani. Per molti ani
ghe gavemo domandà a Armstrong cossa che el voleva dir con quel:
"Bona fortuna Sior Gorsky".
Armstrong no'l rispondeva mai ma el se fazeva un soriseto.
Nel 1995 a Tampa, Florida durante el periodo dele domande dopo un discorso,
un giornalista ghe ga domandà de novo riguardo el Sior Gorski.
Questo volta l'astronauta ga finalmente risposto. El Sior Gorsky iera morto,
cussì Neil Armstrong se sentiva libero de risponder ala domanda.
Quando che el iera picolo el zogava baseball con un amico nel giardin de
casa e un certo punto la bala xe andada a finir soto la finestra dela camera
de leto del vizin de casa, che iera el Sior Gorsky. Quando el muleto Armstrong
xe andà a ciorse la bala el ga inteso la Siora Gorsky che la ghe
zigava de mata al Sior Gorsky: "Sesso oral! Te vol el sesso oral?!
Te lo gaverà quando che el muleto dei nostri vizini de casa andarà
sula Luna" |
