Al Sindaco

consigli pe’l suo mandato

Alora Sior Sindaco, Intanto complimenti per la sua vitoria, con l’ocasion ghe volessi dar un qualche sugerimento per agevolarla nei sui compiti futuri, in modo de contentar tuti e no far rabiar nissun.

Meterghe multe a tuti per el divieto de sosta meno che soto casa de lori, che la i pol che se no andove i parchegia che no xe posto.

A Barcola la devi meter più scalete per andar in acqua, no che un ghe tochi far diese o magari quindise metri de ndove che el gà el sugamàn per poder far un toc’.

Far piste ciclabili ma no sui marciapie che la intriga, gnanca sula strada che za le xe strete, no dove che xe la riva in su che cossa la vol che morimo a pedalar in salita, insoma la le fazi, cossa devo dirghe mi dove, no son miga sindaco mi.

Le tasse, la devi cavar le tasse che la gente no ga soldi per pagar, xe miseria, avanti de sto passo no i poderà gnanca portar ogni giorno i fioi davanti la porta de scola col Suv, o forsi i poderà ma ghe tocherà studar el motor per sparagnar benzina intanto che el fio smonta. Lei che la xe sindaco no la pol permeter disgrazie simili!

Xe sporco per tuto, cossa no la vedi, la se pensi che giusto ieri go butà in graia in giardin de via orlandini el mio vecio stramazo, ben, ogi el xe ancora là e nissun ga netado! Anca le botilie rote, bicieri, carte, pacheti de sigarete che i nostri fioi buta per tera, i scovazzini stenta a ingrumar. Cossa i pensa, che ghe disemo a fioi de no butar?? Cossa i xe mati, miga i volerà che li traumatizemo coi divieti che dopo ghe vien i complessi, no?

L’autobus, sior sindaco, i’autobus! La se pensi che una volta go spetado la dicianove sei, digo sei minuti e sula tabela iera scrito che la saria rivada fra zinque minuti. Cossa xe serietà questa? La vardi che i triestini paga el bilieto la sa? Bon, magari no tuti, ma se no i paga sarà sicuro un bon motivo. La fazi qualcossa, che i triestini xe stufi e la ghe disi ai autisti che i vadi pian che se no se scassemo tuti, ma no tropo pian che gavemo anca furia e che i studi i condizionatori che ne fa malar, che i tegni i finstrini seradi che se no fa giro de aria, ma che no sia caldo, no semo miga bestie!

La devi studar i rumori. No devi esser rumori, che dà fastidio. Qua la gente ga de riposar, ga de star in pase inveze ghe toca sentir musiche, muleria che ciacola, motorini che sfrecia, perfin gente che lavora che no se pol più de lori, cossa proprio qua i ga de lavorar??? Però no devi gnanca esser una zità morta la sa? Ghe vol manifestazioni, feste che vegni i turisti, no che sia un deserto zà ale undise de sera. Insoma, far feste ma in zito e far parchegi soto tera, ma senza scavar, e che i sia gratis.

Roba più importante: lei no la devi far gnente se prima no la ghe ga domandado ai triestini. La vol spostar monumenti, far ponti, cambiar una piaza, meter novi lampioni, asfaltar un marciapie, bever un bicier de bianco, spostar un cassonetto? La ghe devi ben pulito domandar ogni volta, spiegarghe ben, mostrarghe el pupolo – disegnar un bicier de bianco no xe dificile – e sentir se ghe va ben.

Se ghe andarà ben, ma devi esser dacordo tuti e co digo tuti intendo tuti, alora forsi la poderà far, ma lo stesso mi speteria ancora un poco perché magari dopo un sie mesi vien fora qualchidun che no ghe ndava ben ma che no gaveva dito perché quel giorno che iera de dir el scriveva ale Segnalazioni per via che el late che vendi siora Jole soto casa costa 2 centesimi più che ala Pam e che no el comprerà più de siora Jole e comunque in Friul costa de meno per no parlar dela Jugo. Bon, insoma, la me scolti a mi, no la stia far gnente, ma anche per no far gnente la ghe domandi ai triestini se ghe va ben che no la fazi gnente e, sopratuto, la ghe mostri el pupolo.

Eco, mi calcolo se le farà come che i triestini vol e che mi ghe go riasunto, la gente finirà de lamentarse. Ma dopo i se lamenteria perchè no i ga più de cossa lamentarse e che xe colpa sua de lei, sior sindaco, che la ghe ga cavado i motivi per lamentarse e che se stava meio prima.

E qua no so più cossa dirghe, la devi veder lei, la sarà pur sindaco per qualcossa, no?

Cordialmente.