I ani passa per tuti

Una baba la va per la prima volta in tun novo studio dentistico per farse controlar un dente che ghe diol. Intanto che la speta sentada in saleta, la se inacorzi del atestato in cornise che xe impicado sul muro e, legendo el nome e el cognome del dentista, ghe vien in mente che cussì se ciamava anche un figon che andava a scola con ela un trenta ani indrio, a le superiori, iera proprio un gran bel mulo quela volta, tanto che la se ricorda come che la ghe sbavava drio e la se lo insognava de note. “Mama mia, pensa se xe lui, chissà che bel toco de mato che el sarà!” la pensa intanto che la speta.

Co xe el suo turno l’assistente la ciama e la la fa acomodar su la poltrona e la baba, tuta emozionada, la speta l’arivo del dentista fantasticando come una muleta.

Ma eco che ghe se para davanti un vecio, stempiado coi caveluzi grizi e tante rughe sul viso.

“Niente” pensa la baba “no pol esser el mio amor segreto, questo xe tropo vecio, nol ga i ani miei e poi el xe bruto come la fame!”

Finida la visita la baba no resisti e la ghe domanda comunque al dentista se per caso el ga fato el Galilei.

“Si” ghe rispondi lui.

“Ma, la me permeti, in che ano le se ga diplomà dotor?” ghe domanda la baba.

“Nel 1990. Perchè la me domanda?” ghe fa el dentista.

Pensando sodisfata de no esserse mai dichiarada evitando cussì de conviver ogi con un bruto vecio, la ghe disi comunque: “Ah, alora lei la iera in tela mia classe!”

“Ma dai? E de cossa la iera professoressa?” ghe domanda el dotor….